1. Dɛn ne “Onyankopɔn asomdwoe,” na sɛ yɛwɔ bi a, sɛn na ɛboa yɛn? (Filipifo 4:6, 7)

 YƐWƆ asomdwoe bi a nnipa a ɛwɔ wiase no nnim ho hwee. Ɛno ne “Onyankopɔn asomdwoe.” Ɛyɛ akomatɔyam a sɛ obi ne yɛn soro Agya no ntam yɛ kama a, onya. Yɛwɔ Onyankopɔn asomdwoe a, yɛte nka sɛ yɛn ho tɔ yɛn. (Kenkan Filipifo 4:6, 7.) Ɛma yɛne afoforo a wɔdɔ Onyankopɔn fa adamfo denneennen. Afei nso, ɛma yɛne “asomdwoe Nyankopɔn” no ntam yɛ kama. (1 Tes. 5:23) Sɛ yenim yɛn Agya no, yɛde yɛn ho to no so, na yetie no a, Onyankopɔn asomdwoe betumi aka yɛn koma ato yɛn yam bere a yɛrehyia ɔhaw bi no.

2. Adɛn nti na yebetumi anya awerɛhyem sɛ yebetumi anya Onyankopɔn asomdwoe?

² So ɛyɛ ampa sɛ yebetumi anya Onyankopɔn asomdwoe bere a yare atu atese, atoyerɛnkyɛm bi asi, ɔman no mu ayɛ basabasa, anaa nkurɔfo retan yɛn ani no? Ɔhaw yi mu biara betumi ama ehu aka yɛn. Nanso, Yesu tuu n’akyidifo fo sɛ: “Mommma mo koma nntu, na mommma ɛmmmɔ hu.” (Yoh. 14:27) Anigyesɛm ne sɛ, anuanom de Yesu afotu no ayɛ adwuma. Yehowa mmoa so nti, sɔhwɛ a emu yɛ den a wɔnam mu mpo no, wɔatumi anya asomdwoe.

3. Sɛ yare bi tu atese a, sɛn na ebetumi asɛe yɛn asomdwoe?

³ Sɛ yare bi tu atese a, etumi ma biribiara sesa wɔ yɛn abrabɔ mu prɛko pɛ. Yɛnhwɛ sɛnea COVID-19 yare no kaa nnipa pii. Nhwehwɛmu bi a wɔyɛe no, wɔbisabisaa nnipa bi nsɛm, na wɔn mu bɛboro fa kaa sɛ COVID-19 yare no nti, wɔntumi nna. Yare no kɔfaa dadwen kɛse bɛtoo nkurɔfo so, ebinom nyaa adwenemhaw, na ebinom nso nom nsa boroo so, na wɔnom nnubɔne. Ebinom nso dii wɔn abusuafo ani, na afoforo nso yɛe sɛ wɔbekum wɔn ho. Sɛ yare bi atu atese wɔ baabi  a wowɔ no a, dɛn na wobɛyɛ na dadwen anhyɛ wo so, na woanya Onyankopɔn asomdwoe?

4. Nkɔm a Yesu hyɛ faa awiei mmere no ho no, sɛ yehu a, adɛn nti na ɛbɛma yɛanya asomdwoe?

⁴ Yesu hyɛɛ nkɔm sɛ awiei mmere no mu no, nsanyare a edi awu anaa nyarewa bebree “bɛba mmeaemmeae.” (Luka 21:11) Sɛn na wei a yenim no ma yenya asomdwoe? Sɛ yare tew si baabi a, ɛnyɛ yɛn nwanwa. Yehu sɛ nea Yesu kae no ara na ɛreba mu no. Enti ɛsɛ sɛ yɛde afotu a Yesu de maa wɔn a ɛte awiei mmere no mu no yɛ adwuma. Ɔkaa sɛ: “Monhwɛ na moammɔ hu.”—Mat. 24:6.

