1, 2. (a) Sɛ ebinom ware foforo a, dɛn na ɛtɔ da a yebisa yɛn ho, na dɛn ntia? (b) Nsɛmmisa bɛn na yebesusuw ho wɔ ti yi mu?

SO WOTAA kɔ ayeforohyia ase? Nnipa pii taa kɔ, efisɛ ɛyɛ anigye bere. Wuhu sɛ awarefo no ho ayɛ fɛ. Na sɛ wohwɛ wɔn anim a, wuhu sɛ wɔn ani agye! Saa da no deɛ, ɔserew nkutoo, na ɛte sɛ nea biribiara bɛkɔ yiye ama wɔn daakye.

² Nanso, ɛsɛ sɛ yegye tom sɛ ɛnnɛ aware pii agyigya. Sɛ nnipa mmienu ware a, yɛbɔ mpae sɛ biribiara bɛkɔ yiye, nanso ɛtɔ da bi a yebisa sɛ: ‘So anigye bɛkɔ so atena aware yi mu? So ebegyina?’ Sɛ yebetumi abua nsɛm yi a, gye sɛ yehu sɛ okunu ne ɔyere no de wɔn ho to Onyankopɔn afotu a ɛfa aware ho no so na wɔde bɔ wɔn bra. (Kenkan Mmebusɛm 3:5, 6.) Ɛsɛ sɛ wɔyɛ saa na wɔakɔ so atena Onyankopɔn dɔ mu. Afei momma yɛnhwɛ nsɛmmisa nnan yi ne mmuae a Bible de ma: Dɛn nti na ɛsɛ sɛ woware? Sɛ wopɛ sɛ woware a, hena na wobɛware no? Wobɛyɛ dɛn asiesie wo ho ama aware? Na dɛn na ɛbɛboa awarefo ama wɔn aware asɔ daa?

3. Dɛn nti na nyansa nnim sɛ yɛbɛware kɛkɛ?

³ Ebinom gye di sɛ ade baako a ɛma nnipa ani gye ne aware—kyerɛ sɛ obi ntumi nnya anigye ne abotɔyam gye  sɛ wanya ɔhokafo. Ɛnyɛ nokware koraa! Yesu a na ɔyɛ osigyani no kae sɛ sigyadi yɛ akyɛde na ɔkae sɛ wɔn a wobetumi adi sigya no nyɛ saa. (Mateo 19:11, 12) Ɔsomafo Paulo nso kae sɛ mfaso pii wɔ sigyadi so. (1 Korintofo 7:32-38) Nanso Yesu anaa Paulo anhyɛ mmara katee biara wɔ ho; nokwarem no, sɛ obi bara aware a, na ɔrekyerɛkyerɛ “adaemone nkyerɛkyerɛ.” (1 Timoteo 4:1-3) Ne nyinaa akyi no, sɛ obi pɛ sɛ ɔsom Yehowa a hwee ntwetwe n’adwene a, sigyadi betumi aboa no. Enti nyansa nnim sɛ yɛbɛware kɛkɛ, ebia esiane sɛ yɛn mfɛfo nyinaa rewareware nti.

4. Ɔkwan bɛn so na aware pa boa wɔ mmofra ntetee mu?

⁴ Ɛnde so ntease pa bi wɔ hɔ a obi betumi agyina so aware? Yiw. Ɛsɛ sɛ yɛkae sɛ aware yɛ akyɛde a efi ɔdɔ Nyankopɔn no hɔ. (Kenkan Genesis 2:18.) Enti mfaso wɔ so na ebetumi ama yɛanya anigye. Sɛ nhwɛso no, sɛ wopɛ sɛ wokyekye abusua a, ɛsɛ sɛ wunya aware pa. Mmofra hia agya ne ɛna a wɔbɛtete wɔn, wɔbɛdɔ wɔn, wɔbɛteɛ wɔn so na wɔama wɔn akwankyerɛ. (Dwom 127:3; Efesofo 6:1-4) Nanso ɛnyɛ abawo nkutoo nti na wɔhyehyɛɛ aware.

5, 6. (a) Sɛnea Ɔsɛnkafo 4:9-12 kyerɛ no, mfaso bɛn na ɛwɔ adamfofa so? (b) Ɔkwan bɛn so na aware betumi ayɛ sɛ hama a ɛbɔ ho mmiɛnsa?

