1. Sɛnea 1 Tesalonikafo 5:11 kyerɛ no, adwuma bɛn na yɛn nyinaa reyɛ bi?

 MO ASAFO no asi Ahenni Asa anaa asiesie Ahenni Asa bi a asɛe pɛn? Sɛ saa a, yegye di sɛ wokae da a edi kan a mokɔɔ adesua wɔ Ahenni Asa foforo no mu no. W’ani sɔɔ nea Yehowa ayɛ ama mo no paa. Ebia w’ani gyei ara ma w’ani koraa tetɛwee, enti na ɛyɛ den sɛ wobɛto dwom a na mode rehyɛ ase no. Yɛn Ahenni Asa a yesisi no kamakama no de ayeyi brɛ Yehowa. Nanso nea ɛde ayeyi kɛse brɛ Yehowa paa ne adansi adwuma foforo bi a yɛyɛ no. Saa adwuma no de, ɛsom bo koraa sen adan ankasa a yesisi. Ɛne sɛ, nnipa a ɛba mmeae a yehyiam som no, yɛhyɛ wɔn den. Saa asɛm yi na na ɛwɔ ɔsomafo Paul adwene mu bere a ɔkyerɛw asɛm a ɛwɔ 1 Tesalonikafo 5:11 no. Ɛno ne kyerɛwsɛm a adesua yi gyina so.—Kenkan.

2. Dɛn na yebesusuw ho wɔ adesua yi mu?

² Sɛ yɛreka wɔn a wotumi hyɛ wɔn nuanom Kristofo nkuran paa a, yɛrentumi nka nnyaw ɔsomafo Paul. Ná ɔwɔ tema ma anuanom. Adesua yi mu no, yɛbɛhwɛ sɛnea ɔboaa anuanom (1) ma wotumi gyinaa sɔhwɛ ano, (2) ma wotumi ne wɔn ho wɔn ho tenaa asomdwoe mu, ne (3) ma wɔhyɛɛ gyidi a wɔwɔ wɔ Yehowa mu no den. Momma yɛnhwɛ sɛnea yebetumi asuasua no na yɛahyɛ anuanom den.—1 Kor. 11:1.

3. Dɛn na Paul yɛe a ɛkyerɛ sɛ ɔde nea ehia paa dii kan?

³ Ná Paul dɔ anuanom paa. Ná wakɔ ahokyere mu pɛn, enti bere a anuanom rehyia sɔhwɛ no, na obetumi anya ayamhyehye ne tema ama wɔn. Bere bi Paul sika sae, enti na ɛsɛ  sɛ ɔpɛ adwuma bi yɛ na watumi ahwɛ ne ho ne wɔn a na ɛka ne ho no. (Aso. 20:34) Ná ɔyɛ ntamadan. Bere a okoduu Korinto no, odii kan ne Akwila ne Priskila yɛɛ ntamadan adwuma, efisɛ saa adwuma no ara na na wɔn nso yɛ. Nanso “homeda biara,” na ɔka asɛm no kyerɛ Yudafo ne Greecefo. Afei bere a Silas ne Timoteo bae no, “Paul fii ase de ne bere nyinaa kaa asɛm no.” (Aso. 18:2-5) Ade titiriw a na esi Paul ani so wɔ n’asetenam no, ne werɛ amfi da; ɛne sɛ ɔbɛsom Yehowa. Esiane sɛ na Paul yere ne ho yɛ asɛnka adwuma no, na ɔsan yɛ adwuma de hwɛ ne ho nti, otumi hyɛɛ ne nuanom nkuran. Ɔkaee wɔn sɛ, ɛnsɛ sɛ wɔma asetena mu dadwen ne nea wɔbɛyɛ de ahwɛ wɔn mmusua ma wɔn werɛ fi “nneɛma a ehia paa no.” Saa nneɛma no ne biribiara a yɛyɛ de som Yehowa.—Filip. 1:10.