5. (a) Sɛn na asɛm a ɛwɔ Filipifo 4:8, 9 betumi aboa yɛn ma yɛahu nea ɛsɛ sɛ yɛbɔ ho mpae bere a yare bi atew asi baabi a yɛwɔ no? (b) Sɛ wutie Bible a wɔayɛ no ɔdio a, sɛn na ɛbɛboa wo?

⁵ Sɛ yare tew si baabi a, ebetumi ama yɛn adwene atu afra, anaa yɛn koma atu mpo. Asɛm a ɛte saa na ɛtoo onuawa bi a ne din de Desi. b Bere a COVID-19 kum ne papa kumaa, ne papa panyin ba, ne ne dɔkta no, na osuro sɛ anhwɛ a ɔno nso benya yare no bi na ɔde asan ne maame a ne mfe akɔ anim no. Yare no nti, na ɛyɛ no sɛ n’adwuma befi ne nsa ama ayɛ den ama no sɛ obenya nea obedi ne nea ɔde betua ne dan ka. Wei nyinaa yɛɛ no kɔdaanna. Nanso Desi san nyaa asomdwoe. Ɔkwan bɛn so? Ɔhyɛɛ da bɔɔ mpae ka kyerɛɛ Yehowa sɛ ɔmmoa no na ne koma antu, na onnya adwempa. (Kenkan Filipifo 4:8, 9.) Ɔmaa Yehowa faa Bible a wɔayɛ no ɔdio so ne no “kasae.” Ɔka sɛ, “Akenkanfo no nne a ahomeka wom no kaa me koma too me yam, na ɛkaee me Yehowa mmɔborɔhunu.”—Dw. 94:19.

6. Sɛn na kokoam adesua ne asafo nhyiam betumi aboa wo?

⁶ Sɛ yare tew si baabi a, ɛnyɛ dɛn ara a, nneɛma a woyɛ no daa no bi ho bɛka, nanso hwɛ na antwitware kokoam adesua a wobɛyɛ ne asafo nhyiam a wobɛkɔ mu. Osuahu ahorow a ɛwɔ asafo nhoma ne video ahorow mu no bɛkae wo sɛ, ɛmfa ho sɛ wo nuanom nso rehyia sɔhwɛ a worehyia no bi no, wɔda so ara de nokwaredi resom Yehowa. (1 Pet. 5:9) Wokɔ asafo nhyiam a, ɛbɛboa wo ma woadwinnwen Bible mu nsɛm a ɛhyɛ nkuran ho. Ɛbɛboa wo nso ma woanya hokwan de ahyɛ anuanom nkuran, na wo nso woanya nkuranhyɛ. (Rom. 1:11, 12) Yehowa asomfo a na wɔyare, ehu aka wɔn, anaa wɔyɛ ankonam no, sɛnea Yehowa boaa wɔn no, sɛ wudwinnwen ho a, ɛbɛhyɛ wo gyidi den, na ɛbɛma woanya awerɛhyem sɛ, wo nso ɔbɛboa wo.

7. Dɛn na yebetumi asua afi ɔsomafo Yohane hɔ?

⁷ Bɔ mmɔden ne wo nuanom mmɔ. Sɛ yare tew si baabi na yɛne yɛn nuanom hyiam a, ebia ebehia sɛ yɛhwɛ na yɛammɛn  wɔn pii. Biribi saa si a, ebia yɛbɛte nka te sɛ ɔsomafo Yohane. Ná ɔpɛ sɛ ohu n’adamfo Gaio anim ne anim. (3 Yoh. 13, 14) Nanso obehui sɛ, saa bere no de, ɔrentumi nhu no. Enti Yohane yɛɛ nea obetumi; ɔkyerɛw Gaio krataa. Sɛ ɛnyɛ bere nyinaa na wubetumi akɔsra wo nuanom a, bɔ mmɔden fa tɛlefon, video anaa tɛs mɛsegye so ne wɔn nni nkitaho. Sɛ wo ne wo nuanom Kristofo di nkitaho a, ɛremma wonte nka sɛ woayɛ ankonam, na w’asom bedwo wo. Nanso sɛ dadwen hyɛ wo so a, ka ho asɛm kyerɛ asafo mu mpanyimfo, na gye mmoa biara a wɔde bɛma wo no tom.—Yes. 32:1, 2.

