Ɔwɛn-Aban a ɛbaa June 1, 1912 no kaa sɛ: “Wɔn a wɔkenkan yɛn nhoma yi, ebia wɔn mu pii nim obi a n’ani afura. Wobetumi anya nhoma akan a wontua hwee . . . . Anifuraefo nhoma a yɛreka yi, wɔapagyapagyaw nkyerɛwee a ɛwom no sɛnea ɛbɛyɛ a anifuraefo betumi akan.” Ɔwɛn-Aban no san kaa sɛ: “Anifuraefo pii wɔ hɔ a, sɛ wɔte sɛ anigye da bi reba ama nhyira aba wiase baabiara a, ɛma wɔn koma tɔ wɔn yam paa.”

 Bere a saa nsɛm no baa Ɔwɛn-Aban no mu no, na aman a wɔka Borɔfo kasa no nni ɔkwan baako a wɔfa so kyerɛw ade ma anifuraefo kenkan. Nanso saa bere no mpo, sɛnea Ɔwɛn-Aban no kae no, na Yehowa Adansefo yɛ nhoma a ɛka Bible mu nokwasɛm wɔ nkyerɛwee a “wɔapagyapagyaw,” kyerɛ sɛ, anifuraefo nkyerɛwee mu, na yennyae besi nnɛ! Seesei yɛwɔ nhoma a yɛde anifuraefo nkyerɛwee ayɛ wɔ kasa bɛboro 50 mu. Sɛn na yɛyɛ no?

 Sɛ woreyɛ nhoma ama anifuraefo a, ade a edi kan ne sɛ wobɛdan nsɛm no akɔ anifuraefo nkyerɛwee mu. Michael Millen yɛ adwuma wɔ Dwumadibea a Wɔhwɛ Ma Wɔhyehyɛ Nsɛm Wɔ Yɛn Nhoma Mu wɔ Patterson, New York. Ɔkaa sɛ: “Kan no, sɛ yɛpɛ sɛ yɛdan nsɛm bi kɔ anifuraefo nkyerɛwee mu a, na yɛtɔ kɔmputa program na yɛde ayɛ. Nanso ɛnyɛ kasa a yɛpɛ nyinaa na na saa program no tumi dan no anifuraefo nkyerɛwee. Seesei de, yɛde program a yɛayɛ a yɛfrɛ no Watchtower Translation System na ɛdan nsɛm kɔ anifuraefo nkyerɛwee mu. Etumi dan nsɛm kɔ anifuraefo nkyerɛwee mu wɔ kasa a ɛwɔ wiase no fã kɛse no ara mu. Minnye nni sɛ program foforo bi wɔ wiase baabi a etumi yɛ saa.”

 Sɛ yɛreyɛ nhoma ama anifuraefo a, ɛnyɛ nsɛm no nko ara na yɛdan kɔ anifuraefo nkyerɛwee mu, na mmom emu mfoni nso, yɛkyerɛkyerɛ mu. Mfoni a ɛda Wubetumi Anya Anigye Daa! nhoma a yɛayɛ ama anifuraefo no akyi sei, nkyerɛkyerɛmu a ɛwɔ ho ne sɛ: “Papa bi nam kwan hihiaa bi so. Kwan no nwonwan, na nhwiren a ɛyɛ fɛ ne mmepɔw wɔ kwan no so.” Onua bi a n’ani afura a wɔfrɛ no Jamshed yɛ asafo mu somfo san yɛ ɔkwampaefo. Ɔkaa sɛ: “Mfoni a wɔkyerɛkyerɛ mu saa no boa me paa.”

 Sɛ yɛdan nsɛm no kɔ anifuraefo nkyerɛwee mu wie a, yɛde kɔma Betel ahorow a wɔyɛ anifuraefo nhoma. Ekodu hɔ a, wɔde nsɛm no tintim krataa so. Saa nkrataa no, ɛyɛ den, na wɔde nsɛm tintim so a, entuetue. Afei nso, sɛ obi kenkan nhoma no mpɛn pii mpo a, nkrataa no mmoammoa. Sɛ yetintim nsɛm no gu nkrataa no so wie a, yɛbobɔ ntokuru wɔ baabi a yɛbɛkeka abom no, na yɛkeka si ani yɛ no nhoma. Yewie a yetumi de ka nhoma a yɛde mena asafo ahorow no ho. Sɛ posɔfese bi nso wɔ nhyehyɛe a wɔma yɛde nneɛma mena anifuraefo a yentua ho sika a, yetumi de fa hɔ nso. Sɛ ɛho behia a, Betel ahorow tumi yɛ nhyehyɛe de nhoma no fa baabi a ebedu ntɛm na ama anuanom a wɔyɛ anifuraefo anaa wɔn ani nhu ade yiye no nsa aka, na wɔatumi de akɔ asafo nhyiam.

 Wei nyinaa gye bere ne sika pii. Nea ɛwom ne sɛ, bere dodow a yɛde yɛ anifuraefo Bible 2 pɛ no, yetumi de saa bere no ara yɛ wɔn a wɔnyɛ anifuraefo Bible 50,000 wɔ baabi a yɛprinte nhoma wɔ Wallkill, New York no. Borɔfo Bible a yɛyɛ ma anifuraefo (nea wɔfrɛ no grade-two) no, ɛwɔ afã mmaako mmaako 25, na woka bom a na wunya Bible baako. Nneɛma a yɛde yɛ anifuraefo Bible baako no, ebetumi ayɛ Bible a wɔyɛ ma wɔn a wɔn ani hu ade mmaako mmaako 123. a Afã 25 a ɛka bom yɛ Bible baako no, ne nyinaa nnuraho nko ara ho ka bɛyɛ Amerika dɔla 150!

