1. Aka kakra ma Yesu awu no, asɛm bɛn na ɔka kyerɛɛ ɔkorɔmfo-werɛmfo bi a na ɔno nso sɛn dua so wɔ ne nkyɛn no? (Luka 23:39-43)

 BERE a Yesu ne akorɔmfo-werɛmfo mmienu a na wɔn nso sɛn dua so wɔ ne nkyɛn no rewu no, wɔhuu amane paa. (Luka 23:32, 33) Akorɔmfo-werɛmfo mmienu no nyinaa didii Yesu atɛm, enti ɛda adi sɛ na wɔnyɛ n’asuafo. (Mat. 27:44; Mar. 15:32) Nanso wɔn mu baako sesaa n’adwene. Ɔkaa sɛ: “Yesu, sɛ woba w’Ahenni mu a, kae me.” Yesu nso kaa sɛ: “Nokwarem mereka akyerɛ wo nnɛ sɛ, wobɛka me ho wɔ Paradise.” (Kenkan Luka 23:39-43.) Bere a Yesu reyɛ ne som adwuma no, ɔkaa “ɔsoro Ahenni” no ho asɛm, nanso biribiara nni hɔ a ɛkyerɛ sɛ na ɔkorɔmfo-werɛmfo yi gye saa asɛm no di. Afei nso, Yesu anka da sɛ saa ɔbarima no bɛkɔ Ahenni no mu. (Mat. 4:17) Asaase so Paradise a na ɛbɛba daakye ho asɛm na na Yesu reka. Adɛn nti na yebetumi aka saa?

2. Dɛn na ɛkyerɛ sɛ ɔkorɔmfo-werɛmfo a onuu ne ho no, na ɔyɛ Yudani?

² Ɔkorɔmfo-werɛmfo a onuu ne ho no, ɛbɛyɛ sɛ na ɔyɛ Yudani. Ɔka kyerɛɛ nea ɔka ne ho no sɛ: “Enti wunsuro Onyankopɔn koraa? Asotwe a wɔde ama no no, ɛnyɛ ɛno ara bi na wɔde ama wo?” (Luka 23:40) Ná Yudafo no som Onyankopɔn baako pɛ, nanso amanaman mufo no de, na wɔsom anyame pii. (Ex. 20:2, 3; 1 Kor. 8: 5, 6) Sɛ akorɔmfo-werɛmfo yi yɛ amanaman mufo a, anka asɛm a ebia baako no bebisa ne yɔnko no ne sɛ: “Enti wunsuro anyame no koraa?” Afei nso, wɔansoma Yesu amanaman mufo no nkyɛn; “Israel fi nguan a wɔayera no” nkyɛn na wɔsomaa no. (Mat. 15:24) Ná Onyankopɔn ama Israelfo no ahu sɛ  obenyan awufo. Ebetumi aba sɛ na ɔkorɔmfo-werɛmfo a wanu ne ho no nim wei. Sɛ yɛhwɛ asɛm a ɔkae no a, onyaa adwene sɛ Yehowa benyan Yesu ma wakodi ade wɔ Onyankopɔn Ahenni mu. Ɛbɛyɛ sɛ ɔbarima no nyaa anidaso sɛ Onyankopɔn benyan ɔno nso.

3. Ɛbɛyɛ sɛ dɛn na ɛbaa ɔkorɔmfo-werɛmfo a na wanu ne ho no adwenem bere a Yesu kaa Paradise ho asɛm kyerɛɛ no no? Kyerɛkyerɛ mu. (Genesis 2:15)

³ Ɔkorɔmfo-werɛmfo a na wanu ne ho no, sɛ na ɔyɛ Yudani a, ɛnde ɛbɛyɛ sɛ na wate Adam ne Hawa ho asɛm, na na onim sɛ Yehowa de wɔn kɔtenaa Paradise. Enti bere a Yesu kaa Paradise ho asɛm kyerɛɛ no no, ɛbɛyɛ sɛ ohui sɛ paradise no bɛyɛ turo fɛfɛɛfɛ bi wɔ asaase so daakye.—Kenkan Genesis 2:15.

