Afe biara, nnipa mpempem pii na wɔbɔ asu, enti yehia adan pii a yɛde bɛyɛ yɛn som adwuma no. Nkɔanim yi nti, Adansi Dwumadibea ahorow a ɛwɔ wiase nyinaa de sii wɔn ani so sɛ 2020 ɔsom afe no mu no, wobesisi adan foforo anaa wobesiesie nea ɛwɔ hɔ dedaw bɛboro 2,700 ama yɛde ayɛ yɛn som adwuma no. a

 Nanso korona yare no nti, nneɛma ankɔ sɛnea na yɛhwɛ kwan. Esiane sɛ na Nhoma Tintim Boayikuw a Ɛhyɛ Akwankyerɛ Kuw No Ase pɛ sɛ wɔbɔ anuanom ho ban na wodi aban mmara so nti, adan a na wɔreyɛ ho adwuma wɔ wiase nyinaa no, wɔtwentwɛn dodow no ara so. Ne nyinaa akyi no, afe 2020 ɔsom afe no mu no, adan a yɛde yɛ ɔsom adwuma a yesisii ne nea yesiesiei ansa na korona yare no reba no boro 1,700. Afei nso yetumi wiee adwuma a na yɛreyɛ wɔ adan foforo bɛboro 100 ho. Ebi ne sɛ Betel afie, mmeae a wɔkyerɛ kasa ase, ne mmeae a ɛtete saa. Adan mmienu bi a wowiee ho adwuma no, yɛnhwɛ sɛnea anuanom anya so mfaso kɛse.

 Cameroon Betel. Betel dedaw a na ɛwɔ Douala no, na esua koraa, enti sɛ wobetumi akɔ so atena hɔ a, gye sɛ wɔyɛ ho adwuma paa. Nhoma Tintim Boayikuw a Ɛhyɛ Akwankyerɛ Kuw No Ase no susuw ho sɛ anka wobesiesie hɔ, nanso wohui sɛ na ɛka a wɔbɛbɔ wɔ ho no, sɛ wɔtɔn dan no koraa a, wɔrennya saa sika no. Afei wɔyɛe sɛ wɔbɛtɔ asaase asi dan foforo anaa wɔbɛtɔ dan asiesie, nanso wɔannya bi.

 Saa bere no, na yɛn Nhyiam Asa no baako wɔ kurow bi so, na sɛ wufi Douala rekɔ hɔ a, ɛwɔ atifi fam. Emu hɔ ara na anuanom no tee sɛ Cameroon aban no ayɛ sɛ wɔrebeyi kar kwan ato saa Nhyiam Asa no nkyɛn. Wohui sɛ, sɛ wowie kwan no a, ɛhɔ kɔ bɛyɛ mmerɛw, na wobenya nsu ne kanea ne nea ɛtete saa. Ɛno nti wohui sɛ wosi Betel no wɔ hɔ a, ɛbɛboa paa. Wei maa Akwankyerɛ Kuw no penee so sɛ wontwa Nhyiam Asa no asaase no bi na wonsi Betel foforo wɔ so.

 Adansefo ne adwumayɛfo a yɛabɔ wɔn paa boom yɛɛ adwuma no, na ɛmaa ɛka no kɔɔ fam na yɛansɛe bere nso pii. Sika a yɛsesee sɛ yɛde bɛyɛ adwuma no, yewiei no na ɛso atew boro Amerika dɔla ɔpepem mmienu! Betel abusua no tumi tu kɔtenaa dan foforo no mu ansa na korona yare no reba.

 Betel abusua a ɛwɔ Cameroon no anya baabi pa reyɛ adwuma, na wanya baabi pa nso atena. Wei aboa wɔn paa, na wohu Betel foforo no sɛ akyɛde a efi Yehowa hɔ. Awarefo bi kaa sɛ: “Yɛpɛ sɛ yɛyɛ adwumaden de kyerɛ sɛ yɛn ani sɔ akyɛde a yɛn nsa aka yi.”

