ADESUA ASƐM 35
DWOM 123 Brɛ Wo Ho Ase Ma Nyankopɔn Nhyehyɛe
Sɛnea Yɛbɛboa Wɔn a Wɔayi Wɔn Afi Asafo No Mu No
“Anigye pii bɛba ɔsoro wɔ ɔbɔnefo baako a wasakra ho sen atreneefo 99 a wonhia adwensakra.” —LUKA 15:7.
NEA ADESUA YI BƐKA HO ASƐM
Nea enti a ɛho hia sɛ wɔyi ebinom fi asafo no mu, ne sɛnea asafo mu mpanyimfo betumi aboa wɔn ama wɔasakra wɔn adwene, na wɔasiesie wɔne Yehowa ntam.
1-2. (a) Sɛ obi yɛ bɔne kɛse bi na wansakra n’adwene a, Yehowa bu no sɛn? (b) Wɔn a wɔyɛ bɔne no, dɛn na Yehowa pɛ sɛ wɔyɛ?
YEHOWA nsosɔ bɔne so. (Dw. 5:4-6) Sɛnea ɔpɛ sɛ yɛbɔ yɛn bra no, waka ho asɛm wɔ n’Asɛm Bible no mu. Esiane sɛ ɔpɛ yɛn yiye nti, ɔpɛ sɛ yɛde nea waka no yɛ adwuma. Ɛwom, Yehowa nim sɛ bɔne wɔ yɛn ho, enti ɔnhwɛ kwan sɛ yɛbɛyɛ yɛn biribiara pɛpɛɛpɛ. (Dw. 130:3, 4) Nanso, ‘amumɔyɛfo a wɔde n’adom kata wɔn anim bɔ ahohwibra’ no de, ɔnsosɔ wɔn so. (Yuda 4) Bible ka mpo sɛ Onyankopɔn ko a wɔfrɛ no Armagedon no ba a, “wɔbɛsɛe amumɔyɛfo.”—2 Pet. 3:7; Adi. 16:16.
2 Nanso Yehowa mpɛ sɛ obiara bɛsɛe. Sɛnea yɛaka ho asɛm wɔ adesua nsɛm a yɛadi kan asua no mu no, Bible ka no pefee sɛ nea Onyankopɔn pɛ ne sɛ “obiara bɛsakra n’adwene.” (2 Pet. 3:9) Asafo mu mpanyimfo suasua Yehowa, enti wɔnya abotare boa wɔn a wɔyɛ bɔne no ma wɔsesa wɔn akwan sɛnea ɛbɛyɛ a wɔbesiesie wɔne Yehowa ntam. Nanso ɛnyɛ abɔnefo nyinaa na wɔsakra wɔn adwene. (Yes. 6:9) Ebinom wɔ hɔ a, mpanyimfo no bɛyɛ ara, nanso bɔne no ara na wɔbɛkɔ so ayɛ; wɔrensakra. Ɛba saa a, dɛn na mpanyimfo no bɛyɛ?
“MUNYI ƆBƆNEFO NO MFI MO MU”
3. (a) Dɛn na Bible ka sɛ wɔnyɛ abɔnefo a wɔnsakra wɔn adwene no? (b) Sɛ ɔbɔnefo bi ansakra n’adwene a, adɛn nti na yebetumi aka sɛ ɔkwan bi so no, ɔno ara na wayi ne ho afi asafo no mu?
3 Sɛ ɔbɔnefo bi ansakra n’adwene a, ɛnde nea mpanyimfo no bɛyɛ ara ne sɛ wɔde asɛm a ɛwɔ 1 Korintofo 5:13 yi bɛyɛ adwuma: “Munyi ɔbɔnefo no mfi mo mu.” Enti yebetumi aka sɛ ɔbɔnefo no ara na wama aba saa; nea oduae no, ɛno ara na watwa. (Gal. 6:7) Adɛn nti na yebetumi aka saa? Efisɛ mpanyimfo no yɛɛ biara sɛ anka wɔbɛma wanya adwensakra nanso ɔsen ne kɔn. (2 Ahe. 17:12-15) Nea ɔyɛe no kyerɛ sɛ na ɔnyɛɛ n’adwene sɛ ɔde Yehowa mmara bɛyɛ adwuma.—Deut. 30:19, 20.