4. Asɛm a Yesu ka kyerɛɛ akorɔmfo-werɛmfo no mu baako no, dɛn na ɛsɛ sɛ ɛkanyan yɛn ma yedwinnwen ho?

⁴ Asɛm a Yesu ka kyerɛɛ ɔkorɔmfo-werɛmfo no, ɛsɛ sɛ ɛkanyan yɛn ma yedwinnwen sɛnea Paradise asetena bɛyɛ ho. Nokwasɛm ne sɛ, Ɔhene Solomon ahenni a na asomdwoe wom no, yebetumi asua Paradise ho biribi afi mu. Afei nso, yebetumi ahwɛ kwan sɛ Yesu a ɔyɛ kɛse sen Solomon ne wɔn a wɔne Yesu bedi ade no de nhyira pii bɛba asaase yi so. (Mat. 12:42) Enti, ɛda adi sɛ, nea ɛsɛ sɛ “nguan foforo” no yɛ na wɔatumi atena Paradise afebɔɔ no, ɛsɛ sɛ ɛho hia wɔn.—Yoh. 10:16.

5. Sɛn na wohwɛ kwan sɛ asetena bɛyɛ wɔ Paradise?

⁵ Sɛ wususuw Paradise asetena ho a, dɛn na ɛba w’adwene mu? Ebia nea ɛba w’adwene mu ne baabi a ɛhɔ yɛ fɛ te sɛ Eden turo no. (Gen. 2:7-9) Ebia wobɛkae nkɔm a Mika hyɛ faa Onyankopɔn nkurɔfo ho no. Ɔkaa sɛ, “wɔn mu biara bɛtena ne bobe ne ne borɔdɔma dua ase.” (Mika 4:3, 4) Ebia aduan a ebebu so a Bible ka ho asɛm no nso bɛba w’adwene mu. (Dw. 72:16; Yes. 65:21, 22) Enti wubetumi de w’adwene abu sɛ wowɔ turo fɛfɛɛfɛ bi mu na wote pon bi ho a aduan a ɛyɛ dɛ ayɛ so ma. Hwɛ sɛ mframa a emu tew rebɔ fa wo ho, na nhwiren ne afifide hua nenam mu. Afei hwɛ sɛ abusuafo, nnamfo ne awufo a wɔanyan wɔn nyinaa abom rebɔ nserehehe. Wei nyinaa nyɛ bɔsrɛmka. Yebetumi aka sɛ nneɛma bi a ɛtete sei bɛkɔ so wɔ asaase so. Wei da nkyɛn a, yebenya adwuma a ɛma akomatɔyam nso ayɛ wɔ Paradise.

6. Dɛn na yɛbɛyɛ wɔ Paradise? (Hwɛ mfoni no.)

⁶ Yehowa abɔ yɛn wɔ ɔkwan bi so a ɛma yɛn ani gye adwuma a yɛyɛ ho. (Ɔsɛnk. 2:24) Kristo Mfirihyia Apem Nniso no mu no, yebenya adwuma pii ayɛ. Nnipa  a wɔbenya wɔn ti adidi mu wɔ ahohiahia kɛse no mu ne nnipa ɔpepem pii a wɔbenyan wɔn no, wɔbehia ntaade, aduan ne baabi a wɔbɛtena. Adwuma a yɛbɛyɛ na yɛn nsa aka saa nneɛma yi bɛma yɛn koma atɔ yɛn yam paa. Sɛnea na ɛsɛ sɛ Adam ne Hawa yɛ Eden turo no mu adwuma no, yɛn nso yebenya hokwan ayɛ asaase no so adwuma ma adan paradise. Afei nso, nnipa ɔpepem pii a wɔbenyan wɔn a wɔnnim Yehowa ne n’atirimpɔw ho ade papa biara no, fa w’adwene bu sɛ yɛde anigye rekyerɛkyerɛ wɔn. Saa ara na anokwafo a wɔtenaa ase bere tenten ansa na Yesu reba a yɛbɛboa wɔn ama wɔasua nneɛma pii no nso bɛma yɛn ani agye.

7. Ahotoso bɛn na yebetumi anya, na adɛn ntia?

⁷ Yebetumi anya ahotoso sɛ Paradise a ɛbɛba daakye no, yebenya asomdwoe, yebedi yiye, na biribiara bɛkɔ so pɛpɛɛpɛ. Adɛn ntia? Efisɛ sɛnea asetena bɛyɛ wɔ Yesu Ahenni mu no, Yehowa ama yɛahu ho mpopoe kakra. Yɛhwɛ nea ɛkɔɔ so bere a Ɔhene Solomon dii ade no a, ɛbɛma yɛate wei ase.

8. Sɛn na Ɔhene Dawid nsɛm a ɔkyerɛwee wɔ Dwom 37:10, 11, 29 no baa mu? (Hwɛ “Nsɛmmisa a Efi Akenkanfo Hɔ” a ɛwɔ Ɔwɛn-Aban yi mu no.)