⁵ Susuw kyerɛwsɛm a ti yi gyina so ne ɛho nsɛm afoforo ho hwɛ: “Baanu ye sen obiakofo, efisɛ wonya wɔn brɛ so akatua pa. Sɛ obiako hwe ase a, nea ɔka ne ho no bɛma no so. Na obiakofo a ɔhwe ase a obi mma no so no, ebesi no dɛn? Bio nso, sɛ baanu da a, wɔn ho bɛyɛ wɔn hyew; na obiakofo de, ɛbɛyɛ dɛn na ne ho ayɛ no hyew? Sɛ obi betumi adi obiakofo so a, nnipa baanu de, wobetumi ne no asi anim. Na hama a ɛbɔ ho abiɛsa no, emu rentew ntɛm.”—Ɔsɛnkafo 4:9-12.

 ⁶ Bible mu asɛm yi kyerɛ mfaso a ɛwɔ adamfofa so. Na sɛnea yenim no, aware yɛ adamfofa a emu yɛ den. Sɛnea kyerɛwsɛm yi kyerɛ no, adamfofa a ɛte saa betumi ama yɛanya mmoa, awerɛkyekye, ne ahobammɔ. Nanso sɛ aware bi mu bɛyɛ den a, ɛnsɛ sɛ ɛyɛ nnipa mmienu ntam abusuabɔ ara kwa. Sɛnea kyerɛwsɛm yi kyerɛ no, hama a ɛbɔ ho mmienu betumi atew. Nanso ɛbɛyɛ den sɛ hama a ɛbɔ ho mmiɛnsa anaa nea wɔawɔ no mmɛsa bɛtew. Sɛ okunu ne ɔyere nyinaa ma ɛyɛ wɔn asɛnhia sɛ wɔbɛsɔ Yehowa ani a, wɔn aware no bɛyɛ te sɛ hama a ɛbɔ ho mmiɛnsa. Sɛ ɛba saa a, wɔma Yehowa bɛyɛ aware no fã, enti aware no mu yɛ den paa.

7, 8. (a) Afotusɛm bɛn na Paulo kyerɛw maa Kristofo asigyafo a nna ho akɔnnɔ hyɛ wɔn so no? (b) Aware ho nokwasɛm bɛn na Bible ma yehu?

⁷ Bio nso awarefo nkutoo na mmara ma kwan sɛ wobetumi anya nna mu kyɛfa. Bible ka sɛ awarefo betumi anya nna mu anigye. (Mmebusɛm 5:18) Sɛnea Bible kyerɛ no, sɛ ɔbabun bi “nyɛ abofra bio,” anaasɛ watra bere a n’akɔnnɔ mu yɛ den mpo a, ɛno nkyerɛ sɛ ɔrentumi nnya nna ho akɔnnɔ. Sɛ wantumi anhyɛ ne ho so a, ebia ɔde ne ho bɛhyɛ afide anaa nneyɛe a ɛmfata mu. Enti honhom kaa Paulo ma ɔkyerɛw afotusɛm yi maa asigyafo: “Sɛ wontumi nhyɛ wɔn ho so a, wɔnware, na eye sɛ wɔbɛware sen sɛ akɔnnɔ bɛhyɛ wɔn so.”—1 Korintofo 7:9, 36; Yakobo 1:15.

⁸ Nea obi begyina so aware biara no, ɛsɛ sɛ ohu aware mu nokwasɛm bi. Sɛnea Paulo kae no, wɔn a wɔware no “ho behiahia wɔn ɔhonam mu.” (1 Korintofo 7:28) Nsɛnnennen a awarefo hyia no, asigyafo nhyia bi. Nanso sɛ woyɛ w’adwene sɛ wobɛware a, wobɛyɛ dɛn atew emu haw no so na woama emu nhyira adɔɔso? Ade baako ne sɛ wobɛpaw wo hokafo nyansam.

9, 10. (a) Asɛm bɛn na Paulo ka de kyerɛe sɛ asiane wom sɛ yɛne wɔn a wonnye nni bɛtwe kɔndua koro? (b) Sɛ obi antie Onyankopɔn afotu na ɔware nea onnye nni a, dɛn na ɛtaa ba?

