• “Metee nka sɛ me kunu afa m’akyi mpɛn pii.”

• “Metee nka sɛ wagu m’anim ase, me ho nyɛ fɛ, na mfaso nni me so.”

• “Mantumi anka ho asɛm ankyerɛ obiara. Ná ɛhyɛ me ho na ɛrewe me.”

• “Metee nka sɛ, asɛ Yehowa nnwene me ho.”

Saa nsɛm yi ma yehu sɛ, sɛ ɔbea bi kunu hwɛ ponografi a, etumi teetee no paa. Na sɛ wahyɛ sum ase ayɛ saa abosome anaa mfe pii a, ɔbea no betumi ate nka sɛ ɔrentumi nnye ne kunu nni bio. Ɔbea warefo bi kaa sɛ, “Ɛyɛ a mitumi bisa me ho sɛ: ‘Barima bɛn koraa ni? Ɔde biribi foforo resie me anaa?’”

Yɛakyerɛw saa asɛm yi ama mmea a wɔn kununom hwɛ ponografi. a Ɛbɛkyerɛ Bible nnyinasosɛm bi a ebetumi akyekye wɔn werɛ, na ama wɔanya awerɛhyem sɛ Yehowa ka wɔn ho. Afei nso, ɛbɛboa wɔn ama wɔanya akomatɔyam na wɔatumi akɔ so asom Yehowa. b

Ɛwom sɛ worentumi nkyerɛ wo kunu nea ɔnyɛ, nanso wubetumi ayɛ nneɛma bi a ɛbɛma wo koma atɔ wo yam, na w’asom adwo wo. Hwɛ nea edidi so yi.

Nka sɛ wo na woama aba saa. Sɛ ɔbea bi kunu hwɛ ponografi a, ebia ɔbɛte nka sɛ ɔno na wama ne kunu reyɛ saa. Alice c tee nka sɛ ne ho nyɛ ne kunu fɛ. Obisaa ne ho sɛ, ‘Adɛn nti na mewɔ hɔ na me kunu hwɛ mmea afoforo?’ Mmea binom wɔ hɔ a, sɛ wɔn kununom hwɛ ponografi na wɔn bo fuw a, ɛma wɔte nka sɛ wɔn nneyɛe na ɛresɛe asɛm no. Danielle ka sɛ, “Esiane sɛ na me kunu hwɛ ponografi nti, ɛhaw me na me bo fuw no. Enti ɛyɛɛ me sɛ me na meresɛe yɛn aware no.”

Wo nso, sɛ saa na wote nka a, hu sɛ Yehowa remfa nea wo kunu yɛ no ho asodi nto wo so. Yakobo 1:14 ka sɛ: “Nea ɛsɔ obi hwɛ ne n’ankasa akɔnnɔ a ɛtwetwe no na ɛto no brada.” (Rom. 14:12; Filip. 2:12) Sɛ́ anka Yehowa de  asodi no bɛto wo so no, n’ani sɔ wo nokwaredi no mmom.—2 Be. 16:9.

Afei nso, ɛsɛ sɛ ɔyere te ase sɛ, hwɛ a ne kunu hwɛ ponografi no nkyerɛ sɛ ne ho nyɛ fɛ anaa ɔtɔ sin. Animdefo a esua ponografi ho ade ka sɛ, sɛ obi hwɛ ponografi a, nna ho akɔnnɔ a onya no, ɔbea biara ntumi nnwudwo ano.

Mma ɛnnyɛ wo dadwen. Catherine kaa sɛ, nea na agye n’adwene ara ne ponografi a na ne kunu hwɛ no. Frances kaa sɛ: “Sɛ ɛba sɛ minhu baabi a me kunu wɔ a, na agyaw me adwinnwen. Da mu no nyinaa, me yam bɛhyehye me saa ara.” Anuanom mmea binom ka sɛ, sɛ wɔne anuanom a wɔnim sɛ wɔn kununom hwɛ ponografi wɔ hɔ a, na wɔn ani awu sei pɔtɔɔ. Ebinom nso ka sɛ, ɛyɛ a na wɔayɛ ankonam efisɛ wɔsusuw sɛ obiara nte nea wɔrefa mu no ase.

Sɛ wote nka saa a, ɛnyɛ bɔne. Nanso sɛ wokɔ so dwinnwen ho a, ɛbɛteetee wo paa. Mmom, bɔ mmɔden fa w’adwene si wo ne Yehowa ayɔnkofa no so. Woyɛ saa a, ɛbɛboa wo ma woanya ahoɔden de agyina ano.—Dw. 62:2; Efe. 6:10.

