Frankaakyia. Yehowa Adansefo gye di sɛ frankaa a wobɛbɔ wo mu ase ama no anaa wubekyia no yɛ ɔsom mu adeyɛ a mpɛn pii no wɔde ɔman dwom ka ho. Na nea adeyɛ yi kyerɛ ankasa ne sɛ ɔman no anaa akannifo no na nkwagye fi wɔn na ɛnyɛ Onyankopɔn. (Yesaia 43:11; 1 Korintofo 10:14; 1 Yohane 5:21) Akannifo yi mu bi ne tete Babilon hene Nebukadnesar. Nea ɛbɛyɛ na ne manfo ahu ne tumi ne mmɔden a ɔbɔ wɔ ɔsom mu no, saa ɔhempɔn tumfoɔ yi de ohoni kɛse bi sii hɔ na ɔka kyerɛɛ ne manfo sɛ, sɛ wɔbɔ dwom—te sɛ ɔman dwom bi—a, wɔnkotow ohoni no. Ná Hebrifo mmiɛnsa a wɔfrɛ wɔn Sadrak, Mesak, ne Abed-Nego no nim sɛ wɔankotow ohoni no a, wobetumi akum wɔn, nanso wɔanyɛ.—Daniel, ti 3.

Yɛn mmere yi mu no, Abakɔsɛm kyerɛwfo Carlton Hayes kyerɛwee sɛ, “ɔmampɛ agyiraehyɛde titiriw a egyina hɔ ma wɔn gyidi ne ɔsom mu ade titiriw ne frankaa. Sɛ wɔde frankaa no retwam a, mmarima tu wɔn kyɛw, anwensɛm akyerɛwfo ka nsɛm, na mmofra nso to nnwom de yi frankaa no ayɛ.” Ɔde kaa ho sɛ ɔmampɛ abɛyɛ ɔsom a ɛwɔ “nna kronkron” te sɛ July 4 wɔ United States, na ɛwɔ “ahotefo ne nnɔmmarima” ne “asɔrefie ahorow.” Ɔsraani panyin bi kae wɔ guabɔ bi ase wɔ Brazil sɛ: “Wɔde nidi ma frankaa na wɔsom no . . . te sɛ nea wɔsom Nananom asase no.” Yiw, “frankaa no yɛ kronkron te sɛ mmeamudua,” sɛnea The Encyclopedia Americana kae mmere bi no.

 Nnansa yi ara nhoma a yɛaka ho asɛm no kae sɛ ɔman nnwom “da ɔmampɛ honhom adi, na mpɛn pii no emu nsɛm yɛ adesrɛ a wɔde to Onyankopɔn anim de hwehwɛ n’akwankyerɛ ne ahobammɔ ma ɔman no anaa wɔn akannifo.” Enti sɛ Yehowa nkoa ka sɛ frankaakyia ne ɔman nnwom fa ɔsom ho a, wonim nea wɔreka. Bere a nhoma The American Character rekyerɛ nea enti a Yehowa Adansefo mmofra nkyia frankaa anaa wɔnka ɔman ntam wɔ U.S. sukuu ahorow mu no, ɛkae sɛ: “Afei Asɛnnibea Kunini no ankasa agye atom wɔ asɛnni mu sɛ saa amanne a wɔyɛ no daa yi yɛ ɔsom mu adeyɛ.”

Ɛwom sɛ Yehowa nkurɔfo mfa wɔn ho nhyɛ amanne biara a ɛne Kyerɛwnsɛm no nhyia mu deɛ, nanso wɔkyerɛ obu ma hokwan a afoforo wɔ sɛ wɔyɛ saa no. Afei nso wɔkyerɛ obu ma ɔman frankaa no sɛ sɛnkyerɛnne na wobu aban a wɔde asi hɔ no sɛ “atumfoɔ a wɔkorɔn” a wogyina hɔ sɛ “Onyankopɔn somfo.” (Romafo 13:1-4) Enti Yehowa Adansefo tie afotu a ɛne sɛ wɔmmɔ mpae mma “ahene ne wɔn a wɔwɔ dibea a ɛkorɔn nyinaa” no. Yɛn atirimpɔw ne sɛ “ɛno bɛma yɛde asomdwoe ne kommyɛ abɔ yɛn bra wɔ onyamesom pa ne anidahɔ a edi mũ mu.”—1 Timoteo 2:2.

