Timoteo yɛ aberante a na n’ani gye ho sɛ ɔbɛboa nkurɔfo. Otuu kwan kɔɔ nkurow pii mu kɔboaa afoforo. Eyi maa n’ani gyei paa wɔ n’asetena mu. So wopɛ sɛ wote ne ho asɛm?—

Timoteo nyinii wɔ kurow bi a wɔfrɛ no Listra mu. Bere a ɔyɛ abofra no, ne nanabea Lois ne ne maame Eunike fii ase kyerɛkyerɛɛ no Yehowa ho ade. Bere a Timoteo nyinii no, na ɔpɛ sɛ ɔboa afoforo ma wosua Yehowa ho ade.

Bere a na Timoteo da so ara yɛ aberante no, Paulo ka kyerɛɛ no sɛ ɔnka ne ho ma wɔnkɔka asɛm no wɔ nkurow foforo mu. Timoteo kae sɛ: ‘Yoo, mɛkɔ!’ Ntɛm ara na ɔne no kɔe kɔboaa afoforo.

 Timoteo ne Paulo tuu kwan kɔɔ Makedonia kurow bi a wɔfrɛ no Tesalonika mu. Sɛ na wobetumi akɔ hɔ a, na ɛsɛ sɛ wɔnantew twa kwantenten, na wɔsan tena hyɛmma mu. Bere a woduu hɔ no, wɔboaa nnipa pii ma wosuaa Yehowa ho ade. Nanso, nnipa binom bo fuw wɔn, na na wɔpɛ sɛ wopira wɔn. Enti, Paulo ne Timoteo fii hɔ kɔkaa asɛm no wɔ baabi foforo.

Asram bi akyi no, Paulo ka kyerɛɛ Timoteo sɛ ɔnsan nkɔ Tesalonika nkɔhwɛ sɛnea anuanom ho te. Ná ehia sɛ onya akokoduru paa ansa na watumi asan akɔ kurow a emu yɛ hu saa no mu! Nanso, Timoteo kɔe, efisɛ na odwen anuanom a wɔwɔ hɔ no ho. Bere a ofii hɔ bae no, ɔbɛkaa asɛm a ɛyɛ anigye kyerɛɛ Paulo. Ná anuanom a wɔwɔ Tesalonika no ho ye paa!

Timoteo ne Paulo boom yɛɛ adwuma mfe pii. Bere bi, Paulo kyerɛwee sɛ, Timoteo paa ne onipa a obetumi asoma no ma wakɔboa asafo ahorow no. Ná Timoteo dɔ Yehowa, na na ɔdɔ nnipa nso.

So wodɔ nnipa, na wopɛ sɛ woboa wɔn ma wosua Yehowa ho ade?— Sɛ woyɛ saa a, w’ani betumi agye paa wɔ w’asetena mu te sɛ Timoteo!