1. Nhyira bɛn na Yehowa pɛ sɛ nnipa nyinaa nya?

 YEHOWA de obiara pɛ ama no. Enti gyinae a yɛpɛ biara yetumi si. Gyinae a ɛho hia paa a ɔdasani biara betumi asi ne sɛ obehyira ne ho so ama Yehowa na wabɛka n’asomfo ho. Yehowa pɛ sɛ obiara yɛ saa. Adɛn ntia? Efisɛ ɔdɔ nnipa, na ɔpɛ sɛ esi wɔn yiye. Ɔpɛ sɛ wɔne no fa adamfo na wɔtena ase daa.—Deut. 30:​19, 20; Gal. 6:​7, 8. 

2. Dɛn na Yehowa pɛ sɛ abɔnefo a wɔnnuu wɔn ho yɛ? (1 Yohane 2:1)

² Yehowa nhyɛ obiara sɛ ɔnsom no. Wama kwan sɛ obiara betumi asi gyinae a ɔpɛ. Na sɛ ɛkɔba sɛ Kristoni bi a wabɔ asu bu Onyankopɔn mmara so na ɔyɛ bɔne kɛse bi nso ɛ? Sɛ wannu ne ho a, ɛwɔ sɛ wɔyi no fi asafo no mu. (1 Kor. 5:13) Ɛba saa mpo a, Yehowa hwɛ kwan denneennen sɛ ɔbɔnefo no bɛsan aba ne nkyɛn. Nokwasɛm ne sɛ, ɛno ka ho bi paa nti na ɔmaa Yesu bewui, sɛnea ɛbɛyɛ a ɔde abɔnefo a wɔanu wɔn ho bɔne bɛkyɛ wɔn. (Kenkan 1 Yohane 2:1.) Yɛn Nyankopɔn a ɔdɔ yɛn no hyɛ abɔnefo nkuran sɛ wɔnsakra wɔn adwene.—Sak. 1:3; Rom. 2:4; Yak. 4:8.

3. Dɛn na yebesusuw ho wɔ adesua yi mu?

³ Adwene a Yehowa wɔ wɔ bɔne ne abɔnefo ho no, ɔpɛ sɛ yɛn nso yenya saa adwene no bi. Adesua yi bɛma yɛahu sɛnea yebetumi ayɛ saa. Sɛ woresua adesua  asɛm yi a, hwɛ sɛ wubenya nsɛmmisa a edidi so yi ho mmuae a: (1) Onua bi a ɔyɛɛ bɔne kɛse bi wɔ Korinto asafo no mu no, sɛn na wɔdii asɛm no ho dwuma? (2) Bere a ɔbɔnefo no nuu ne ho no, akwankyerɛ bɛn na ɔsomafo Paul de mae? (3) Sɛ Kristoni bi yɛ bɔne kɛse bi a, sɛn na Bible mu asɛm yi ma yehu adwene a Yehowa wɔ wɔ onii no ho?

ONUA BI A ƆYƐƐ BƆNE KƐSE BI WƆ KORINTO ASAFO NO MU NO, SƐN NA WƆDII ASƐM NO HO DWUMA?

4. Dɛn na esii wɔ Korinto asafo no mu? (1 Korintofo 5:​1, 2)

⁴ Kenkan 1 Korintofo 5:​1, 2. Paul asɛmpatrɛw akwantu a ɛtɔ so mmiɛnsa no mu no, ɔtee sɛ Korinto asafo a na wɔtewee nkyɛe no, na asɛm bi a ɛyɛ asefem asi wom. Ná onua bi a ɔwɔ saa asafo no mu agye ne papa yere. Ná ɛyɛ atantanne a “enni amanaman mufo mpo mu”! Ɛnyɛ sɛ na asafo no sosɔ saa subammɔne no so kɛkɛ, na mmom ɛbɛyɛ sɛ na wɔde hoahoa wɔn ho mpo. Ebia ebinom nyaa adwene sɛ wɔresuasua sɛnea Onyankopɔn da mmɔborɔhunu adi kyerɛ abɔnefo no. Nanso Yehowa de, sɛ ne somfo bi yɛ bɔne a ɔnsosɔ so. Saa subammɔne a ɔbarima no daa no adi no, ɛda adi pefee sɛ na ɛresɛe din pa a na asafo no wɔ no. Afei nso, ɛbɛyɛ sɛ na ɔde ne subammɔne no resɛe asafo no mufo a na wɔne no bɔ no. Enti dɛn na Paul ka kyerɛɛ asafo no sɛ wɔnyɛ?

