1. Dɛn na ɛbɛboa yɛn ama yɛn ani agye ho sɛ yebesua Bible nkɔmhyɛ?

 ONUA aberantewa bi a ne din de Ben ka sɛ, n’ani gye ho paa sɛ obesua Bible nkɔmhyɛ. Saa ara na wo nso wote nka anaa? Anaa yɛbɔ Bible nkɔmhyɛ so a, na ehu aka wo? Ebi mpo a, Bible nkɔmhyɛ a wubesua yɛ wo anihaw. Nanso, nea enti a Yehowa ma wɔde nkɔmhyɛ kaa Bible no ho no, sɛ wusua ho ade kɔ akyiri a, ebia w’ani bɛba abegye ho.

2. Dɛn na yɛde yɛn adwene besi so wɔ adesua yi mu?

² Adesua yi mu no, yɛbɛhwɛ nea enti a ɛsɛ sɛ yesua Bible nkɔmhyɛ ne ɔkwan a yɛbɛfa so asua. Ɛno akyi no, nkɔmhyɛ a ɛwɔ Daniel nhoma no mu no, yebesusuw mmienu ho, na yɛahwɛ sɛnea yɛte ase a ɛbɛboa yɛn nnɛ.

3. Sɛ yɛpɛ sɛ yɛte Bible nkɔmhyɛ ase a, dɛn na ehia sɛ yɛyɛ?

³ Sɛ yɛpɛ sɛ yɛte Bible nkɔmhyɛ ase a, ɛsɛ sɛ yɛhwehwɛ mmoa. Yɛnhwɛ mfatoho yi. Fa no sɛ worekɔ baabi a wunnim hɔ, nanso w’adamfo bi a onim hɔ paa ka wo ho. Baabi a mubedu biara onim hɔ, na ɔkwan biara nso, onim baabi a ekopue. Ɛrenyɛ wo dɛ sɛ w’adamfo no ne wo kɔe anaa? Yehowa te sɛ saa adamfo no; onim nea ɛrekɔ so wɔ wiase, na onim nea ɛda yɛn anim nso. Ɛno nti, sɛ yebetumi ate Bible nkɔmhyɛ ase a, ɛsɛ sɛ yɛbrɛ yɛn ho ase hwehwɛ ne mmoa.—Dan. 2:28; 2 Pet. 1:19, 20.

4. Adɛn nti na Yehowa ma wɔde nkɔmhyɛ kaa Bible no ho? (Yeremia 29:11) (Hwɛ mfoni no nso.)

⁴ Ɔwofo pa biara pɛ sɛ daakye ne mma ani gye. Saa pɛpɛɛpɛ na Yehowa nso te. (Kenkan Yeremia 29:11.) Awofo de, wɔrentumi nkyerɛ nea ebesi daakye, nanso Yehowa  de, obetumi akyerɛ nea ebesi daakye pɛpɛɛpɛ. Yehowa ma wɔde nkɔmhyɛ kaa Bible no ho, sɛnea ɛbɛyɛ a yebehu nsɛntitiriw bi a ebesisi daakye. (Yes. 46:10) Bible nkɔmhyɛ yɛ biribi a ɛsom bo a yɛn soro Agya no de ama yɛn. Nanso wobɛyɛ dɛn agye adi sɛ nea Bible ka fa daakye ho no bɛbam ampa?

5. Dɛn na aberantewa anaa ababaa betumi asua afi Max suahu no mu?

⁵ Sɛ yɛn mma kɔ sukuu a, mpɛn pii no, wɔn a wɔnhyɛ da nnye Bible no nni, anaa wɔn a wɔmfa Bible no nyɛ hwee atwa wɔn ho ahyia. Ɛtɔ da a, nsɛm a wɔkeka ne wɔn abrabɔ betumi ama Ɔdansefo bi adwenem ayɛ no naa. Wo de, yɛnhwɛ onua bi a ne din de Max. Ɔka sɛ, “Ná m’awofo akyerɛkyerɛ me ama mahu nokware som. Afei nso, na wɔakyerɛkyerɛ me sɛ Onyankopɔn na ɔma wɔkyerɛw Bible no. Nanso mewɔ sukuu no, m’adwenem fii ase yɛɛ me naa wɔ nkyerɛkyerɛ a ɛte saa ho.” Dɛn na n’awofo yɛe? Ɔka sɛ, “Mihui sɛ anyɛ wɔn dɛ de, nanso wɔnyaa me ho abotare.” Max awofo de Bible no yiyii ne nsɛmmisa no ano maa no. Max nso yɛɛ biribi kaa ho. Ɔka sɛ, “Me ara misuaa Bible nkɔmhyɛ, na me ne mmerante ne mmabaa bi a ɛwɔ asafo no mu bɔɔ nea misuae no ho nkɔmmɔ.” Ekowiee sɛn? Max ka sɛ, “Ɛno akyi no, mibegye dii paa sɛ Onyankopɔn na ɔma wɔkyerɛw Bible no!”

