Sɛ biribi a ɛte saa si a, esiane sɛ ɔbarima no akɔware foforo nti, asafo no bebu aware a edi kan no sɛ agu, na wɔabu aware foforo no sɛ edi mu. Nea ɛbɛma yɛate asɛm a yɛreka yi ase no, momma yɛnhwɛ nea Yesu ka faa aware a wogyae na wɔsan ware foforo ho.

Sɛnea Mateo 19:9 ma yehu no, Yesu kaa ade baako pɛ a Kyerɛwnsɛm ma kwan sɛ obi betumi agyina so agyaa aware. Ɔkaa sɛ: “Sɛ ɛnyɛ aguamammɔ nti na obi gyaa ne yere, na ɔsan ware foforo a, wasɛe aware.” Nea yesua fi nea Yesu kae no mu ni: (1) Aguamammɔ nko ara na Kyerɛwnsɛm no ma kwan sɛ obi betumi agyina so agyaa aware. (2) Ɔbarima biara a ne yere mmɔɔ aguaman na obegyaa no asan aware foforo no asɛe aware. *

So Yesu nsɛm yi kyerɛ sɛ, sɛ obi bɔ aguaman na ogyaa ne yere a, Kyerɛwnsɛm no ma no kwan sɛ obetumi aware foforo? Ɛnyɛ saa ankasa na ɛkyerɛ. Sɛ ɔbarima bi sɛe aware a, ne yere a ne ho nni asɛm no na ɔbɛkyerɛ sɛ ɔde bɛkyɛ no, anaa ɔremfa nkyɛ no. Sɛ ɔbea no amfa ankyɛ ɔbarima no na wogu aware no mmara kwan so a, wɔn mu biara betumi akɔware obi foforo.

Ebetumi nso aba sɛ, ɔbea a ne ho nni asɛm no pɛ paa sɛ aware no gyina, enti ɔbɛka akyerɛ ɔbarima no sɛ ɔpɛ sɛ ɔde ne bɔne akyɛ no. Nanso sɛ ɛba sɛ ɔbarima a wasɛe aware no ka sɛ kyenkyen ara a obegyaa aware nso ɛ? Esiane sɛ ɔbea no pɛ sɛ ɔde ɔbarima no bɔne kyɛ no na wɔkɔ so ware nti, Kyerɛwnsɛm no mma ɔbarima no kwan sɛ ɔbɛware foforo. Nanso sɛ ɔbarima no kɔ so ara bu n’ani gu nea Kyerɛwnsɛm no ka no so, na ɔkɔware bere a Kyerɛwnsɛm no mma no kwan a, na wasan asɛe aware. Ɛba saa a, asafo mu mpanyimfo no bɛsan adi n’asɛm.—1 Kor. 5:1, 2; 6:9, 10.

Sɛ ɔbarima a Kyerɛwnsɛm no mma no kwan sɛ ɔware foforo kɔware a, sɛn na asafo no bebu n’aware a edi kan no ne n’aware foforo no? Sɛ wohwɛ Kyerɛwnsɛm no mu a, ɛkyerɛ sɛ aware a edi kan no da so ara di mu anaa? So ɔbea a ne ho nni asɛm no da so ara wɔ hokwan sɛ ɔde ɔbarima no bɔne bɛkyɛ no anaa? Asafo no bebu ɔbarima no sɛ n’aware ngui, ɛnna waware foforo aka ho anaa?

Kan no, sɛ ɔbarima bi sɛe aware na ɔkɔware foforo, na ne yere a ne ho nni asɛm no da so te ase, ɔnwaree anaa ɔnkɔbɔɔ aguaman a, na asafo no bu ɔbarima no sɛ n’aware ngui na waware foforo aka ho. Nanso bere a Yesu reka aware a wogyae san ware foforo ho asɛm no, ɛnyɛ ɔbea a ne ho nni asɛm no na ɔde n’adwene sii ne so. Mmom, nea ɔkae ne sɛ, sɛ ɔbarima bi gyaa aware kɔware foforo bere a Kyerɛwnsɛm no mma no kwan a, na wasɛe aware. Sɛnea Yesu kae no, sɛ ɛba saa a, gyaa a ogyaa aware kɔwaree foforo no te sɛ nea wasɛe aware pɛpɛɛpɛ. Ɛno ma aware a edi kan no gu.

