1-2. Sɛ abofra bi bisa n’awofo nsɛm bi fa Onyankopɔn anaa Bible no ho a, ebia awofo no bɛte nka sɛn?

 NNIPA pii nim sɛ abatete nna fam koraa. Sɛ wowɔ ba a, yɛkamfo wo sɛ worebɔ mmɔden aboa no ma ne gyidi ayɛ den. (Deut. 6:​6, 7) Wo ba no renyin no, ebia obebisabisa wo nsɛm bi afa wo gyidi ho. Yɛbɛyɛ nhwɛso a, ebia obebisa sɛ, ‘Adɛn nti na Yehowa mpɛ sɛ yɛbɛyɛ wei anaa wei?’

² Mfiase no, obisa wo saa nsɛm no a, ebia ɛbɛhaw wo. Ebia ɛbɛyɛ wo sɛ gyama ɔpɛ sɛ ogyae Yehowa som. Nanso, nea ɛwom ne sɛ, sɛ mmofra renyin a, ɛsɛ sɛ wɔbisa nsɛm sɛnea ɛbɛyɛ a wɔn adwene besi wɔn pi wɔ nea wɔgye di no ho. (1 Kor. 13:11) Enti, ɛnsɛ sɛ biribi a ɛte saa ma wo koma tu. Sɛ wɔbisa nsɛm a ɛte saa a, wubetumi de saa hokwan no aboa wɔn ama wɔadwen nsɛm ho akɔ akyiri na ama wɔn gyidi ayɛ den.

3. Dɛn na yebesusuw ho wɔ adesua yi mu?

³ Adesua yi mu no, yɛbɛhwɛ sɛnea awofo bɛboa wɔn mma ma (1) wɔn adwene asi wɔn pi wɔ nea wɔgye di no ho, (2) ma wɔahu sɛ mfaso wɔ so sɛ wɔde Bible mu asɛm bɛbɔ wɔn bra, ne (3) sɛnea wɔbɛboa wɔn ma wɔahu kwan a wɔbɛfa so akyerɛkyerɛ wɔn gyidi mu. Afei nso, yɛbɛhwɛ nea enti a eye sɛ mmofra bebisa nsɛm. Ɛno da nkyɛn a, yɛbɛhwɛ nneɛma bi a awofo betumi ne wɔn mma abom ayɛ na ama wɔanya hokwan ne wɔn abɔ yɛn gyidi ho nkɔmmɔ.

BOA WO BA MA N’ADWENE NSI NO PI WƆ NEA OGYE DI HO

4. Asɛm bɛn na abofra bi betumi abisa, na adɛn ntia?

⁴ Awofo nim sɛ, sɛ wɔwɔ gyidi a, ɛno ara nkyerɛ sɛ wɔn mma nso benya bi. Yehowa mu gyidi de, wɔmfa nwo. Abofra no renyin a, ebia nsɛm bi betumi ahaw n’adwene. Ebia obebisa ne ho sɛ: ‘Mɛyɛ dɛn ahu sɛ Onyankopɔn wɔ hɔ? Nea Bible ka no,  metumi agye adi paa?’ Nokwasɛm ne sɛ, Bible hyɛ yɛn nkuran sɛ ‘yɛmfa yɛn adwene nyɛ adwuma nsusuw nneɛma ho,’ na ‘yɛnhwehwɛ nneɛma nyinaa mu nhwɛ sɛ ɛyɛ nokware anaa.’ (Rom. 12:1; 1 Tes. 5:21) Nanso wobɛyɛ dɛn aboa wo ba ma ne gyidi ayɛ den?

