1. Adɛn nti na yɛma mmuae wɔ adesua ase?

 ADƐN nti na yɛkɔ adesua? Nea enti paa a yɛkɔ adesua ne sɛ yekoyi Yehowa ayɛ. (Dw. 26:12; 111:1) Afei nso, adesua a yɛkɔ no boa yɛn ma yɛhyehyɛ yɛn ho yɛn ho nkuran wɔ mmere a emu yɛ den yi mu. (1 Tes. 5:11) Enti, sɛ yɛma yɛn nsa so ma mmuae a, ɛkyerɛ sɛ yɛreyɛ saa nneɛma mmienu no nyinaa.

2. Hokwan bɛn na yɛwɔ a yebetumi de ama mmuae wɔ adesua ase?

² Nnawɔtwe biara, yenya hokwan a yebetumi de ama mmuae wɔ adesua ase. Yɛbɛyɛ nhwɛso a, edu nnawɔtwe awiei na yɛreyɛ Ɔwɛn-Aban Adesua no a, yebetumi ama mmuae. Nnawɔtwe mfinimfini adesua no nso, sɛ yɛreyɛ Tweetwee Bible Mu, Asafo Bible Adesua, anaa sɛ ɔkasa ne atiefo nkɔmmɔbɔ bi wom a, yebetumi ama mmuae.

3. Dɛn na ebetumi ama ayɛ den ama yɛn sɛ yɛbɛma mmuae, na sɛn na Hebrifo 10:24, 25 betumi aboa yɛn?

³ Yɛn nyinaa pɛ sɛ yeyi Yehowa ayɛ, na yɛhyɛ yɛn nuanom Kristofo nkuran. Nanso nneɛma bi betumi ama ayɛ den sɛ yɛbɛma mmuae. Ebia yɛn yam bɛhyehye yɛn, anaa ebi nso a na yɛpɛ paa sɛ yɛma mmuae, enti yɛn yam a anka yɛmaa yɛn nsa so ara a, na wɔafrɛ yɛn, nanso ɛyɛ a ɛmma saa. Dɛn na ɛbɛboa yɛn ma yɛadi saa ɔhaw yi so? Asɛm bi a ɔsomafo Paul kyerɛw kɔmaa Hebrifo no betumi aboa yɛn ma yɛanya mmuae no. Ɔkaa sɛ ɛho hia paa sɛ yehyiam, na ɔkyerɛɛ mu sɛ, sɛ yehyiam a, yɛmfa nyɛ yɛn botae sɛ ‘yɛbɛhyehyɛ yɛn ho nkuran.’ (Kenkan Hebrifo 10:24, 25.) Sɛ yehu sɛ mmuae tiawa bi mpo a yɛbɛma no betumi ahyɛ atiefo nkuran a, ɛbɛkanyan yɛn ama yɛama mmuae; ɛremma ehu nkyekyere yɛn. Afei nso, mmuae  dodow a yɛpɛ sɛ yɛma no, sɛ amma saa mpo a, yɛn ani betumi agye efisɛ ɛbɛma afoforo a ɛwɔ asafo no mu nso anya hokwan ama mmuae.—1 Pet. 3:8.

4. Nneɛma mmiɛnsa bɛn na yebesusuw ho wɔ adesua yi mu?

⁴ Dɛn na yebesusuw ho wɔ adesua yi mu? Nea edi kan, sɛ yɛwɔ asafo a emufo nnɔɔso mu, na mmuae no taa kogyina nnipa kakraa bi so a, yɛbɛhwɛ sɛnea yebetumi ahyehyɛ yɛn ho nkuran. Ɛno akyi no, sɛ yɛwɔ asafo a emufo dɔɔso mu, na nnipa pii pɛ sɛ wɔtaa ma mmuae a, ɛno nso, yɛbɛhwɛ sɛnea yebetumi ahyehyɛ yɛn ho nkuran. Ne korakora no, yɛbɛhwɛ sɛnea yebetumi ama yɛn mmuae ahyɛ afoforo nkuran.