4. Dɛn na Paul ne Timoteo yɛ de boaa wɔn mfɛfo gyidifo ma wotumi gyinaa ɔsɔretia ano?

⁴ Bere a wɔtew Tesalonika asafo no, ankyɛ koraa na wɔn a wɔabɛyɛ Kristofo foforo no hyiaa ɔsɔretia a emu yɛ den. Bere a basabasayɛfo bi a wɔmpɛ sɛ wotie asɛm no anhu Paul ne Silas no, wɔtwee “anuanom binom kɔmaa kurow no mu atumfo,” na wɔteɛteɛɛm sɛ: “Saa mmarima yi nyinaa sɔre tia Kaesare ahyɛde.” (Aso. 17:6, 7) Bere a anuanom a wɔabɛyɛ Kristofo foforo yi hui sɛ kurow no mu mmarima asɔre atia wɔn no, wo de, hwɛ sɛnea wɔn ho bedwiriw wɔn afa! Anka wei betumi ama wɔagow wɔn ho wɔ Yehowa som mu, nanso na Paul mpɛ sɛ biribi a ɛte saa besi. Ɛwom, na ɛsɛ sɛ ɔne Silas fi kurow no mu, nanso wɔde nhyehyɛe guu akwan mu a na ɛbɛma asafo foforo no anya nkɔso. Paul kaee Tesalonikafo no sɛ: “Yɛsomaa Timoteo a ɔyɛ yɛn nua . . . no, sɛ ɔmmɛhyɛ mo den na ɔnkyekye mo werɛ mma mo gyidi nyɛ den, sɛnea ɛbɛyɛ a amanehunu yi remma obiara nhinhim.” (1 Tes. 3:2, 3) Ɛbɛyɛ sɛ Timoteo ankasa nso hyiaa ɔsɔretia wɔ ne kurom Listra. Ohuu sɛnea Paul hyɛɛ anuanom den wɔ hɔ. Esiane sɛ Timoteo huu sɛnea Yehowa boaa wɔn nti, na obetumi ama wɔn a wɔabɛyɛ Kristofo foforo yi awerɛhyem sɛ, wɔn nso, biribiara bɛyɛ yiye ama wɔn.—Aso. 14:8, 19-22; Heb. 12:2.

5. Sɛn na asafo mu panyin bi boaa onua bi a ne din de Bryant?

⁵ Dɛn bio na Paul yɛ de hyɛɛ ne mfɛfo gyidifo den? Bere a Paul ne Barnaba san kɔɔ Listra, Ikoniom ne Antiokia no, “wɔpaw mpanyimfo maa wɔn wɔ asafo biara mu.” (Aso. 14:21-23) Ɛda adi sɛ, mpanyimfo a wɔpaw wɔn no kyekyee nsafo no mufo werɛ. Ɛnnɛ nso, saa ara na asafo mu mpanyimfo yɛ. Momma yɛnhwɛ asɛm bi a onua bi a ne din de Bryant kae. Ɔkaa sɛ: “Midii mfe 15 no, me papa gyaw yɛn hɔ, na wotuu me maame nso fii asafo no mu. Metee nka sɛ minni boafo biara, na m’abam bui.” Dɛn na ɛboaa Bryant ma otumi gyinaa ɔhaw kɛse yi ano? Ɔka sɛ: “Ná asafo mu panyin bi a ne din de Tony ne me bɔ nkɔmmɔ wɔ adesua ase ne mmere afoforo. Ɔkaa nnipa bi a wohyiaa sɔhwɛ nanso na wɔwɔ anigye ho asɛm kyerɛɛ me. Ɔkan Dwom 27:10 kyerɛɛ me, na na ɔtaa ka Hesekia ho asɛm kyerɛ me; ɛwom sɛ ne papa anyɛ nhwɛso pa, nanso ɔno de, ɔde nokwaredi som Yehowa.” Nea asafo mu panyin no yɛe no, ɛboaa Bryant sɛn? Bryant ka sɛ: “Nkuranhyɛ a Tony de maa me nti, akyiri yi, mifii ase yɛɛ bere nyinaa som adwuma no bi, na ama me koma atɔ me yam.” Asafo mu mpanyimfo, momfa mo ani nto fam na sɛ muhu ebinom te sɛ Bryant a wohia “asɛmpa” a ɛbɛhyɛ wɔn nkuran a, moaboa wɔn.—Mmeb. 12:25.

