Yehowa pɛ sɛ yegye yɛn ani anaa yɛyɛ nneɛma a ɛbɛma yɛn ani agye wɔ asetena mu. Nanso, ɛnyɛ nneɛma a yɛyɛ de gyigye yɛn ani nyinaa na ɛsɔ n’ani. Afahyɛ ne nnapɔnna a nkurɔfo di sɛɛ, ɛnyɛ ne nyinaa na ɛsɔ n’ani. Ɛnde, afahyɛ ne nnapɔnna ahorow bɛn na ɛsɛ sɛ yɛtwe yɛn ho fi ho de kyerɛ sɛ yɛdɔ Yehowa?

1. Adɛn nti na afahyɛ anaa nnapɔnna ahorow pii nsɔ Yehowa ani?

Ɛbɛyɛ wo nwonwa sɛ afahyɛ anaa nnapɔnna pii wɔ hɔ a, ennyina Kyerɛwnsɛm no so anaasɛ efi abosonsom mu. Ebi wɔ hɔ a, wobɛkɔ mu no, na ɛne atorosom wɔ biribi yɛ. Ebi wɔ hɔ nso a, wubehu sɛ ahonhonsɛm frafra. Afahyɛ no bi mpo de, adwene a ɛhyɛ akyi ne sɛ, ɔkra bi wɔ yɛn mu a enwu da. Ebi de, gyidihunu ahyɛ mu ma. (Yesaia 65:11) Yehowa bɔ n’asomfo kɔkɔ sɛ: “Montew mo ho . . . na munnyae sɛ mode mo nsa ka nea ɛho ntew no.”—2 Korintofo 6:17. a

2. Afahyɛ anaa nnapɔnna a wodi de hyɛ onipa bi anuonyam no, Yehowa te nka sɛn wɔ ho?

Yehowa bɔ yɛn kɔkɔ sɛ, yɛnhwɛ yiye na ‘yɛamfa yɛn ho anto onipa dasani so.’ (Kenkan Yeremia 17:5.) Afahyɛ no bi wɔ hɔ a, wɔde hyɛ atumfoɔ anaa asogyafo anuonyam. Ebi nso wɔ hɔ a, wɔde kae bere a ɔman no nyaa fahodi anaa wɔhyɛ fã no de nidi ma ɔman no ahyɛnsode. (1 Yohane 5:21) Ebi koraa de, wɔde hyɛ amanyɔkuw anaa ahyehyɛde bi anuonyam. Sɛ Yehowa hu sɛ yɛde anuonyam soronko bi rema onipa anaa ahyehyɛde bi, ɛnkanka ahyehyɛde a ɛyɛ nneɛma a ɛne n’apɛde nhyia a, wohwɛ a ɔbɛte nka sɛn?

3. Nneɛma bɛn na ɛkɔ so wɔ afahyɛ ahorow ase a ɛmma Yehowa nnye ntom?

Bible no kasa tia “asanom bebrebe, apontow a ase yɛ gyegyeegye, [ne] akɔwensafo fekuw.” (1 Petro 4:3) Afahyɛ anaa nnapɔnna no bi wɔ hɔ a, sɛ nkurɔfo redi a, wɔyɛ wɔn ade basabasa na wobu brabɔne. Sɛ Yehowa betumi akɔ so afa yɛn nnamfo a, gye sɛ yɛtwe yɛn ho fi abrabɔ fĩ a ɛtete saa ho.

 SUA PII KA HO

 5. Boa afoforo ma wonhu nea wugye di

6. Yehowa pɛ sɛ yɛn ani gye

Yehowa pɛ sɛ yɛne yɛn abusuafo ne yɛn nnamfo bom gye yɛn ani. Monkenkan Ɔsɛnkafo 8:15. Muwie a munsusuw asɛmmisa yi ho:

• Dɛn na ɛwɔ kyerɛwsɛm yi mu a ɛma yehu sɛ Yehowa pɛ sɛ yɛn ani gye?

Yehowa pɛ sɛ n’asomfo bom gye wɔn ani anaa wɔyɛ nneɛma a ɛbɛma wɔn ani agye. Hwɛ VIDEO yi, na wubehu sɛ, sɛ yɛkɔ amanaman ntam nhyiam a, yɛn ani gye paa.

Monkenkan Galatifo 6:10. Muwie a munsusuw nsɛmmisa yi ho:

• Wohwɛ a, ɛsɛ sɛ yɛtwɛn ma afahyɛ bi du so ansa na ‘yɛayɛ afoforo yiye’ anaa yɛayɛ wɔn papa?

• Bere bɛn na wokyɛ obi ade a ɛbɛma w’ani agye paa—ɛyɛ bere a wɔredi afahyɛ bi a obiara rekyɛ ade no, anaa bere a w’ankasa afi wo pɛ mu akyɛ obi ade?

• Yehowa Adansefo pii wɔ hɔ a, ɛwom ara a, wotumi tow pon ma wɔn mma, na mpo ɛtɔ da a, wɔkyɛ wɔn ade. Sɛ wowɔ mma a, nneɛma bɛn na wubetumi ayɛ ama wɔn ani agye?

 NEA YƐASUA

Yehowa pɛ sɛ yɛne yɛn abusuafo ne yɛn nnamfo bom gye yɛn ani. Nanso afahyɛ ne nnapɔnna ahorow a n’ani nnye ho no, ɔpɛ sɛ yɛtwe yɛn ho fi ho.

Ntimu

• Sɛ yɛpɛ sɛ yehu sɛ afahyɛ anaa nnapɔnna bi sɔ Yehowa ani anaa ɛnsɔ n’ani a, nsɛm bɛn na yebetumi abisa yɛn ho?

• Yɛbɛyɛ dɛn ama yɛn abusuafo ne yɛn nnamfo ahu nea enti a yenni afahyɛ bi?

• Yɛyɛ dɛn hu sɛ Yehowa pɛ sɛ yegye yɛn ani?