5. Sɛ yɛwɔ asafo a emufo nnɔɔso mu a, yɛbɛyɛ dɛn ahyehyɛ yɛn ho nkuran?

⁵ Asafo anaa kuw a emufo nnɔɔso mu no, ɛyɛ a nnipa pii ntaa mma wɔn nsa so mma mmuae. Ɛtɔ da a, nea ɔrehwɛ adesua no so no, ebia ebehia sɛ ɔtwɛn kakra ma obi ma ne nsa so ansa na wanya obi afrɛ no. Ɛba saa a, ebia ɛremma adesua no nyɛ dɛ. Tebea a ɛte saa mu no, dɛn na wubetumi ayɛ? Ɛyɛ a, bɔ mmɔden ma wo nsa so mpɛn pii. Woyɛ saa a, ebia ɛbɛkanyan afoforo ma wɔn nso ataa ama mmuae.

6-7. Yɛpɛ sɛ yɛma mmuae a, yɛbɛyɛ dɛn na yɛn yam anhyehye yɛn pii?

⁶ Sɛ wopɛ sɛ woma mmuae na wo yam hyehye wo a, dɛn na wubetumi ayɛ? Biribi a ɛte saa tumi to nnipa bebree. Nanso wubetumi ahwɛ nea woyɛ a ɛremma wo yam nhyehye wo pii bere a worema mmuae, na ama woatumi ahyɛ wo nuanom nkuran yiye. Wobɛyɛ no sɛn?

⁷ Nyansahyɛ a ɛwɔ Ɔwɛn-Aban a aba dedaw mu no, sɛ wususuw emu bi ho a, ebetumi aboa wo. b Ebi ne sɛ wubesiesie wo ho yiye. (Mmeb. 21:5) Sɛ wote nea yɛresusuw ho no ase yiye a, ɛbɛma ayɛ mmerɛw ama wo sɛ wobɛma mmuae. Afei nso, ma wo mmuae no nyɛ tiawa. (Mmeb. 15:23; 17:27) Sɛ woma mmuae ntiantia a, ɛremma wo yam nhyehye wo pii. Sɛ yɛn mmuae no yɛ tiawa, ebia ɔkasamu baako anaa mmienu pɛ a, ebia ɛno mpo bɛyɛ mmerɛw ama anuanom sɛ wɔbɛte ase sen sɛ yɛbɛkeka nsɛntitiriw no nyinaa abom de ama mmuae tenteenten. Sɛ wo ara wode wo nsɛm ma mmuae tiawa a, ɛbɛkyerɛ sɛ woasiesie wo ho yiye, na wote nea moresua no ase paa.

8. Sɛn na Yehowa hu mmɔden biara a yɛbɔ no?

⁸ Yɛmfa no sɛ wode nyansahyɛ yi bi ayɛ adwuma, nanso wo yam da so ara hyehye wo sɛ wobɛma mmuae pii. Ɛnde, nya awerɛhyem sɛ mmɔden biara a wobɛbɔ no, Yehowa ani bɛsɔ. (Luka 21:1-4) Yehowa nka sɛ yɛnyɛ biribi a ɛboro yɛn ahoɔden so. (Filip. 4:5) Fa botae a wubetumi adu ho si w’ani so, na srɛ Yehowa sɛ ɔmmoa wo na wo yam anhyehye wo pii. Ahyɛase no de, wubetumi de asi w’ani so sɛ wobɛma mmuae tiawa baako.