Sɛ wohwɛ Bible mu a, wubehu sɛ mmea bi botowee, na wɔbɔɔ Yehowa mpae ma ɔkyekyee wɔn werɛ. Sɛ wokenkan wɔn ho asɛm na wudwinnwen ho a, ebetumi aboa wo. Wubehu sɛ ɛnyɛ bere nyinaa na Yehowa yii wɔn haw no fii hɔ, nanso ɔma wɔnyaa asomdwoe. Hanah sei, tebea a na ɔwom nti, na ne “werɛ ahow paa.” Ɛwom, ɔhaw a na ɔrefa mu no, na onnim sɛnea ɛbɛkɔ akowie, nanso bere a “ɔbɔɔ mpae wɔ Yehowa anim kyɛe” no, onyaa asomdwoe.—1 Sam. 1:10, 12, 18; 2 Kor. 1:3, 4.

Hwehwɛ mmoa fi asafo mu mpanyimfo hɔ. Wɔbetumi ayɛ sɛ “mframa ano hintabea, ne ahum ano guankɔbea.” (Yes. 32:2) Ebi mpo a wɔbetumi akyerɛ wo onuawa bi a wubetumi aka wo koma mu asɛm akyerɛ no na wakyekye wo werɛ.—Mmeb. 17:17.

Wubetumi aboa wo kunu ma wagyae ponografi hwɛ anaa? Ebia wubetumi. Bible ka sɛ, sɛ wopɛ sɛ wudi ɔhaw bi so anaa woko tia ɔtamfo bi a ne ho yɛ hu a, “baanu ye sen ɔbaako.” (Ɔsɛnk. 4:9-12) Nhwehwɛmu kyerɛ sɛ, sɛ awarefo ka wɔn ti pam ho na wɔboa nea ponografi hwɛ aka ne hɔ no a, ɛboa paa. Afei, sɛ wɔn aware agyigya na wɔbom yɛ ho adwuma a, etumi kɔ yiye paa.

 Nanso, sɛnea obi nnom aduru mma ɔyarefo no, sɛ wo hokafo no pɛ paa sɛ ogyae ponografi no hwɛ a, ebegyina no so titiriw. So wabɔ Yehowa mpae sɛ ɔmmoa no mma onnyae, na wahwehwɛ mmoa afi mpanyimfo no hɔ? (2 Kor. 4:7; Yak. 5:14, 15) Nhyehyɛe bɛn na ɔde agu akwan mu a ɛbɛboa no ama watwe ne ho afi ho? Yɛbɛyɛ nhwɛso a, sɛ ɔwɔ ɛlɛtrɔnik mfiri a, dɛn na wayɛ wɔ ho a ɛbɛma ɔrenkɔtɔ saa asiane no mu bio? (Mmeb. 27:12) Mmoa a wopɛ sɛ wode ma no no, wohwɛ a, wayɛ krado sɛ obegye atom, na ɔmfa biribiara nsie wo? Sɛ saa a, ɛnde ebia wubetumi aboa no.

Wobɛyɛ no sɛn? Yɛnhwɛ nhwɛso bi. Ethan mmofraase pɛɛ na ofii ase hwɛɛ ponografi ma ɛkaa ne hɔ. Akyiri yi, ɔwaree Felicia. Sɛ ɛba sɛ biribi retwetwe Ethan sɛ ɔnsan nkɔhwɛ ponografi a, Felicia ma ɛyɛ mmerɛw ma no sɛ ɔbɛka ho asɛm akyerɛ no. Ethan kyerɛ mu sɛ: “Meka biribiara kyerɛ me yere; memfa hwee nsie no. Ɔdɔ a ɔdɔ me nti, ɔboa me ma mihu tebea ahorow a ɛsɛ sɛ mekwati na mankɔhwɛ bio, na ɔde n’ani di me nkɔso akyi. Afei nso, ɔboa me ma mehwɛ yiye wɔ Intanɛt a mede bedi dwuma ho.” Nea ɛwom ne sɛ, sɛnea Ethan ani gye ponografi ho no, ɛhaw Felicia paa. “Nanso,” Felicia ka sɛ, “m’abufuw ne yaw a midi no mmoa no mma ɔntwe ne ho mfi saa suban bɔne yi ho. Yɛbom susuw ne haw no ho wie a, ɛma osi ne bo sɛ ɔbɛyere ne ho na wankɔhwɛ bio amma manni yaw.”