 Baabi a Wɔkyerɛ Tojolabal Kasa Ase Wɔ Mexico. Anuanom a wɔkyerɛ Tojolabal kasa ase no, wɔde mfe pii yɛɛ adwuma wɔ Central America Betel a ɛbɛn Mexico City no. Nanso Tojolabal kasa no, Altamirano ne Las Margaritas paa na wɔka no. Efi Central America Betel no rekɔ hɔ no bɛyɛ kilomita 1,000 (akwansin 620)! Enti na ɛyɛ den ma wɔn a wɔkyerɛ Tojolabal kasa no ase no sɛ wobehu nsakrae a ɛreba kasa no mu. Afei nso na ɛyɛ den sɛ wobenya anuanom a wɔbɛn Betel a wɔte kasa no, na wɔatumi abɛboa ama wɔakyerɛ kasa no ase. Ná ɛyɛ den nso sɛ wobenya anuanom ama wɔabɛkenkan nneɛma agu afiri so.

 Wei nyinaa nti, na Akyerɛw Boayikuw a Ɛhyɛ Akwankyerɛ Kuw No Ase no pɛ sɛ woyi anuanom a wɔkyerɛ Tojolabal kasa ase no kɔ baabi a wɔka kasa no. Enti anuanom yɛe sɛ wɔbɛtɔ dan na wɔasiesie. Ná ɛno bo wɔ fam sen sɛ wobesi dan foforo anaa wɔbɛhan obi dan.

 Wɔn a wɔkyerɛ kasa ase no baako kaa mfaso a wanya no ho asɛm sɛ: “Mfe du a mede yɛɛ adwuma wɔ Betel no nyinaa, manhyia abusua baako mpo wɔ mpɔtam hɔ a wɔka me kasa. Nanso seesei baabi a yɛwɔ yi de, wɔn a wɔka Tojolabal kasa no atwa yɛn ho ahyia. Da biara, mihyia wɔn a wɔka Tojolabal kasa. Wei ama mate kasa no bi aka ho, na ama m’adwuma nso atu mpɔn.”

 Sɛ biribiara kɔ yiye a, yɛde asi yɛn ani so sɛ 2021 ɔsom afe no mu no, yebesisi mmeae a wɔkyerɛ kasa ase ne mmeae a wɔyɛ Bible sukuu ahorow bɛyɛ 75. Betel adansi nnwuma akɛse nwɔtwe bi nso wɔ hɔ a, yɛbɛsan de akɔhyehyɛ so. Ebi ne wiase nyinaa adwumayɛbea ti adansi adwuma a ɛrekɔ so wɔ Ramapo, New York no ne Argentina ne Italy Betel a wɔresi foforo no. Ɛno da nkyɛn a, yehia Ahenni Asa foforo bɛboro 1,000, na mmeae a anuanom hyiam nso, emu 6,000 nyɛ papa, enti ehia sɛ wonya foforo. Afei nso Ahenni Asa dedaw a ɛwɔ hɔ no, ehia sɛ wosiesie emu 4,000 yɛ no foforo.

 Adan a yesi ne nea yesiesie yi nyinaa, yɛyɛ dɛn nya ho sika? Onua Lázaro González yɛ Central America Baa Boayikuw no muni, na ɔmaa asɛm yi ho mmuae. Ná ɔreka dan a wɔresi ama anuanom a wɔkyerɛ Tojolabal kasa ase no ho asɛm. Ɔkaa sɛ: “Yɛn asaasesin yi mu no, sikasɛm ho yɛ den. Enti sɛ yɛn nuanom a wɔwɔ wiase nyinaa no ammoa yɛn a, anka ɛbɛyɛ den sɛ yebetumi asisi adan ama wɔn a wɔkyerɛ kasa ase no wɔ baabi a yɛn nuanom ka kasa no. Sika a yenya fi anuanom a wɔwɔ wiase afanan nyinaa hɔ no na ama anuanom a wɔkyerɛ kasa ase no atumi akɔtena baabi a wɔka wɔn kasa no. Yɛda yɛn nuanom a wɔwɔ wiase nyinaa no ase sɛ woyi wɔn yam boa.” Anokwa, ɛnyɛ ntoboa a muyi de boa adwuma a yɛyɛ wɔ wiase nyinaa no a, anka yɛrentumi nyɛ adan yi nyinaa ho adwuma. Ntoboa no pii wɔ hɔ a, mode fa donate.pr418.com so.