 Wɔn a wɔboa ma yɛyɛ anifuraefo Bible no, wohu wɔn adwuma no sɛn? Onuawa bi wɔ South Africa Betel a wɔfrɛ no Nadia. Ɔkaa sɛ: “Yɛn nuanom Kristofo a wɔyɛ anifuraefo anaa wɔn ani nhu ade yiye no, ɛnna fam mma wɔn koraa, enti mihu no sɛ ɛyɛ hokwan kɛse sɛ yetumi yɛ biribi de boa wɔn. Yetumi hu sɛ Yehowa dɔ wɔn papaapa.”

 Sɛ onifuraefo bi ntumi nkan anifuraefo nkyerɛwee nso ɛ? Mfe kakra a atwam no, yɛyɛɛ nhoma bi a wɔde sua sɛnea wɔkenkan anifuraefo nkyerɛwee. Yɛato din Learn to Read Braille, na anifuraefo nkyerɛwee ne wɔn a wohu ade nkyerɛwee na ɛwom. Yɛyɛɛ no sɛ obi a n’ani hu ade mfa mmoa nea n’ani nhu ade mma onsua akenkan. Yɛayɛ ade tratraa bi ne kyerɛwdua aka nhoma no ho a yetumi de kyerɛw anifuraefo nkyerɛwee. Sɛ obi resua anifuraefo nkyerɛwee a, saa nneɛma yi na ɛbɛboa no ama ɔno ara atumi akyerɛw anifuraefo nkyerɛwde no agu krataa so mmaako mmaako. Sɛ ɔkɔ so yɛ no saa a, ɛbɛma nkyerɛwde no aka ne tirim, enti bere biara a ɔde ne nsa bɛfa nkyerɛwde no bi so no, obetumi ahu nkyerɛwde ko.

 Anuanom a wɔyɛ anifuraefo anaa wɔn ani nhu ade yiye no, sɛn na nhoma yi aboa wɔn? Onua bi te Haiti a wɔfrɛ no Ernst. Bere bi a atwam no, na onni anifuraefo nhoma biara a ɔde bɛkɔ adesua. Enti sɛ onya dwumadi anaasɛ ɔpɛ sɛ ɔma mmuae wɔ adesua ase a, gye sɛ ɔkyere biribiara gu ne tirim. Ɔkaa sɛ: “Seesei de mitumi ma me nsa so ma mmuae bere biara a mepɛ. Mitumi hu paa sɛ me ne me nuanom nyinaa yɛ baako. Yɛn nyinaa di honhom fam aduan baako!”

 Asafo mu panyin bi wɔ Austria a n’ani nhu ade yiye. Wɔfrɛ no Jan, na ɔhwɛ Ɔwɛn-Aban Adesua ne Asafo Bible Adesua so. Ɔkaa sɛ: “Asafo nhoma a wɔayɛ ama anifuraefo no, emu da hɔ paa sen anifuraefo nhoma foforo biara a makenkan. Nea ɛma emu da hɔ no bi ne sɛ, kratafa biara wɔ nɔma, na ɛsan wɔ ase hɔ nsɛm a worehwehwɛ a wommrɛ. Afei mfoni biara nso, wɔakyerɛkyerɛ mu pɛpɛɛpɛ.”

 Onuawa kwampaefo bi wɔ South Korea a wɔfrɛ no Seon-ok. N’ani afura, na n’aso nso asiw. Bere bi a atwam no, sɛ ɔkɔ adesua a, gye sɛ obi so ne nsa de mum kasa kyerɛkyerɛ nea ɛrekɔ so no mu kyerɛ no, nanso seesei de, ɔno ara tumi kenkan Bible ho nhoma ahorow wɔ anifuraefo nkyerɛwee mu. Ɔkaa sɛ: “Anifuraefo nhoma a afoforo ayɛ no, ne kan yɛ den efisɛ wobɛhwɛ no na dɔt dɔt a esisi mu a yɛde kenkan no bi ayera anaa akyeakyea anaa krataa a wɔde kyerɛwee no mu yɛ hare dodo. Nanso anifuraefo nhoma a Yehowa Adansefo ayɛ de, wɔde krataa a emu yɛ duru na ayɛ, na dɔt dɔt a yɛde kenkan no nso, ɛyɛ akɛseakɛse, enti mede me nsa sisi so a ɛyɛ mmerɛw sɛ mɛkenkan.” Ɔsan kaa sɛ: “Bere bi a atwam no, sɛ metumi asua Bible ho nhoma a, gye sɛ obi boa me, nanso seesei de, me ara mitumi sua m’ade. Ɛyɛ me dɛ paa sɛ me ara mitumi sua ade ansa makɔ adesua nnawɔtwe biara, na m’ani gye sɛ mitumi ma mmuae nso. Nhoma biara nni hɔ a asafo yɛ ma anifuraefo a menkenkan. Asafo nhoma a wɔayɛ ama anifuraefo no, wubetumi aka mpo sɛ ‘agye me abɔ so.’”

 Asɛm bi wɔ hɔ a yɛkyerɛw wɔ yɛn nhoma a yɛprinte nyinaa mu, na nhoma a yɛyɛ ma anifuraefo nso, yɛkyerɛw wom. Ɛne sɛ: “Nhoma yi, yɛntɔn. Yɛde yɛ Bible nkyerɛkyerɛ adwuma wɔ wiase nyinaa. Nkurɔfo fi wɔn pɛ mu yi ntoboa de boa adwuma no.” Yɛda mo ase sɛ mofa akwan a yɛakyerɛ wɔ donate.pr418.com so yi ntoboa. Mo ayamye nti, yetumi yɛ Bible ho nhoma ma nnipa pii a anifuraefo ne wɔn a wɔn ani nhu ade yiye nso ka ho.