Seesei Bible mu nsɛm ne nneɛma foforo a ɛma Yehowa Adansefo gyidi yɛ den, na ɛma wotumi som Onyankopɔn no, pii wɔ hɔ a ɛlɛtrɔnik afiri so na wonya no. Nanso wokɔ aman bi so a, Intanɛt bo yɛ den paa nti anuanom no bi ntumi ntɔ. Ebinom nso, baabi a wɔte no, Intanɛt no nyɛ papa; ɛwɔ hɔ ara a na atew kɔ. Mmeae bi mpo de, Intanɛt nni hɔ koraa.

 Nanso seesei anuanom pii tumi twe nhoma, video, ne nneɛma afoforo a wɔrenhia Intanɛt! Ebia worebisa sɛ, wɔyɛ no sɛn?

 Ahyehyɛde no ayɛ adaka ketewa bi a wɔfrɛ no JW Box. Wɔde ma Asafo ahorow a wonni Intanɛt anaa wɔn Intanɛt nyɛ papa. Adaka no, wɔatɔ afiri bi ato mu a yɛfrɛ no router. Ɛboa ma obi nni Intanɛt koraa a, obetumi atwe nneɛma a ɛwɔ so no bi. Kɔmputa Dwumadibea a ɛwɔ Betel no nso ayɛ biribi wɔ adaka no mu a ɛma etumi yɛ adwuma. Afei nso, wɔayɛ no ɔkwan bi so a wobetumi atwe nhoma, video, ne nneɛma afoforo afi jw.org so agu so. Adaka no, baako biara bo bɛyɛ U.S. dɔla 75.

 Sɛ anuanom kɔ Ahenni Asa so a, wobetumi de wɔn fon atwe nhoma ne video ahorow a wɔde agu JW Box so no bi. Wɔn a wɔn fon ayɛ dedaw anaa ne bo nyɛ den mpo betumi atwe bi. Nanso yemmisa sɛ, sɛ Yehowa Adansefo asafo bi nni Intanɛt a, wɔbɛyɛ dɛn anya nneɛma foforo a aba jw.org so no bi, na wɔde agu JW Box no mu? Ɛwom ara a, Betel twe nneɛma foforo a aba jw.org so no bi gu USB anaa pendrive so de mena asafo ahorow no, ná wɔn nso atwe agu JW Box no mu. USB anaa pendrive no, baako biara bo bɛyɛ dɔla 4.

 Sɛn na JW Box yi aboa yɛn nuanom? Onua bi a yɛfrɛ no Nathan Adruandra a ɔte Democratic Republic of Congo kaa sɛ: “Video a wɔato din ‘O Yehowa, . . . Wo na Mede Me Ho To Wo So’ ne Monkae Lot Yere No, meyɛe ara sɛ mɛtwe nanso anyɛ yiye. Afei koraa de, na mapa abaw. Nanso seesei, metumi atwe agu me fon so. Aboa yɛn a yɛyɛ awofo no ma yetumi kyerɛkyerɛ mmofra no yiye.”

 Onua bi a ɔboa ma asafo ahorow a ɛwɔ Nigeria nsa ka JW Box no bi nso kaa sɛ: “Yɛn nuanom hu JW Box no sɛ ɛyɛ akyɛde soronko a efi Yehowa hɔ. Ɛyɛ wɔn dɛ paa sɛ seesei, sɛ wɔretwe nhoma, video, ne nneɛma afoforo a ɛwɔ Nnwinnade Titiriw a Yɛde Kyerɛkyerɛ no mu a, wɔmmrɛ.”

 JW Box bɛboro 1,700 na wɔde akɔma anuanom a wɔwɔ Africa, Oceania, ne South America. Afei wɔde nhyehyɛe agu akwan mu a ɛbɛma asafo ahorow pii nso nsa aka bi. Yɛyɛ dɛn nya sika yɛ nneɛma wei nyinaa? Ntoboa a mofa donate.pr418.com so yi kɔboa wiase nyinaa adwuma no na ɛma ɛyɛ yiye. Yɛda mo ase sɛ muyi mo yam yi ntoboa.