Ade baako a ɛda Akwankyerɛ Kuw no koma so paa ne sɛ, ntoboa a yeyi no, wɔde besisi asafo adan a ɛboa ma yetumi yɛ asɛnka adwuma no. Afe 2023 ɔsom afe no sei, Yehowa Adansefo a ɛwɔ wiase nyinaa de sika bɛboro dɔla ɔpepem 500 na ɛyɛɛ Ahenni Asa ne Nhyiam Asa ahorow ho adwuma. Ebi wɔ hɔ a, wɔtɔe; ebi nso, wɔn ara na wɔsii; ebi nso, nea ɛwɔ hɔ dedaw no na wɔsiesiei, na wɔde sika no bi nso yɛɛ nhyehyɛe a wɔde bɛhwɛ adan no so yiye. a Nea yɛreka yi da nkyɛn a, ɛsono sika a asafo biara nso de siesiee nneɛma wɔ wɔn Ahenni Asa ho.

 Afei nso, ntoboa a yeyi no, yɛde bi sisi Betel adan, na yɛde bi nso yɛ ho adwuma na ansɛe. Betel na ɛyɛ asɛnka adwuma no ho ntotoe, na ɛboa yɛn ma yɛka asɛmpa no wɔ wiase nyinaa. Sɛnea na yɛyɛ nneɛma bi wɔ Betel no, seesei yɛatetew so. Ɛno aboa ma yetumi de sika a anka yɛde bɛyɛ saa nneɛma no kɔboa ma yesisi Ahenni Asa ne Nhyiam Asa foforo, na yɛde bi nso siesie nea ayɛ dedaw no. Ne nyinaa akyi no, Betel adan a ɛsɛ sɛ yesiesie, nea ɛsɛ sɛ yesi no foforo ne nea ɛsɛ sɛ yeyi fi baabi a ɛwɔ de kɔ baabi foforo no, yɛda so ara hia sika pii a yɛde bɛyɛ ho adwuma. Adɛn nti na ehia sɛ yɛyɛ saa nnwuma yi nyinaa? Dɛn na Betel yɛ de boa saa nnwuma a ɛho hia yi? Momma yɛnhwɛ.

 Betel adan no, bebree wɔ hɔ a yesii no, mfe 30 anaa 40 atwam. Nicholas a ɔyɛ adwuma wɔ Wiase Nyinaa Adansi Dwumadibea no ka sɛ: “Adan a wɔhwɛ siesie no yiye mpo no, sɛ ɛrekyɛ a, na n’ahoɔden so retew. Sɛ dan bi yɛ dedaw na woyɛ no foforo a, ɛboa ma dan no san nya ahoɔden na esi ne dedaw mu.”

 Betel adan no bi wɔ hɔ a, ehia sɛ yɛbae mu. Aman bebree wɔ hɔ a bere a wɔresi Betel a ɛwɔ hɔ no, na ɛhɔ adawurubɔfo nhyɛ da nnɔɔso saa. Nanso seesei adawurubɔfo no ayɛ bebree. Ɛno nti, anuanom a ɛyɛ adwuma wɔ Betel no, ɛsɛ sɛ wɔde bi ka ho na wɔatumi aboa adawurubɔfo no. Wei nti, Betel adan a kan no na anuanom tumi tena hɔ ma ɛyɛ yiye no, seesei wɔadɔɔso ara ma womoa wɔn hyɛ hɔ koraa a, ɛnyɛ yiye!

 Ade baako nso ne ahobammɔ. Wiase yi awiei de mmirika rebobɔ ba, enti atoyerɛnkyɛm a ɛresisi no adɔɔso na ayɛ hu. (Luka 21:11) Enti seesei, yɛwɔ ɔkwan foforo a yɛfa so siesie asafo adan a ayɛ dedaw no. Ɛno boa ma adan no nya ahoɔden, na wɔn a ɛyɛ adwuma wom no nya ahobammɔ. Afei nso, sɛ atoyerɛnkyɛm si a, yebetumi ayɛ ntotoe wɔ hɔ de aboa anuanom a wɔn ho aka no, na nneɛma a wɔhia na wɔatumi akɔ so asom Onyankopɔn nso, yɛama wɔn nsa aka.

 Afe 2023 ɔsom afe no, Akwankyerɛ Kuw no penee so ma yɛyɛɛ adansi adwuma kɛse bi; ɛne sɛ, yɛyɛɛ Betel adan a ɛwɔ aman 43 so ho adwuma. Wei kyerɛ sɛ Betel adan a ɛwɔ wiase no, bɛyɛ emu fã de, na adansi adwuma bi rekɔ so wɔ hɔ saa bere no. Adwuma a yɛayɛ no, emu kakra bi na yɛaka ho asɛm wɔ ase ha no. Wo de, hwɛ na wubehu mfaso a afi mu aba.

