Yɛn abusua no tu kɔtenaa kurow bi a yɛfrɛ no Roodepoort a ɛwɔ South Africa. Yɛkɔɔ hɔ no, mfe kakraa bi akyi na me papa wui. Afe 1947 no, na madi mfe 16. Saa bere no, na meyɛ adwuma wɔ aban tɛlefon adwuma mu, sɛnea ɛbɛyɛ a mɛboa yɛn abusua no. Da koro, na mewɔ fie, ɛnna owura bi a ne mfe akɔ anim baa hɔ. Ɔkaa sɛ yɛnkra Ɔwɛn-Aban. Ná yɛmpɛ sɛ yebebu no animtiaa, enti yɛkraa bi.

 Nanso, ankyɛ koraa na yɛn ani begyee ho sɛ yebesua Bible na yɛate ase yiye. Bere a na me maame yɛ ababaa no, na ɔkɔ Dutch Reformed Asɔre. Nanso afei, bere a ɔde nea na ɔresua afi Bible mu no totoo nea asɔre no kyerɛkyerɛ ho no, obehui sɛ na asɔre no afom kwan koraa. Enti yɛpenee so sɛ Yehowa Adansefo ne yɛn nsua Bible, na ankyɛ koraa na yefii ase kɔɔ adesua. Mebɔɔ asu afe 1949. Yɛn abusua no mu no, me na midii kan bɔɔ asu. Mekɔɔ so yɛɛ honam fam adwuma mfe kakra, nanso na mepɛ sɛ meyɛ pii wɔ Yehowa som mu.

 Afe 1954 no, mifii ase yɛɛ daa akwampae adwuma, na mebɔɔ Betel a ɛwɔ South Africa no amanneɛ sɛ wɔnkyerɛ me baabi a metumi akɔboa asɛnka adwuma no kɛse. Betel kaa sɛ menkɔ Pretoria, na wɔyɛɛ nhyehyɛe sɛ onuawa bi a ɔno nso yɛ ɔkwampaefo mmɛka me ho wɔ hɔ. Ofie a yɛn mmienu kɔtenaa mu no, na yɛn ho tɔ yɛn. Meda so ara kae doonɔt dɛdɛɛdɛ bi a yɛfrɛ no koeksisters no. Wɔde esiam na ɛyɛ; wɔbɔ no sɛ mmɛsa, na wɔakyew. Wɔwie a na wɔde ade dɛdɛɛdɛ bi a ɛte sɛ asikyere a wɔanan agu ho. Ná wɔtɔn wɔ baabi a ɛbɛn yɛn fie.

 Bere a onuawa a me ne no reyɛ akwampae adwuma no waree no, Onua George Phillips a na ɔhwɛ South Africa Betel so saa bere no bisaa me sɛ, m’ani begye ho sɛ mɛyɛ ɔkwampaefo titiriw anaa. Ɔkaa saa no, mihuruw sɔe.

 Afe 1955 na mebɛyɛɛ ɔkwampaefo titiriw, na baabi a wɔdii kan de me kɔe ne kurow bi a yɛfrɛ no Harrismith. Ɛyɛɛ den maa me ne ɔkwampaefo titiriw a ɔka me ho no sɛ yebenya ofie a yɛtena mu a yɛn ho bedwo yɛn. Bere bi sei, ofie bi a yenya kɔtenaa mu no, na ne wura no yɛ ɔbea. Bere a asɔre a ɛwɔ mpɔtam hɔ no huu asɛnka adwuma a yɛreyɛ no, wɔhyɛɛ ofiewura no ma otuu yɛn.