⁹ Honhom kaa Paulo ma ɔkyerɛw asɛm bi too hɔ a ehia sɛ obi a ɔrehwehwɛ okunu anaa ɔyere ma n’ani ku ho: “Mo ne wɔn a wonnye nni nntwe kɔndua koro.” (2 Korintofo 6:14) Ná n’asɛm no yɛ kasakoa a ɛkyerɛ sɛnea wɔde mmoa yɛ adwuma wɔ afuw mu. Sɛ wɔde kɔndua koro to mmoa mmienu a ɛsono wɔn kɛse ne wɔn ahoɔden so a, wɔn nyinaa brɛ. Saa ara na sɛ gyidini ne obi a onnye nni twe aware mu kɔndua koro a, ɛde ateetee ne ahoyeraw na ɛba. Sɛ ɔhokafo baako pɛ sɛ ɔtena Yehowa dɔ mu, na ɔfoforo no ani nnye ho a, wɔn asetenam botae renhyia, na ɛbɛyɛ ahometesɛm. Enti Paulo tu Kristofo fo sɛ wɔnware wɔ “Awurade mu nkutoo.”—1 Korintofo 7:39.

¹⁰ Ɛtɔ da bi a, Kristofo asigyafo binom te nka sɛ ɛbɛyɛ papa sɛ wɔne wɔn a wonnye nni bɛtwe kɔndua koro sen sɛ wɔbɛyɛ ankonam. Enti wobu wɔn ani gu Bible afotu so, na wɔware wɔn a wɔnsom Yehowa. Nanso nea ɛtaa fi mu ba no yɛ awerɛhow. Saafo no ware wɔn a wontumi ne wɔn nsusuw nneɛma a ɛho hia wɔ asetenam ho. Ankonamyɛ a eyi de ba no sen nea na wɔwom ansa na wɔreware no koraa. Nanso nea ɛyɛ anigye ne sɛ Kristofo asigyafo mpempem pii de nokwaredi tie Onyankopɔn afotu na wɔde wɔn ho to so. (Kenkan Dwom 32:8.) Wɔhwɛ kwan sɛ da bi wɔbɛware, nanso wɔkɔ so di sigya kosi sɛ wobenya ɔhokafo a ɔsom Yehowa Nyankopɔn.

11. Dɛn na ɛbɛboa wo ma woapaw ɔhokafo nyansam? (Hwɛ adaka “ Dɛn Na Mehwehwɛ Wɔ Ɔhokafo Ho?”)

¹¹ Nokwarem no, eyi nkyerɛ sɛ Yehowa somfo biara fata sɛ woware no. Enti sɛ woresusuw aware ho a,  hwehwɛ obi a ne suban ne ne honhom fam botae ne wo de hyia, na hwɛ sɛ ɔdɔ Onyankopɔn sɛnea wodɔ no no. Akoa nokwafo ne ɔbadwemma no akyerɛw nsɛm pii afa asɛm yi ho, enti nyansa wom sɛ wode mpaebɔ susuw Kyerɛwnsɛm mu afotu yi ho na woma ɛkyerɛ wo kwan bere a woresi gyinae a anibere wom yi no. *—Kenkan Dwom 119:105.

12. Aware ho amanne bɛn na ɛkɔ so wɔ aman bi so, na nhwɛso bɛn na ɛwɔ Bible mu a ebetumi aboa?

¹² Aman pii so no, wɔn amanne ne sɛ awofo na wɔpaw ɔhokafo ma wɔn ba. Wogye tom wɔ saa aman no so sɛ awofo na wɔwɔ nyansa a emu dɔ ne osuahu a wobetumi de apaw ɔhokafo a ɔfata. Aware a ɛte saa no taa yɛ yiye, sɛnea na ɛte wɔ Bible mmere mu no. Ɛnnɛ, awofo betumi asua biribi afi nhwɛso a Abraham yɛe bere a ɔsomaa n’akoa sɛ ɔnkɔhwehwɛ ɔyere mmrɛ Isak no mu. Ná ɛnyɛ sika anaa dibea na Abraham susuw ho. Mmom ɔbɔɔ mmɔden biara a obetumi sɛ obenya ɔbea a ɔsom Yehowa ama Isak aware. *—Genesis 24:3, 67.

13-15. (a) Ɔkwan bɛn so na nnyinasosɛm a ɛwɔ Mmebusɛm 24:27 no betumi aboa aberante a ɔresusuw aware ho? (b) Dɛn na ababaa betumi ayɛ de asiesie ne ho ama aware?