4. Sɛ obi yɛ bɔne na wansakra n’adwene na sɛ wɔyi no fi asafo no mu a, adɛn nti na wɔde ho amanneɛbɔ to gua wɔ asafo no mu?
4 Sɛ obi yɛ bɔne na wansakra n’adwene na sɛ wɔyi no fi asafo no mu a, wɔde to gua wɔ asafo no mu sɛ ɔnyɛ Yehowa Danseni bio. a Ɛnyɛ adwene a ɛwɔ amanneɛbɔ no akyi ne sɛ wɔde begu ɔbɔnefo no anim ase. Mmom ɛboa ma asafo no de Bible mu akwankyerɛ yi yɛ adwuma. Bible ka sɛ, saa onipa no, “mo ne no mmmɔ,” na “mo ne no nnnidi mpo.” (1 Kor. 5:9-11) Yɛn yiyedi nti na Onyankopɔn de saa akwankyerɛ no maa yɛn. Ɔsomafo Paul kyerɛwee sɛ: “Mmɔkaw kakraa bi na ɛma mmɔre no nyinaa kaw.” (1 Kor. 5:6) Sɛ obi yɛ bɔne na wansakra n’adwene, na sɛ wɔanyi no amfi asafo no mu a, ɛremma afoforo nhaw wɔn ho sɛ wɔde Yehowa mmara bɛyɛ adwuma.—Mmeb. 13:20; 1 Kor. 15:33.
5. Sɛ wɔyi obi fi asafo no mu a, ɛsɛ sɛ yebu no sɛn, na adɛn nti na ɛsɛ sɛ yebu no saa?
5 Sɛ wɔyi yɛn nua Kristoni bi fi asafo no mu a, ɛsɛ sɛ yebu no sɛn? Ɛwom sɛ yɛne no remmɔ de, nanso yebebu no sɛ oguan a wayera a obetumi asan aba Yehowa nkyɛn. Kae sɛ oguan a wayera no hyiraa ne ho so maa Yehowa. Ɛyɛ awerɛhosɛm sɛ seesei ɔmmɔ ne bra sɛ obi a wahyira ne ho so; wei yɛ biribi a ɛyɛ hu paa. (Hes. 18:31) Nanso bere a Yehowa gu so rehu nnipa mmɔbɔ yi de, anidaso wɔ hɔ sɛ obetumi asan aba. Sɛ wɔyi obi fi asafo no mu mpo a, dɛn na mpanyimfo no bɛyɛ de akyerɛ sɛ wɔwɔ anidaso sɛ obetumi asan aba?