8. Sɛ atoyerɛnkyɛm bi si a, sɛn na ebetumi asɛe w’asomdwoe?

⁸ Sɛ nsu ayiri afa baabi a wote, asaasewosow asi hɔ, anaa ogya atɔ hɔ pɛn a, ebia dadwen a ɛkɔfa brɛɛ wo no, ɛteetee wo kyɛe. Sɛ ɛma wohweree w’adɔfo anaa ɛsɛee w’agyapade a, ebia ɛmaa wo werɛ howee, woyɛɛ basaa, anaa wo bo mpo fuwii. Ɛno nkyerɛ sɛ honam fam nneɛma agye w’adwene, anaa wunni gyidi. Nea wofaa mu no, na ani soso, na ebia na ebinom mpo hwɛ kwan sɛ wobɛyɛ nneɛma bi a ɛmfa kwan mu. (Hiob 1:11) Nanso sɛ nea worefa mu no ano yɛ hyew mpo a, wubetumi anya asomdwoe. Ɔkwan bɛn so?

9. Sɛn na Yesu siesiee yɛn adwene maa atoyerɛnkyɛm a ebesisi?

⁹ Kae nkɔm a Yesu hyɛe no. Yɛnte sɛ wɔn a ɛwɔ wiase a ɛyɛ wɔn sɛ atoyerɛnkyɛm rentumi nto wɔn da no. Yɛn de, yɛhwɛ kwan sɛ, yɛn bere yi so no, atoyerɛnkyɛm bɛdɔɔso, na ebi betumi aka yɛn. Yesu ka kyerɛɛ n’akyidifo sɛ “asaasewosow akɛse” ne atoyerɛnkyɛm afoforo besisi ansa na awiei no aba. (Luka 21:11) Ɔsan hyɛɛ nkɔm sɛ, ‘amumɔyɛ bɛdɔɔso’ wɔ yɛn bere yi so. Ɛnnɛ, awudisɛm, basabasayɛ, ne amumɔyɛsɛm a ɛrekɔ so no di wei ho adanse. (Mat. 24:12) Yesu anka da sɛ wɔn a Yehowa apo wɔn no nko ara na ɔhaw a ɛtete saa bɛto wɔn. Nokwasɛm ne sɛ, atoyerɛnkyɛm ato Yehowa asomfo anokwafo pii mpo. (Yes. 57:1; 2 Kor. 11:25) Ebia Yehowa remfa anwanwakwan so mmɔ yɛn ho ban mfi atoyerɛnkyɛm nyinaa ho, nanso biribiara a ɛbɛma yɛn koma atɔ yɛn yam na yɛanya asomdwoe no, ɔde bɛma yɛn.

10. Sɛ yesiesie yɛn ho ma atoyerɛnkyɛm nnɛ a, adɛn nti na ɛkyerɛ sɛ yɛwɔ gyidi? (Mmebusɛm 22:3)

¹⁰ Sɛ yedi kan siesie yɛn ho hu nea atoyerɛnkyɛm si a yɛbɛyɛ a, sɛ esi a, ɛbɛyɛ mmerɛw ama yɛn sɛ yɛbɛka yɛn koma ato yɛn yam. Nanso sie a yebedi kan asiesie yɛn ho no kyerɛ sɛ yenni Yehowa mu gyidi anaa? Ɛnte saa koraa. Nea ɛwom paa ne sɛ, sɛ yedi kan siesie yɛn ho ma atoyerɛnkyɛm a, ɛkyerɛ sɛ yɛwɔ Yehowa mu gyidi sɛ ɔbɛhwɛ yɛn. Ɔkwan bɛn so? Onyankopɔn Asɛm tu yɛn fo sɛ, yensiesie yɛn ho mma atoyerɛnkyɛm. (Kenkan Mmebusɛm 22:3.) Onyankopɔn ahyehyɛde no nam nsɛmma nhoma, asafo nhyiam, ne nkaebɔ ahorow so kae yɛn daa sɛ yensiesie yɛn ho mma atoyerɛnkyɛm. c Sɛ yɛwɔ Yehowa mu ahotoso a, yɛrentwentwɛn yɛn nan ase koraa; yɛde saa afotu no bɛyɛ adwuma ansa na atoyerɛnkyɛm bi asi.

