1. Sɛ yɛka nea ɛyɛe a yehuu “nokware no” a, ɛboa yɛn sɛn?

 “ƐYƐƐ dɛn na wuhuu nokware no?” Yegye di sɛ woama saa asɛm yi ho mmuae mpɛn pii. Sɛ yɛpɛ sɛ yehu yɛn nua Kristoni bi yiye a, yɛtaa bisa no saa asɛm no. Yɛn ani gye ho sɛ yebehu nea ɛyɛe a yɛn nuanom behuu Yehowa na wɔfaa no adamfo. Yɛn nso, sɛnea nokware no da yɛn koma so no, yɛn ani gye ho sɛ yɛbɛka ho asɛm akyerɛ wɔn. (Rom. 1:11) Sɛ yɛbɔ nkɔmmɔ a ɛte saa a, ɛkae yɛn sɛ nokware no som bo paa. Afei nso, ɛma yesi yɛn bo paa sɛ yɛbɛkɔ so anantew “nokware no mu”; kyerɛ sɛ, yɛbɛkɔ so abɔ yɛn bra sɛnea Yehowa pɛ na ama wahyira yɛn na wagye yɛn atom.—3 Yoh. 4.

2. Dɛn na yebesusuw ho wɔ adesua yi mu?

² Adesua yi mu no, nea enti a yɛn ani gye nokware no ho no, yebesusuw bi ho. Ɛno akyi no, yɛbɛhwɛ sɛnea yɛbɛkɔ so akyerɛ sɛ nokware no som bo ma yɛn. Yegye di sɛ nea Yehowa ayɛ de atwe yɛn aba nokware no mu no, wei bɛboa yɛn ma yɛakyerɛ ho anisɔ kɛse. (Yoh. 6:44) Ɛno nso bɛboa yɛn ama yɛayere yɛn ho paa aka nokware no ho asɛm akyerɛ nkurɔfo.

3. Adɛn nti paa na yɛn ani gye nokware no ho?

³ Nea enti a yɛn ani gye nokware no ho dɔɔso. Nea edi kan paa ne sɛ, yɛdɔ Yehowa Nyankopɔn, efisɛ nokware no,  ne nkyɛn na efi. N’Asɛm Bible no ama yɛahu sɛ ɔno ne ade nyinaa so Tumfoɔ a ɔbɔɔ ɔsoro ne asaase. Afei nso, Bible no ama yɛahu sɛ ɔyɛ yɛn soro Agya a ɔdɔ yɛn na odwen yɛn ho. (1 Pet. 5:7) Yenim sɛ yɛn Nyankopɔn no ‘wɔ mmɔborɔhunu ne ayamhyehye, ne bo mfuw ntɛm, ne dɔ a enni huammɔ nni ano, na ne nokwaredi dɔɔso.’ (Ex. 34:6) Yehowa dɔ atɛntrenee. (Yes. 61:8) Sɛ yɛrehu amane a, ɛyɛ ne yaw, na wayɛ krado paa sɛ bere a wahyɛ no bɛso ama wayi amanehunu nyinaa afi hɔ. (Yer. 29:11) Hwɛ anigyesɛm a ɛte saa! Ɛnyɛ nwanwa sɛ yɛdɔ Yehowa saa!

4-5. Adɛn nti na ɔsomafo Paul de anidaso a yɛwɔ no totoo sɛkyɛ ho?

⁴ Ade foforo bɛn nti na yɛn ani gye nokware no ho? Nokware no de mfaso bebree brɛ yɛn. Yɛnhwɛ emu baako. Ɛno ne daakye ho anidaso a yɛwɔ no. Nea ɛbɛma yɛahu sɛnea saa anidaso no som bo no, ɔsomafo Paul de totoo biribi ho. Ɔkaa sɛ: “Saa anidaso a yɛwɔ yi, ɛte sɛ sɛkyɛ ma ɔkra; etim hɔ na enhinhim.” (Heb. 6:19) Sɛnea sɛkyɛ ma po so hyɛn gyina faako no, yɛn nso sɛ yehyia sɔhwɛ a, Bible mu anidaso a yɛwɔ no betumi ama yɛagyina pintinn.

⁵ Ɛha yi, ɔsoro anidaso a Kristofo a wɔasra wɔn wɔ no, ɛno ho asɛm na na Paul reka. Nanso, Kristofo a wɔhwɛ kwan sɛ wɔbɛtena ase daa wɔ asaase so no, wɔn nso, asɛm a ɔkae no fa wɔn ho. (Yoh. 3:16) Nokwasɛm ne sɛ, nea yɛasua afa anidaso a yɛwɔ sɛ yɛbɛtena ase daa ho no, aboa yɛn ama yɛanya anigye wɔ asetena mu.