6. Sɛ w’adwene mu yɛ wo naa a, dɛn na ehia sɛ woyɛ, na adɛn ntia?

⁶ Sɛnea ɛtoo Max no, wo nso, sɛ w’adwenem afi ase reyɛ wo naa wɔ Bible nkyerɛkyerɛ ho a, mma ɛnnhaw wo. Nanso ntenatena ho koraa. Adwenem naayɛ te sɛ nkannare. Sɛ wubu w’ani gu so a, ɛde nkakrankakra bɛsɛe w’ade a ɛsom bo. Ansa na wubeyi adwenem naayɛ a ɛte sɛ nkannare a ɛresɛe wo gyidi afi hɔ no, ɛsɛ sɛ wudi kan bisa wo ho sɛ, ‘Nea Bible ka fa daakye ho no, migye di?’ Sɛ w’adwene nsi wo pi a, ɛnde ɛho behia sɛ wusua Bible nkɔmhyɛ a aba mu dedaw no. Wobɛyɛ no sɛn?

7. Ɛba sɛnea yesua Bible nkɔmhyɛ a, nhwɛso bɛn na Daniel ayɛ ama yɛn? (Daniel 12:10) (Hwɛ mfoni no nso.)

⁷ Ɛba sɛnea yesua Bible nkɔmhyɛ a, Daniel ayɛ nhwɛso ama yɛn. Ɔde adwempa na esuaa Bible nkɔmhyɛ, efisɛ na ɔpɛ sɛ ohu nokware no. Ná Daniel brɛ ne ho ase nso. Ná onim sɛ, wɔn a wɔnim Yehowa na wɔde n’akwankyerɛ bɔ wɔn bra no, wɔn na ɔma wɔte nkɔmhyɛ ase. (Dan. 2:27, 28; kenkan Daniel 12:10.) Daniel hwehwɛɛ Yehowa mmoa de kyerɛe sɛ ɔbrɛ ne ho ase. (Dan. 2:18) Afei nso, Daniel too ne bo ase suaa no yiye. Kyerɛwnsɛm a na ɛwɔ hɔ saa bere no, ɔyɛɛ mu nhwehwɛmu kɔɔ akyiri. (Yer. 25:11, 12; Dan. 9:2) Wobɛyɛ dɛn asuasua Daniel?

8. Adɛn nti na ebinom sua Bible nkɔmhyɛ?

⁸ Dwen nea enti a woresua Bible nkɔmhyɛ no ho. Nokware no a wopɛ sɛ wuhu  paa nti na woresua Bible nkɔmhyɛ anaa? Sɛ saa a, ɛnde Yehowa bɛboa wo. (Yoh. 4:23, 24; 14:16, 17) Dɛn bio nti na ebia obi bɛka sɛ ɔresua Bible nkɔmhyɛ? Nea enti a ebinom yɛ saa ne sɛ, wɔrepɛ biribi agyina so aka sɛ Bible no mfi Onyankopɔn hɔ. Sɛ wɔnya saa adwene no a, ɛma wɔte nka sɛ wɔn ankasa betumi akyerɛ nea ɛyɛ papa ne nea ɛyɛ bɔne, na wɔabɔ wɔn bra sɛnea wɔpɛ. Nanso yɛn de, ɛsɛ sɛ yɛde adwempa sua Bible nkɔmhyɛ. Bio nso, suban foforo bi wɔ hɔ a ehia sɛ yenya na ama yɛate Bible nkɔmhyɛ ase.

9. Suban bɛn na ehia sɛ yenya na ama yɛate Bible nkɔmhyɛ ase? Kyerɛkyerɛ mu.

⁹ Brɛ wo ho ase. Yehowa ahyɛ bɔ sɛ ɔbɛboa ahobrɛasefo. (Yak. 4:6) Enti ehia sɛ yɛbɔ mpae srɛ no sɛ ɔmmoa yɛn mma yɛnte Bible nkɔmhyɛ ase. Afei nso, akoa nokwafo a Yehowa nam wɔn so ma yɛn honhom fam aduan wɔ bere a ɛsɛ mu no, ɛsɛ sɛ yegye tom sɛ yehia wɔn mmoa. (Luka 12:42) Yehowa nyɛ sakasaka Nyankopɔn, enti sɛ ɔfa ɔkwan baako pɛ yi so ma yɛte nokware a ɛwɔ Bible mu no ase a, ntease wom.—1 Kor. 14:33; Efe. 4:4-6.