Sɛ ɔbarima bi gyaa aware san kɔware foforo ma aware a edi kan no gu a, sɛ ɔbea a ne ho nni asɛm no de bɛkyɛ no oo, sɛ ɔremfa nkyɛ no oo,  biribi a ɛte saa mma asɛm no mu bio. Ɛno nti, gyinae biara nni hɔ a ɛsɛ sɛ osi sɛ ɔde bɛkyɛ ne kunu dedaw no anaa ɔremfa nkyɛ no; biribi a ɛte saa biara ho adesoa nna no so bio. Afei nso, sɛ ɔbea a ne ho nni asɛm no da so te ase oo, ɔnwaree oo, ɔnkɔbɔɔ aguaman oo, ɛnyɛ ɛno na ɛbɛkyerɛ sɛnea asafo no bebu aware foforo a ɔbarima no de ne ho akɔhyem no. *

Nhwɛso a yɛaka ho asɛm yi mu no, okunu no sɛee aware. Ɛno na ɛmaa aware no gui. Nanso sɛ ɔbarima no ansɛe aware, ɛnna wagyaa ne yere asan akɔware foforo nso ɛ? Anaa yɛmfa no sɛ ɛnyɛ aguaman na ɔbarima no bɔe ansa na ɔregyaa ne yere, na awaregyae no akyi no ɔkɔbɔ aguaman ma ɔbea no ka sɛ ɔde bɛkyɛ no, na ɛno nyinaa akyi no, ɔbarima no twii n’ani kɔware foforo nso ɛ? Wɔ nhwɛso a yɛaka ho asɛm yi nyinaa mu no, aware a wogyae san ware bio no yɛ awaresɛe, na ɛma aware a edi kan no gu. Wei kyerɛ sɛ aware foforo no di mu wɔ mmara kwan so. Sɛnea yɛkaa ho asɛm wɔ November 15, 1979, Ɔwɛn-Aban, Borɔfo de no, kratafa 32 mu no, “Seesei ɔbarima no aware foforo, enti ɔrentumi nka kɛkɛ sɛ ɔregyaa aware foforo yi, na wasan akɔfa ne yere dedaw no. Bere a ɔbarima no gyaa aware, kɔbɔɔ aguaman, na ɔsan waree foforo no, ɛmaa aware dedaw no gui.”

Ntease foforo a yɛanya yi nkyerɛ sɛ, sɛnea aware yɛ kronkron na awaresɛe yɛ bɔne a emu yɛ duru no, seesei yemmu no saa bio. Sɛ ɛnyɛ aguamammɔ nti na ɔbarima bi gyaa ne yere kɔware foforo a, asafo mu mpanyimfo bɛbɔ no sobo sɛ wasɛe aware, na wɔadi n’asɛm. (Ɔbea a ɔkɔwaree no no, sɛ ɔyɛ Kristoni a, mpanyimfo no bɛbɔ ɔno nso sobo sɛ wasɛe aware, na wɔadi n’asɛm.) Ɛwom, asafo no mufo remmu ɔbarima no sɛ n’aware ngui na waware foforo aka ho, nanso ɔbarima no rennya hokwan titiriw biara wɔ asafo no mu kosi sɛ mfe pii betwam. Afei nso, ɔrennya hokwan titiriw biara kosi sɛ wɔn a ne bɔne no ahaw wɔn no bo bedwo, na wɔasan anya obu ama no. Bio nso, sɛ wɔbɛma no hokwan bi a, ɔbea a ogyaa no yayaayaw, ne mmofra a ebia ogyaa wɔn guu ɔbea no so no, ɛsɛ sɛ asafo mu mpanyimfo hwɛ sɛ asɛm no da so ara haw wɔn anaa.—Mal. 2:14-16.

Aware a wogyae san kɔware foforo a ennyina Kyerɛwnsɛm so no, ɛde nsunsuanso bɔne pii ba. Wei nti, sɛnea Yehowa bu aware sɛ ɛyɛ kronkron no, saa ara na ɛsɛ sɛ Kristofo a wosusuw ade ho kɔ akyiri nso bu aware.—Ɔsɛnk. 5:4, 5; Heb. 13:4.