 Angola. Matt yɛ Angola Baa Boayikuw no muni. Nea ɔkae ni: “Nkɔmhyɛ a ɛwɔ Hagai 2:7 no, ɛyɛ yɛn dɛ sɛ yɛahu sɛ aba mu wɔ kwan foforo so. Yɛn koraa ɛyɛ yɛn nwanwa. Mfe du pɛ, adawurubɔfo dodow a na yɛwɔ no, bɛboro fã (kyerɛ sɛ, ɔha mu nkyɛm 60) abɛka ho! Nea ɛbɛyɛ a yebetumi aboa adawurubɔfo yi nyinaa ama wɔatumi asom Yehowa nti, anuanom a ɛyɛ adwuma wɔ Betel no, na ɛsɛ sɛ yenya mmɔho mmiɛnsa. Nanso esiane sɛ na Betel hɔ sua nti, na yɛrentumi mfa nnipa pii saa. Ɛno nti Betelfo a ɛwɔ hɔ no, na adwuma pii abegu wɔn so ama wɔgye wɔn ho a ennye, na ɛtɔ da a, na ɛsɛ sɛ wɔka mu yɛ adwuma.”

 Yɛde hyɛɛ anuanom bi nsa sɛ wɔnhwɛ nea yebetumi ayɛ afa asɛm no ho. Ahyɛase no, wɔn adwene yɛɛ wɔn sɛ yɛbae Betel a ɛwɔ hɔ no mu a, ɛbɛboa. Nanso wɔde wɔn ani too fam paa hwɛɛ asɛm no, na wɔhui sɛ, sɛ wɔbae Betel no mu a, ɛremmoa, ɛbɛsɛe anuanom ntoboa kwa. Enti wɔkaa sɛ yɛntɔ dan bi a ɛbɛn hɔ na yɛnyɛ ho adwuma. Matt kaa sɛ: “Bere a wɔka kyerɛɛ Baa Boayikuw no sɛ yɛntɔ dan nyɛ ho adwuma no, yɛkaa sɛ dan a yɛatɔ de, ɛrentumi nyɛ sɛ dan a yɛn ara yɛasi. Nanso seesei yɛahu sɛ saa dan no ara na na yehia. Yehowa ahyira gyinaesi no so.”

 Yɛhwɛ nea ɛrekɔ no a, daakye biara, anhwɛ a ebehia sɛ yɛbae Angola Betel no mu. Nanso seesei de, Betel adan no bi wɔ hɔ a yetumi tutu hyehyɛ no foforo. Afei nso yɛatɔ dan foforo, na yɛahenhae bi nso. Ne nyinaa nti, yebetumi aka sɛ yɛn ho nkyere yɛn. Enti adawurubɔfo a ɛrebu bɔ ho bebree no, yebetumi aboa wɔn ama wɔanya nea wɔhia na wɔatumi asom Yehowa.

 Japan. Betel adan a ɛwɔ hɔ no, nea wɔdii kan sii no rekeka kɔ mfe 40, nanso adan no dodow no ara de, wɔnyɛɛ adwuma kɛse biara wɔ ho da. Wɔabɔ mmɔden ahwɛ no yiye paa, nanso ne nyinaa akyi no, wɔahu sɛ dan no akyɛ dodo; n’ahoɔden asa. Ɛno nti seesei, Japan Betel no, wɔreyɛ adwuma bebree wɔ ho paa.

 Nnansa yi nso, Betel asetena asesa. Ansa na afe 2015 reba no, Betelfo aduan nyinaa, na yɛnoa ma wɔn. Enti adan a na Betelfo tete mu no, baabi ketekete bi na na wɔtumi noa aduan. Seesei nso de, yɛayeyɛ gyaade wɔ adan no mu, enti Betelfo nya baabi noa wɔn nnuan. Yɛn nuabea Kumiko yɛ adwuma wɔ Japan Betel. Nea ɔreka ni: “M’ani gye baabi a yetumi noa aduan no ho paa. Ɛno nti, nsakrae a yɛayɛ wɔ Betel asetena mu no, mitumi de yɛ adwuma paa.”

 Adwuma a anuanom yɛ wɔ Japan Betel no, ɛboa paa ma asɛnka adwuma no nya nkɔso wɔ wiase nyinaa. (Mateo 28:19, 20) Wiase nyinaa, Betel mmienu pɛ na asafo prente Bible mũ no nyinaa wɔ hɔ. Japan Betel no ka ho. Enti Betel dan dedaw a wɔreyɛ ho adwuma no, ade baako a wɔde bɛba hɔ ne afiri bi a yɛde twitwa nhoma ano na ɛsan twe mfuturu. Ɛba saa a, obiara a ɔyɛ adwuma wɔ baabi a wɔprente nhoma no, ɛbɛbɔ ne ho ban na mfuturu ankɔ ne mu. Afiri yi bo ne ne hyehyɛ ho ka nko ara, woka bom a, ɛnenam dɔla ɔpepem baako. Nanso tɔ ara na ɛsɛ sɛ yɛtɔ, efisɛ ɛbɛma yɛatumi aprente Bible ne asafo nhoma ahorow akɔma anuanom.