10. Dɛn na wusua fi nea Esther yɛe no mu?

¹⁰ To wo bo ase sua no yiye. Fa nkɔmhyɛ bi a w’ani gye ho na yɛ ho nhwehwɛmu. Saa na onuawa bi a ne din de Esther yɛe. Ná n’ani gye ho sɛ obesua nkɔmhyɛ a ɛfa Mesia a na ɔbɛba no ho. Ɔka sɛ: “Midii mfe 15 no, mifii ase hwehwɛɛ adanse a ɛkyerɛ sɛ wɔkyerɛw saa nkɔmhyɛ no ansa na Yesu reba.” Osuaa Po a Awu Ho Nhoma Mmobɔwee no ho ade, na nea ohui no ma ogyee Mesia no ho nkɔmhyɛ no dii. Ɔka sɛ: “Emu bi wɔ hɔ a, wɔkyerɛwee ansa na Kristo reba, enti nkɔmhyɛ a ɛwom no nso, sɛ emfi Onyankopɔn hɔ a, na efi he?” Esther ka sɛ: “Ná ɛsɛ sɛ mekenkan nhwehwɛmu a mayɛ no mpɛn pii ansa na mate ase.” Nanso ɛyɛ no dɛ sɛ otumi yɛɛ saa. Bere a ɔtoo ne bo ase suaa Bible nkɔmhyɛ ahorow bi no, ɔkaa sɛ, “Me ara mibehui sɛ nea Bible ka biara yɛ nokware!”

11. Sɛ yɛn ara yɛhwehwɛ adanse a ɛkyerɛ sɛ nea Bible ka no yɛ nokware a, sɛn na ɛboa yɛn?

¹¹ Nkɔmhyɛ a ɛwɔ Onyankopɔn Asɛm no mu no, sɛ yehu sɛnea emu bi abam no a, ɛma yɛde yɛn werɛ nyinaa hyɛ Yehowa mu, na yegye akwankyerɛ biara a ɔde ma yɛn no tom. Afei nso, ɛmfa ho sɔhwɛ biara a yɛrehyia no, Bible nkɔmhyɛ ma yehu sɛ, daakye papa bi da yɛn anim. Nkɔmhyɛ a ɛwɔ Daniel nhoma no mu no, momma yensusuw mmienu bi a ɛrebam no ho tiawa. Sɛ yɛte ase a, ebetumi aboa yɛn ma yɛasisi gyinae pa.

12. Ohoni no nan ase a ɛyɛ ‘dade a afrafra dɔte a ɛyɛ mmerɛw no,’ egyina hɔ ma dɛn? (Daniel 2:41-43)

¹² Kenkan Daniel 2:41-43. Ɔhene Nebukadnesar soo dae bi a ɛfa ohoni bi ho. Bere a Daniel rekyerɛ ase no, ɔkaa sɛ ohoni a ɔhene no hui no, ne nan ase  yɛ ‘dade a afrafra dɔte a ɛyɛ mmerɛw.’ Nkɔmhyɛ afoforo a ɛwɔ Daniel ne Adiyisɛm nhoma no mu no, sɛ yɛde saa nkɔmhyɛ yi toto ho a, yebetumi aka sɛ, ohoni no nan ase no gyina hɔ ma Anglo-Amerika a ɛredi wiase so nnɛ no. Daniel kaa saa tumidi yi ho asɛm sɛ “ne fã bi bɛyɛ den na ne fã bi nso ayɛ mmerɛw.” Adɛn nti na ne fa bi yɛ mmerɛw? Efisɛ ɔmanfo no a wɔgyina hɔ ma dɔte a ɛyɛ mmerɛw no, wɔmma saa tumidi yi kwan mma enni ne koko so asɛm. b