9. Sɛ yɛwɔ asafo a emufo dɔɔso mu a, adɛn nti ebetumi ayɛ den sɛ yɛbɛma mmuae?

⁹ Sɛ w’asafo mufo dɔɔso na wopɛ sɛ woma mmuae a, ebia ɛnyɛ bere nyinaa na wɔbɛfrɛ wo, efisɛ ebia na anuanom pii nso ama wɔn nsa so. Yɛbɛyɛ nhwɛso a,  Danielle ani gye ho sɛ bere nyinaa ɔbɛma mmuae wɔ adesua ase. c Ohu no sɛ ɛka ne som ho. Obu no sɛ ɛyɛ ɔkwan baako a ɔfa so hyɛ afoforo nkuran. Afei nso, ɛboa no ma gyidi a ɔwɔ wɔ Bible mu no yɛ kɛse. Nanso bere a ɔkɔɔ asafo a emufo dɔɔso mu no, na wɔntaa mfrɛ no; ɛtɔ da koraa a adesua no nyinaa mu no, onnya baako mpo mma. Ɔkaa sɛ, “Ɛhaw me paa. Metee nka sɛ asɛ hokwan bi a mewɔ abɔ me. Sɛ ɛyɛ saa toatoa so a, mibisa me ho sɛ, adɛn, ɛyɛ boapayɛ anaa?”

10. Yɛbɛyɛ dɛn anya hokwan pii ama mmuae?

¹⁰ Sɛnea Danielle tee nka no, wo nso woate nka saa pɛn? Sɛ biribi a ɛte saa ato wo pɛn a, ebia ɛbɛyɛ wo sɛ pɛ wo baabi tena na tie adesua no bi kɛkɛ. Nanso nnyae sɛ wobɛbɔ mmɔden ama mmuae. Dɛn na wubetumi ayɛ? Adesua biara a wobɛkɔ no, sɛ wusiesie mmuae dodow bi a, ebia ɛbɛboa wo. Sɛ ɛba saa na adesua no ahyɛase no, wɔamfrɛ wo a, adesua no rekɔ so no, wubetumi asan anya hokwan a wode bɛma mmuae. Sɛ woresiesie wo ho ama Ɔwɛn-Aban Adesua no a, hwɛ sɛnea nkyekyɛm biara fa adesua no asɛmti no ho. Woyɛ saa a, bere a adesua no rekɔ so no, ɛnyɛ dɛn ara a wubenya biribi aka. Afei nso, nkyekyɛm ahorow a ɛka Bible nkyerɛkyerɛ a emu yɛ den ho asɛm no, wubetumi asiesie wo ho ama saa nkyekyɛm no, na sɛ edu hɔ a, woama mmuae. (1 Kor. 2:10) Adɛn ntia? Efisɛ edu saa ɔfã no a, ebia nnipa kakraa bi na ɛbɛma wɔn nsa so. Na sɛ wode nyansahyɛ yi nyinaa ayɛ adwuma, na moakɔ adesua dodow bi nanso wunnyaa kwan mmaa mmuae a, dɛn na wobɛyɛ? Ansa na adesua no befi ase no, wubetumi akohu nea ɔhwɛ adesua no so no, na woaka asɛmmisa a wopɛ sɛ woma ho mmuae no akyerɛ no.

11. Dɛn na Filipifo 2:4 hyɛ yɛn nkuran sɛ yɛnyɛ?

¹¹ Kenkan Filipifo 2:4. Onyankopɔn nam ne honhom so maa ɔsomafo Paul hyɛɛ Kristofo nkuran sɛ wɔnnwen afoforo ho. Yɛkɔ adesua a, yɛbɛyɛ dɛn de saa afotusɛm yi ayɛ adwuma? Ɛsɛ sɛ yɛkae sɛ, sɛnea yɛpɛ sɛ yɛma mmuae no, saa ara na afoforo nso pɛ sɛ wɔma mmuae.

12. Ɔkwan pa bɛn na yebetumi afa so ahyɛ afoforo nkuran wɔ adesua ase? (Hwɛ mfoni no nso.)