11. Dɛn na wusua fi nea ɛtoo Margaret no mu?

¹¹ Momma yɛnhwɛ nea ɛtoo onuawa bi a ne din de Margaret. Atumfoɔ no ka kyerɛɛ no sɛ omfi baabi a ɔte no, efisɛ na ogya atɔ ne mpɔtam hɔ. Esiane sɛ na nnipa pii reguan afi hɔ wɔ bere koro mu nti, ɛmaa kar  bɔ pee so wɔ akwan no so. Ná akwan no so nyinaa ayɛ wusiw kumɔnn, enti na Margaret ntumi mpue mfi ne kar mu. Nanso onyaa ne ti didii mu, efisɛ na wadi kan asiesie ne ho. Ná ɔwɔ bag ketewa bi a ɔde map ahyɛ mu a ɛbɛboa no ama wahu kwan foforo a ɔbɛfa so afi hɔ. Atoyerɛnkyɛm mpo nnya nsii no, ɔde kar kɔfaa kwan no so, sɛnea ɛbɛyɛ a sɛ biribi si mpofirim a obetumi afa so a ɔrenyera. Esiane sɛ na Margaret adi kan asiesie ne ho nti, onyaa ne ti didii mu.

12. Akwankyerɛ a ɛbɔ yɛn ho ban a wɔde ma yɛn no, adɛn nti na ɛsɛ sɛ yedi so?

¹² Nea ɛbɛyɛ na atumfoɔ no abɔ yɛne afoforo ho ban no, ebia wɔbɛka akyerɛ yɛn sɛ, mma yemmpue, baabi a yɛwɔ no yemfi hɔ, anaa yenni akwankyerɛ pɔtee bi so. Sɛ wɔde akwankyerɛ a ɛte saa ma a, ebinom mpɛ sɛ wɔbedi so, anaa wɔtwentwɛn wɔn nan ase efisɛ wɔmpɛ sɛ wɔbegyaw wɔn agyapade hɔ. Kristofo nso ɛ, yɛyɛ yɛn ade sɛn? Bible ka kyerɛ yɛn sɛ: “Awurade nti mommrɛ mo ho ase mma nnipa nhyehyɛe nyinaa; mommrɛ mo ho ase mma ɔhene esiane ne dibea nti, ne amradofo a ɔhene soma wɔn.” (1 Pet. 2:13, 14) Onyankopɔn ahyehyɛde no nso ma yɛn akwankyerɛ a ɛbɔ yɛn ho ban. Wɔtaa ka kyerɛ yɛn sɛ, fon nɔma a yɛwɔ no mprempren no, yɛmfa mma asafo mu mpanyimfo no, na sɛ asɛm bi si mpofirim a wɔatumi ne yɛn adi nkitaho. Woayɛ saa anaa? Afei nso, wɔtumi ma yɛn akwankyerɛ sɛ yɛnhyɛ baabi kakra anaa yemfi baabi a yɛwɔ no. Bio nso, sɛ atoyerɛnkyɛm si a, wɔtumi kyerɛ yɛn nea yɛyɛ a yebenya mmoa, sɛnea yɛbɛboa afoforo ne bere a ɛsɛ sɛ yɛboa wɔn. Sɛ yɛanni akwankyerɛ a ɛte saa so a, yebetumi de yɛne mpanyimfo no nkwa ato asiane mu. Kae sɛ, saa mmarima anokwafo yi na ɛhwɛ yɛn so. (Heb. 13:17) Margaret kaa sɛ, “Akwankyerɛ a efi mpanyimfo no ne ahyehyɛde no hɔ a midii so no, migye di paa sɛ ɛno na egyee me nkwa.”