5. Dɛn na awofo betumi ayɛ de aboa wɔn mma ma wɔagye Bible no adi? (Romafo 12:2)

⁵ Boa wo ba ma ɔnhwehwɛ adanse a ɛkyerɛ sɛ nea Bible ka no yɛ nokware. (Kenkan Romafo 12:2.) Sɛ wo ba bisa wo asɛm bi a, nnwinnade a yɛde yɛ nhwehwɛmu te sɛ Watch Tower Publications Index ne Nhoma a Yehowa Adansefo De Yɛ Nhwehwɛmu no, fa hokwan no kyerɛ no sɛnea ɔde bɛyɛ nhwehwɛmu anya ne nsɛmmisa no ho mmuae. Nhoma a Yehowa Adansefo De Yɛ Nhwehwɛmu no sei, obetumi ahwɛ asɛmti a ɛne “Bible,” na wahwɛ asɛmti ketewa a ɛne “Efi Onyankopɔn Honhom Mu.” Obenya adanse a ɛkyerɛ sɛ Bible nyɛ nhoma bi a nnipa akyerɛw kɛkɛ. Mmom, ɛyɛ “Onyankopɔn asɛm.” (1 Tes. 2:13) Yɛbɛyɛ nhwɛso a, obetumi ayɛ tete Asiria ahenkurow Niniwe ho nhwehwɛmu. Bere bi a atwam no, Bible ho abenfo bi kaa sɛ na kurow biara nni hɔ a ɛde Niniwe. Nanso, bɛyɛ afe 1850 no, wɔn a wɔtutu fam hwehwɛ tetefo nneɛma mu kohuu Niniwe amamfo. Wei di adanse sɛ nea Bible kae no yɛ nokware. (Sef. 2:​13-15) Sɛnea Niniwe sɛee na ɛmaa Bible nkɔmhyɛ baa mu no, sɛ ɔrepɛ ho nsɛm pii a, obetumi ahwɛ asɛm a yɛato din “So Wunim?” Ɛwɔ November 2021 Ɔwɛn-Aban mu. Wubetumi aboa wo ba ma ɔde nea osua fi yɛn nhoma ahorow mu no atoto nea ɔkenkan fi encyclopedia ne nhoma afoforo mu no ho. Wei bɛboa no ma wagye adi paa sɛ nea Bible ka no yɛ nokware.

6. Dɛn na awofo betumi ayɛ de aboa wɔn mma ma wɔadwinnwen nneɛma ho akɔ akyiri? Ma ɛho nhwɛso. (Hwɛ mfoni no nso.)

⁶ Boa wo mma ma wɔnwinnwen nneɛma ho nkɔ akyiri. Awofo, mompɛ akwan a mubetumi afa so ne mo mma abɔ Bible no anaa Onyankopɔn ho nkɔmmɔ. Akwan no bi ne sɛn? Mubetumi akɔ tete nneɛma akorae, baabi a wɔaduadua nnua ne nhwiren, anaa moakɔsra Betel akɔhwɛ tete nneɛma. Sɛ mokɔsra tete nneɛma akorae bi anaa mohwɛ ho mfoni anaa video wɔ intanɛt so a, mubetumi atwe mo mma adwene asi nsɛm bi a asisi wɔ abakɔsɛm mu anaa nneɛma bi a ɛwɔ hɔ so. Wei betumi aboa wɔn ama wɔagye adi sɛ Bible no yɛ nokware. Ebia wubetumi aka Moab Abopon no ho asɛm akyerɛ wɔn. Saa abopon no adi mfe 3,000, na Yehowa din wɔ so. Ɛwɔ tete nneɛma akorae bi a ɛwɔ France ahenkurow Paris mu. Afei nso, sɛ mokɔ yɛn adwumayɛbea ti a ɛwɔ Warwick, New York, na mokɔ tete  nneɛma akorae a ɛwɔ hɔ no a, mubehu Moab Abopon no sɛso wɔ ɔfã a yɛato din, “Bible no ne Onyankopɔn Din.” Wohwɛ Moab Abopon no so a, wɔakyerɛw so sɛ, Moab hene Mesa tew atua tiaa Israel. Wei ne Bible mu asɛm no hyia. (2 Ahe. 3:​4, 5) Sɛ wo mma no ara de wɔn ani hu adanse a ɛkyerɛ sɛ Bible mu asɛm yɛ nokware a, ɛbɛma wɔn gyidi ayɛ den.—Fa toto 2 Beresosɛm 9:6 ho.

7-8. (a) Abɔde a atwa yɛn ho ahyia no, sɛ yɛhwɛ sɛnea ɛyɛ fɛ no a, dɛn na yesua fi mu? Ma ɛho nhwɛso. (Hwɛ mfoni no nso.) (b) Nsɛmmisa bɛn na ebetumi aboa wo ba ma wagye adi paa sɛ Ɔbɔadeɛ bi wɔ hɔ?