13. Nokwasɛm atitiriw bɛn na yesua fi saa nkɔmhyɛ yi mu?

¹³ Sɛ yɛhwɛ ohoni a Daniel kaa ho asɛm no a, yebetumi asua nokwasɛm atitiriw pii afi mu, ɛnkanka ne nan ase no. Nea edi kan, Anglo-Amerika Wiase Tumidi no akyerɛ sɛ ɛwɔ tumi wɔ akwan pii so. Yɛbɛyɛ nhwɛso a, aman a edii nkonim wɔ Wiase Ko a Edi Kan ne Wiase Ko a Ɛtɔ So Mmienu mu no, na wɔdi mu akoten paa. Nanso wɔn manfo no ama wɔn tumi ano abrɛ ase efisɛ, wɔn manfo no kɔ so ko tia wɔn ho wɔn ho ne aban no. Nea ɛtɔ so mmienu, Anglo-Amerika na ebedi tumi ara akosi sɛ Onyankopɔn Ahenni bɛba abɛsɛe wiase ahenni nyinaa. Enti ɛwom sɛ ɛtɔ mmere bi a aman bi bɛsɔre atia Anglo-Amerika Wiase Tumidi no, nanso wɔrentumi ntu no ade so da. Nea enti a yɛreka saa ne sɛ, “ɔbo” a egyina hɔ ma Onyankopɔn Ahenni no bebubu ohoni no nan ase a egyina hɔ ma Anglo-Amerika tumidi no.—Dan. 2:34, 35, 44, 45.

14. Nkɔmhyɛ a ɛfa ohoni no nan ase a ɛyɛ dade ne dɔte ho no, sɛ yɛte ase a, sɛn na ɛbɛboa yɛn ma yɛasisi gyinae pa?

¹⁴ Daniel nkɔmhyɛ a ɛfa ohoni no nan ase a ɛyɛ dade ne dɔte ho no, wugye di paa sɛ ɛyɛ nokware? Sɛ wugye di a, ɛbɛkyerɛ sɛnea wobɛbɔ wo bra. Woremmoaboa ahonyade ano wɔ wiase a ɛregye nna awu yi mu. (Luka 12:16-21; 1 Yoh. 2:15-17) Afei nso, sɛ wote nkɔmhyɛ yi ase a, ɛbɛboa wo ama woahu sɛ asɛnka ne nkyerɛkyerɛ adwuma no ho hia paa. (Mat. 6:33; 28:18-20) Wusua nkɔmhyɛ yi wie a, wubetumi abisa wo ho sɛ, ‘Gyinae a misisi kyerɛ sɛ migye di paa sɛ, ɛrenkyɛ Onyankopɔn Ahenni bɛba abɛsɛe nnipa aban nyinaa?’

15. Ɛnnɛ, henanom ne “anaafo fam hene no” ne “atifi fam hene no”? (Daniel 11:40)

¹⁵ Kenkan Daniel 11:40. Daniel ti 11 ka ahemfo mmienu bi a wɔredi apere ho asɛm; wɔn mu biara pɛ sɛ odi wiase so. Saa nkɔmhyɛ yi, sɛ yɛde toto nkɔmhyɛ afoforo a ɛwɔ Bible mu ho a, yetumi hu sɛ Russia ne aman a wɔtaa n’akyi no, wɔne “atifi fam hene no,” na Anglo-Amerika Wiase Tumidi no ne “anaafo fam hene no.” c

16. Wɔn a ɛte “atifi fam hene no” aman so no, ɔhaw bɛn na wɔhyia?

¹⁶ Onyankopɔn nkurɔfo a ɛte “atifi fam hene no” aman so no, saa ɔhene yi retan wɔn ani denneennen. Wɔaboro Adansefo no bi de wɔn agu afiase esiane wɔn gyidi nti. Nea “atifi fam hene no” reyɛ no, sɛ́ anka ɛbɛbɔ yɛn nuanom hu no, ɛhyɛ wɔn gyidi den mmom. Adɛn ntia? Efisɛ yɛn nuanom no nim sɛ tan a wɔretan Onyankopɔn nkurɔfo ani no ma Daniel  nkɔmhyɛ no ba mu. d (Dan. 11:41) Saa nokwasɛm a yenim yi, ɛboa yɛn ma yɛhyɛ yɛn gyidi den na ɛma yɛkɔ so di Yehowa nokware.