NEA MPANYIMFO BƐYƐ DE ABOA WƆN A WƆAYI WƆN AFI ASAFO NO MU
6. Dɛn na mpanyimfo bɛyɛ de aboa obi a wɔayi no afi asafo no mu no?
6 Sɛ wɔyi obi fi asafo no mu a, wohwɛ a, ɛkyerɛ sɛ wɔayi ne baako ahyɛ ne nsa sɛ ɔno ara mfa ne ti mpempem nkosi sɛ ɔbɛsan aba Yehowa nkyɛn anaa? Ɛnte saa koraa! Sɛ boayikuw a emufo yɛ mpanyimfo no rebɔ ɔbɔnefo a wansakra n’adwene no amanneɛ sɛ wɔbeyi no afi asafo no mu a, wɔkyerɛ no anammɔn a ehia sɛ otu na watumi asan aba. Nanso ɛnyɛ ɛno nko ara ne ade a mpanyimfo no yɛ. Mpɛn pii no, boayikuw no bɛka akyerɛ ɔbɔnefo no sɛ abosome kakra akyi no, wɔbɛpɛ sɛ wɔsan hyia no. Sɛ wɔhyia no a, wɔbɛhwɛ sɛ wanya adwensakra anaa. Sɛ ɔbɔnefo no pene so na sɛ mpanyimfo no san ne no hyia a, wɔbɛka nsɛm a ɛka koma de ahyɛ no nkuran sɛ ɔnsakra na ɔnsan mmra. Sɛ mpanyimfo no ne no hyia na sɛ onnuu ne ho mpo a, wɔbɛsan ayɛ nhyehyɛe na ɛwom ara a, wɔasan ne no ahyia.
7. Sɛ wɔyi obi fi asafo no mu a, dɛn na mpanyimfo bɛyɛ de akyerɛ sɛ wɔresuasua Yehowa ayamhyehye? (Yeremia 3:12)
7 Sɛ wɔyi obi fi asafo no mu a, mpanyimfo yɛ nea wɔbetumi biara de suasua Yehowa ayamhyehye. Bere a tete Israelfo a na wɔyɛ Yehowa man no tew atua no sei, wantwɛn amma wɔansakra ansa na ɔreboa wɔn. Mmom bere a wɔnnya nyɛɛ biribiara a ɛkyerɛ sɛ wɔasakra wɔn adwene mpo no, oyii ne yam boaa wɔn. Adesua asɛm a ɛtɔ so mmienu a ɛwɔ Ɔwɛn-Aban yi mu no, yehui sɛ Yehowa ka kyerɛɛ ne diyifo Hosea sɛ ɛmfa ho sɛ ne yere da so rebu brabɔne no, ɔnsan ne no nkosiesie wɔn ntam. Ɔde kyerɛɛ ne nkurɔfo baabi a n’ayamhyehye kodu. (Hos. 3:1; Mal. 3:7) Asafo mu mpanyimfo suasua Yehowa; nea wɔpɛ paa ne sɛ ɔbɔnefo no bɛsan aba, enti wɔnyɛ biribiara a ɛbɛtwe no asan.—Kenkan Yeremia 3:12.
8. Yesu mfatoho a ɛfa ɔba desɛefo no ho no, sɛn na ɛma yɛte Yehowa ayamhyehye ne ne mmɔborɔhunu ase yiye? (Luka 15:7)
8 Kae Yesu mfatoho a ɛfa ɔba desɛefo no ho no. Yɛkaa ho asɛm wɔ adesua asɛm a ɛtɔ so mmienu no mu. Bere a agya no huu ne ba no wɔ akyirikyiri sɛ ɔresan aba fie no, “otuu mmirika kɔyɛɛ no atuu, na ofew n’ano.” (Luka 15:20) Hyɛ no nsow sɛ papa no antwɛn sɛ ne ba no mmɛpa no kyɛw ansa na ɔde ne bɔne akyɛ no. Mmom sɛnea agya biara a ɔwɔ ɔdɔ bɛyɛ no, odii kan tuu anammɔn kɔɔ ne ba no nkyɛn. Mpanyimfo no bɔ mmɔden sɛ wɔbɛyɛ saa ara de aboa wɔn a wɔafom kwan no. Nea wɔpɛ ara ne sɛ saa nguan a wɔayera yi bɛsan aba Yehowa fie. (Luka 15:22-24, 32) Sɛ ɔbɔnefo baako san ba Yehowa nkyɛn a, anigye ba soro ne asaase so nyinaa!—Kenkan Luka 15:7.
