Ɛnnɛ, nnipa bebree tan wɔn yɔnko nnipa kwa. Enti wutie kaseɛbɔ a, sɛ ɛnyɛ asɛm a ɛyɛ asefem na ebinom aka afa afoforo ho a, na ɛyɛ awurukasɛm na wɔde adi wɔn esiane ɔtanhunu nti. Ebinom nso tumi tu wɔn ani si afoforo so esiane baabi a wɔfi nti. Ɔko nso de, daa yɛte ho asɛm.

•   “Nnansa yi, biribi a ɛrekɔ so paa wɔ sohyia midia so ne sɛ, ɔtan nti, nkurɔfo to nsɛm a ɛyɛ asefem mane afoforo. Nea akɔfa wei aba ne Israel ne Gaza ntɔkwaw no. Nnipa a ɔtanhunu adonnɔn wɔn nso hyɛ akyi na wɔresosɔ gya gu.”—The New York Times, November 15, 2023.

•   “Efi October 7 reba no, ɔtanhunu akɔ n’anim paa. Ɔtan nti, nkurɔfo to nsɛm a ɛyɛ asefem mane afoforo, na wɔtumi mpo di wɔn bɔne. Wei yɛ biribi a apagyaw nnansa yi, na ɛhaw adwene paa.”—Dennis Francis na ɔde asɛm yi too gua November 3, 2023; ɔno ne panyin a ɔda United Nations General Assembly no ano.

 Nsɛm a ɛyɛ asefem a nkurɔfo to mane afoforo, aturutrasɛm, ne akokoakoko a ɔtanhunu akɔfa aba no, efii ase nyɛ nnɛ. Bible mpo ka sɛ tete mmere mu no, na ebinom ‘hwehwɛ nsɛm a ano yɛ yaw totow no sɛ agyan,’ na ebinom nso wɔ hɔ a, na ɔko ne aturutrasɛm yɛ wɔn dɛ. (Dwom 64:3; 120:7; 140:1) Nanso Bible ma yɛte ase sɛ, ɔtan a ɛwɔ wiase nnɛ no de, ɛkyerɛ biribi.

 Bible ma yehu nneɛma mmienu nti a ɔtan abu so nnɛ.

1.  1. Bible ka too hɔ sɛ bere bi bɛba a “nnipa dodow no ara dɔ ano bedwo.” (Mateo 24:12) Enti nnipa dodow no ara renna ɔdɔ adi, mmom wɔbenya subammɔne, na wɔbɛkeka nkurɔfo ti abom ama wɔatan wɔn ho.—2 Timoteo 3:1-5.

2.  2. Ɔtan a agye ntini wɔ wiase nnɛ no, Satan Ɔbonsam tirimɔdenfo no na ɔhyɛ akyi. Bible ma yehu sɛ “wiase nyinaa da ɔbɔnefo no tumi mu.”—1 Yohane 5:19; Adiyisɛm 12:9, 12.

 Ne nyinaa akyi no, Bible ma yehu sɛ, nneɛma a akɔfa ɔtan aba no, ɛrenkyɛ biara Onyankopɔn betu ne nyinaa ase. Ɛnyɛ ɛno nko, amanehunu a ɔtan akɔfa aba no nso, obeyi afi hɔ. Bible hyɛ yɛn bɔ sɛ:

•   Onyankopɔn ‘bɛpopa wɔn aniwa mu nisu nyinaa, na owu nni hɔ bio, na awerɛhow ne osu ne yaw nso nni hɔ bio. Kan nneɛma no atwam.’—Adiyisɛm 21:4.