⁷ Boa wo ba ma onnwinnwen abɔde ho. Sɛ wo ne wo ba nam baabi a wɔaduadua nnua ne nhwiren anaa mowɔ afuw mu a, wubetumi atwe n’adwene asi abɔde mu adwini a ɛyɛ fɛ so. Adɛn ntia? Efisɛ adwini a ɛte saa no di adanse sɛ obi a onim nyansa paa na ɔyɛe. Nneɛma pii wɔ abɔde mu a atwitwa kanko, na nyansahufo asua ho ade mfe pii. Nyansahufo bi a ne din de Nicola Fameli kyerɛ mu sɛ, sɛ wofa abɔde bi a atwa kanko a, ɛwɔ kwan pɔtee a ɛfa so hyehyɛ pɛpɛɛpɛ, na edi mmara pɔtee bi so. Nneɛma a atwitwa kanko wɔ abɔde mu no dɔɔso; ebi ne sɛnea nsorommakuw bi ahyehyɛ, nwanwene, nhaban, ne afifide bi a wɔfrɛ no sunflower. a

⁸ Sɛ wo ba no kɔ sukuu na osua abɔde mu nyansahu ho ade a, obehu sɛ abɔde a atwa yɛn ho ahyia no pii wɔ hɔ a, ɔkwan a ɛfa so hyehyɛ no, edi mmara pɔtee bi so. Yɛfa nnua sei a, emu dodow no ara wɔ ɔkwan pɔtee a ɛfa so nyin. Sɛ dutan no renyin a, ɛpaapae nkorabata na eyiyi mman. Sɛnea nnua paapae nkorabata na eyiyi mman no, yebetumi ahu biribi a ɛte saa nso wɔ abɔde afoforo mu. Sɛnea saa abɔde yi nyinaa tumi hyehyɛ fɛfɛɛfɛ no, hena na ɔyɛe? Sɛ wo ba no dwinnwen saa asɛmmisa yi ho kɔ akyiri a, ɛda adi sɛ ɛbɛma wagye adi paa sɛ Onyankopɔn na ɔbɔɔ nneɛma nyinaa. (Heb. 3:4) Sɛ wo ba no nyin kakra a, wubetumi abisa no sɛ, “Sɛ Onyankopɔn na ɔbɔɔ yɛn a, wunnye nni sɛ ɔno na obetumi akyerɛ yɛn ɔkwampa a ɛsɛ sɛ yɛfa so bɔ yɛn bra na ama yɛn ani agye?” Afei wubetumi akyerɛ mu akyerɛ no sɛ, yebenya akwankyerɛ pa a ɛte saa wɔ Bible mu.

BOA WO BA MA ONHU SƐ MFASO WƆ SO SƐ ƆDE BIBLE MU ASƐM BƐBƆ NE BRA

9. Sɛnea Bible ka sɛ yɛmmɔ yɛn bra no, dɛn na ebetumi ama wo ba adwenem ayɛ no naa wɔ ho?

⁹ Sɛnea Bible ka sɛ yɛmmɔ yɛn bra no, sɛ wo ba bisa wo nsɛm bi fa ho a, bɔ mmɔden hu nea enti a ɔrebisa saa nsɛm no. Bisa wo ho sɛ: ‘Sɛnea Bible ka sɛ yɛmmɔ yɛn bra no, gye na onnye ntom, anaasɛ sɛ nkurɔfo bisa no ho asɛm a, onhu sɛnea ɔbɛkyerɛkyerɛ mu?’ Emu biara no, nea ɛbɛboa wo ba no ma wahu mfaso  a ɛwɔ so sɛ ɔde Bible mu asɛm bɛbɔ ne bra no, wubetumi ne no asua Wubetumi Anya Anigye Daa! nhoma no. b

