Saa adesua no mu no, yehui sɛ asɛnkɛse bi wɔ hɔ a ɛfa nnipa ne abɔfo nyinaa ho. Ɛno ne Yehowa din kɛse a ɛho bɛtew no. Gye a nnipa ne abɔfo begye atom sɛ ɔkwan a Yehowa fa so di tumi no, ɛno na ɛyɛ papa paa no, ɛno nso ka Yehowa din kɛse a ɛho bɛtew no ho. Afei nso, nokware a nnipa bedi ama Yehowa no ka saa asɛnkɛse no ho.

Adɛn nti na seesei de yɛka sɛ asɛnkɛse a ɛho hia paa no, ɛfa Yehowa din ne sɛnea ɛho bɛtew no ho? Momma yɛnhwɛ nneɛma mmiɛnsa nti a yɛreka saa.

Nea edi kan, Satan kasa tiaa Yehowa anaa ɔsɛee ne din wɔ Eden turom hɔ. Asɛm a Satan bisaa Hawa no kyerɛ sɛ Yehowa tirim yɛ den efisɛ wahyehyɛ mmara a ntease nnim ama nnipa. Ɛno akyi no, Satan dan asɛm a Yehowa kae no; ɔkyerɛe sɛ Onyankopɔn yɛ ɔtorofo. Enti ɔsɛee Yehowa din. Ɔbɛyɛɛ “Ɔbonsam,” a nea ɛkyerɛ ne “dinsɛefo.” (Yoh. 8:44) Esiane sɛ Hawa gyee atosɛm a Satan kae no dii nti, ɔyɛɛ Onyankopɔn so asoɔden, na ɔsɔre tiaa ne tumidi. (Gen. 3:1-6) Ɛnnɛ ne nnɛ nyinaa, Satan kɔ so ara sɛe Onyankopɔn din. Wɔn a wɔgye atosɛm a ɛtete saa di no, ɛnyɛ den koraa sɛ wɔbɛyɛ Yehowa so asoɔden. Enti Onyankopɔn nkurɔfo de, Yehowa din kronkron a Satan ne n’akyidifo resɛe no no, yebu no sɛ enye koraa. Ɛno na akɔfa ɔhaw ne amanehunu a ɛwɔ wiase nyinaa aba.

Nea ɛtɔ so mmienu, nea ɛbɛyɛ na nnipa ne abɔfo nyinaa ho atɔ wɔn no, Yehowa abɔ ne tirim pɔw sɛ ɔbɛtew ne din ho, na wapopa efi biara afi ho. Ɛno ne ade a ɛho hia Yehowa paa. Yehowa ka sɛ: “Mɛtew me din kɛse . . . no ho.” (Hes. 36:23) Afei nso, Yehowa asomfo nyinaa, sɛ wɔrebɔ mpae a, ade a ɛsɛ sɛ ɛho hia wɔn paa no, Yesu sii so dua. Ɔkaa sɛ: “Wo din ho ntew.” (Mat. 6:9) Bible taa ka sɛ yɛnhyɛ Yehowa din anuonyam. Ɛho nhwɛso kakra ni: “Momfa anuonyam a ɛfata Yehowa din mma no.” (1 Be. 16:29; Dw. 96:8) “Monto ayeyi nnwom mma ne din kɛse no.” (Dw. 66:2) “Mɛhyɛ wo din anuonyam akosi daa.” (Dw. 86:12) Bere bi a na Yesu wɔ Yerusalem asɔrefie hɔ no, ɔkaa sɛ: “Agya, hyɛ wo din anuonyam.” Yehowa ankasa nso fi soro kasae, na obuae sɛ: “Mahyɛ no anuonyam, na mɛsan ahyɛ no anuonyam bio.”—Yoh. 12:28. a