 Akyiri yi, Betel yii me kɔɔ Parkhurst a ɛwɔ Johannesburg. Mekɔɔ hɔ no, wɔde mmea mmienu a wɔyɛ asɛmpatrɛwfo bɛkaa me ho. Akyiri yi, baako waree, ɛnna wɔyii nea ɔka ho no nso kɔɔ baabi foforo. Onuawa bi a yɛfrɛ no Eileen Porter yii ne yam ma mekɔtenaa ɔne n’abusua nkyɛn. Ɛwom sɛ na abusua no nni ahɔhodan wɔ fie hɔ de, nanso wɔgyee me. Baabi a na meda no, na ɛhɔ sua, na ntama na na wɔde atwa ɛhɔ ne ɔdan no fã a aka no ntam. Ná Eileen yam ye, na na ɔhyɛ nkuran, na m’ani kaa n’anim. Ɛwom sɛ na nnwuma pii gu no so wɔ fie de, nanso na ɔde nsi ne ahokeka yɛ ne som adwuma no. Mihu no saa a, na ɛyɛ me fɛ paa.

 Ankyɛ na wɔyii me kɔɔ kurow bi a yɛfrɛ no Aliwal North wɔ Eastern Cape mantam mu. Wɔkaa sɛ me ne onuawa bi a yɛfrɛ no Merlene (Merle) Laurens nkɔyɛ ɔsom adwuma no wɔ hɔ. Saa bere no, na yɛn mmienu nyinaa adi boro mfe 20 kakra. Onuawa bi a ne mfe akɔ anim nhwɛso hyɛɛ yɛn nkuran paa. Ná ne din de Dorothy, nanso esiane sɛ na yɛpɛ n’asɛm nti, na yetwa no tiaa frɛ no, Auntie Dot. Ne mmabaaberem no, ɔkɔɔ asɛnka ma nkraman wee no, nanso ɛno ammu n’abam amma wantoto asɛnka adwuma no ase.

 Afe 1956 no, Merle gyaw me hɔ kɔɔ Gilead sukuu no adesuakuw a ɛto so 28. Me yam a, na anka me ne no na ɛrekɔ Gilead no! Ɔkɔe no, Auntie Dot hwɛɛ me yiye. Ɛwom sɛ na wanyin kyɛn me mfe pii de, nanso yɛbɛyɛɛ nnamfo paa.

 Sɛnea wɔtoo nsa frɛɛ Merle kɔɔ Gilead no, akyiri yi, me nso, wɔtoo nsa frɛɛ me, na m’ani gye a egyei de, yɛnka! Ansa na merebɛkɔ Gilead no, mikodii bɛyɛ abosome nwɔtwe wɔ kurow bi a yɛfrɛ no Nigel mu. Me ne onuawa Kathy Cooke a na wawie Gilead sukuu kɔyɛɛ ɔsom adwuma no wɔ saa kurow no mu. Gilead ho nkɔmmɔ a Kathy ne me bɔe nti, ɛkaa me nko ara a, na bere no aso ama makɔ. Enti mekɔɔ New York, January 1958.

 Bere a mekɔɔ Gilead no, me ne anuanom mmea mmienu a wɔnyɛ aborɔfo fitaa na ɛdaa ɔdan baako mu. Wɔn ne, onuawa Tia Aluni a ofi Samoa, ne onuawa Ivy Kawhe a ɔyɛ Maorini. Bere a na mewɔ South Africa no, na aban a ɛwɔ hɔ no yiyi nnipa mu. Enti, na wɔmma aborɔfo ne wɔn a wɔnyɛ aborɔfo mmɔ. Wei ma ɛyɛɛ ade foforo koraa maa me sɛ me ne anuanom mmea mmienu no bɛda ɔdan baako mu. Ankyɛ koraa na mebɛpɛɛ wɔn asɛm, na m’ani gyei sɛ adesuakuw a meka ho no, emufo bi yɛ aborɔfo na ebinom nso nyɛ aborɔfo.