¹³ Sɛ w’ani abere resusuw aware ho a, ɛnde ɛbɛyɛ papa sɛ wubisa wo ho sɛ, ‘So maso aware ankasa?’ Sɛ nna ho akɔnnɔ wɔ wo mu, worepɛ mma anaa yɔnko, anaasɛ ɛyɛ  wo sɛ wodɔ obi a, ɛno nko ara nkyerɛ sɛ woaso aware. Mmom no, botae pɔtee bi wɔ hɔ a ɛsɛ sɛ ɔbarima anaa ɔbea a ɔpɛ sɛ ɔware susuw ho.

¹⁴ Ɛsɛ sɛ aberante biara a ɔrehwehwɛ ɔyere susuw nnyinasosɛm yi ho yiye: “Siesie w’adwuma wɔ abɔnten, na yɛ w’afuw mu adwuma. Ɛno akyi no, kyekye wo fie nso.” (Mmebusɛm 24:27) Dɛn na eyi kyerɛ? Saa bere no sɛ obi pɛ sɛ ɔware nya abusua a, na ehia sɛ obisa ne ho sɛ, ‘So mayɛ krado sɛ mɛhwɛ ɔbea no ne mmofra a ebia yɛbɛwo wɔn no?’ Ɛsɛ sɛ odi kan yɛ afuw na ɔhwɛ ne nnɔbae. Saa ara nso na ɛte nnɛ. Ehia sɛ ɔbarima a ɔpɛ sɛ ɔware no siesie ne ho ma asɛyɛde a ɛwom no. Mpɛn dodow a ɔwɔ ahoɔden no deɛ, ɛsɛ sɛ ɔyɛ adwuma. Onyankopɔn Asɛm kyerɛ sɛ, sɛ ɔbarima nhwɛ n’abusua wɔ honam mu, nkate mu ne honhom mu a, ɔyɛ onipa bɔne sen nea onnye nni!—Kenkan 1 Timoteo 5:8.

¹⁵ Sɛ ababaa bi nso si gyinae sɛ ɔbɛware a, ɛkyerɛ sɛ wagye atom sɛ asɛyɛde a emu yɛ duru na ɛde bɛto ne so. Bible ma yehu nimdeɛ ne su ahorow a ɔyere behia na watumi aboa ne kunu na wahwɛ ne fie. (Mmebusɛm 31:10-31) Sɛ mmarima anaa mmea bi pere wɔn ho ware bere a wonsiesiee wɔn ho sɛ wobedi asɛyɛde a ɛwɔ aware mu no ho dwuma a, na wɔyɛ pɛsɛmenkominya, na wonnwen nea wobetumi ayɛ de aboa wɔn hokafo ho. Nanso nea ɛho hia sen biara ne sɛ wɔn a wɔresusuw aware ho no besiesie wɔn ho sɛ wɔde Onyankopɔn asɛm bɛhyehyɛ wɔn aware no.

16, 17. Kyerɛwnsɛm mu nnyinasosɛm bɛn na ɛsɛ sɛ wɔn a wɔresiesie wɔn ho ama aware no susuw ho?

¹⁶ Sɛ obi resiesie ne ho ama aware a, ɛsɛ sɛ osusuw asɛyɛde a Onyankopɔn de ama okunu ne ɔyere no ho. Ehia sɛ ɔbarima hu nea ti a ɔbɛyɛ wɔ Kristofo  fie no kyerɛ. Eyi nkyerɛ sɛ ɔbɛyɛ katee. Mmom ɛsɛ sɛ osuasua sɛnea Yesu daa ne tiyɛ adi no. (Efesofo 5:23) Saa ara na ehia sɛ Kristoni ɔbea te ɔyere asɛyɛde a nidi wom no ase. So ɔbɛbrɛ ne ho ase ahyɛ ne ‘kunu mmara’ ase? (Romafo 7:2) Ampa ɔhyɛ Yehowa ne Kristo mmara ase dedaw. (Galatifo 6:2) Nanso tumi a ne kunu di wɔ fie hɔ nso yɛ mmara foforo. So obetumi abrɛ ne ho ase ahyɛ ɔbarima a ɔnyɛ pɛ no tumidi ase na waboa no? Sɛ ɛyɛ den ma no sɛ ɔbɛyɛ saa a, ɛnde ɛnsɛ sɛ ɔware koraa.