Nea ɛtɔ so mmiɛnsa, bere nyinaa Yehowa atirimpɔw ne ne din na ɛnam. Susuw wei ho hwɛ: Sɛ Kristo Mfirihyia Apem Nniso no ba awiei, na sɔhwɛ a etwa to no ba a, ɛno akyi no, dɛn na ebesi? Saa bere no, Yehowa din a ɛho bɛtew no, wohwɛ a, ɛbɛyɛ asɛnkɛse ama nnipa ne abɔfo anaa? Nea ɛbɛyɛ na  yɛanya saa asɛmmisa no ho mmuae no, kae nokware a ɛsɛ sɛ nnipa di ma Yehowa ne taa a ɛsɛ sɛ wɔtaa ne tumidi akyi no. Nnipa a wɔakyerɛ sɛ wɔdi nokware no, wohwɛ a, ɛbɛyɛ den ama wɔn sɛ wɔbɛkɔ so adi nokware anaa? Daabi. Ebedu saa bere no, na bɔne ne sintɔ biara nni wɔn ho, na na wɔasɔ wɔn ahwɛ nso. Afei, wɔbɛtena ase daa. Saa bere no, Yehowa tumidi a nnipa ne abɔfo bɛtaa akyi no, wohwɛ a, ɛbɛyɛ asɛnkɛse ama wɔn anaa? Daabi, efisɛ saa bere no, na wɔn a wɔwɔ soro ne asaase so nyinaa abehu sɛ Yehowa tumidi na ɛyɛ papa paa. Yehowa din nso ɛ? Saa bere no, wohwɛ a, ɛno paa na ɛho behia n’asomfo anaa?

Ebedu saa bere no, na Yehowa atew ne din ho koraa, apopa efi biara afi ho. Nanso ne din no ho bɛkɔ so ahia anokwafo a wɔwɔ soro ne asaase so nyinaa. Adɛn ntia? Efisɛ wɔbehu sɛ Yehowa da so ara reyɛ anwanwade. Susuw wei ho hwɛ: Esiane sɛ Yesu bɛsan de Ahenni no nyinaa ama Yehowa Nyankopɔn nti, Onyankopɔn ‘bɛyɛ ade nyinaa ama obiara.’ (1 Kor. 15:28) Ɛno akyi no, nnipa a ɛwɔ asaase so benya “anuonyam ahofadi a ɛwɔ hɔ ma Onyankopɔn mma no.” (Rom. 8:21) Afei, Yehowa bɛma n’atirimpɔw a ɛfa nnipa ne abɔfo ho no aba mu. Ɔbɛka wɔn nyinaa abom ama wɔayɛ abusua kɛse baako.—Efe. 1:10.

Sɛ nea yɛaka ho asɛm yi nyinaa bam a, sɛn na Yehowa abusua a ɛwɔ soro ne asaase so no bɛte nka? Nokwasɛm ne sɛ, yebenya ɔpɛ a emu yɛ den sɛ, yɛbɛkɔ so ahyɛ Yehowa din kɛse no anuonyam. Onyankopɔn maa Dawid kyerɛwee sɛ: “Ayeyi nka Yehowa Nyankopɔn . . . Ayeyi nka ne din kɛse no daa.” (Dw. 72:18, 19) Yɛbɛkɔ so anya nneɛma foforo agyina so ayi no ayɛ afebɔɔ.

Yehowa din kae yɛn ne ho biribiara. Ade titiriw a ɛkae yɛn ne ne dɔ. (1 Yoh. 4:8) Yɛn werɛ remfi da sɛ ɔdɔ nti na Yehowa bɔɔ yɛn; ɛno ara nso nti na ɔde agyede no maa yɛn. Afei nso, yɛn werɛ remfi da sɛ ɔkwan a ɔfa so di yɛn so no tene, na ɔyɛ no ɔdɔ so, na yɛbɛkɔ so ahu sɛnea oyi ne dɔ adi kyerɛ yɛn no afebɔɔ. Yɛbɛkɔ so abɛn yɛn soro Agya no, na yɛato nnwom ayi ne din kɛse no ayɛ afebɔɔ.—Dw. 73:28.