Sɛ wote sɛ wiase rebɛsɛe a, ɛdɛn na ɛba w’adwene mu? Ebia ɛbɛyɛ wo sɛ atoyerɛnkyɛm kɛse bi rebesi ama asaase yi ne ɛso biribiara asɛe. Ebinom gye di sɛ wiase yi rekeka kɔ atoyerɛnkyɛm kɛse bi a ɛte saa mu, ɛnkanka ne sɛ wɔakenkan amanneɛbɔ bi te sɛ nea edidi so yi:

•   “Ebetumi aba sɛ nnipa de nuklea anaa topae a ɛhye aman bɛko. Ebia wɔbɛhyɛ da na ako, anaa biribi na ɛbɛkɔ akɔprɛ nkɔkwa no, anaa mente-me-ho-ase bi na ɛbɛkɔ akɔfa aba.”—Bulletin of the Atomic Scientists.

•   “Mfe du ni, nea ɛrekɔ so wɔ wiase ne mframa gyampantrudu, egya a ɛtɔ kwae mu, ɔpɛ, ɛpo ase mmire a ɛresɛe, mframa a ɛyɛ hye, ne nsu a ɛtɔ yiri sɛe nneɛma. Sɛnea saa nneɛma no resisi no, yenhuu bi da.”—National Geographic.

•   “Sɛnea ntutummɛ anaa mmebɛw resɛe ade wɔ Afrika no, yɛnam-yɛnam, yenhuu bi da.”—The Associated Press.

 Biribi besi ama asaase asɛe anaa? Ɛdɛn na Bible aka?

 Daabi, ɛrensɛe. Onyankopɔn Asɛm Bible ka kyerɛ yɛn sɛ asaase bɛwɔ hɔ afebɔɔ. (Ɔsɛnkafo 1:4) Onyankopɔn rensɛe asaase a wahyɛ da abɔ no. Mmom “wɔn a wɔresɛe asaase no” na ɔbɛsɛe wɔn.—Adiyisɛm 11:18.

 Bible ma yehu sɛ, “wiase” a ɛrebɛsɛe no yɛ nnipa a wɔyɛ nea wɔpɛ a wɔmfa Onyankopɔn nyɛ hwee. “Amumɔyɛfo wiase” na Onyankopɔn sɛee no wɔ Noa bere so, na saa ara na ɛnnɛ nso ɔbɛyɛ.—2 Petro 2:5; 3:7.

 Sɛnea 1 Yohane 2:17 kyerɛ no, “wiase ne n’akɔnnɔ retwam.” Bible mu asɛm yi ma yehu sɛ, ɛnyɛ asaase yi na Onyankopɔn bɛsɛe no, na mmom nnipa a wɔayɛ wɔn adwene sɛ bɔne nko ara na wobedi no, wɔn na ɔbɛsɛe wɔn.

 Bible nka da pɔtee a awiei no bɛba. (Mateo 24:36) Nanso ɛma yehu sɛ awiei no abɛn. Bible aka nsɛm a edidi so yi ato hɔ:

•   Nneɛma bi te sɛ akokoakoko, ɔkɔm, nsanyare a edi awu, ne asaasewosow akɛse bɛba “mmeaemmeae.”—Mateo 24:3, 7, 14; Luka 21:10, 11; Adiyisɛm 6:1-8.

•   Nnipa dodow no ara bɛyɛ pɛsɛmenkominya aboro so. Wo de hwɛ, Bible se nnipa bɛyɛ “sikanibere,” “wɔbɛyɛ bonniayɛ,” na “wɔrentumi nhyɛ wɔn ho so.”— 2 Timoteo 3:1-5.

 Nnipa pii gye tom sɛ efi afe 1914 reba no, nea Bible aka sɛ ebesisi no, saa pɛpɛɛpɛ na ɛrekɔ so wɔ wiase, na wei kyerɛ sɛ awiei no abɛn. Sɛ wopɛ wei ho nsɛm pii a, hwɛ “What Does Bible Chronology Indicate About the Year 1914?” ne “What Is the Sign of ‘the Last Days,’ anaa ‘End Times’?”

 Nhoma a etwa to wɔ Bible mu no kyerɛ bere a ‘wɔbɛda Awurade Yesu adi.’ Saa bere no yɛ bere a Yesu de tumi bɛba na wabeyi abɔnefosɛm nyinaa afi asaase so, na ɔde akatua pa ama wɔn a wɔsom Onyankopɔn no.—2 Tesalonikafo 1:6, 7; 1 Petro 1:7, 13.

 Nhoma a etwa to wɔ Bible mu no ma yehu nneɛma a ebesisi daakye. (Adiyisɛm 1:1) Nsɛmpa ne nsɛm a ɛma yenya anidaso wɔ saa nhoma no mu. (Adiyisɛm 1:3) Ɛma yehu sɛ Onyankopɔn beyi ntɛnkyea ne nsisi nyinaa afi hɔ, na wama asaase adan paradise. Saa bere no, onipa biara nni hɔ a ɔbɛte yaw anaa obehu amane anaa mpo obewu.—Adiyisɛm 21:3, 4.

 Wopɛ sɛ wuhu bɔhyɛ kamakama a Bible ka ho asɛm yi ho nsɛm pii anaa? Yehowa Adansefo ne nkurɔfo sua Bible kwa; wonnye sika biara. Wo ne wɔn sua bi a, ɛbɛboa wo. Adɛn nti na ɛnnɛ yi ara, wonhwehwɛ wɔn akyi kwan?