Wokɔ Haiti man no mu a, aturuturafo agye hɔ abɔ so, na nsɛmmɔne a wɔredi de, yɛnka. South Africa, Mexico, ne aman bi a ɛwɔ Latin America nso, awudisɛm ne awurukasɛm nso ama ne homene so wɔ hɔ paa. Ɛwom, aman bi wɔ hɔ a, amumɔyɛsɛm a yɛreka ho asɛm yi so atew, nanso ɛhɔ koraa ɔmanfo da a wɔnna, efisɛ ɛwɔ hɔ ara a wobɛte sɛ yɛse obi akowia ade, obi akɔsɛe obi agyapade, anaa nsɛmmɔnedifo atwa gya ato obi agyapade mu.

 Amumɔyɛsɛm a atu atese wɔ wiase yi mu no, dɛn na Bible ka fa ho?

 Bible ma yɛte ase sɛ, nneɛma a ebesisi a ɛbɛma yɛahu sɛ “wiase yi awiei bere no” adu no, amumɔyɛ ka ho. (Mateo 24:3) Bere a Yesu Kristo reka saa nneɛma no ho asɛm no, ɔkaa sɛ:

•   “Amumɔyɛ a ɛbɛdɔɔso nti, nnipa dodow no ara dɔ ano bedwo.”—Mateo 24:12.

 Bible san ka too hɔ sɛ “awiei mmere no mu no,” nnipa ‘rentumi nhyɛ wɔn ho so, wobedi atirimɔdensɛm, wɔbɛyɛ wɔn a wɔmpɛ papa.’ (2 Timoteo 3:1-5) Saa subammɔne yi ka ho bi na ɛnnɛ amumɔyɛsɛm abu so saa no.

 Nanso akyea na emmui; anidaso wɔ hɔ. Bible ka sɛ ɛrenkyɛ biara amumɔyɛ befi hɔ.

•   “Aka kakraa bi na nnebɔneyɛfo nni hɔ bio; wobɛhwehwɛ wɔn tenabea, nanso worenhu wɔn. Ahobrɛasefo na asaase no bɛyɛ wɔn dea, na wobegye wɔn ani wɔ asomdwoe bebree mu.”—Dwom 37:10, 11.

 Kenkan nsɛm a edidi so yi. Ɛbɛboa wo ama woahu anidaso nsɛm a ɛwɔ Bible mu. Afei nso, wubehu nea enti a wubetumi agye adi sɛ, nsɛm a ɛresisi wɔ wiase nnɛ no ama Bible nkɔmhyɛ aba mu.

 “A Real Hope for a Better Tomorrow”

 “Nneɛma Bɛn Na Esisi a Ɛbɛkyerɛ Sɛ Yɛwɔ ‘Awiei Mmere’ Anaa ‘Nna a Edi Akyiri’ No Mu?”

 “Did the Bible Predict the Way People Think and Act Today?”