6. Sɛn na Paul de nsɛm a esisii hyɛɛ anuanom nkuran?

 ⁶ Paul kaee ne nuanom Kristofo sɛ, esiane sɛ Yehowa hyɛɛ “adansefo mununkum kɛse” no den nti, wotumi gyinaa sɔhwɛ biara a wohyiae ano. (Heb. 12:1) Paul hui sɛ sɔhwɛ ahorow a tetefo no faa mu a wotumi gyinaa mu no, ebetumi ama ne nuanom Kristofo anya akokoduru, na aboa wɔn ma wɔde wɔn ani asi “Onyankopɔn teasefo no kurow” no so. (Heb. 12:22) Ɛnnɛ nso, saa ara na ɛboa yɛn. Sɛnea Yehowa boaa Gideon, Barak, Dawid, Samuel ne afoforo pii no, hena na sɛ ɔkan ho asɛm a ɛnhyɛ no den? (Heb. 11:32-35) Anuanom a wɔde nokwaredi asom Yehowa wɔ yɛn bere yi so no, wɔn nso, wɔn gyidi no nhyɛ yɛn den anaa? Anuanom taa kyerɛw brɛ yɛn wɔ wiase nyinaa adwumayɛbea ti ha sɛ, bere a wɔkenkan Yehowa asomfo anokwafo a wɔwɔ yɛn bere yi so binom asetenam nsɛm no, ahyɛ wɔn gyidi den.

7. Afotu a Paul de mae a ɛwɔ Romafo 14:19-21 no, dɛn na wusua fi mu?

⁷ Sɛ yɛyere yɛn ho ma asomdwoe tena asafo no mu a, ɛhyɛ anuanom den. Sɛ yɛne obi adwene nhyia wɔ biribi ho a, ɛnsɛ sɛ yɛma ɛde mpaapaemu ba yɛn mu. Sɛ ɛnyɛ sɛ obi rebu Bible nnyinasosɛm bi so a, ɛnsɛ sɛ yɛma yɛn asɛm yɛ twann. Momma yɛnhwɛ nhwɛso bi. Asafo a na ɛwɔ Roma no, na Yudafo ne Amanaman mufo nyinaa bi wom. Bere a Mose Mmara no baa awiei no, nnuan bi a na anka wɔabara no, afei de na obiara betumi adi. (Mar. 7:19) Efi saa bere no rekɔ no, Yudafo a wɔabɛyɛ Kristofo no mu bi tee nka sɛ wobetumi adi aduan biara a wɔpɛ. Nanso Yudafo a wɔabɛyɛ Kristofo no binom de, wɔtee nka sɛ ɛnyɛ papa sɛ wobedi nnuan a ɛte saa. Wei de mpaapaemu baa asafo no mu. Paul sii so dua sɛ ɛho hia paa sɛ wɔma asomdwoe di hene, enti ɔkaa sɛ: “Ɛyɛ papa sɛ worenwe nam anaa worennom nsã anaa worenyɛ biribiara a ɛbɛto wo nua hintidua.” (Kenkan Romafo 14:19-21.) Paul boaa ne mfɛfo gyidifo ma wobehui sɛ mpaapaemu a ɛte saa betumi de ɔhaw abrɛ ankorankoro ne asafo mu no nyinaa. Ná ɔno ara nso wɔ ɔpɛ sɛ ɔbɛyɛ nsakrae biara a ehia na wanto afoforo hintidua. (1 Kor. 9:19-22) Yɛn nso, nneɛma a ɛsono gyinae a obiara besi wɔ ho no, sɛ yɛantwe no twann a, yɛbɛhyɛ afoforo den, na aboa ma asomdwoe atena yɛne wɔn ntam.

8. Bere a asɛnkɛse bi sii a anka ɛreyɛ asɛe asafo no asomdwoe no, dɛn na Paul yɛe?

⁸ Sɛ nsɛm bi a ɛho hia sɔre, na anuanom adwene nhyia wɔ ho a, Paul yɛɛ nhwɛso fɛfɛɛfɛ a ɛbɛboa ama asomdwoe atena asafo no mu. Yɛbɛyɛ nhwɛso a, tete Kristofo asafo no mu no, ebinom gye gyinaa mu denneennen sɛ Amanaman mufo a wɔabɛyɛ Kristofo no ntwa twetia. Ebia wɔyɛɛ saa, na amma wɔn a enni asafo no mu ankasa antia wɔn. (Gal. 6:12) Ná Paul ne wɔn nyɛ adwene koraa, nanso wanka sɛ kyenkyen ara a, wonnye nea ɔreka no ntom. Mmom, ɔbrɛɛ ne ho ase kaa sɛ wɔmfa asɛm no nkɔdan asomafo ne mpanyimfo a ɛwɔ Yerusalem no. (Aso. 15:1, 2) Sɛnea Paul dii asɛm no ho dwuma nti, ɛboaa Kristofo no ma wɔanyɛ biribiara amfa ansɛe anigye ne asomdwoe a na ɛwɔ asafo no mu no.—Aso. 15:30, 31.