 Anuanom a wɔkyerɛɛ yɛn ade wɔ Gilead no, na baako ne Onua Maxwell Friend. Ɔkwan a na ɔfa so kyerɛ ade no, ɛtɔ da a, na emu yɛ den ma yɛn. Sukuudan a ɔkyerɛ ade wom no, na nkanea mmiɛnsa wɔ hɔ a wɔakyerɛw ho “Ma Wo Nne So,” “Ma Ɛnkɔ Ntɛm,” ne “Ma Emu Nyɛ Hyew.” Sɛ osuani bi rema ɔkasa anaa ɔreyɛ ɔyɛkyerɛ, na Onua Friend hu sɛ biribi nkɔ yiye a, na ɔsɔ kanea no baako. Sɛ ɔsɔ saa nkanea no bi to wo so pɛ, na wo yam ahye wo! Esiane sɛ na mefɛre ade nti, na ɔtaa sɔ kanea no bi to me so. Ne nyinaa mu no, na mepɛ Onua Friend asɛm. Sukuu no mu no, sɛ yesua ade kakra a, na yɛagyae akɔyɛ nnwuma bi. Ɛtɔ da a, bere a m’ani abere reyɛ m’adwuma no, mɛhwɛ no, na wayi ne yam akɔyɛ kɔfe abrɛ me.

 Bere a yɛwɔ sukuu hɔ no, ade rekye na ade resa nyinaa no, nea na meredwen ho ne baabi a yewie sukuu no a wɔbɛma makɔyɛ ɔsom adwuma no. Merle a bere bi na me no reyɛ akwampae adwuma no, na wawie Gilead ama wɔde no kɔ Peru. Saa bere no, Onua Knorr na na odi ɔsom adwuma no anim wɔ wiase nyinaa. Enti Merle hyɛɛ me nkuran sɛ me ne no nkasa nhwɛ sɛ, ɔsɛmpatrɛwfo a ɔne Merle reyɛ ɔsom adwuma a na ɔrebɛware no, ɔbɛma makosi n’ananmu anaa. Ɛwom ara a, na Onua Knorr ba Gilead sukuu hɔ, enti anyɛ den sɛ menya no ne no abɔ nkɔmmɔ. Ampa-ne-ampa ara, bere a miwiee sukuu no, wɔkaa sɛ menkɔsom wɔ Peru!

 M’ani gyei paa sɛ me ne Merle san kɔyɛɛ ɔsom adwuma no wɔ Lima, Peru! Mikoduu Peru no, ɛwom sɛ afei na na meresua Spanish kasa de, nanso ankyɛ koraa na minyaa Bible asuafo a na wɔrenya nkɔso paa. Akyiri yi, wɔde me ne Merle kɔɔ Ayacucho kurow a ɛda mmepɔw so no kɔyɛɛ ɔsom adwuma no. Momma menka, na ɛhɔ adwuma no yɛ me den! Ná masua Spanish kakra, nanso nnipa a ɛwɔ no, na Quechua kasa no nko ara na bebree ka. Sɛnea na mmepɔw no so mframa te nti, yɛnantew kakra a, na yɛretee so, na ɛkyɛe kakra ansa na ɛhɔ mframa no ne yɛn ho regye.

 Ɛyɛɛ me sɛ manyɛ hwee wɔ Ayacucho, na minyaa adwene sɛ ɛbɛyɛ den sɛ nnipa pii begye nokware no wɔ ɔmantam no mu. Nanso, ɛnnɛ, nnipa a wɔka asɛmpa no wɔ Ayacucho kurow no mu bɛboro 700, na baabi a Yehowa Adansefo kyerɛ nsɛm ase kɔ Quechua (Ayacucho) kasa mu nso wɔ ɔmantam no mu.