5. Dɛn na Paul ka kyerɛɛ asafo no sɛ wɔnyɛ, na dɛn na na ɔpɛ sɛ ɔkyerɛ? (1 Korintofo 5:13) (Hwɛ mfoni no nso.)

⁵ Kenkan 1 Korintofo 5:13. Yehowa maa Paul kyerɛw krataa kɔmaa asafo no sɛ, wɔnyi ɔbɔnefo a onnuu ne ho no mfi asafo no mu. Sɛn na na ɛsɛ sɛ asafo no mufo ne no di? Paul ka kyerɛɛ wɔn sɛ ɛnsɛ sɛ ‘wɔne no bɔ.’ Dɛn na na ɛno kyerɛ? Paul kyerɛɛ mu sɛ, ɛnsɛ sɛ wɔne “saa onipa no didi mpo.” (1 Kor. 5:11) Sɛ obi ne obi tena ase didi a, ɛnyɛ den koraa sɛ ɔne saa nipa no bɛbɔ nkɔmmɔ na wafa no adamfo. Twe a na asafo no mufo bɛtwe wɔn ho afi ɔbɔnefo no ho no, na ɛbɛbɔ asafo no ho ban na wamfa ne subammɔne no ansan wɔn. (1 Kor. 5:​5-7) Afei nso, sɛ wɔne ɔbarima no ammɔ a, ebetumi ama n’ani aba ne ho so na wahu sɛ ɔne Yehowa ntam asɛe. Ebia wei bɛma n’ani awu, na aka no ma wanya adwensakra.

6. Krataa a Paul kyerɛwee no, dɛn na asafo no yɛe wɔ ho, na dɛn na ɔbɔnefo no nso yɛe?

 ⁶ Bere a Paul kyerɛw krataa kɔmaa Kristofo a ɛwɔ Korinto no akyi no, na ontumi nhu sɛ asafo no de bɛyɛ adwuma anaa wɔremfa nyɛ adwuma. Akyiri yi, Tito bɛkaa asɛm bi kyerɛɛ no a ɛmaa n’ani gyei paa. Asɛm a Paul kyerɛwee wɔ krataa no mu no, asafo no tie guu aso pa mu, enti wɔyii ɔbɔnefo no fii asafo no mu. (2 Kor. 7:​6, 7) Afei nso, bere a Paul de ne krataa no kɔmaa wɔn bere tiaa bi akyi no, ɔbɔnefo no sakraa n’adwene! Ɔsesaa ne suban, na ofii ase dii Yehowa mmara so. (2 Kor. 7:​8-11) Ɛno akyi no, dɛn na Paul ka kyerɛɛ asafo no sɛ wɔnyɛ?

 SƐN NA NA ƐSƐ SƐ ASAFO NO MUFO NE ƆBƆNEFO A ONUU NE HO NO DI?

7. Bere a wɔyii ɔbɔnefo no fii asafo no mu no, dɛn na efii mu bae? (2 Korintofo 2:​5-8)

⁷ Kenkan 2 Korintofo 2:​5-8. Paul kaa sɛ “animka a nnipa dodow no de ama saa onipa no, ɛno ara dɔɔso ma no.” Wei kyerɛ sɛ nteɛso a na wɔde ama no no, na aboa no ama wasakra n’adwene. Enti na ɛho nhia sɛ asafo no kɔ so teɛ no so.—Heb. 12:11.

8. Dɛn bio na Paul ka kyerɛɛ asafo no sɛ wɔnyɛ?

⁸ Paul ka kyerɛɛ asafo no sɛ: “Munyi mo yam mfa nkyɛ” onua a ɔyɛɛ bɔne no, “na monkyekye ne werɛ” na “momma onhu sɛ modɔ no ampa.” Hyɛ no nsow sɛ, ɛnyɛ sɛ na Paul pɛ sɛ wɔgye ɔbarima no ba asafo no mu kɛkɛ. Mmom na ɔpɛ sɛ wɔde wɔn kasa ne wɔn nneyɛe ma ɔbarima a wanu ne ho no nya awerɛhyem sɛ, wɔayi wɔn yam de ne bɔne akyɛ no, na wɔdɔ no. Ɛba saa a, na ɛbɛma ɔbarima no ahu sɛ asafo no agye no atom ampa.