17. Onyankopɔn nkurɔfo a ɛte “anaafo fam hene no” aman so no, ɔhaw bɛn na wɔhyiae?

¹⁷ Bere bi a atwam no, “anaafo fam hene no” nso tan Yehowa nkurɔfo ani. Yɛbɛyɛ nhwɛso a, Wiase Ko a Edi Kan ne Wiase Ko a Ɛtɔ So Mmienu no mu no, esiane sɛ anuanom ankɔ sraadi anaa wɔamfa wɔn ho anhyehyɛ amanyɔsɛm mu nti, wɔde wɔn mu bebree koguu afiase. Afei nso, Adansefo mma a wɔkɔ sukuu no, esiane sɛ wɔankyia frankaa anaa wɔanto ɔman dwom nti, wɔyii wɔn mu bi adi. Nanso nnansa yi de, Yehowa nkurɔfo a ɛte ɔhene yi aman so no, wɔn gyidi ho sɔhwɛ a wɔhyia no yɛ soronko, na ɛno nso ma ɛyɛ den sɛ wɔde wɔn koma nyinaa bɛtaa Onyankopɔn Ahenni no akyi. Yɛbɛyɛ nhwɛso a, edu abatowbere a, ɛbɛyɛ  Kristoni bi sɛ ɔnkogyina amanyɔkuw bi akyi. Aba paa de, ebia ɔrentow, nanso n’adwene ne ne koma mu de, ebia wobɛhwɛ na ɔtaa amanyɔkuw bi akyi. Nanso yɛn nneyɛe oo, nea ɛkɔ so wɔ yɛn adwenem oo, ɛho hia sɛ yɛma ne nyinaa da adi pefee sɛ yennyina amanyɔkuw biara akyi!—Yoh. 15:18, 19; 18:36.

18. Apereperedi a ɛrekɔ so wɔ “atifi fam hene no” ne “anaafo fam hene no” ntam no, sɛn na ɛsɛ sɛ yɛyɛ yɛn ade wɔ ho? (Hwɛ mfoni no nso.)

¹⁸ Wɔn a wɔnnye Bible nkɔmhyɛ nni no, sɛ wɔhu sɛ “atifi fam hene no” ne “anaafo fam hene no” ‘repiapia wɔn ho’ a, ebetumi agyaw wɔn adwinnwen. (Dan. 11:40) Ahemfo mmienu yi, wɔn mu biara wɔ akode a ebetumi asɛe biribiara wɔ asaase so. Nanso yenim sɛ Yehowa remma kwan mma biribi a ɛte saa nsi. (Yes. 45:18) Enti apereperedi a ɛrekɔ so wɔ “atifi fam hene no” ne “anaafo fam hene no” ntam no, sɛ́ anka ɛbɛhaw yɛn no, ɛsɛ sɛ ɛhyɛ yɛn gyidi den mmom, efisɛ esi so dua sɛ wiase yi awiei abɛn.

19. Dɛn na ɛsɛ sɛ yehu fa Bible nkɔmhyɛ ho?

¹⁹ Bible nkɔmhyɛ no bi wɔ hɔ a, yennim sɛnea ɛbɛba mu. Odiyifo Daniel mpo, nea ɔkyerɛwee no, ɛnyɛ ne nyinaa na ɔtee ase. (Dan. 12:8, 9) Nanso sɛ yennim ɔkwan pɔtee a nkɔmhyɛ bi bɛfa so abam a, ɛno nkyerɛ sɛ ɛremma mu. Yebetumi anya ahotoso paa sɛ, sɛ bere so sɛ nkɔmhyɛ bi ba mu a, Yehowa bɛma yɛate ase sɛnea ɔyɛɛ no tete no.—Amos 3:7.

20. Bible nkɔmhyɛ ahorow bɛn na ɛbɛbam nnansa yi ara, na dɛn na ɛsɛ sɛ yɛkɔ so yɛ?

²⁰ Ɛrenkyɛ, amanaman no bɛka sɛ yɛwɔ “asomdwoe ne ahotɔ!” (1 Tes. 5:3) Afei, wiase atumfoɔ no bɛtow ahyɛ atorosom so asɛe no pasaa. (Adi. 17:16, 17) Ɛno akyi no, wɔbɛtow ahyɛ Onyankopɔn nkurɔfo so. (Hes. 38:18, 19) Wei bɛkɔ akɔtwe Armagedon ko no aba. (Adi. 16:14, 16) Yebetumi agye adi sɛ ɛrenkyɛ koraa na saa nsɛm yi asisi. Enkosi saa bere no, momma yɛn ani nku Bible nkɔmhyɛ ho, na yɛmmoa afoforo nso mma wɔnyɛ saa. Yɛyɛ saa a, ɛbɛkyerɛ sɛ yɛn ani sɔ nea yɛn soro Agya no ayɛ ama yɛn no.