9. Nsɛm a ɛka koma bɛn na Yehowa ka kyerɛ abɔnefo?
9 Ɛde besi ha yi, yɛahu sɛ wɔn a wɔyɛ bɔne na wɔnsakra wɔn adwene no, Yehowa nsosɔ wɔn so. Nanso onyi abɔnefo tow-kyene. Ɔpɛ sɛ wɔsan ba ne nkyɛn. Sɛ obi yɛ bɔne na ɔsakra n’adwene a, sɛnea Yehowa te nka no, waka ho asɛm wɔ Hosea 14:4 sɛ: “Mɛsa wɔn yare, na wɔremfi m’akyi bio. Meyi me yam adɔ wɔn, efisɛ m’abufuw adan afi [wɔn] so.” Wei yɛ nhwɛso a ɛyɛ fɛ paa a mpanyimfo betumi asuasua na sɛ wɔhu sɛ obi anya adwensakra ketewaa bi mpo a, wɔayɛ ntɛm akɔboa no. Ɛsan yɛ nhwɛso kamakama ma wɔn wɔafi Yehowa nkyɛn no sɛ wɔnyɛ ntɛm nsan mmra ne nkyɛn.
10-11. Wɔn a wɔayi wɔn afi asafo no mu dedaw no nso, dɛn na mpanyimfo no bɛyɛ de aboa wɔn?
10 Ebinom wɔ hɔ a wɔayi wɔn afi asafo no mu dedaw, ebi mpo a mfe pii atwam. Wɔn nso yɛbɛyɛ wɔn dɛn? Ebetumi mpo aba sɛ bɔne a wɔyɛe a ɛma wɔyii wɔn fii asafo no mu no, wɔagyae yɛ. Ebinom nso wɔ hɔ a, nea wɔyɛe a ɛma wɔyii wɔn fii asafo no mu mpo ebia wɔnkae. Ne nyinaa mu no, mpanyimfo no bɛhwehwɛ saafo no akyi kwan na wɔne wɔn ahyia. Sɛ wɔkɔsra obi a ɔte saa a, wɔbetumi mpo ne no abɔ mpae na wɔaka nsɛm a ɛka koma de ahyɛ no nkuran sɛ ɔnsan mmra asafo no mu. Sɛ onii no fii asafo no mu akyɛ a, ɛnde ɛda adi sɛ ebia na wayɛ mmerɛw paa. Enti sɛ ɔpɛ sɛ wɔsan gye no ba asafo no mu a, mpanyimfo no betumi ayɛ nhyehyɛe ama obi ne no ayɛ Bible adesua bere mpo a wɔnnya nnyee no. Mpanyimfo no nkutoo na wɔbɛyɛ Bible adesua a ɛte saa ho nhyehyɛe.
11 Mpanyimfo no suasua Yehowa ayamhyehye, enti wɔyere wɔn ho hwehwɛ obiara a wafi asafo no mu kɔboa no ma ohu sɛ obetumi asan aba. Sɛ ɔbɔnefo bi sakra n’adwene na ɔsesa fi ne kwammɔne ho a, wɔbetumi agye no ntɛmpa ara.—2 Kor. 2:6-8.
12. (a) Tebea ahorow bɛn mu na ɛsɛ sɛ mpanyimfo yɛ ahwɛyiye paa? (b) Adɛn nti na ɛnsɛ sɛ yenya adwene sɛ abɔnefo bi wɔ hɔ a Yehowa remfa wɔn bɔne nkyɛ wɔn da? (Hwɛ ase hɔ asɛm no nso.)