9. Adɛn nti na ɛbɛyɛ sɛ na ɛyɛ den sɛ ebinom de ɔbɔnefo a na wanu ne ho no bɔne bɛkyɛ no?

⁹ Bere a wɔgyee ɔbɔnefo a wanu ne ho no, ɛbɛyɛ sɛ na ɛyɛ den ma asafo no mufo binom sɛ wɔbegye no atom. Adɛn nti na yɛreka saa? Ade yi, ne nneyɛe bɔne no kɔfaa ɔhaw brɛɛ asafo mũ no nyinaa, na ɛbɛyɛ sɛ ɛkɔfaa animguase brɛɛ ankorankoro bi nso. Ná asafo no mufo abɔ mmɔden adi Yehowa mmara so. Enti ebia ebinom tee nka sɛ bɔne paa a ɔbarima yi dii a wɔasan agye no aba asafo no mu de, antwa yiye. (Fa toto Luka 15:​28-30 ho.) Ɛnde, adɛn nti na na ɛsɛ sɛ asafo no mufo yi wɔn yam da ɔdɔ kann adi kyerɛ onua a na wɔasan agye no no?

10-11. Ɔbarima a na wanu ne ho no, sɛ mpanyimfo no amfa ne bɔne no ankyɛ no a, dɛn na anka ebetumi asi?

¹⁰ Ɔbarima a na wanu ne ho no, sɛ mpanyimfo no ansan annye no amma asafo no mu, anaa bere a ɔsan bae no, asafo no mufo yii ne baako hyɛɛ ne nsa a, wohwɛ a anka ɔbɛte nka sɛn? Anka “awerɛhow bebrebe” bɛhyɛ no so. Ebia anka ɔbɛte nka sɛ anidaso nyinaa asa. Ebi mpo a anka ɔrenhaw ne ho sɛ obesiesie ɔne Onyankopɔn ntam.

¹¹ Nea enye koraa ne sɛ, ɔbarima a na wanu ne ho no, sɛ asafo no mufo amfa ne bɔne ankyɛ no a, anka ebetumi ama wɔne Yehowa ntam asɛe. Adɛn ntia? Efisɛ sɛ wɔyɛ saa a, ɛkyerɛ sɛ, Yehowa a ɔde abɔnefo a wɔanu wɔn ho bɔne kyɛ wɔn no, ɛnyɛ ɔno na wɔresuasua no, na mmom Satan tirimɔdenfo a onni ahummɔbɔ no na wɔresuasua no. Ɛba saa a, na wɔama Ɔbonsam nam wɔn so rema ɔbarima no agyae Yehowa som koraa.—2 Kor. 2:​10, 11; Efe. 4:27.

12. Dɛn na na asafo no betumi ayɛ de asuasua Yehowa?

¹² Ɛnde, dɛn na na Korinto asafo no betumi ayɛ de akyerɛ sɛ wɔresuasua Yehowa, na ɛnyɛ Satan? Ɛne sɛ wɔbesuasua sɛnea Yehowa ne abɔnefo a wɔanu wɔn ho di no. Yɛnhwɛ nea Bible akyerɛwfo bi ka faa Yehowa ho. Dawid kaa sɛ, Yehowa ‘ye, na oyi ne yam de bɔne kyɛ.’ (Dw. 86:5) Mika kyerɛwee sɛ: “Hena na ɔyɛ Onyankopɔn te sɛ wo, nea ɔde mfomso kyɛ?” (Mika 7:18) Yesaia nso kaa sɛ: “Ma ɔbɔnefo nnyaw ne kwan, na onipabɔnefo nsakra n’adwene; ma ɔnsan mmra Yehowa nkyɛn, na obehu no mmɔbɔ, ɔmmra yɛn Nyankopɔn  nkyɛn, na ɔde bɛkyɛ no aboro so.”—Yes. 55:7.

13. Ɔbarima a ɔyɛɛ bɔne no, adɛn nti na na ɛnsɛ sɛ wɔtwentwɛn so sɛ wɔbɛsan agye no? (Hwɛ adaka a yɛato din “ Ɔbarima a Na Ɔwɔ Korinto No, Bere Bɛn Na Wɔsan Gyee No?” no.)

¹³ Ná ɛsɛ sɛ Korinto asafo no gye ɔbarima a na wanu ne ho no awaawaa atuu, na wɔma ohu sɛ wɔdɔ no na wɔn ani agye sɛ wasan aba. Wɔyɛ saa a, na ɛbɛkyerɛ sɛ wɔresuasua Yehowa. Sɛ asafo no tie Paul akwankyerɛ no na wɔsan gye ɔbɔnefo a wanu ne ho no ba asafo no mu a, na ɛbɛkyerɛ sɛ ‘wɔreyɛ osetie wɔ ade nyinaa mu.’ (2 Kor. 2:9) Ɛwom, bere a wɔyii ɔbarima no fii asafo no mu no, edii abosome kakraa bi, nanso na asotwe no aboa no ama wasakra. Enti na ɛho nhia sɛ wɔtwentwɛn so ansa na wɔasan agye no aba asafo no mu.