10. Wobɛyɛ dɛn aboa wo ba ma wahu sɛnea ɔne Yehowa bɛfa adamfo?

¹⁰ Boa wo ba ma ɔne Yehowa mfa adamfo denneennen. Sɛ wo ne wo ba resua Bible no a, nsɛmmisa, mfoni ne mfatoho a ɛwɔ Wubetumi Anya Anigye Daa! nhoma no mu no, bɔ mmɔden fa di dwuma. Wei bɛma woahu nea ɛwɔ ne komam. (Mmeb. 20:5) Yɛbɛyɛ nhwɛso a, adesua 8 no de Yehowa toto adamfo pa bi ho; adamfo a ɔte saa tu yɛn fo sɛnea ɛbɛyɛ a ɛbɛbɔ yɛn ho ban na asi yɛn yiye. Sɛ mususuw 1 Yohane 5:3 no ho wie a, wubetumi abisa no sɛ, “Esiane sɛ yenim sɛ Yehowa yɛ adamfo pa nti, sɛ ɔka sɛ yɛnyɛ biribi a, ɛsɛ sɛ yebu no sɛn?” Anhwɛ a ɛbɛyɛ wo sɛ saa asɛmmisa no ho nhyɛ da nhia, nanso sɛ wubisa wo ba no a, ebia ɛbɛboa no ama wahu sɛ, dɔ a Onyankopɔn dɔ yɛn nti na ɔhyehyɛ mmara ma yɛn.—Yes. 48:​17, 18.

11. Wobɛyɛ dɛn aboa wo ba ma wahu sɛ mfaso wɔ so sɛ ɔde Bible mu afotu bɛbɔ ne bra? (Mmebusɛm 2:​10, 11)

¹¹ Sɛ yɛde Bible mu afotu bɔ yɛn bra a, sɛnea ɛboa yɛn no, wo ne wo ba mmɔ ho nkɔmmɔ. Sɛ morekenkan Bible anaa moreyɛ daa asɛm a, sɛnea Bible mu afotu aboa mo abusua no, munsusuw ho. Yɛbɛyɛ nhwɛso a, wubetumi aboa wo ba no ma wahu sɛ, sɛ yɛyɛ adwumaden na yɛka nokware a, ɛboa yɛn paa. (Heb. 13:18) Wubetumi nso aboa no ama wahu sɛ, sɛ yɛde Bible mu afotu bɔ yɛn bra a, ɛboa yɛn ma yenya apɔwmuden na ɛma yɛn ani gye. (Mmeb. 14:​29, 30) Sɛ mususuw Bible mu afotu a ɛte saa ho a, ɛda adi sɛ ɛbɛboa wo ba no ma wahu sɛ, mfaso wɔ so sɛ obetie nea Bible ka.—Kenkan Mmebusɛm 2:​10, 11.

12. Dɛn na Agya bi yɛ de boa ne ba ma ohu sɛ mfaso wɔ so paa sɛ ɔde Bible mu afotu bɛbɔ ne bra?

¹² Agya bi a ɔwɔ France a ne din de Steve ne ne yere wɔ ɔbabarima bi a wadi mfe 16 a ne din de Ethan. Steve kyerɛ nea ɔne ne yere yɛ de boa wɔn ba no ma ohu sɛ dɔ a Yehowa dɔ yɛn nti na ɔhyɛ mmara ma yɛn. Ɔka sɛ: “Ɛyɛ a yebisa no sɛ, ‘Adɛn nti na Yehowa pɛ sɛ yɛde saa afotusɛm yi bɔ yɛn bra? Adɛn nti na wei kyerɛ sɛ ɔdɔ yɛn? Sɛ woamfa saa afotusɛm yi ammɔ wo bra a, wohwɛ a dɛn na ebesi?’” Nkɔmmɔ a ɛtete saa no aboa Ethan ama wagye adi sɛ, ɔkwan a Yehowa pɛ sɛ yɛfa so bɔ yɛn bra no yɛ papa paa. Steve de ka ho sɛ: “Yɛn botae ne sɛ yɛbɛboa Ethan ama wahu sɛ, nyansa a ɛwɔ Bible mu no, nnipa nyansa nnu ho hwee koraa.”

13. Ma nhwɛso fa kyerɛ sɛnea awofo betumi atete wɔn mma ma wɔahu sɛnea wɔde Bible mu afotu bɛbɔ wɔn bra?

¹³ Tete wo ba ma onhu sɛnea ɔde Bible mu afotu bɛbɔ ne bra. Yɛmfa no sɛ wɔama wo ba dwumadi bi wɔ sukuu sɛ ɔnkenkan nhoma bi. Wɔn a ɔrekenkan wɔn ho asɛm wɔ nhoma no mu no, ebia na wɔn suban nye. Yɛbɛyɛ nhwɛso a, ebia na wɔbu brabɔne anaa wɔde abufuw kekaw mu gu nkurɔfo so, nanso nhoma no ka wɔn ho asɛm te sɛ nea obetumi ahwɛ wɔn asua wɔn. Sɛnea nnipa a wɔwɔ nhoma no mu suban te no, wubetumi aka akyerɛ wo ba no sɛ ɔmfa ntoto sɛnea Yehowa pɛ sɛ yɛbɔ yɛn bra no ho nhwɛ. (Mmeb. 22:​24, 25; 1 Kor. 15:33; Filip. 4:8) Ebia wei bɛboa wo ba no na sɛ ɔkɔ sukuu na wɔresusuw ho a, watumi adi ne kyerɛkyerɛfo ne ne mfɛfo sukuufo no adanse.

