Bible mu no, Hebri adeyɛ asɛm na·vaʼʹ na wɔkyerɛ ase “hyɛ nkɔm.” Nea ɛkyerɛ paa ne sɛ obi reka asɛm, atemmusɛm, anaa ahyɛde bi a efi Onyankopɔn hɔ. Ebetumi nso akyerɛ sɛ obi rekyerɛkyerɛ Onyankopɔn Asɛm anaa ɔreka biribi a Onyankopɔn aka sɛ ebesi daakye ho asɛm. Saa nsɛm yi nyinaa bi wɔ Hesekiel nkɔmhyɛ no mu, na ne nyinaa fi Onyankopɔn hɔ.—Hes. 3:10, 11; 11:4-8; 14:6, 7; 37:9, 10; 38:1-4.

• ANISOADEHU

• MFATOHO

• ƆYƐKYERƐ

Nkɔmhyɛ a ɛwɔ Hesekiel nhoma no mu no, ebi yɛ anisoadehu, mfatoho, abebusɛm, ne nsɛm a ebesisi ho ɔyɛkyerɛ ahorow.

NKƆMHYƐ NO MMAMU

Ɛtɔ da a, Hesekiel nkɔmhyɛ no mmamu boro baako. Sɛ nhwɛso no, nokware som a wɔbɛma so bio ho nkɔmhyɛ no baa mu kakra bere a Onyankopɔn nkurɔfo san kɔɔ Bɔhyɛ Asaase no so no. Nanso, nhoma yi Ti 9 no bɛma yɛahu sɛ nokware som a wɔbɛma so bio ho nkɔmhyɛ no anya mmamu nnɛ, na ɛbɛsan anya mmamu daakye nso.

Bere bi a atwam no, yɛkaa sɛ nsɛm bi a ɛwɔ Hesekiel nkɔmhyɛ mu no gyina hɔ ma biribi kɛse a ɛbɛba daakye. Nanso nhoma yi mu de, yɛrenyɛ saa. Yɛrenka sɛ onipa bi, biribi, beae bi, anaa asɛm bi a esii gyina hɔ ma biribi kɛse a ebesi nnɛ, gye sɛ yɛwɔ adanse pefee wɔ Kyerɛwnsɛm mu a yebetumi agyina so aka saa. a Mmom no, yɛbɛhwɛ sɛnea Hesekiel nkɔmhyɛ no mu pii bɛba mu daakye. Yɛbɛsan ahwɛ nea yebetumi asua afi Hesekiel nkɔmhyɛ no mu, ne nea yebetumi asua afi nnipa, mmeae, ne nsɛm a esisii a ɔkaa ho asɛm no mu.