Sɛ nkurɔfo sisi obi anaa wɔdi no bɔne a, ɛyaw a ɔfa mu no, Yesu te ase paa. Nea enti a ɛte saa ne sɛ, ɔno ankasa, nkurɔfo de bi adi no pɛn. Ɔbaa asaase so no, nkurɔfo twaa asɛm too no so, wɔboroo no, wɔfaa kwammɔne so dii n’asɛm, wɔbuu no fɔ bere mpo a na ɔnyɛɛ bɔne biara, na wɔkum no yayaayaw. Ɛwom sɛ na bɔne biara nni ne ho, nanso ofii ne pɛ mu de ne nkwa bɔɔ afɔre maa yɛn, na ɔde yɛɛ ‘agyede de gyee nnipa bebree.’ (Mateo 20:28; Yohane 15:13) Seesei Yesu na odi Onyankopɔn Ahenni no so hene, na ɛrenkyɛ koraa, obeyi nsisi ne ntɛnkyea nyinaa afi wiase. Ɛba saa a, nsɛmmɔnedi a ɛde nsɛmmɔnedi, akyi bɛyera koraa.—Yesaia 42:3.

 Sɛ Yesu keka ne ho a, wiase bɛyɛ sɛn? Bible ka sɛ:

•   “Aka kakraa bi na nnebɔneyɛfo nni hɔ bio; wobɛhwehwɛ wɔn tenabea, nanso worenhu wɔn. Ahobrɛasefo na asaase no bɛyɛ wɔn dea, na wobegye wɔn ani wɔ asomdwoe bebree mu.”—Dwom 37:10, 11.

 Nea Yesu ayɛ ama yɛn dedaw ne nea ɔbɛyɛ ama yɛn daakye no, yɛbɛyɛ dɛn akyerɛ sɛ yɛn ani sɔ? Wohwɛ Luka 22:19 a, Yesu ka kyerɛɛ n’asuafo no sɛ wɔnkae ne wu no. Enti afe biara, sɛ da no du so a, Yehowa Adansefo hyiam kae Yesu wu no. Yɛreto nsa afrɛ wo sɛ bɛka yɛn ho Kwasida, March 24, 2024, na yɛnkae Yesu wu no.

Hwehwɛ Baabi a Wubetumi Akɔ Nkaedi No Bi