13. Kristofo a atoyerɛnkyɛm atu wɔn afi baabi a wɔte no, dɛn na ama wɔanya anigye ne asomdwoe?

¹³ Anuanom bebree a atoyerɛnkyɛm, ɔko anaa basabasayɛ a ɛrekɔ so wɔ wɔn man mu nti, wɔatu afi baabi a wɔwɔ no, wɔabehu sɛ mmere adane, enti wɔn nso ayɛ nea wɔbetumi biara adane wɔn ho bi. Wei nti, wɔreyɛ pii wɔ Yehowa som mu. Wɔte sɛ tete Kristofo a ɔsɔretia nti wɔbɔ hwetee no; wɔkɔ so ‘ka Onyankopɔn asɛm no ho asɛmpa.’  (Aso. 8:4) Sɛ́ anka wɔde wɔn adwene besi ɔhaw a wɔakɔ mu no so no, asɛnka adwuma no boa wɔn ma wɔde wɔn adwene si Ahenni no so. Wei nti, wɔda so ara wɔ anigye ne asomdwoe.

14. Sɛ nkurɔfo retan yɛn ani a, sɛn na ebetumi asɛe yɛn asomdwoe?

¹⁴ Sɛ nkurɔfo retan yɛn ani a, ebetumi asɛe nneɛma pii a ɛma yenya akomatɔyam no. Sɛ yetumi ne yɛn nuanom hyiam anaa yɛkɔ asɛnka a obiara nhaw yɛn, na yetumi yɛ nneɛma a yɛyɛ no daa no a yensuro sɛ obi bɛkyere yɛn a, ɛma yɛn ani gye, na yɛn koma tɔ yɛn yam. Nanso sɛ nkurɔfo tiatia saa fahodi a yɛwɔ no so a, ebetumi ama dadwen abɛtɔ yɛn so, na yɛabisa yɛn ho sɛ, dɛn na wei bɛkɔ akɔfa aba? Ɛnyɛ bɔne sɛ yɛbɛte nka saa. Nanso ɛsɛ sɛ yɛhwɛ yiye. Yesu kaa sɛ, sɛ nkurɔfo tan n’akyidifo ani a, ebetumi ato wɔn hintidua. (Yoh. 16:1, 2) Ɛnde, sɛ nkurɔfo retan yɛn ani a, dɛn na yɛbɛyɛ na asomdwoe a yɛwɔ no ansɛe?

15. Adɛn nti na ɛnsɛ sɛ yesuro sɛ nkurɔfo bɛtan yɛn ani? (Yohane 15:20; 16:33)

¹⁵ Onyankopɔn Asɛm ka sɛ: “Wɔn a wɔpɛ sɛ wɔde onyamesom pa tena ase sɛ Kristo Yesu akyidifo nyinaa, nkurɔfo bɛtan wɔn ani.” (2 Tim. 3:12) Bere a wɔbaraa yɛn adwuma no wɔ onua bi a wɔfrɛ no Andrei man mu no, ɛyɛɛ den maa no sɛ obegye saa asɛm no atom. Ɔkaa sɛ: ‘Adansefo bebree wɔ ha. Ɛbɛyɛ dɛn na atumfoɔ no atumi akyere yɛn nyinaa?’ Saa asɛm a Andrei dwinnwen ho no amfa asomdwoe ammrɛ no, mmom ɛmaa adwinnwen bɛtɔɔ no so. Anuanom a aka no gyaa asɛm no maa Yehowa, na wɔannya adwene sɛ atumfoɔ no rentumi nkyere wɔn. Ná wɔnim sɛ atumfoɔ no betumi akyere wɔn, nanso na wɔn yam nhyehye wɔn te sɛ Andrei. Enti Andrei nso sesaa n’adwene na ɔde ne ho too Onyankopɔn so. Ɔyɛɛ saa no, ankyɛ koraa na onyaa asomdwoe. Seesei, ɛwom sɛ ɔhaw no nkɔe, nanso ɔwɔ anigye. Yɛn nso yebetumi anya anigye a ɛte saa. Ɛwom sɛ Yesu ka kyerɛɛ yɛn sɛ, ɛsɛ sɛ yɛhwɛ kwan sɛ nkurɔfo bɛtan yɛn ani, nanso ɔmaa yɛn awerɛhyem sɛ yebetumi akɔ so adi Yehowa nokware.—Kenkan Yohane 15:20; 16:33.