9. Yɛbɛyɛ dɛn asuasua nea Paul yɛe no?

⁹ Sɛ asɛm bi si na ɛde akasakasa a emu yɛ den ba asafo no mu a, wɔn a Yehowa apaw wɔn sɛ wɔnhwɛ asafo no so no, ɛsɛ sɛ yɛhwehwɛ akwankyerɛ fi wɔn hɔ. Yɛyɛ saa a,  ɛkyerɛ sɛ yɛpɛ sɛ asomdwoe tena asafo no mu. Mpɛn pii no, nhoma ahorow ne akwankyerɛ a asafo no de ma yɛn no, yebetumi anya akwankyerɛ a egyina Bible so afi mu. Sɛ yɛanyɛ nea yɛn ara yɛte nka sɛ eye wɔ yɛn ani so, na yɛde akwankyerɛ a wɔde ama yɛn no yɛ adwuma a, ɛbɛboa ama asomdwoe atena asafo no mu.

10. Dɛn bio na Paul yɛe a ɛkyerɛ sɛ na ɔpɛ sɛ asomdwoe tena asafo no mu?

¹⁰ Paul amfa n’adwene ankɔ anuanom mmerɛwyɛ so, mmom ɔtwee adwene sii suban pa a anuanom wɔ so. Ɔyɛɛ wei de kyerɛe sɛ ɔpɛ sɛ asomdwoe tena asafo no mu. Ɛho nhwɛso ne sɛ, Paul krataa a ɔkyerɛw kɔmaa Romafo no, bere a ɔde reba awiei no, ɔbobɔɔ nnipa pii din. Mpɛn pii no, na ɔka asɛmpa anaa biribi pɔtee bi fa wɔn ho. Yebetumi asuasua Paul na yɛataa aka anuanom suban pa ho asɛm. Yɛyɛ saa a, ɛma yɛne yɛn nuanom fa adamfo denneennen, na ɛboa ma ɔdɔ tena asafo no mu.

11. Sɛ mente-me-ho-ase bi sɔre a, dɛn na yɛbɛyɛ ama asomdwoe aba?

¹¹ Ɛtɔ da a, Kristofo a wɔn ho akokwaw mpo, mente-me-ho-ase anaa akasakasa tumi ba wɔn ntam. Biribi saa na ɛtoo Paul ne ne yɔnko berɛbo Barnaba. Asɛmpatrɛw adwuma a edi hɔ a na wɔrekɔyɛ no, na Barnaba pɛ sɛ wɔde Marko ka wɔn ho kɔ, nanso Paul ne no anyɛ adwene koraa. Wei de “akasakasa a emu yɛ den” baa wɔn ntam, na obiara faa ne kwan. (Aso. 15:37-39) Nanso Paul ne Barnaba ne Marko siesiee wɔn ntam. Wei kyerɛ sɛ asomdwoe ne baakoyɛ a ɛwɔ asafo no mu no, na ɛho hia wɔn paa. Akyiri yi, Paul kamfoo Barnaba ne Marko nyinaa. (1 Kor. 9:6; Kol. 4:10) Yɛn nso, sɛ akasakasa bi wɔ yɛne afoforo ntam wɔ asafo no mu a, ɛho hia sɛ yesiesie, na yɛkɔ so de yɛn adwene si suban pa a ɛwɔ afoforo ho no so. Yɛyɛ saa a, ɛbɛboa ma asomdwoe ne baakoyɛ atena asafo no mu.—Efe. 4:3.

12. Ɔhaw bɛn saa na yɛn nuanom tumi hyia?