 Bere bi akyi no, Merle waree ɔmansin sohwɛfo bi a ne din de Ramón Castillo. Afe 1964 no, wɔde abosome 10 yɛɛ sukuu bi wɔ Gilead, na Ramón kɔɔ bi. Wɔn a Ramón ne wɔn kɔɔ saa sukuu no, na aberante bi a me ne no kɔɔ Gilead ka ho. Ná ne din de Fu-lone Liang. Saa bere no, na ɔresom wɔ Hong Kong, ɛnna wɔsan too nsa frɛɛ no baa Gilead sɛ, nnwuma a wɔyɛ wɔ Betel no, ommegye ho ntetee. a Fu-lone bisaa Ramón sɛ, sɛn na nneɛma rekɔ ama me wɔ Peru. Ɛno akyi no, sɛ Fu-lone kyerɛw me a, na me nso makyerɛw no bi.

 Ahyɛase no ara na Fu-lone maa metee ase sɛ, nkrataa a yɛrekyerɛkyerɛw yɛn ho no kyerɛ sɛ yɛreyɛ aware nhyehyɛe. Onua Harold King a na ɔne Fu-lone nyinaa yɛ asɛmpatrɛwfo wɔ Hong Kong no, ɔno na na ɔtaa kɔ posɔfese ma wɔn. Enti Fu-lone ne Harold ka ma ogye toom sɛ, sɛ ɔkyerɛw krataa a, ɔde bɛkɔ akɔmena ama no. Sɛ Fu-lone de krataa no ma Harold sɛ ɔmfa nkɔmena a, na Harold adrɔdrɔ mfoni nketenkete wɔ so, na wakyerɛw aseresɛm bi wɔ so te sɛ, “Mɛma wakyerɛw wo waa-waa!”

 Me ne Fu-lone kɔɔ so dii nkrataakyerɛw bɛyɛ afe ne fã, ɛnna yesii gyinae sɛ yɛbɛware. Enti mifii Peru kɔɔ Hong Kong. Bere a merefi Peru no, na masom wɔ hɔ bɛyɛ mfe nson.

 Me ne Fu-lone waree November 17, 1965. M’ani gyee Hong Kong asetena ho paa. Ná me ne me kunu ne anuanom mmienu ne wɔn yerenom na ɛte wɔ Hong Kong Betel. Da biara, na Fu-lone kyerɛ nsɛm ase, na me nso makɔ asɛnka. Ná Cantonese kasa no sua yɛ me den, nanso anuanom mmea a wɔyɛ asɛmpatrɛwfo, ne me kunu a ɔda me koma so no too wɔn bo ase boaa me. Me ne mmofra suaa ade, na ɛboaa me ma mitumi suaa kasa no. Ɛsan maa me bo tɔɔ me yam paa.

 Mfe bi akyi no, me ne Fu-lone tu kɔtenaa asɛmpatrɛwfo fie wɔ Hong Kong kurow no fã bi a yɛfrɛ hɔ Kwun Tong. Ɛhɔ no, na Fu-lone kyerɛ asɛmpatrɛwfo a wɔaba ɔman no mu foforo no Cantonese kasa. b Ná ɛhɔ asɛnka yɛ me dɛ paa, enti nna pii wɔ hɔ a na mempɛ sɛ mepɔn ba fie mpo!

 Afe 1968 no, me nsa kaa nhoma foforo a yɛne nkurɔfo de sua Bible a yɛato din, Nokware a Ɛde Kɔ Daa Nkwa Mu, na m’ani gyei paa. Nhoma foforo no, na emu yɛ mmerɛw sen nhoma dedaw a yɛne nkurɔfo de sua Bible a yɛato din, “Ma Onyankopɔn Nyɛ Ɔnokwafo” no. Nkurɔfo a na saa nhoma foforo yi betumi aboa wɔn paa ne wɔn a na wɔnnim Bible ne Kristosom ho hwee no.

 Nanso, mfomso a meyɛe ne sɛ, mefaa no sɛ wɔn a me ne wɔn sua ade no, sɛ wɔtumi yi nsɛmmisa a ɛwɔ nhoma no mu ano nko ara de a, ɛnde na ɛkyerɛ sɛ wɔreba nokware no mu ara ne no. Bere bi de, me ne me Bible suani bi suaa Nokware nhoma no nyinaa wiei a na m’adwene ara ne sɛ ɔte biribiara ase. Nanso, nea me ne no suae nyinaa akyi no, sɛɛ na onnye nni mpo sɛ Onyankopɔn wɔ hɔ! Masua sɛ me ne nkurɔfo a me ne wɔn sua ade bɛbɔ nkɔmmɔ de ahwɛ sɛ nea wɔresua no, wɔte ase anaa.