16. Sɛ nkurɔfo retan yɛn ani a, akwankyerɛ bɛn na ɛsɛ sɛ yetie?

¹⁶ Sɛ atumfoɔ no bara yɛn adwuma no,  anaa wɔma ɛyɛ den ma yɛn sɛ yɛbɛsom Yehowa sɛnea yɛpɛ a, ebia Betel anaa asafo mu mpanyimfo bɛma yɛn akwankyerɛ. Akwankyerɛ a ɛte saa botae ne sɛ ɛbɛbɔ yɛn ho ban, ɛbɛboa ama yɛakɔ so anya honhom fam aduan, na aboa yɛn ama yɛakɔ so aka asɛmpa no sɛnea ɛsɛ. Sɛ wɔde akwankyerɛ ma na sɛ wonte ase mpo a, yɛ nea wubetumi biara di so. (Yak. 3:17) Afei nso, hwɛ yiye na nsɛm a ɛfa anuanom ne asafo no dwumadi ho no, woanyi no adi ankyerɛ wɔn a wɔnni hokwan sɛ wɔhu.—Ɔsɛnk. 3:7.

17. Sɛnea asomafo a na ɛwɔ tete Kristofo no bere so yɛe no, dɛn na yɛn nso yɛasi yɛn bo sɛ yɛbɛyɛ?

¹⁷ Ade titiriw baako nti a Satan atu n’ani asi Onyankopɔn nkurɔfo so ne sɛ, wɔn na “wokura Yesu ho adansedi adwuma” no mu. (Adi. 12:17) Mma Satan ne ne wiase no nnhunahuna wo. Sɛ nkurɔfo sɔre tia yɛn na sɛ yɛkɔ so ka asɛmpa no kyerɛkyerɛ nkurɔfo a, ɛma yɛn ani gye, na yɛn asom dwo yɛn. Tete Kristofo no bere so no, bere a Yudafo atumfoɔ no hyɛɛ asomafo no sɛ wɔnnyae asɛm no ka no, saa mmarima anokwafo no tiee Onyankopɔn mmom. Wɔkɔɔ so kaa asɛmpa no, na saa adwuma no maa wɔn ani gyei. (Aso. 5:27-29, 41, 42) Sɛ atumfoɔ no mma yɛn kwan mma yɛnka asɛm no sɛnea yɛpɛ a, ɛnsɛ sɛ yegyae ka, nanso ɛsɛ sɛ yɛma yɛn ani da hɔ. (Mat. 10:16) Sɛ yɛyɛ nea yebetumi nyinaa de sɔ Yehowa ani, na yɛka nkwagye asɛm no a, yebenya asomdwoe.

18. Hena na obetumi ama yɛn asomdwoe a edi mu?

¹⁸ Nya awerɛhyem sɛ, sɛ nneɛma mu yɛ den sɛ dɛn mpo a, yebetumi anya asomdwoe. Mmere a ɛtete saa mu no, ɛsɛ sɛ yɛkae sɛ Onyankopɔn asomdwoe na yehia. Saa asomdwoe no, Yehowa nko ara na ɔde ma. Sɛ yare bi tu atese, atoyerɛnkyɛm bi si, anaa nkurɔfo retan w’ani a, fa wo ho to no so. Bata n’ahyehyɛde no ho denneennen. Fa w’adwene bu daakye papa bi a ɛda w’anim no. Woyɛ saa a, ‘asomdwoe Nyankopɔn no ne wo bɛtena.’ (Filip. 4:9) Adesua a edi hɔ no mu no, yɛn mfɛfo Kristofo a wɔrehyia amanehunu no, yɛbɛhwɛ sɛnea yebetumi aboa wɔn ma wɔanya Onyankopɔn asomdwoe.