¹² Sɛ yɛboa yɛn nuanom ma wɔn gyidi yɛ den a, ɛhyɛ wɔn den. Ebinom wɔ hɔ a, wɔn abusuafo a wɔnyɛ Adansefo, wɔn adwumamfo anaa wɔn mfɛfo sukuufo di wɔn ho fɛw. Afoforo nso, yare a emu yɛ den reteetee wɔn. Ebinom nso, obi ayɛ wɔn ade ma ayɛ wɔn yaw paa; wɔpɛ sɛ wɔde kyɛ, nanso ɛnna fam. Afoforo nso bɔɔ asu nyɛ nnɛ, na wɔatwɛn ara sɛ wiase yi bɛba awiei nso ɛmmae. Tebea a ɛtete saa nyinaa betumi asɔ Kristofo gyidi ahwɛ. Kristofo a na ɛwɔ asomafo no bere so no, wɔn nso hyiaa ɔhaw a ɛtete saa. Dɛn na Paul yɛ de hyɛɛ ne nuanom den?

13. Wɔn a wɔn gyidi nti nkurɔfo dii wɔn ho fɛw no, sɛn na Paul boaa wɔn?

¹³ Paul de Kyerɛwnsɛm no hyɛɛ ne nuanom gyidi den. Yɛbɛyɛ nhwɛso a, Yudafo a na wɔabɛyɛ Kristofo no, na ebinom abusuafo kyerɛ sɛ Yudasom yɛ papa sen Kristosom. Ɛno nti, ɛbɛyɛ sɛ na saa Kristofo no nhu nea wɔnka. Yegye di paa sɛ, krataa a Paul kyerɛw kɔmaa Hebrifo no hyɛɛ saa Kristofo no gyidi den. (Heb. 1:5, 6; 2:2, 3; 9:24, 25) Nkyerɛkyerɛmu a ɛtɔ asom a Paul de maa wɔn no, na wobetumi de abɔ akasatiafo no nsɛm no agu. Ɛnnɛ, yɛn nso yebetumi aboa yɛn nuanom Kristofo ma wɔde asafo nhoma ahorow mu nsɛm akyerɛkyerɛ wɔn gyidi mu. Yɛn mma nkumaa nso, esiane sɛ wogye adebɔ di nti, sɛ nkurɔfo serew wɔn a, yebetumi aboa wɔn ma wɔde nhomawa a yɛato din, Was Life Created? ne The Origin of Life—Five Questions Worth Asking no mu nsɛm akyerɛ nea enti a wogye adebɔ di.

14. Ɛwom sɛ asɛnka ne ɔkyerɛkyerɛ adwuma no nti, na Paul nni adaagye koraa, nanso dɛn na ɔyɛe?

 ¹⁴ Paul hyɛɛ ne nuanom nkuran sɛ wɔnyɛ “nnwuma pa” mfa nkyerɛ wɔn dɔ. (Heb. 10:24) Paul nam ne kasa ne ne nneyɛe nyinaa so boaa ne nuanom. Ɛho nhwɛso ni. Bere a ɔkɔm bi tew sii Yudea no, Paul boa ma wɔde nneɛma a anuanom hia no bi kɔmaa wɔn. (Aso. 11:27-30) Ɛwom sɛ asɛnka ne ɔkyerɛkyerɛ adwuma no nti, na Paul nni adaagye koraa, nanso bere nyinaa ɔhwehwɛɛ akwan a ɔbɛfa so aboa anuanom a wɔakɔ ahokyere mu. (Gal. 2:10) Ɔnam saa a ɔyɛe so maa ne nuanom Kristofo nyaa ahotoso sɛ Yehowa bɛhwɛ wɔn. Yɛn nso, sɛ atoyerɛnkyɛm bi si, na yɛde yɛn bere, yɛn ahoɔden anaa yɛn nimdeɛ boa anuanom a wɔakɔ ahokyere mu no a, ɛhyɛ wɔn gyidi den. Daa sɛ yeyi sika de boa wiase nyinaa adwuma no a, yɛn nuanom nya so mfaso, na ɛno nso hyɛ wɔn gyidi den. Sɛ yɛyɛ wei ne nneɛma foforo nso ka ho a, yɛboa yɛn nuanom ma wonya ahotoso sɛ Yehowa rennan n’akyi nkyerɛ wɔn da.

15-16. Wɔn a wɔn gyidi ayɛ mmerɛw no, sɛn na ɛsɛ sɛ yɛne wɔn di?