⁸ Onyankopɔn maa Ɔhene Dawid kyerɛw sɛnea asetena bɛyɛ bere a ɔhene nyansafo nokwafo bi redi ade daakye. (Kenkan Dwom 37:10, 11, 29.) Sɛ yɛne nkurɔfo rebɔ paradise a ɛbɛba daakye no ho nkɔmmɔ a, yɛtaa kan Dwom 37:11 no kyerɛ wɔn. Sɛ yɛkan kyerɛ wɔn a, ɛfata, efisɛ Yesu kaa asɛnkoro no ara wɔ ne Bepɔw So Asɛnka no mu, na ɔma ɛdaa adi sɛ ɛbɛba mu daakye. (Mat. 5:5) Dawid nsɛm no nso ma yehu sɛnea na asetena bɛyɛ wɔ Ɔhene Solomon bere so. Bere a Solomon di Israel so no, Onyankopɔn nkurɔfo nyaa asomdwoe soronko, na nneɛma kɔɔ yiye maa wɔn wɔ “asaase a nufusu ne ɛwo abu so wɔ so” no so. Ná Onyankopɔn aka sɛ: “Sɛ mokɔ so di m’ahyɛde . . .  so . . .  a, mɛma asomdwoe aba asaase no so, na mobɛda a obiara renhunahuna mo.” (Lev. 20:24; 26:3, 6) Saa bɔhyɛ no nyinaa baa mu bere a Solomon  dii ade no. (1 Be. 22:9; 29:26-28) Afei nso, Yehowa hyɛɛ bɔ sɛ nnebɔneyɛfo befi hɔ. (Dw. 37:10) Enti, asɛm a ɛwɔ Dwom 37:10, 11, 29 no baa mu tete no, na daakye nso ɛbɛba mu.

9. Dɛn na Saba hemmaa ka faa Ɔhene Solomon ahenni ho?

⁹ Asomdwoe a Israelfo no nyae ne sɛnea na nneɛma kɔ yiye bere a Solomon redi ade no, Saba hemmaa tee ho asɛm. Saa ɔhemmaa yi twaa kwantenten baa Yerusalem sɛ nea wate no ɔno ara de n’ani reba abɛhwɛ. (1 Ahe. 10:1) Bere a obehuu sɛnea nneɛma te wɔ Solomon ahenni mu no, ɔkaa sɛ: “Nea wɔka kyerɛɛ me no, anokwa, ennu . . . fã mpo! Anigye ne wo nkurɔfo, na anigye ne wo nkoa a wogyina w’anim daa tie wo nyansa no!” (1 Ahe. 10:6-8) Nanso sɛnea na nneɛma te bere a na Solomon redi ade no, ɛyɛ nea Yehowa bɛyɛ ama adasamma wɔ ne Ba Yesu ahenni no mu ho mpopoe kakraa bi.

10. Akwan bɛn so na Yesu yɛ kɛse sen Solomon?

¹⁰ Yesu yɛ kɛse sen Solomon wɔ akwan nyinaa mu. Ná Solomon tɔ sin. Odii mfomso akɛse na ewiee ase no, ɛkɔfaa ɔhaw kɛse brɛɛ Onyankopɔn nkurɔfo. Nanso Yesu de, ɔyɛ Ɔhene a sintɔ biara nni ne ho na onni mfomso. (Luka 1:32; Heb. 4:14, 15) Sɔhwɛ akɛse a Satan de baa Yesu so nyinaa no, Yesu dii nkonim. Kristo ama ada adi sɛ ɔrenyɛ bɔne da anaa ɔrenyɛ biribiara a ɛde ɔhaw bɛbrɛ anokwafo a odi wɔn so no. Anokwa, ɛyɛ hokwan kɛse paa na yɛanya sɛ Yesu ne yɛn Hene.

11. Henanom na ɛbɛboa Yesu?

¹¹ Nnipa 144,000 bɛka Yesu ho ne no adi ade, na wɔahwɛ ama adasamma anya nea wɔhia. Wei bɛma nea enti a Yehowa bɔɔ asaase no aba mu. (Adi. 14:1-3) Bere a saa nkurɔfo yi wɔ asaase so no, wɔfaa sɔhwɛ ne amanehunu bebree mu, enti wɔbɛyɛ ahemfo a wɔte nnipa ase. Dɛn pɔtee na saa ahemfo yi bɛyɛ?