BOA WO BA MA ONHU KWAN A ƆBƐFA SO AKYERƐKYERƐ NE GYIDI MU

14. Asɛm bɛn na ebetumi ayɛ den ama Kristofo mmabun sɛ wɔne afoforo bɛbɔ ho nkɔmmɔ, na adɛn ntia?

¹⁴ Ɛtɔ da a, Kristofo mmabun nnya akokoduru mfa nkyerɛkyerɛ wɔn gyidi mu. Sɛ adannandi ho asɛm sɔre wɔ sukuu mu a, ehu  nti, ebia ɛbɛyɛ den sɛ wɔbɛkyerɛ nea enti a wɔnnye saa asɛm no nni. Adɛn nti na ebetumi ayɛ den ama wɔn? Ebia wɔn akyerɛkyerɛfo no bɛkyerɛkyerɛ adannandi mu te sɛ nea ɛyɛ nokwasɛm. Dɛn na wubetumi ayɛ de aboa wo ba ma wanya akokoduru de akyerɛkyerɛ ne gyidi mu?

15. Dɛn na ebetumi aboa Kristoni babun ma wanya ahotoso sɛ nea ogye di no yɛ nokware?

¹⁵ Boa wo ba ma onnya ahotoso sɛ nea ogye di no yɛ nokware. Ɛnsɛ sɛ ɛyɛ wo ba aniwu sɛ ogye di sɛ Ɔbɔadeɛ bi wɔ hɔ. (2 Tim. 1:8) Adɛn ntia? Nokwasɛm ne sɛ abɔde mu nyansahufo pii nim sɛ, nneɛma a nkwa wom no, ɛnyɛ ɛno ara na ɛbae. Abɔde a atwa yɛn ho ahyia no, sɛ wɔhwɛ sɛnea ɛyɛ fɛ no a, wɔhu sɛ obi a onim nyansa paa na ɔyɛe. Wei nti, adannandi nkyerɛkyerɛ a wɔkyerɛkyerɛ wɔ sukuu pii mu wɔ wiase baabiara no, abɔde mu nyansahufo bebree nnye nni. Nea ɛmaa anuanom binom begye dii sɛ obi na ɔbɔɔ nkwa no, sɛ wo ba no dwinnwen ho a, ebetumi ahyɛ ne gyidi den. c

16. Nea enti a wo ba gye di sɛ Ɔbɔadeɛ bi wɔ hɔ no, wobɛyɛ dɛn aboa no ma wahu sɛnea ɔbɛkyerɛkyerɛ mu akyerɛ afoforo? (1 Petro 3:15) (Hwɛ mfoni no nso.)

¹⁶ Nea enti a wo ba gye di sɛ Ɔbɔadeɛ bi wɔ hɔ no, boa no ma onhu sɛnea ɔbɛkyerɛkyerɛ mu akyerɛ afoforo. (Kenkan 1 Petro 3:15.) Nsɛm a ɛba toatoa so a ɛwɔ jw.org a yɛato din “Young People Ask—Creation or Evolution?” no, wubetumi ne no asusuw ho. Nsɛm a ɛwɔ hɔ a wo ba no betumi de aboa afoforo ma wɔate ase paa sɛ Ɔbɔadeɛ bi wɔ hɔ no, wo ne no mmɔ ho nkɔmmɔ. Kae no sɛ enhia sɛ ɔne ne sukuufo no gye akyinnye. Boa no ma onhu sɛ, sɛ obi ma kwan sɛ ɔne no mmɔ ho nkɔmmɔ a, ɛnsɛ sɛ ɔma ne nkyerɛkyerɛmu yɛ nwonworann. Yɛbɛyɛ nhwɛso a, ebia ne yɔnko sukuuni bi bɛka sɛ: “Me de, nea mede m’ani hu nko ara na migye di, ɛnna Onyankopɔn nso minhuu no da.” Wo ba no betumi aka sɛ: “Fa no sɛ wonam kwae bi a ɛmmɛn kurom baabiara mu, ɛnna wokopuee abura bi so. Wobɛka sɛ abura no ara na ɛbae anaa? Ɛnyɛ dɛn ara a, obi na otuu abura no. Sɛ abura mpo, obi na otui a, amansan yi ne nneɛma a nkwa wom no, wohwɛ a, ɛnyɛ obi a onim nyansa paa na ɔyɛe?”