¹⁵ Wɔn a na wɔn gyidi ayɛ mmerɛw no, Paul ampa abaw wɔ wɔn ho. Onyaa ayamhyehye maa wɔn, na sɛnea ɔne wɔn kasae no maa wɔn koma tɔɔ wɔn yam. (Heb. 6:9; 10:39) Yɛbɛyɛ nhwɛso a, Paul krataa a ɔkyerɛw kɔmaa Hebrifo no mu no, na ɔtaa de asɛmfua “yɛn” di dwuma. Saa a ɔyɛe no kyerɛ sɛ, na ogye tom sɛ afotu a ɔde rema no, na ɛsɛ sɛ ɔno ara nso de yɛ adwuma. (Heb. 2:1, 3) Sɛnea Paul yɛe no, yɛn nso ɛnsɛ sɛ yɛpa abaw wɔ wɔn a wɔn gyidi ayɛ mmerɛw no ho. Mmom, ɛsɛ sɛ yɛma wohu sɛ yedwen wɔn ho paa, na ɛno bɛhyɛ wɔn gyidi den. Yɛyɛ saa a, ɛma wonya awerɛhyem sɛ yɛdɔ wɔn. Sɛnea  yebefi yɛn komam akasa ama atɔ wɔn koma so no, ebetumi ahyɛ wɔn den paa.

¹⁶ Paul maa ne nuanom no awerɛhyem sɛ Yehowa nim nnwuma pa a na wɔreyɛ nyinaa. (Heb. 10:32-34) Sɛ yɛreboa yɛn nua Kristoni bi a ne gyidi ayɛ mmerɛw a, yebetumi asuasua nea Paul yɛe no. Yebetumi ama waka nea ɛyɛe a obehuu nokware no akyerɛ yɛn. Afei nso, bere bi a ɔtee nka sɛ Yehowa aboa no no, yebetumi ahyɛ no nkuran ma wakaakae. Yebetumi de saa akwannya no aboa no ama wanya awerɛhyem sɛ Yehowa werɛ mfii nnwuma pa a wayɛ no, na daakye nso, ɔrenyi ne baako nhyɛ ne nsa da. (Heb. 6:10; 13:5, 6) Sɛ yɛne yɛn nuanom a yɛdɔ wɔn yi bɔ nkɔmmɔ a ɛte saa a, ebia ɛbɛkanyan wɔn ma wɔakɔ so asom Yehowa.

17. Dɛn na ɛsɛ sɛ yɛkɔ so yere yɛn ho yɛ no yiye?

¹⁷ Sɛnea nkakrankakra ɔdansifo ho kokwaw wɔ n’adwuma mu no, yɛn nso sɛnea yɛhyɛ anuanom den no, nkakrankakra yebetumi atu mpɔn wom. Wɔn a bere bi wotumi gyinaa sɔhwɛ ano no, sɛ yɛka wɔn ho asɛm kyerɛ afoforo a, ɛbɛhyɛ wɔn den ma wɔatumi agyina sɔhwɛ ahorow ano. Suban pa a afoforo wɔ no, sɛ yɛka ho asɛm kyerɛ wɔn a ɛbɛboa ma asomdwoe atena asafo no mu. Afei nso, sɛ asɛm bi sɔre a, yɛbɛhwɛ sɛ yɛremma ɛnsɛe asafo no asomdwoe, na sɛ akasakasa bi wɔ yɛne afoforo ntam a, yɛbɛhwɛ asiesie ama asomdwoe aba. Bio nso, sɛ yɛde Bible no boa anuanom ma wohu sɛnea wɔbɛkyerɛkyerɛ wɔn gyidi mu, yɛboa wɔn a wɔakɔ ahokyere mu, na yɛboa wɔn a wɔn gyidi ayɛ mmerɛw no a, ɛbɛhyɛ wɔn den.

18. Dɛn na woasi wo bo sɛ wobɛyɛ?

¹⁸ Wɔn a esisi asafo adan no wɔ anigye ne akomatɔyam. Yɛn nso, sɛ yɛboa anuanom a ɛwɔ asafo no mu ma wɔn gyidi yɛ den a, yenya anigye ne akomatɔyam. Ɔdan de, ɛkyɛ kyɛ sɛ dɛn koraa a ɛbɛsɛe, nanso nea yɛyɛ de hyɛ anuanom den no de, yebetumi anya so mfaso afebɔɔ! Momma yensi yɛn bo sɛ ‘yɛbɛkɔ so ahyehyɛ yɛn ho nkuran na yɛahyehyɛ yɛn ho den.’—1 Tes. 5:11.