 ¹² Dwinnwen ho sei hwɛ. Sɛ wo ne wo nnamfo rebɔ nkɔmmɔ a, wubegye nkɔmmɔ no abɔ so? Yennye nni sɛ wobɛyɛ saa! Wopɛ sɛ wɔn nso ka bi. Yɛkɔ adesua nso a, yɛpɛ sɛ nnipa bebree nya kwan ma mmuae. Nokwasɛm ne sɛ, ɔkwan pa baako a yebetumi afa so ahyɛ yɛn nuanom nkuran ne sɛ yɛbɛma wɔn kwan ma wɔn nso ama mmuae. (1 Kor. 10:24) Momma yɛnhwɛ sɛnea yebetumi ayɛ saa.

13. Yɛbɛyɛ dɛn ama nkurɔfo pii anya kwan ama mmuae?

¹³ Ade baako ne sɛ, yebetumi ama yɛn mmuae ayɛ tiawa, sɛnea ɛbɛyɛ a afoforo nso benya bere no bi ama mmuae. Ehia sɛ mpanyimfo ne adawurubɔfo a wɔn ho akokwaw yɛ wei ho nhwɛso. Sɛ worema mmuae tiawa mpo a, nkeka nsɛntitiriw pii mmobɔ so. Sɛ woka biribiara a ɛwɔ nkyekyɛm no mu a, ɛbɛyɛ dɛn na ebi aka ama afoforo nso aka bi? Sɛ yɛbɛyɛ nhwɛso a, nkyekyɛm yi mu no, yɛaka nyansahyɛ mmienu ho asɛm. Ɛne sɛ, yɛbɛma yɛn mmuae ayɛ tiawa na yɛnkeka nsɛntitiriw pii mmobɔ so. Enti sɛ yɛresusuw nkyekyɛm yi ho, na wo na wɔbedi kan afrɛ wo a, yɛsrɛ wo ka asɛntitiriw baako pɛ ho asɛm.

14. Dɛn na ɛbɛboa yɛn ama yɛahu mpɛn dodow a yɛbɛma yɛn nsa so? (Hwɛ mfoni no nso.)

¹⁴ Da nhumu adi na ama woahu mpɛn dodow a wobɛma mmuae. Sɛ yɛma yɛn nsa so dodo a, ebia ɛbɛhyɛ nea ɔrehwɛ adesua no so no ma wafrɛ yɛn ntoatoaso bere mpo a afoforo nnyaa kwan nkasae. Wei betumi abu afoforo abam, na ɛbɛyɛ den ama wɔn sɛ wɔbɛma wɔn nsa so.—Ɔsɛnk. 3:7.

15. (a) Sɛ yɛma yɛn nsa so na wɔamfrɛ yɛn a, dɛn na ɛnsɛ sɛ yɛyɛ? (b) Wɔn a ɛhwɛ adesua so no, dɛn na wɔbetumi ayɛ na nnipa dodow no ara atumi ama mmuae? (Hwɛ adaka a yɛato din “ Sɛ Worehwɛ Adesua So a” no.)

¹⁵ Sɛ adawurubɔfo pii pɛ sɛ wɔma  mmuae a, ebia yɛrentumi mma mmuae dodow a yɛpɛ no. Ɛtɔ mmere bi a, ebia nea ɔrehwɛ adesua no so no rentumi mfrɛ yɛn koraa. Wei betumi ayɛ yɛn yaw, nanso sɛ wɔamfrɛ yɛn a, ɛnsɛ sɛ yɛn bo fuw.—Ɔsɛnk. 7:9.

16. Yɛbɛyɛ dɛn ahyɛ wɔn a ɛma mmuae no nkuran?

¹⁶ Sɛ wuntumi mma mmuae dodow a wopɛ a, adɛn nti na sɛ afoforo rema mmuae a wuntie no yiye, na sɛ yɛpɔn a woakɔkamfo wɔn? Ebia sɛnea anka wo mmuae no bɛhyɛ wo nuanom nkuran no, saa ara na nkamfo a wode bɛma wɔn no nso bɛhyɛ wɔn nkuran. (Mmeb. 10:21) Kamfo a yɛbɛkamfo afoforo no yɛ ɔkwan foforo a yebetumi afa so ahyehyɛ yɛn ho nkuran.