Nsɛm a ɛtete saa a okunu ne ɔyere bɛbom asusuw ho no, ɛboa ɔbarima no ma ɔtwe ne ho fi ponografi ho. Afei nso, ɛboa ɔbea no ma ɔsan nya ne kunu mu gyidi. Nea ɛwom ara ne sɛ, sɛ ɔbarima bi ka sɛnea ɔte nka kyerɛ ne yere, afei nea ɔyɛ biara anaa baabi a ɔwɔ biara ɔma ne yere hu a, ebeyi adwenem naayɛ biara afi hɔ.

Wo nso, wohwɛ a wubetumi afa saa kwan no ara so aboa wo kunu anaa? Sɛ saa a, adɛn na mommom nkan saa asɛm yi na munsusuw ho? Ebia ɔde besi n’ani so sɛ obegyae ponografi no hwɛ, na wayɛ nea ɛbɛma woanya ne mu gyidi. Sɛ́ anka ne bo befuw sɛ mobɛka ne haw no ho asɛm no, ɛsɛ sɛ ɔbɔ mmɔden te ase sɛ nea ɔreyɛ no haw wo. Wo botae ne sɛ wobɛboa no ma wayere ne ho agyae, na wanya hokwan ayɛ nea ɛbɛboa ma woasan agye no adi. Ebehia sɛ mo mmienu nyinaa sua nea ɛma nkurɔfo hwɛ ponografi ne sɛnea mubedi ɔhaw a ɛte saa so. d

 Sɛ wusuro sɛ anhwɛ a na mo nkɔmmɔ no adan akasakasa a, ɛnde ahyɛase no, wubetumi ama ɔpanyin bi a mo mmienu nyinaa wɔ ne mu ahotoso atena mu bi, na waboa mo. Hyɛ no nsow sɛ, sɛ wo kunu anaa wo yere gyae ponografi hwɛ mpo a, ebetumi akyɛ ansa na woasan anya ne mu gyidi. Nanso mpa abaw. Fa w’adwene si nkɔso nketenkete a ɛreba no so. Nya anidaso sɛ, sɛ woto wo bo ase a, nkakrankakra, mo aware no bɛsan asi ne dedaw mu.—Ɔsɛnk. 7:8; 1 Kor. 13:4.

Na sɛ ɛwom ara na wo kunu san kɔhwɛ ponografi a, ɛkyerɛ sɛ onnuu ne ho, anaa nea adu no de, woyɛ ho hwee a ɛrenyɛ yiye? Ɛnte saa ankasa. Nanso sɛ wahwɛ ara ma aka ne hɔ de a, ɛnde ebetumi aba sɛ ɛyɛ ɔhaw bi a ɛne no abɛtena. Sɛ ogyae hwɛ bere tenteenten mpo a, obetumi asan akɔhwɛ. Sɛ ɛte sɛ nea watumi adi ɔhaw no so mpo a, nea ɛbɛyɛ na ɛrensan nyi ne ti bio no, nhyehyɛe a ɔde guu akwan mu a aboa no no, ɛsɛ sɛ ɔyere ne ho kura mu. (Mmeb. 28:14; Mat. 5:29; 1 Kor. 10:12) Ebehia sɛ ‘ɔyɛ n’adwene foforo’ na ‘okyi bɔne.’ Wei kyerɛ sɛ, ponografi ne ɔbrafi biara te sɛ boasipem no, ɛsɛ sɛ ɔtwe ne ho fi ho koraa. (Efe. 4:23; Dw. 97:10; Rom. 12:9) Wayɛ krado sɛ ɔbɛyɛ anaa? Sɛ saa a, ɛnde ɛwom sɛ akyea, nso emmui. e

Na sɛ wo kunu anaa wo yere nyɛɛ n’adwene sɛ obegyae ponografi hwɛ nso ɛ? Wei betumi ama daa woate nka sɛ wadi wo huammɔ, wo bo betumi afuw, na woate nka sɛ wama wo nsa asi fam. Nanso, gyaw biribiara ma Yehowa; woyɛ saa a, ɛbɛma w’asom adwo wo. (1 Pet. 5:7) Sua ade daa, dwinnwen nea wusua no ho, na bɔ mpae. Woyɛ saa a, ɛbɛma woabɛn Yehowa. Nya awerɛhyem sɛ, worebɛn Yehowa nyinaa, na ɔno nso rebɛn wo. Yesaia 57:15 ka sɛ Yehowa ne wɔn a “wɔabubu ne mmɔborɔwafo” na ɛte, na ɔpɛ sɛ ɔboa wɔn ma wɔn ani gye bio. Bɔ mmɔden sɛ wobɛsom Yehowa yiye. Ma asafo mu mpanyimfo no mmoa wo. Kae sɛ akyea nso emmui, enti ebia dabidabi, wo kunu no bɛsakra n’adwene.—Rom. 2:4; 2 Pet. 3:9.