¹⁷ Bio nso, ɛsɛ sɛ awarefo no mu biara yɛ krado sɛ ɔbɛyɛ nea ne hokafo hia ama no. (Kenkan Filipifo 2:4.) Paulo kyerɛwee sɛ: “Sɛ́ ankorankoro no, mo mu biara nnɔ ne yere sɛ ne ho; na ɔyere de, onnya obu kɛse mma ne kunu.” Onyankopɔn honhom maa Paulo hui sɛ ehia sɛ ɔbarima te nka sɛ ne yere wɔ obu a emu dɔ ma no. Na saa ara na ehia sɛ ɔbea nso te nka sɛ ne kunu dɔ no.—Efesofo 5:21-33.

18. Dɛn nti na ɛsɛ sɛ nnipa mmienu a wɔpɛ sɛ wɔware no di wɔn ho so?

¹⁸ Enti nantew a edi aware anim nyɛ anigye bere kɛkɛ. Ɛyɛ bere a ɛsɛ sɛ ɔbarima ne ɔbea de sua sɛnea wobetumi atena yiye; afei ɛbɛboa wɔn ma wɔahu sɛ ɛfata sɛ wɔware anaa ɛmfata. Ɛyɛ bere a ehia sɛ wodi wɔn ho so! Esiane sɛ wɔdɔ wɔn ho nti, wobetumi anya nkate a ano yɛ den sɛ wobesuso wɔn ho mu; eyi betumi ayɛ sɔhwɛ kɛse. Nanso wɔn a wɔdɔ wɔn ho ampa no bɛhwɛ yiye na wɔn mu biara anyɛ biribi a ɛbɛsɛe ne dɔfo no ne Onyankopɔn ntam. (1 Tesalonikafo 4:6) Enti sɛ wode wo ho ahyɛ nantew a edi aware anim mu a, sua sɛ wubedi wo ho so; na sɛ munya ware anaa moanware mpo a, wubehu sɛ ɛyɛ su a mfaso wɔ so wo nkwa nna nyinaa.

19, 20. Ɔkwan bɛn so na ɛsɛ sɛ adwene a Kristoni wɔ wɔ aware ho no yɛ soronko wɔ wiase no de ho? Kyerɛkyerɛ mu.

¹⁹ Sɛ nnipa mmienu bɛma wɔn aware agyina a, ɛsɛ sɛ wohu nea ahofama kyerɛ. Sɛ wɔka aware ho asɛm wɔ nhoma ne sini mu a, mpɛn pii no wɔma ekowie anigye mu sɛnea nnipa pii hwehwɛ. Nanso nokwasɛm ankasa ne sɛ aware nyɛ awiei; mmom ɛyɛ mfiase ara kwa. Ɛyɛ biribi a Yehowa yɛe sɛ ɛntena hɔ daa no mfiase. (Genesis 2:24) Nanso awerɛhosɛm ne sɛ nnipa pii nhu no saa nnɛ. Wɔ aman bi so no, wɔtaa ka sɛ aware te sɛ “pɔw a wɔbɔ.” Nanso wonnim sɛ saa kasakoa yi kyerɛ sɛnea nnipa dodow no ara hu aware. Dɛn nti na ɛte saa? Asɛm no ne sɛ, sɛ obi bɔ pɔw a, ɛsɛ sɛ etumi gyina kosi bere biara a ɔpɛ, nanso ade baako ne sɛ ɔbɛbɔ pɔw no sɛnea obetumi asan no ntɛm.

²⁰ Ɛnnɛ nnipa pii bu aware sɛ biribi a ɛtena hɔ bere tiaa bi mu. Wɔde wɔn ho hyem ntɛm efisɛ wɔte nka sɛ ɛbɛboa wɔn, nanso sɛ asɛnnennen bi sɔre ara pɛ a, wosusuw sɛ wobetumi agu aware no. Nanso kae sɛnea Bible de hama yɛ mfatoho de kyerɛkyerɛ ade a etumi gyina te sɛ aware no mu no. Fa nsuhyɛn sɛ nhwɛso. Wɔyɛ hama a wɔde suso nsuhyɛn mu wɔ ɔkwan bi so sɛnea ɛbɛkyɛ, na ahum kɛse tu mpo a, entumi ntetew mu. Saa ara na wɔyɛɛ aware sɛ ɛntena hɔ daa. Kae asɛm a Yesu kae yi: “Nea Onyankopɔn aka abom no, mma onipa biara nntetew mu.” (Mateo 19:6) Enti sɛ woware a, ɛsɛ sɛ wunya saa adwene yi wɔ aware ho. So nkabom a ɛte saa ma aware yɛ adesoa? Dabida.