12. Adwuma bɛn na Yehowa de bɛma 144,000 no?

¹² Adwuma a Yesu ne 144,000 no bɛyɛ no, ɛso koraa sen nea Solomon yɛe no. Ɔhene Solomon hwɛɛ nnipa ɔpepem pii so wɔ ɔman baako pɛ so. Nanso wɔn a wɔbedi ade wɔ Onyankopɔn Ahenni no mu de, wɔbɛhwɛ nnipa ɔpepepem pii so wɔ wiase nyinaa. Ɛyɛ hokwan kɛse paa na Yehowa ama 144,000 no anya!

13. Wɔn a wɔne Yesu bedi ade no, adwuma titiriw bɛn na wɔbɛyɛ?

¹³ Mpem ɔha aduanan nnan no bɛyɛ ahemfo ne asɔfo te sɛ Yesu. (Adi. 5:10) Mose Mmara no mu no, na asɔfo no adwuma titiriw ne sɛ, wɔbɛhwɛ ama ɔmanfo no anya apɔwmuden na bere koro no ara nso wɔahwɛ ama wɔne Yehowa ntam ayɛ kama. Ná Mmara no yɛ “nneɛma pa a ɛbɛba no sunsuma,” enti ntease wom sɛ yɛbɛka sɛ wɔn a wɔne Yesu bedi ade no bɛboa ama Onyankopɔn nkurɔfo anya apɔwmuden, na wɔahwɛ ama wɔne Onyankopɔn ntam nso ayɛ kama. (Heb. 10:1) Ɔkwan a saa ahemfo ne asɔfo yi bɛfa so ne Ahenni no manfo adi nkitaho wɔ asaase so de, daakye na yebehu. Nhyehyɛe biara a Yehowa bɛyɛ no, yebetumi anya ahotoso sɛ Paradise a ɛbɛba no, wɔn a wɔwɔ asaase so no benya akwankyerɛ a wɔhia.—Adi. 21:3, 4.

14. Ayɔnkofa bɛn na ɛda “nguan foforo” no ne Kristo nuanom no ntam?

¹⁴ Wɔn a wɔne Yesu bedi ade no, ɔfrɛɛ wɔn “nguankuw ketewa.” (Luka 12:32)  Ɔkaa kuw a ɛtɔ so mmienu bi nso ho asɛm, na ɔfrɛɛ wɔn “nguan foforo.” Saa akuw mmienu yi aka abom ayɛ nguankuw baako. (Yoh. 10:16) Yɛrekasa yi, akuw mmienu yi bom yɛ adwuma, na wɔbɛkɔ so ayɛ adwuma kosi sɛ asaase nyinaa bɛdan Paradise. Ebedu saa bere no, na “nguankuw ketewa” no mufo wɔ soro; “nguan foforo” no nso, wɔbenya anidaso sɛ wɔbɛtena asaase so afebɔɔ ama wɔn ani agye. Nanso nneɛma bi wɔ hɔ a ɛsɛ sɛ “nguan foforo” no yɛ no nnɛ na ama wɔatumi atena Paradise.

15. (a) Sɛn na “nguan foforo” no boa Kristo nuanom no? (b) Wobɛyɛ dɛn asuasua onua no a wakɔ sotɔɔ bi mu no? (Hwɛ mfoni no.)

¹⁵ Ɔkorɔmfo-werɛmfo a onuu ne ho no, wannya hokwan ankyerɛ nea Kristo yɛ maa no no ho anisɔ kɛse ansa na ɔrewu. Nanso yɛn a yɛka “nguan foforo” no ho no de, yɛwɔ hokwan pii a yɛde bɛkyerɛ nea Yesu ayɛ ama yɛn no ho anisɔ. Yɛbɛyɛ nhwɛso a, nea yɛyɛ ma Yesu nuanom a wɔde honhom asra wɔn no na ɛkyerɛ sɛ yɛdɔ Yesu. Yesu kaa sɛ nea nguan no bɛyɛ ama Yesu nuanom no na obegyina so abu wɔn atɛn. (Mat. 25:31-40) Nea yebetumi ayɛ de aboa Kristo nuanom no ne sɛ, yɛbɛyere yɛn ho aboa wɔn ma wɔayɛ asɛnka ne asuafoyɛ adwuma no. (Mat. 28:18-20) Ɛno nti, nhoma a wɔayɛ ama yɛn a yɛde sua Bible te sɛ Wubetumi Anya Anigye Daa! no, yɛpɛ sɛ yɛde yɛ adwuma yiye. Sɛ wunnya nnyaa obiara a wo ne no yɛ Bible adesua a, adɛn nti na womfa nsi w’ani so sɛ wobɛka Bible adesua ho asɛm akyerɛ nnipa dodow biara a wubetumi?