6-7. Yvonne behuu nokware a ɛfa daakye ho no, aboa no sɛn?

⁶ Momma yɛnhwɛ onuawa bi a ne din de Yvonne. Wɔantete no wɔ nokware no mu; bere a ɔyɛ abofra no, na osuro owu. Ɔkae sɛ ɔkenkan biribi a na ɛyɛ den sɛ ne werɛ befi. Ɛne sɛ: “Da bi bɛba a, ade renkye bio.” Ɔka sɛ: “Saa asɛm no nti, edu anadwo a nkurɔfo adeda no, na ato me adwennwen; mɛdwene me daakye ho saa ara. Mibehuu sɛ ‘abrabɔ a yɛwom yi, ɛnyɛ ɛno ara ni.’ Mibisaa me ho sɛ, ‘Mebɛyɛɛ dɛn koraa wɔ wiase?’ Ná mempɛ sɛ miwu!”

⁷ Akyiri yi, bere a Yvonne bɛyɛɛ ɔbabun no, ohyiaa Yehowa Adansefo. Ɔka sɛ: “Mibegye toom sɛ metumi atena ase daa wɔ Paradise asaase so.” Sɛn na nokware no a yɛn nuabea no hui no aboa no? Ɔka sɛ: ‘Minsi pɛ nnwen me daakye anaa owu ho bio.’ Yetumi hu sɛ nokware no som bo ma Yvonne paa, na sɛ ɔka daakye ho anidaso a ɔwɔ no ho asɛm kyerɛ nkurɔfo a, ɛma ne koma tɔ ne yam paa.—1 Tim. 4:16.

8-9. (a) Mfatoho bi a Yesu mae mu no, dɛn na ɔbarima bi yɛ de kyerɛe sɛ agyapade bi a ohui no som bo ma no? (b) Sɛn na nokware no som bo ma wo?

⁸ Bible mu nokware foforo nso ne Onyankopɔn Ahenni ho Asɛmpa no. Nokware a ɛfa saa Ahenni no ho no, Yesu de totoo agyapade bi a wɔde ahintaw ho. Yesu kaa wɔ Mateo 13:44 sɛ: “Ɔsoro Ahenni te sɛ agyapade bi a wɔde ahintaw wuram a obi kohui na ɔde siei. Anigye a onyae nti, ɔkɔtɔn nea ɔwɔ nyinaa kɔtɔɔ saa asaase no.” Hyɛ no nsow sɛ ɔbarima no amfa ansi n’ani so sɛ ɔrekɔhwehwɛ agyapade. Nanso bere a ohui no, ɔde nneɛma pii bɔɔ afɔre sɛnea ɛbɛyɛ a ne nsa bɛka. Nea ɛwom ne sɛ ɔtɔn nea ɔwɔ nyinaa. Adɛn ntia? Efisɛ na onim sɛ saa agyapade no som bo paa. Ná ɛsom bo sen biribiara a na ɛsɛ sɛ ɔde bɔ afɔre.

⁹ Saa na wuhu nokware no anaa? Yegye di sɛ saa na wuhu no! Ɛnnɛ, Yehowa som ma  yɛn ani gye paa, na yɛwɔ anidaso sɛ yebenya daa nkwa bere a Onyankopɔn Ahenni no redi yɛn so no. Saa anigye no, biribiara nni wiase yi mu a yebetumi de atoto ho. Hokwan a yɛanya ne Yehowa afa adamfo denneennen no, ɛsom bo sen biribiara a yɛde bɛbɔ afɔre. Nea ɛma yɛn ani gye paa ne sɛ ‘yɛbɛsɔ n’ani koraa.’—Kol. 1:10.

10-11. Dɛn na ɛkanyan Michael ma ɔsesaa n’abrabɔ?

