Sɛ wobɛyɛ Onyankopɔn adamfo a, ɛho hia sɛ wusua ne ho ade. So wo nnamfo nim wo din na wɔde frɛ wo? Wonim. Onyankopɔn pɛ sɛ wuhu ne din na wode frɛ no nso. Onyankopɔn din de Yehowa. (Dwom 83:18; Mateo 6:9) Ɛsɛ sɛ wuhu nea ɔpɛ ne nea ɔmpɛ nso. Ɛho hia sɛ wuhu ne nnamfo ne n’atamfo. Egye bere na woatumi ahu obi. Bible ka sɛ nyansa wom sɛ wubeyi bere asi hɔ de asua Yehowa ho ade.—Efesofo 5:15, 16.

Onyankopɔn nnamfo yɛ nea ɛsɔ n’ani. Susuw wo nnamfo ho hwɛ. Sɛ wo ne wɔn di wɔ ɔkwammɔne so na woyɛ nneɛma a wɔmpɛ a, so wobɛkɔ so ayɛ wɔn nnamfo? Dabida! Saa ara nso na sɛ wopɛ sɛ woyɛ Onyankopɔn adamfo a, ehia sɛ woyɛ nea ɛsɔ n’ani.—Yohane 4:24.

Ɛnyɛ ɔsom nyinaa na ɛma obi tumi fa Onyankopɔn adamfo. Yesu a ɔne Onyankopɔn adamfo paa no ka akwan abien ho asɛm. Ɔkwan no biako trɛw na nnipa ayɛ so ma. Saa kwan no kɔ ɔsɛe mu. Ɔkwan a ɛka ho no sua na nnipa kakraa bi na wɔnam so. Saa kwan no kɔ daa nkwa mu. Eyi kyerɛ sɛ sɛ wopɛ sɛ wofa Onyankopɔn adamfo a, ɛsɛ sɛ wuhu ɔkwan a ɛteɛ a wɔfa so som no.—Mateo 7:13, 14.