SUASUA YEHOWA ATƐNTRENEE NE NE MMƆBORƆHUNU

14-15. Asɛm a esii wɔ Korinto asafo no mu no, sɛnea wɔdii ho dwuma no, dɛn na yebetumi asua fi mu? (2 Petro 3:9) (Hwɛ mfoni no nso.)

¹⁴ Asɛm a esii wɔ Korinto asafo no mu no, sɛnea wɔdii ho dwuma no, wɔakyerɛw ato hɔ sɛ “ɛnkyerɛkyerɛ yɛn.” (Rom. 15:4) Kyerɛwtohɔ no ma yehu sɛ, sɛ obi yɛ bɔne kɛse wɔ asafo no mu a, Yehowa nsosɔ so. Ɔnka sɛ esiane sɛ ɔwɔ  “mmɔborɔhunu” nti, abɔnefo a wɔnnuu wɔn ho no, asafo no mufo nkɔ so ara ne wɔn mmɔ. Yehowa yɛ mmɔborɔhunufo, nanso ɔnyɛ nhwɛhaa; afei nso, ongow ne mmara mu. (Yuda 4) Nokwasɛm ne sɛ, sɛ ɔyɛ saa a, ɛno mmom na ɛbɛkyerɛ sɛ ɔnyɛ mmɔborɔhunufo, efisɛ ɔbɔnefo no betumi de ne subammɔne no asɛe asafo no.—Mmeb. 13:20; 1 Kor. 15:33.

¹⁵ Ne nyinaa mu no, yenim sɛ Yehowa mpɛ sɛ obiara bɛsɛe. Sɛ ɛbɛyɛ yiye a ɔpɛ sɛ ogye obiara nkwa. Sɛ obi sesa n’akwan na ɔpɛ sɛ osiesie ɔne Yehowa ntam a, oyi ne mmɔborɔhunu adi kyerɛ onii no. (Hes. 33:11; kenkan 2 Petro 3:9.) Enti, bere a ɔbarima a na ɔwɔ Korinto asafo no mu nyaa adwensakra na ɔsesaa n’akwan no, Yehowa faa Paul so maa asafo no hui sɛ, ɛsɛ sɛ wɔde ɔbarima no bɔne kyɛ no, na wɔma ohu sɛ wɔn ani agye sɛ wasan aba.

16. Asɛm a esii wɔ Korinto asafo no mu no, sɛnea wɔdii ho dwuma no, wote nka sɛn wɔ ho?

¹⁶ Asɛm a esii wɔ Korinto no, sɛnea wɔdii ho dwuma no, yɛasusuw ho akɔ akyiri. Wei aboa yɛn ama yɛahu sɛ, Yehowa wɔ ɔdɔ, ɔyɛ ade trenee, na obu atɛntrenee nso. (Dw. 33:5) Enti yɛpɛ sɛ ayeyi a yɛde ma Onyankopɔn no, yɛde bi ka ho. Ade yi, yɛn nyinaa yɛ abɔnefo, enti yehia bɔnefakyɛ. Ɛsɛ sɛ yɛn mu biara ma Yehowa hu sɛ yɛn ani sɔ agyede no, efisɛ ɛno na ogyina so de yɛn bɔne kyɛ yɛn. Sɛ yehu sɛ ɔdɔ yɛn paa na ɔpɛ sɛ esi yɛn yiye a, ɛhyɛ yɛn nkuran na ɛkyekye yɛn werɛ paa!

17. Dɛn na yebesusuw ho wɔ adesua nsɛm a edi hɔ no mu?

¹⁷ Ɛnnɛ nso ɛ, sɛ asafo no muni bi yɛ bɔne kɛse a, sɛn na mpanyimfo no betumi asuasua Yehowa na wɔaboa no ma wasakra n’adwene? Sɛ mpanyimfo no yi obi fi asafo no mu anaa wɔsan gye obi a, sɛn na ɛsɛ sɛ asafo no mufo yɛ wɔn ade? Yebesusuw nsɛmmisa yi ho wɔ adesua nsɛm a edi hɔ no mu.