17. (a) Awofo bɛyɛ dɛn aboa wɔn mma ma wɔasiesie mmuae a ɛfata? (b) Video no mu no, nneɛma nnan bɛn na yebetumi ayɛ de asiesie mmuae a yɛbɛma? (Hwɛ ase hɔ asɛm no.)

¹⁷ Dɛn bio na yebetumi ayɛ de ahyehyɛ yɛn ho nkuran wɔ adesua ase? Sɛ woyɛ ɔwofo a, hwɛ mfe a wo mma adi, na boa wɔn ma wɔnsiesie mmuae a ɛfata. (Mat. 21:16) Ɛtɔ da a, adesua no tumi ka nneɛma bi a emu dɔ te sɛ awaresɛm anaa ɔbrapa ne ɔbra a ɛmfa kwan mu ho  asɛm. Nanso ebia nkyekyɛm baako anaa mmienu bi de, sɛ yɛresusuw ho a, abofra betumi ama mmuae. Afei nso, ɛnyɛ bere nyinaa na wo mma ma wɔn nsa so a wɔbɛfrɛ wɔn, enti boa wɔn ma wɔnhu nea enti a ɛte saa. Sɛ wokyerɛkyerɛ mu kyerɛ wɔn, na ɛkɔba sɛ wɔfrɛ obi foforo na wɔamfrɛ wɔn a, ɛrenyɛ wɔn yaw.—1 Tim. 6:18. d

18. Sɛ yɛrema mmuae a, yɛbɛyɛ dɛn na yɛanhyɛ yɛn ho anuonyam? (Mmebusɛm 27:2)

¹⁸ Yɛn nyinaa betumi asiesie mmuae a etu mpɔn a ɛbɛhyɛ Yehowa anuonyam na ahyɛ yɛn mfɛfo Kristofo nso nkuran. (Mmeb. 25:11) Ɛwom, ɛtɔ da a yebetumi aka yɛn suahu tiawa, nanso ɛnsɛ sɛ daa na yɛn suahu da yɛn ano. (Kenkan Mmebusɛm 27:2; 2 Kor. 10:18) Mmom, yɛbɔ mmɔden sɛ yɛde yɛn adwene besi Yehowa, n’Asɛm ne ne nkurɔfo so. (Adi. 4:11) Ɛwom, sɛ asɛmmisa no hwehwɛ sɛ yɛka yɛn suahu a, ɛnde ebehia sɛ yɛka. Wei ho nhwɛso na ɛwɔ nkyekyɛm a edi hɔ no mu no.

19. (a) Sɛ yɛkɔ adesua na yɛkyerɛ sɛ yedwen obiara ho a, dɛn na ebefi mu aba? (Romafo 1:11, 12) (b) Mmuae a yɛma wɔ adesua ase no, dɛn na w’ani gye ho wɔ ho?

¹⁹ Ɛwom, mmara ketee biara nni hɔ a ɛkyerɛ sɛnea ɛsɛ sɛ yɛma mmuae, nanso yɛn nyinaa betumi abɔ mmɔden ahyehyɛ yɛn ho nkuran. Wei kyerɛ sɛ tebea bi mu no, ebia ebehia sɛ yɛtaa ma mmuae. Anaa ebetumi akyerɛ sɛ mmuae kakra a yetumi ma no, yɛbɛma yɛn ani asɔ. Afei nso, sɛnea yɛn ani gye ho sɛ yɛbɛma mmuae no, ɛsɛ sɛ yɛkae sɛ saa ara na afoforo nso pɛ sɛ wɔma mmuae. Sɛ yɛkɔ adesua, na yɛannwen yɛn nko ara ho, na yedwen afoforo nso ho a, yɛn mu biara betumi ‘de ne gyidi ahyɛ ne yɔnko nkuran.’—Kenkan Romafo 1:11, 12.