Satan ne n’adaemone mpɛ sɛ wosom Onyankopɔn. Wɔpɛ sɛ wɔdan obiara fi Onyankopɔn ho, sɛ wobetumi a. Ɔkwan bɛn so na wɔfa bɔ mmɔden sɛ wɔbɛyɛ saa? Ɔkwan baako a wɔfa so ne atoro som. (2 Korintofo 11:13-15) Sɛ ɔsom bi nkyerɛkyerɛ nokware a efi Bible mu a, na ɛyɛ atoro som. Atoro som te sɛ sika bɔne—ebetumi ayɛ te sɛ sika pa ankasa de, nanso mfaso nni so. Ebetumi de ɔhaw pii abrɛ wo.

Ɔsom mu atosɛm rentumi nsɔ Yehowa, nokware Nyankopɔn no ani da. Bere a na Yesu wɔ asase so no, na nyamesom kuw bi wɔ hɔ a wɔpɛ sɛ wokum no. Wosusuwii sɛ ɔkwan a na wɔfa so som no teɛ. Wɔkae sɛ: “Yɛwɔ Agya biako, Onyankopɔn.” So Yesu gye toom? Dabi! Ɔka kyerɛɛ wɔn sɛ: “Mufi mo agya Ɔbonsam hɔ.” (Yohane 8:41, 44) Ɛnnɛ nnipa pii susuw sɛ wɔresom Onyankopɔn, nanso wɔresom Satan ne n’adaemone ankasa!—1 Korintofo 10:20.

 Sɛnea dua a ɛyare sow aba bɔne no, saa ara na atoro som nso ma yenya nnipa a wɔyɛ nneɛma bɔne. Ɔhaw ahyɛ wiase ma esiane nneɛma bɔne a nkurɔfo yɛ nti. Ɔbrasɛe, akodi, korɔnbɔ, nhyɛso, awudi, ne mmonnaato rekɔ so wom. Wɔn a wɔyɛ nneɛma bɔne yi mu pii wɔ asɔre a wɔkɔ, nanso wɔn som no nkanyan wɔn mma wɔnyɛ nea ɛteɛ. Sɛ wɔannyae nneɛma bɔne yɛ a, wontumi nyɛ Onyankopɔn nnamfo.—Mateo 7:17, 18.

Atoro som kyerɛkyerɛ nkurɔfo sɛ wɔmmɔ ahoni mpae. Onyankopɔn se yɛmmmɔ ahoni mpae. Ntease wom. Sɛ obi ne wo nkasae da na mmom ɔkasa kyerɛ wo mfonini nkutoo a, so w’ani begye ho? So saa onipa no betumi ayɛ w’adamfo ankasa? Dabi, ontumi. Yehowa pɛ sɛ nkurɔfo ne no kasa, na ɛnyɛ ohoni anaasɛ mfonini a nkwa nnim.—Exodus 20:4, 5.

Atoro som kyerɛkyerɛ sɛ ɛteɛ sɛ wokunkum afoforo wɔ ɔko mu. Yesu kae sɛ Onyankopɔn nnamfo bɛdodɔ wɔn ho. Yenkum nnipa a yɛdɔ wɔn. (Yohane 13:35) Ɛnteɛ mpo sɛ yebekum nnipa abɔnefo. Bere a Yesu atamfo bae sɛ wɔbɛkyere no no, wamma n’asuafo no anko ammɔ ne ho ban.—Mateo 26:51, 52.

Atoro som kyerɛkyerɛ sɛ abɔnefo behu amane wɔ hellgya mu. Nanso, Bible kyerɛkyerɛ sɛ bɔne de owu na ɛba. (Romafo 6:23) Yehowa yɛ ɔdɔ Nyankopɔn. So ɔdɔ Nyankopɔn bɛyɛ nnipa ayayade daa? Dabida! Ɔsom biako pɛ na ɛbɛtra Paradise, nea ɛsɔ Yehowa ani no. (Adiyisɛm 15:4) Ɔsom a egyina Satan atosɛm so nyinaa befi hɔ.