Abatow. Nokware Kristofo bu hokwan a afoforo wɔ sɛ wɔtow aba no. Wɔnsɔre ntia abatow anaa atumfoɔ a wɔtow aba yi wɔn no. Nanso wonni ɔfã biara wɔ amammui nhyehyɛe a ɛwɔ ɔman bi mu no mu. (Mateo 22:21; 1 Petro 3:16) Na sɛ wɔhyɛ nnipa sɛ wɔntow aba wɔ ɔman bi mu anaa wɔhaw wɔn a wɔnkɔ beae a wɔtow aba no a, dɛn na Kristoni bɛyɛ? Esiane sɛ Sadrak, Mesak, ne Abed-Nego kɔɔ Dura asasetaw so tɔnn nti, ebia Kristoni bi a ɔwɔ saa tebea no mu ahonim bɛma no kwan ama wakɔ beae a wɔtow aba no. Nanso ɔbɛhwɛ yiye na wanyɛ biribiara a ɛbɛkyerɛ sɛ ɔwɔ ɔfã bi. Ɛsɛ sɛ osusuw nnyinasosɛm nsia a edidi so yi ho:

1. Yesu akyidifo ‘nyɛ wiase no fã.’—Yohane 15:19.

2. Kristofo yɛ Kristo ne n’Ahenni no ananmusifo.—Yohane 18:36; 2 Korintofo 5:20.

3.   Kristofo asafo no kura gyidi baako, na ɔdɔ a ɛte sɛ Kristo de no bi na ɛka emufo nyinaa bom.—1 Korintofo 1:10; Kolosefo 3:14.

4. Wɔn a wɔtow aba paw ɔpanyin bi no wɔ asodi wɔ nea ɔyɛ ho.—Hwɛ nnyinasosɛm a ɛwɔ 1 Samuel 8:5, 10-18 ne 1 Timoteo 5:22 no.

5. Bere a Israelfo pɛe sɛ wonya onipa sɛ sodifo no, Yehowa buu no sɛ wɔapo no.—1 Samuel 8:7.

6. Ɛsɛ sɛ Kristofo tumi de ahotoso ka Onyankopɔn Ahenni nniso ho asɛm kyerɛ nnipa a wɔdɔm amanyɔkuw ahorow nyinaa.—Mateo 24:14; 28:19, 20; Hebrifo 10:35.

Adwuma a ɛmfa sraadi ho. Aman bi so no, ɔman no hwehwɛ sɛ wɔn a wɔmpɛ sɛ wɔkɔ sraadi no yɛ adwuma bi a ɛmfa sraadi ho tee kosi bere bi. Sɛ yehyia tebea a ɛte saa a, ɛsɛ sɛ yɛbɔ ho mpae, anaasɛ yɛne yɛn yɔnko Kristoni a ne ho akokwaw susuw ho, na yegyina nea yɛasua afa asɛm no ho so de yɛn ahonim si gyinae.—Mmebusɛm 2:1-5; Filipifo 4:5.

Onyankopɔn Asɛm ka kyerɛ yɛn sɛ ‘yɛnyɛ osetie mma nniso ne tumi horow, na yensiesie yɛn ho mma adwuma pa biara, nyɛ nnipa a wɔte asɛm ase.’ (Tito 3:1, 2) Bere a eyi wɔ yɛn adwenem no, yebetumi abisa yɛn ho nsɛm a edidi so yi: ‘So adwuma a ɛmfa sraadi ho a mɛpene so ayɛ no bɛma makogyina ɔfã bi wɔ amanyɔsɛm mu anaa ɛbɛma mede me ho akɔhyɛ atorosom mu?’ (Mika 4:3, 5; 2 Korintofo 6:16, 17) ‘So adwuma yi a mɛyɛ no bɛma ayɛ den ama me sɛ medi Kristofo asɛyɛde ahorow ho dwuma anaa ebesiw me kwan mpo?’ (Mateo 28:19, 20; Efesofo 6:4; Hebrifo 10:24, 25) ‘Ɔkwan foforo so no, so me ho a mede bɛhyɛ adwuma a ɛte saa mu no bɛma manya kwan atrɛw me som adwuma mu, na mpo ebia mede me ho ahyɛ bere nyinaa som adwuma no mu?’—Hebrifo 6:11, 12.

Sɛ Kristoni bi ahonim ma no kwan sɛ obetumi ayɛ adwuma a ɛmfa sraadi ho mmom sen sɛ ɔbɛkɔ afiase a, ɛsɛ sɛ Kristofo a aka no kyerɛ obu ma ne gyinaesi no. (Romafo 14: 10) Saa ara na sɛ ɔte nka sɛ ɔrentumi nyɛ adwuma a ɛte saa a, ɛsɛ sɛ afoforo kyerɛ obu ma saa gyinaesi no nso.—1 Korintofo 10:29; 2 Korintofo 1:24.