 Bere a adansi no rekɔ so no, ade baako a na ehia paa ne sɛ wɔbɛkɔ so aprente Bible. Trey ka Japan Baa Boayikuw no ho. Tie nea ɔkae: “Adansi adwuma no rekɔ so nyinaa, na asafo gu so reyi Bible adi wɔ kasa pii mu, na wiase nyinaa, wɔn a na wɔrepɛ Bible no bi akenkan nso, dɔ ara na na wɔredɔɔso. Sɛ yebetumi ahyehyɛ afiri no asan aprente Bible ne asafo nhoma a, na ɛsɛ sɛ yɛne Betel dwumadibea ahorow ne wɔn a wɔbɛhyehyɛ afiri no di nsawɔso paa de nhyehyɛe gu akwan mu sɛnea ɛbɛyɛ a obiara behu bere a ɔde bɛyɛ n’adwuma.” Ɔhaw yi nyinaa akyi no, efi March kosi August afe 2023 no, bosome biara, na yetumi prente Bible bɛyɛ 220,000. Saa bere no nso, na dan no ho adwuma gyina mu denneennen wɔ baabi a yɛprente nhoma no. Yetumi yɛɛ weinom nyinaa a yɛammɔ ka foforo biara wɔ akyi.

 Betel dan a yɛreyɛ ho adwuma no, mfaso akɛse a yebenya afi mu no, baako ne sɛ, ɛbɛma ɛka a yɛbɔ wɔ anyinam ahoɔden ho no so atew. Yɛbɛyɛ solar panels foforo. Ɛno nti, ɛka a yɛbɔ wɔ anyinam ahoɔden ho no, ɛso bɛtew bɛyɛ dɔla 120,000 afe biara. Afei, yɛbɛyɛ mpomma bi a glass no taa so mmiɛnsa, enti edu awɔwbere a ɛbɛma ɔhyew agyina dan no mu. Wei nti, ɛka a yɛbɔ wɔ anyinam ahoɔden ho no, afe biara ɛso bɛtew bɛyɛ dɔla 10,000. Ɛwom, solar panels ne mpomma no bɛma ɛka a yɛbɛbɔ wɔ dan a yɛresiesie no ho no ayɛ kɛse de, nanso sɛ yɛsese a, awiei koraa no, enkosi bere a ebehia sɛ yɛsesa solar panels ne mpomma no, na ɛka a anka yɛbɛbɔ wɔ anyinam ahoɔden ho no so atew bɛyɛ dɔla ɔpepem 3.5. Afei nso nnua ne nea ɛkeka ho a ɛbɛn dan no, solar panels ne mpomma a yɛbɛyɛ no rensɛe no kɛse, na ɛbɛtew dede so.

 Betel mmienu a yɛreyɛ ho adwuma a yɛaka ho asɛm yi no, ama yɛahu adwuma kɛse a ehia sɛ yɛyɛ na ama yɛn nuanom nsa aka nneɛma a wɔhia na wɔatumi asom Onyankopɔn. Nanso yenwiee adwuma no. Aaron yɛ adwuma wɔ Wiase Nyinaa Adansi Dwumadibea hɔ. Asɛm a ɔkae ni: “Adwuma no fã kɛse no ara de yɛawie, nanso pii wɔ hɔ a ɛsɛ sɛ yɛyɛ.” Yɛbɛyɛ dɛn atumi awie saa adwuma yi? Ɔtoaa so sɛ: “Wɔn a wɔfi wɔn komam yi ntoboa de boa adwuma a ɛho hia yi, ne wɔn a wɔtuu wɔn ho mae bɛboae no, yɛn ani sɔ nea wɔayɛ no. Afei nso, wɔn a wɔretoto nneɛma sɛnea ɛbɛyɛ a daakye wɔbetumi abɛboa no, wɔn nso, yɛda wɔn ase. Ntoboa a yɛn nuanom yi de boa adwuma no ne anuanom a wɔtu wɔn ho ma no, ɛma yehu sɛ Yehowa rehyira adwuma a yɛreyɛ no so paa.”—Dwom 110:3.

 Adan a yesisi ne nea yesiesie no nyinaa, yɛn nuanom fi wɔn pɛ mu na eyi ntoboa ma yɛde yɛ. Anuanom pii de wɔn ntoboa fa donate.pr418.com. Yɛda mo ase paa sɛ mokɔ so yi ntoboa.