 Bere a yedii mfe kakra wɔ Kwun Tong no, yɛsan tu kɔtenaa Hong Kong Betel, na Fu-lone fii ase somee wɔ hɔ sɛ Baa Boayikuw no muni. Mede mfe pii yɛɛ adwuma wɔ Betel sɛ obi a osiesie dan mu, na na mesan tena baabi a yegye ahɔho nso. Ɛwom ara a, na Fu-lone tutu akwan kɔyɛ asafo nnwuma bi a na ɛsɛ sɛ ɔno nko ara di ho dwuma, ɛno nti, na merentumi ne no nkɔ. Nanso, na mefa no sɛ, ɛyɛ hokwan na manya reboa no ama wadi n’asɛyɛde ho dwuma.

 Awerɛhosɛm ne sɛ, afe 2008 no, prɛko pɛ, me wiase nyinaa dan butuwii. Me kunu Fu-lone a ɔda me koma so no wui mpofirim wɔ akwantu mu. Saa bere no, na aka kakraa bi ama Yesu wu Nkaedi no adu. Asɛm no bubuu me! Anuanom mmarima ne mmea yɛɛ ntɛm bɛkyekyee me werɛ. Nkaedi no ase nso, meboaa obi a n’ani gye Bible ho a ɔbaa Nkaedi no bi ma obuee kyerɛwnsɛm a yɛkenkanee no, na ɛno amma mamfa m’adwene ansi awerɛhow a na meredi no so. Mede m’adwene sii kyerɛwnsɛm a na Fu-lone ani gye ho paa baako so ma ɛhyɛɛ me den. Kyerɛwsɛm no ka sɛ: “Me, Yehowa wo Nyankopɔn, mikura wo nsa nifa mu. . . . ‘Mɛboa wo.’”—Yesaia 41:13.

 Fu-lone wu akyi mfe nson no, anuanom a wɔwɔ Hong Kong no hyɛɛ me nkuran sɛ mintu nkɔ Betel a ɛyɛ kɛse, baabi a wɔbetumi ahwɛ m’apɔwmuden yiye. Enti afe 2015 no, mitu kɔɔ South Africa Betel. Ɛhɔ bɛn baabi a migyee nokware no afe 1947 no.

 Manya anigye mfe pii wɔ Yehowa som mu, na mahu sɛ ɔpɛ pa a mewɔ no, Yehowa ahyira so. Meda so ara nya nkra fi nkurɔfo a me ne wɔn suaa Bible ma wɔbɛyɛɛ Yehowa Adansefo no hɔ. Asɛnka adwuma kakra a meyɛe no, mahu sɛ Yehowa ahyira so. Ɛho nhwɛso bi ni. Afe 1958 no, na adawurubɔfo a ɛwɔ Peru dodow yɛ 760. Eduu afe 2021 no, na wɔn dodow akodu bɛyɛ 133,000. Hong Kong nso, afe 1965 no, na adawurubɔfo a ɛwɔ hɔ dodow bɛyɛ 230; eduu afe 2021 no, na wɔn dodow akodu 5,565.

 Me mfe a akɔ anim nti, nneɛma a na anka mitumi yɛ no, seesei mintumi nyɛ. Nanso, meda so ara wɔ ɔpɛ pa, na mehwɛ kwan sɛ mɛkɔ so ada saa suban pa no adi wɔ Yehowa wiase foforo no mu. Adwumayɛfo bebree ho behia wɔ hɔ saa bere no, na mede anigye bɛka sɛ: “Mɛkɔ dodo.”