Adamfofa gyina ɔdɔ so. Bere a wusua Yehowa ho ade pii no, wobɛdɔ no pii. Bere a ɔdɔ a wowɔ ma Onyankopɔn yɛ kɛse no, ɔpɛ a wowɔ sɛ wobɛsom no no nso bɛyɛ kɛse. Eyi bɛka wo ma woabɛyɛ Yesu Kristo suani. (Mateo 28:19) Sɛ wobɛka Yehowa Adansefo abusua a wɔwɔ anigye no ho a, wubetumi ne Onyankopɔn ayɛ adamfo daa. Dɛn na ɛsɛ sɛ woyɛ?

Ɛsɛ sɛ wudi Onyankopɔn mmara ahorow so de da ɔdɔ a wowɔ ma no no adi. “Na eyi ne nea Onyankopɔn dɔ kyerɛ, sɛ yebedi n’ahyɛde so, na n’ahyɛde nyɛ den.”—1 Yohane 5:3.

Fa nea wusua no di dwuma. Yesu kaa asɛm bi a ɛkyerɛkyerɛ eyi mu. Onyansafo bi sii ne fie wɔ ɔbotan so. Ɔkwasea bi sii ne fie wɔ anhwea mu. Bere a ahum kɛse bi tui no, ofie a wosii wɔ ɔbotan so no ammu, nanso ofie a wosii wɔ anhwea mu no bui ma n’asehwe no yɛɛ kɛse. Yesu kae sɛ wɔn a wɔte ne nkyerɛkyerɛ na wodi so no te sɛ onyansafo a osii ne fie wɔ ɔbotan so no. Nanso wɔn a wotie ne nkyerɛkyerɛ na wonni so no te sɛ ɔkwasea a osii ne fie wɔ anhwea so no. Wɔn mu hena na wopɛ sɛ woyɛ?—Mateo 7:24-27.

 Ahosohyira. Eyi kyerɛ sɛ wobɛbɔ Yehowa mpae na woaka akyerɛ no sɛ wopɛ sɛ woyɛ n’apɛde daa. Onyankopɔn apɛde a woyɛ no kyerɛ sɛ woyɛ Yesu Kristo suani.—Mateo 11:29.

Asubɔ. “Ma wɔmmɔ wo asu na bɔ ne din ma ɛnhohoro wo bɔne.”—Asomafo no Nnwuma 22:16.

Fa wo koma nyinaa som Onyankopɔn. “Biribiara a moreyɛ no, mumfi ɔkra nyinaa mu nyɛ no sɛ moyɛ ma Yehowa na ɛnyɛ nnipa.”—Kolosefo 3:23.