21. Adwene bɛn na ɛsɛ sɛ okunu ne ɔyere nya wɔ wɔn ho wɔn ho, na dɛn na ɛbɛboa wɔn ma wɔayɛ saa?

²¹ Ɛsɛ sɛ okunu ne ɔyere no mu biara nya ne yɔnko ho adwempa. Sɛ wɔn mu biara de n’adwene si ne yɔnko  suban pa ne ne mmɔdenbɔ so a, aware no bɛyɛ anigye na obiara koma bɛtɔ ne yam. Esiane sɛ wo hokafo tɔ sin nti, wususuw sɛ ɛbɛyɛ den sɛ wubenya ne ho adwempa? Yehowa nim yɛn mmerɛwyɛ, nanso yenim sɛ ɔwɔ yɛn ho adwempa. Odwontofo no bisae sɛ: “O Yah, sɛ mfomso na wohwɛ a, O Yehowa, anka hena na obegyina?” (Dwom 130:3) Saa ara na ɛsɛ sɛ okunu ne ɔyere nya wɔn ho wɔn ho adwempa na wɔde wɔn mfomso kyekyɛ wɔn ho wɔn ho.—Kenkan Kolosefo 3:13.

22, 23. Ɔkwan bɛn so na Abraham ne Sara yɛ nhwɛso pa ma awarefo a wɔwɔ hɔ nnɛ?

 ²² Bere a aware rekyɛ no, ebetumi de anigye pii aba. Bible ka Abraham ne Sara aware ho asɛm bere a na wɔn mfe akɔ anim no. Yɛrentumi nka sɛ na ɔhaw anaa asɛnnennen biara nni wɔn asetena mu. Wo deɛ susuw asɛm yi ho hwɛ: Ná Sara adi boro mfe 60, na na ɛsɛ sɛ ogyaw ne fie a ahotɔ wom wɔ Ur kurow a sika wom no hɔ kɔtena ntamadan mu ne nkwa nna a aka nyinaa. Nanso ɔbrɛɛ ne ho ase maa ne kunu, na na ɔyɛ ɔboafo ankasa ma Abraham; ofi obu mu boae ma ne gyinaesi baa mu. Na n’ahobrɛase no nnyɛ ani so de. Ɔfrɛɛ ne kunu sɛ ne wura wɔ “ne mu.” (Genesis 18:12; 1 Petro 3:6) Obu a na ɔwɔ ma Abraham no fi komam.

²³ Nanso eyi nkyerɛ sɛ na Abraham ne Sara adwene hyia wɔ biribiara mu. Bere bi ɔkaa biribi a ‘ɛhaw Abraham yiye.’ Nanso Yehowa ka kyerɛɛ Abraham sɛ ontie ne yere. Abraham brɛɛ ne ho ase yɛɛ saa, na nea efii mu bae no yɛɛ nhyira maa abusua no. (Genesis 21:9-13) Okununom ne ɔyerenom a wɔaware mfe pii mpo betumi asua biribi afi awarefo a wosuro Onyankopɔn yi nhwɛso mu.

24. Aware bɛn na ɛhyɛ Yehowa Nyankopɔn anuonyam, na dɛn ntia?

²⁴ Yɛwɔ nnipa mpempem a wɔde anigye aware wɔ Kristofo asafo no mu—ɔyere brɛ ne ho ase ma ne kunu, na okunu nso dɔ ne yere na odi no ni, na wɔn mmienu hwɛ sɛ wɔde Yehowa apɛde bedi kan wɔ wɔn asetena mu. Sɛ woyɛ w’adwene sɛ wobɛware a, paw ɔhokafo nyansam, siesie wo ho yiye ma aware, na hwɛ sɛ wobɛma asomdwoe ne ɔdɔ atena aware no mu na ahyɛ Yehowa Nyankopɔn anuonyam. Sɛ ɛba saa a, w’aware no bɛboa wo ma woatena Onyankopɔn dɔ mu.