Sɛ yɛkan Bible mu asɛm bi a, yebetumi ayɛ ho nhwehwɛmu ate ase yiye. Nanso ɛnyɛ Bible mu nimdeɛ kɛkɛ na yɛpɛ sɛ yenya. Yɛpɛ sɛ yesua Yehowa su ahorow a ɛyɛ fɛ no ho ade sɛnea ɛbɛyɛ a ɔdɔ a yɛwɔ ma no no bɛyɛ kɛse. Sɛ yɛpɛ sɛ yɛyɛ saa a, yebetumi abisa yɛn ho sɛ, ‘Bible mu asɛm a makan yi, dɛn na ɛma mihu fa Yehowa ho?’

Sɛnea Yehowa ada ne su atitiriw a ɛne ɔdɔ, nyansa, atɛntrenee ne tumi adi no, yebetumi ayɛ ho nhwehwɛmu akɔ akyiri. Nanso, ɛnyɛ ne su ahorow no nyinaa ni. Ɔwɔ su afoforo a ɛyɛ fɛ a wubetumi asua ɛno nso ho ade. Ɛhe na wubetumi asua ne su ahorow no ho ade?

Nhoma a Yehowa Adansefo De Yɛ Nhwehwɛmu no, hwɛ asɛmti a ɛne “Yehowa Nyankopɔn,” na hwɛ asɛmti ketewa a ɛne “Yehowa Su.” Afei su ahorow a worekenkan ho asɛm wɔ Bible mu no, fa w’adwene si ɛno so.