NKYERƐKYERƐMU A ƐWƆ ADAKA 19B MU
Nsu a Ɛresen Nkakrankakra No Yiri Bɛyɛɛ Asubɔnten!
Hesekiel hui sɛ nsu bi resen fi Yehowa kronkronbea hɔ. Bere a nsu no pue fii hɔ no, na ɛresen nkakrankakra, nanso ɛkɔɔ n’anim bɛyɛ kwansin baako no, na ayiri adan asubɔnten a emu dɔ! Afei, Hesekiel hui sɛ nnua kusuu sisi asubɔnten no ho. Saa nnua no ma aduan, na ɛsa yare. Dɛn na wei nyinaa kyerɛ?
Asubɔnten No De Nhyira Na Ɛnam
TETE: Bere a Yehowa nkurɔfo no san baa wɔn kurom na wɔsan fii ase som no nokwarem wɔ asɔrefi hɔ no, wonyaa nhyira
ƐNNƐ: Afe 1919 no, wɔmaa nokware som so bio. Abue kwan ama Onyankopɔn asomfo anokwafo anya honhom fam nhyira pii. Nhyira a yenya no, ɛso bi mmae da
DAAKYE: Armagedon akyi no, nhyira a Yehowa de bɛma yɛn no bɛyɛ honam fam de ne honhom fam de
Nsu a Ɛma Nkwa
TETE: Yehowa hyiraa ne nkurɔfo a wɔyɛɛ osetie no ma wotumi som no wɔ ɔkwan a ɛsɔ n’ani so. Bere a wɔn dodow kɔɔ anim mpo no, ne nhyira soo wɔn nyinaa so
ƐNNƐ: Honhom fam paradise a emu retrɛw no, ba ara na nnipa reba mu, na Yehowa nhyira mu atrɛw ma ɛso wɔn nyinaa so. Enti yɛn nyinaa tumi som Yehowa wɔ ɔkwan a ɛsɔ n’ani so
DAAKYE: Wɔn a wobetwa Armagedon no, wobenyan nnipa ɔpepem pii abɛka wɔn ho, na Yehowa nhyira bɛso wɔn nyinaa so
Nnua a Ɛma Nnipa Aduan Na Ɛsa Wɔn Yare
TETE: Bere a Yehowa asomfo anokwafo san kɔɔ wɔn asaase so no, Yehowa maa wɔn honhom fam aduan. Afei nso, na wɔayare wɔ honhom fam mfe pii, enti Yehowa saa wɔn yare
ƐNNƐ: Ɛnnɛ, Yehowa rema ne nkurɔfo honhom fam aduan pii, na ɛboa wɔn ma wɔde wɔn ho fi honhom fam kɔm ne honhom fam yare a abu so wɔ wiase no ho
DAAKYE: Kristo ne 144,000 a wɔne no bedi ade no bɛboa nnipa a wotie Onyankopɔn asɛm nyinaa ama wɔayɛ pɛ, na wɔanya apɔwmuden daa!