17. Sɛn na awofo betumi aboa wɔn mma ma wɔahwehwɛ hokwan a wɔbetumi de aka Bible mu asɛm akyerɛ afoforo? Ma nhwɛso fa kyerɛ nea wo ba no betumi ayɛ.

 ¹⁷ Boa wo ba ma ɔnhwehwɛ hokwan a obetumi de aka Bible mu asɛm akyerɛ afoforo. (Rom. 10:10) Wubetumi de obi a ɔresua sankubɔ ayɛ mfatoho ama no. Sɛnea egye mmɔdenbɔ na obi atumi asua sankubɔ no, ɔno nso ebegye mmɔdenbɔ na watumi aka ne gyidi ho asɛm akyerɛ afoforo. Sɛ obi resua sanku bɔ a, ɔde nnwom a ne bɔ nyɛ den na efi ase. Ɔkɔ so ara bɔ sanku no a, afei ɛbɛyɛ mmerɛw ama no. Kristoni babun nso, sɛ ɔpɛ sɛ ɔka ne gyidi ho asɛm kyerɛ afoforo a, obetumi aka asɛm tiawa bi de afi ase. Yɛbɛyɛ nhwɛso a, obetumi abisa ne yɔnko sukuuni bi sɛ: “Wunim sɛ, nyansahufo taa hwɛ abɔde so yɛ mfiri ne nneɛma bebree? Wo de, ma memfa video bi nkyerɛ wo.” Sɛ oyi Wɔbɔe Anaa? video no bi kyerɛ no wie a, obetumi abisa no sɛ: “Sɛ nyansahufo hwɛ abɔde so yɛ biribi a, sɛ ɛyɛ a yɛhoahoa wɔn? Ɛnde abɔde no ankasa nso ɛ, hena na ɛsɛ sɛ yɛde ho anuonyam ma no?” Sɛ ɔfa saa kwan tiawa yi so a, ebetumi ama ne yɔnko sukuuni no adwen asɛm no ho na ebia ɛbɛma ne kɔn adɔ sɛ obesua Yehowa ho ade pii.

KƆ SO BOA WO BA MA ƆNHYƐ NE GYIDI DEN

18. Awofo bɛyɛ dɛn akɔ so aboa wɔn mma ma wɔahyɛ Onyankopɔn mu gyidi a wɔwɔ no mu den?

¹⁸ Wiase a yɛte mu yi, nkurɔfo a wɔnnye Yehowa nni ahyɛ mu ma sei tɔ. (2 Pet. 3:3) Enti awofo, sɛ mo ne mo mma resua Bible a, nneɛma a ɛbɛma wɔagye adi paa sɛ Onyankopɔn Asɛm yɛ nokware no, mommoa wɔn ma wɔntweetwee mu. Afei nso, nea enti a mfaso wɔ so sɛ yɛde Bible mu afotu bɔ yɛn bra no, mommoa wɔn mma wɔnsua ho ade. Ka Yehowa abɔde ho asɛm kyerɛ wɔn, na boa wɔn ma wɔnwinnwen ho nkɔ akyiri mfa nhyɛ wɔn gyidi den. Boa wɔn ma wɔnhu Bible nkɔmhyɛ a abam dedaw. Nea ɛsen ne nyinaa no, wo ne wɔn mmom mmɔ mpae, na ɛyɛ a wo ara nso bɔ bi ma wɔn. Sɛ woyɛ saa a, wubetumi anya awerɛhyem sɛ, mmɔden biara a worebɔ sɛ wobɛboa wo mma ma wɔahyɛ wɔn gyidi den no, Yehowa behyira so.—2 Be. 15:7.