¹⁰ Yɛn mu bebree ayɛ nsakrae akɛseakɛse sɛnea ɛbɛyɛ a Yehowa begye yɛn atom. Ebinom agyae nnwuma akɛse a wɔyɛ no wɔ wiase no. Ebinom nso agyae sika akyi di. Bere a afoforo nso suaa Yehowa ho ade no, wɔsesaa wɔn abrabɔ koraa. Saa na Michael yɛe. Wɔantete no wɔ nokware no mu. Ɔyɛ aberante no, osuaa karate bɔ. Ɔka sɛ: “Nea na ehia me paa ne sɛ, mɛyere me ho ateɛteɛ m’apɔw mu na ama masi pi asi ta. Ɛtɔ da a, na ɛyɛ me sɛ obiara rentumi mfa m’akyi nka fam.” Nanso bere a Michael fii ase suaa Bible no, ohuu Yehowa adwene wɔ awudisɛm ho. (Dw. 11:5) Michael ka awarefo a wɔne no suaa ade no ho asɛm sɛ: “Wɔanka ankyerɛ me da sɛ minnyae karate no bɔ; nea wɔyɛe ara ne sɛ wɔkɔɔ so ne me suaa Bible mu nokware no.”

¹¹ Michael resua Yehowa ho ade nyinaa, na ɔdɔ a ɔwɔ ma no no nso reyɛ kɛse. Nea ɛkaa ne koma paa ne sɛnea Yehowa wɔ ayamhyehye ma n’asomfo no. Eduu baabi no, Michael hui sɛ ɛsɛ sɛ ɔyɛ nsakrae kɛse bi wɔ n’abrabɔ mu. Ɔka sɛ: “Ná minim sɛ karate a megyae bɔ no bɛyɛ den asen biribi foforo biara a na megyae yɛ. Nanso, na minim nso sɛ meyɛ saa a, ɛbɛsɔ Yehowa ani. Afei nso, na migye di sɛ Yehowa a mɛsom no no som bo sen biribiara a mede bɛbɔ afɔre.” Nokware no a Michael hui no, na ɛsom bo ma no paa, enti ɛkanyan no ma ɔyɛɛ nsakrae akɛse wɔ n’abrabɔ mu.—Yak. 1:25.

12-13. Sɛn na Bible mu nokware buee Mayli ani?

¹² Bible no de nokware no toto kanea a ɛwɔ sum mu ho. Wei ma yehu sɛ nokware no som bo paa. (Dw. 119:105; Efe. 5:8) Mayli fi Azerbaijan, na sɛnea Onyankopɔn Asɛm no abue n’ani no, n’ani sɔ paa. Ná ɛsono asɔre a ne papa kɔ, ɛnna ɛsono asɔre a ne maame kɔ. Ná ne papa kɔ Kramo, ɛnna ne maame wɔ Yudasom mu. Ɔka sɛ: ‘Ná migye di sɛ Onyankopɔn wɔ hɔ, nanso na nneɛma bi kyere m’adwene. Ebi ne sɛ, “Adɛn nti na Onyankopɔn bɔɔ nnipa? Adɛn nti na ɛsɛ sɛ onipa ba wiase bɛbrɛ, na owu nso a, wɔyɛ no ayayade wɔ Ɔbonsam gya mu?” Afei nso, nkurɔfo ka sɛ nea ebesi biara yɛ Onyankopɔn akwan, enti mibisaa me ho sɛ, “Enti nea Onyankopɔn te hɔ reyɛ ara ne sɛ obegyigye yɛn akɔ sɔhwɛ mu, na sɛ yehu amane a, waserew yɛn anaa?”’

¹³ Mayli kɔɔ so hwehwɛɛ ne nsɛmmisa no ho mmuae. Akyiri yi, ɔmaa Yehowa Adansefo ne no suaa Bible, na obegyee nokware no. Ɔka sɛ: ‘Bible mu nsɛm mu da hɔ na ntease wom, enti asesa m’asetena ama ayɛ papa. Onyankopɔn Asɛm mu nokware a mabehu no ama me koma atɔ me yam.’ Yɛne Mayli nyinaa bom yi Yehowa ayɛ, efisɛ ɔno na ‘ɔfrɛɛ yɛn fii sum mu baa ne hann nwonwaso mu.’—1 Pet. 2:9.

14. Dɛn na yɛbɛyɛ na ama yɛn ani agye nokware no ho kɛse? (Adaka a yɛato din “ Ntotoho Afoforo” no, hwɛ ɛno nso.)

¹⁴ Nea yɛasusuw ho yi yɛ nhwɛso kakraa bi a ɛma yehu sɛ nokware no som bo. Ebia wo nso wubetumi adwinnwen pii ho.  Nea enti a yɛn ani gye nokware no ho dɔɔso. Adɛn nti na womfa nyɛ wo botae sɛ wubesua ho ade ahwehwɛ bi aka ho? Bere a nokware no ho anigye a yɛwɔ reyɛ kɛse no, akwan a yɛbɛfa so akyerɛ sɛ yɛn ani gye ho no nso bɛyɛ kɛse.