12 Ɛtɔ da a ɛsɛ sɛ mpanyimfo yɛ ahwɛyiye paa ansa na wɔasan agye obi. Ɛho nhwɛso ne obi a wadi awurukasɛm atia abofra bi, ɔwaefo, anaa obi a ɔfaa kwammɔne bi so guu n’aware. Sɛ ɔpɛ sɛ ɔsan ba a, ɛsɛ sɛ mpanyimfo no hwɛ hu sɛ wanu ne ho paa. (Mal. 2:14; 2 Tim. 3:6) Sɛ wɔyɛ saa a, ɛbɔ nguan no ho ban. Bere koro no ara nso, ɛnsɛ sɛ yɛma yɛn werɛ fi sɛ, sɛ ɔbɔnefo bi nu ne ho na ɔsesa fi n’akwammɔne ho a, Yehowa bɛsan agye no aba ne nkyɛn. Enti wɔn a wɔne nkurɔfo adi no nwenweenwene no, mpanyimfo no yɛ ahwɛyiye paa ansa na wɔasan agye wɔn. Nanso ɛnsɛ sɛ wɔnya adwene sɛ abɔnefo bi wɔ hɔ a Yehowa remfa wɔn bɔne nkyɛ wɔn da. b—1 Pet. 2:10.
DƐN NA ASAFO NO MUFO BETUMI AYƐ?
13. Obi a mpanyimfo aka n’anim ne obi a wɔayi no afi asafo no mu no, nsonsonoe bɛn na ɛda sɛnea yɛne wɔn mu biara di no mu?
13 Sɛnea yehui wɔ adesua a edi wei anim no mu no, ɛtɔ da a, wɔde to asafo no anim sɛ wɔaka obi anim. Ɛba saa a, yebetumi ne no abɔ efisɛ wasakra n’adwene na watwe ne ho afi ne kwammɔne no ho. (1 Tim. 5:20) Ɔda so ka asafo no ho, na ohia anuanom nkuranhyɛ na wakɔ so ayɛ nea ɛtene. (Heb. 10:24, 25) Nanso sɛ wɔyi obi fi asafo no mu de a, ɛsono sɛnea yɛne no di. Yɛne “no mmmɔ,” na yɛne “no nnnidi mpo.”—1 Kor. 5:11.
14. Sɛn na Kristoni biara betumi agyina n’ahonim a ɔde Bible atete no no so ne obi a wɔayi no afi asafo no mu adi? (Hwɛ mfoni no nso.)
14 Sɛ wɔyi obi fi asafo no mu a, wohwɛ a, nea yɛasusuw ho yi kyerɛ sɛ yɛremfii no koraa anaa? Ɛnte saa ankasa. Ɛwom sɛ yɛne no remmɔ de, nanso yɛn mu biara betumi agyina n’ahonim a ɔde Bible atete no no so asi gyinae sɛ ɔbɛto nsa afrɛ no sɛ ɔmmra asafo nhyiam anaa ɔrenyɛ saa; onii no betumi ayɛ yɛn busuani, anaa obi a na ɔbɛn yɛn. Sɛ ɔba nso a, dɛn na anuanom bɛyɛ? Bere bi a atwam de, sɛ obi a ɔte saa ba asafo nhyiam a na yenkyia no. Nanso seesei de, sɛ Kristoni bi bekyia no oo, sɛ ɔrenkyia no oo, yegyaw ma n’ahonim a ɔde Bible atete no no. Ebinom wɔ hɔ a, sɛ obi a wɔayi no afi asafo no mu ba adesua a, wɔn ahonim bɛma wɔn kwan ama wɔakyia no anaa wɔama no akwaaba. Nanso wei nkyerɛ sɛ ɛsɛ sɛ yɛne onii no bɔ anaa yɛne no twetwe nkɔmmɔ.