16. Dɛn na ɛsɛ sɛ yɛyɛ na yɛatumi ayɛ Onyankopɔn Ahenni no manfo?

¹⁶ Ɛnsɛ sɛ yɛtwɛn kosi sɛ yɛbɛkɔ Paradise ansa na yɛabɔ yɛn bra sɛnea Yehowa pɛ. Ɛnnɛ mpo, ɛsɛ sɛ yɛhwɛ sɛ yɛbɛka nokware na yɛabɔ yɛn bra yiye. Afei nso, ɛsɛ sɛ yedi Yehowa, yɛn yere anaa yɛn kunu, ne yɛn nuanom Kristofo nokware. Sɛ yɛyere yɛn ho di Onyankopɔn mmara so yiye wɔ wiase bɔne yi mu a, ɛbɛyɛ mmerɛw ama yɛn sɛ yɛbɛyɛ saa wɔ Paradise. Yebetumi nso asua adwuma a mfaso wɔ so na yɛayere yɛn ho anya suban pa de akyerɛ sɛ yɛayɛ  krado sɛ yɛbɛtena Paradise. Hwɛ asɛm a yɛato din, “Wopɛ Sɛ ‘Asaase No Yɛ Wo Dea’?” a ɛwɔ Ɔwɛn-Aban yi mu no.

17. Ɛsɛ sɛ yɛma bɔne bi a yɛayɛ atwam bubu yɛn anaa? Kyerɛkyerɛ mu.

¹⁷ Afei nso, bere bi a atwam no, sɛ yɛyɛɛ bɔne bi a ɛso a, ɛsɛ sɛ yɛyere yɛn ho na yɛankɔ so ammu yɛn ho fɔ wɔ ho. Ɛwom, yɛremfa agyede afɔre no nyɛ nkataanim ‘mmoapa ntena bɔne mu’ da. (Heb. 10:26-31) Nanso, sɛ yɛayɛ bɔne a ɛso na yɛanu yɛn ho, ahwehwɛ Yehowa mmoa, na yɛasesa yɛn suban a, ɛnde yebetumi anya awerɛhyem sɛ Yehowa de yɛn bɔne bɛkyɛ yɛn ama aboro so. (Yes. 55:7; Aso. 3:19) Kae asɛm a Yesu ka kyerɛɛ Farisifo no. Ɔkaa sɛ: “Mammɛfrɛ atreneefo na mmom nnebɔneyɛfo.” (Mat. 9:13) Agyede afɔre no wɔ tumi paa, enti ebetumi akata yɛn bɔne nyinaa so ama aboro so.

18. Ɔkorɔmfo-werɛmfo a wɔsɛn no dua so wɔ Yesu nkyɛn no, nkɔmmɔ bɛn na wobɛpɛ sɛ wo ne no bɔ?

¹⁸ Fa no sɛ wowɔ Paradise, na wo ne ɔkorɔmfo-werɛmfo a ɔne Yesu kasae no rebɔ nkɔmmɔ. Nokwasɛm ne sɛ, mo mu biara bɛka sɛnea n’ani sɔ Yesu afɔrebɔ no. Nsɛm a esisii nnɔnhwerew kakra ansa na Yesu rewu ne sɛnea ɔtee nka bere a Yesu yɛɛ n’abisade no maa no no, ebia wobɛka akyerɛ no sɛ ɔnka ho asɛm pii nkyerɛ wo. Ebia ɔno nso bebisa wo sɛ Satan wiase no reba awiei no, sɛn na na asetena te? Ɛbɛyɛ hokwan kɛse paa sɛ yɛne nnipa a ɛte saa besua Onyankopɔn Asɛm!—Efe. 4:22-24.

19. Adɛn nti na Paradise asetena remfono yɛn? (Hwɛ mfoni a ɛwɔ Ɔwɛn-Aban yi anim no.)

¹⁹ Paradise asetena remfono yɛn da. Da biara yɛne nnipa a wɔn ho yɛ anika bɛbɔ, na yɛbɛyɛ adwuma a ɛma akomatɔyam. Nea ɛsen ne nyinaa no, da biara yebenya hokwan de ahu yɛn soro Agya no yiye, na biribiara a ɔde bɛma yɛn no nso bɛma yɛn ani agye. Yɛrensua ne ho ade nwie da, na yebesua nneɛma pii nso afa n’abɔde ho. Yɛrenyin kyɛ nyinaa, na ɔdɔ a yɛwɔ ma Onyankopɔn no nso reyɛ kɛse. Yɛda Yehowa ne Yesu ase paa sɛ wɔahyɛ yɛn bɔ sɛ yebetumi atena ase daa wɔ Paradise!