15. Ade baako bɛn na yebetumi ayɛ de akyerɛ sɛ yɛn ani gye nokware no ho?

¹⁵ Nea yebetumi ayɛ de akyerɛ sɛ yɛn ani gye nokware no ho ne sɛ, yebesua Bible ne asafo nhoma ahorow. Sɛ yɛbaa nokware no mu akyɛ sɛ dɛn mpo a, da biara yɛwɔ pii sua. Ɔwɛn-Aban a edi kan koraa no kaa sɛ: ‘Nokware no te sɛ nhwiren ketewa bi a esi kwae mu, na atosɛm a ɛte sɛ nwura reyɛ agye afa. Sɛ wubetumi ahu nhwiren yi a, gye sɛ woto wo bo ase hwehwɛ. . . . Sɛ wopɛ sɛ wotew nhwiren no a, gye sɛ wobɔ wo mu ase. Wunya baako a, mma wo tirim nnyɛ wo dɛ. . . . Hwehwɛ bebree ka ho.’ Adesua yɛ adwumaden, nanso mfaso wɔ so paa.

16. Ɔkwan bɛn na wofa so sua ade a, ɛkɔ yiye ma wo paa? (Mmebusɛm 2:4-6)

¹⁶ Ɛnyɛ yɛn nyinaa na yɛn ani gye akenkan ne adesua ho. Nanso Yehowa ka kyerɛ yɛn sɛ  ‘yɛnkɔ so nhwehwɛ’ sɛnea ɛbɛyɛ a yɛbɛte nokware no ase yiye. (Kenkan Mmebusɛm 2:4-6.) Bere biara a yɛbɛyere yɛn ho asua ade no, yenya so mfaso. Corey ka sɛ, sɛ ɔrekenkan Bible a, ɔde n’adwene si nkyekyɛm baako so te ase wie ansa na wakɔ foforo so. Ɔkyerɛ mu sɛ: “Ase hɔ asɛm biara a ɛwɔ hɔ, ne kyerɛwnsɛm afoforo a saa nkyekyɛm no twe adwene kɔ so no, mekenkan ne nyinaa. Afei meyɛ nhwehwɛmu foforo nso ka ho. . . . Sɛ mefa saa kwan yi so sua ade a, minya so mfaso paa!” Sɛ yɛfa saa kwan yi so oo, sɛ nso yɛfa kwan foforo so oo, sɛ yeyi bere si hɔ yere yɛn ho sua ade a, ɛkyerɛ sɛ yɛn ani sɔ nokware no.—Dw. 1:1-3.

17. Nokware no a yɛde bɛbɔ yɛn bra no kyerɛ sɛn? (Yakobo 1:25)

¹⁷ Yenim sɛ yesua nokware no a, na yenwiei. Sɛ nokware no betumi aboa yɛn paa a, ɛsɛ sɛ yɛde bɔ yɛn bra. Yɛyɛ saa a, ɛnna nokware no de anigye ankasa bɛbrɛ yɛn. (Kenkan Yakobo 1:25.) Yɛbɛyɛ dɛn akyerɛ sɛ yɛde nokware no rebɔ yɛn bra? Onua bi ka sɛ, ɛsɛ sɛ yɛhwehwɛ yɛn ho mu hwɛ nea yɛbɔ mu mmɔden ne nea ɛnkɔ yiye a ɛsɛ sɛ yɛyɛ ho biribi. Ɔsomafo Paul kaa no saa kwan yi so sɛ: “Asɛm no ara ne sɛ, baabi a yɛanya nkɔso akodu no, momma yɛnkɔ so nnantew saa kwan yi so pɛpɛɛpɛ.”—Filip. 3:16.

18. Adɛn nti na yɛyɛ nea yebetumi biara sɛ ‘yɛbɛkɔ so anantew nokware no mu’?

¹⁸ Sɛ yɛyɛ nea yebetumi biara ‘kɔ so nantew nokware no mu’ a, wo de, hwɛ mfaso a yenya! Ɛnyɛ yɛn asetena na etu mpɔn kɛkɛ, mmom yɛma Yehowa ne yɛn nuanom Kristofo nso ani gye. (Mmeb. 27:11; 3 Yoh. 4) Sɛ ɛnyɛ weinom nti na ɛsɛ sɛ yɛn ani gye nokware no ho na yɛde bɔ yɛn bra a, ɛnde dɛn bio?