Kristoni biara betumi de n’ahonim a ɔde Bible atete no no asi gyinae sɛ ɔbɛto nsa afrɛ obi a wɔayi no afi asafo no mu sɛ ɔmmra adesua anaa ɔrenyɛ saa. Afei nso, sɛ ɔpɛ a, obekyia no tiawa ama no akwaaba bere a waba adesua anaa ɔrenyɛ saa (Hwɛ nkyekyɛm 14)
15. Abɔnefo bɛn na 2 Yohane 9-11 ka wɔn ho asɛm? (Adaka a yɛato din “ Bɔne a Paul Kaa Ho Asɛm No, Ɛno Ara Na Yohane Nso Kaa Ho Asɛm Anaa?” no, hwɛ ɛno nso)
15 Ebia ebinom bebisa sɛ, ‘Sɛ́ ɛwɔ Bible mu sɛ, sɛ Kristoni bi kyia obi a wɔayi no afi asafo no mu a, na ɔrefoa onii no bɔne so?’ (Kenkan 2 Yohane 9-11.) Sɛ yɛhwɛ Yohane asɛm yi mu a, yehu sɛ wɔn a wɔyɛ awaefo ne wɔn a wɔhyɛ nkurɔfo kutupa ma wɔyɛ nneɛma bɔne ho asɛm na na ɔreka. (Adi. 2:20) Enti sɛ obi hyɛ awaefo nkyerɛkyerɛ ho nkuran, anaa ɔhyɛ abrabɔ bɔne ho nkuran a, mpanyimfo no renyɛ nhyehyɛe nkɔsra no. Ne nyinaa mu no, onii no betumi asesa na wasan aba Yehowa nkyɛn. Nanso bere a onnya nsesae no de, yɛrenkyia no, na yɛrento nsa mfrɛ no sɛ ɔmmra adesua.
MOMMA YENSUASUA YEHOWA AYAMHYEHYE NE NE MMƆBORƆHUNU
16-17. (a) Dɛn na Yehowa pɛ sɛ abɔnefo yɛ? (Hesekiel 18:32) (b) Sɛ asafo mu mpanyimfo reboa obi a wayɛ bɔne a, dɛn na wɔbɛyɛ de akyerɛ sɛ wɔne Yehowa rebom ayɛ adwuma?
16 Adesua nsɛm a ɛtoatoa so nnum a yɛasua yi, dɛn na ama yɛahu? Ɛne sɛ, Yehowa mpɛ sɛ obiara bɛsɛe! (Kenkan Hesekiel 18:32.) Ɔpɛ sɛ abɔnefo siesie wɔne ne ntam. (2 Kor. 5:20) Ɛno nti, efi tete nyinaa, sɛ Yehowa nkurɔfo fa kwammɔne so a, ɔhyɛ wɔn nkuran sɛ wɔnsakra na wɔnsan mmra ne kyɛn. Ɛyɛ hokwan paa na asafo mu mpanyimfo anya sɛ, wɔne Yehowa bɛbom ayɛ adwuma de aboa abɔnefo ama wɔasakra wɔn adwene.—Rom. 2:4; 1 Kor. 3:9.
17 Abɔnefo sakra a, anigye a ɛba soro de yɛnka! Sɛ yɛn soro Agya Yehowa nguan a wɔayera no mu baako san ba asafo no mu a, ɛma n’ani gye paa. Sɛ yedwinnwen Yehowa ayamhyehye, ne mmɔborɔhunu ne n’adom ho a, ɛma ɔdɔ a yɛwɔ ma no no yɛ kɛse.—Luka 1:78.
DWOM 111 Nea Ɛma Yɛn Ani Gye
a Efi saa bere yi rekɔ no, yɛrenka sɛ yɛatu obi afi asafo no mu. Esiane Paul asɛm a ɛwɔ 1 Korintofo 5:13 nti, seesei yɛbɛka sɛ yɛayi no afi asafo no mu.
b Bible ma yɛte ase sɛ, yenni bɔne pɔtee bi a obi yɛ a ɛno de wɔremfa nkyɛ no da. Nanso sɛ obi boapa yɛ bɔne tia Onyankopɔn na ɔkɔ so sen ne kɔn a, ɛno de ɔremfa nkyɛ no. Sɛ obi ayɛ bɔne a ɛte saa oo, sɛ ɔnyɛɛ saa oo, ɛno de ɛnyɛ yɛn na yɛbɛkyerɛ.—Mar. 3:29; Heb. 10:26, 27.
