1. Yɛhwɛ Bible mu a, na nkurɔfo bu paanoo sɛn?

 YƐHWƐ Bible mu a, yebehu sɛ paanoo paa na na nkurɔfo di. (Gen. 14:18; Luka 4:4) Nokwasɛm ne sɛ, na ɛyɛ aduan titiriw paa. Wei nti, asɛmfua a wɔkyerɛ ase aduan wɔ Bible mu no, ɛtɔ da a nea ɛkyerɛ ankasa ne “paanoo.” (Mat. 6:11 ase hɔ asɛm) Yesu anwanwade ahorow a ɔyɛe no nso, emu mmienu wɔ hɔ a, na paanoo di akoten wom. (Mat. 16:​9, 10) Saa anwanwade no mu baako ho asɛm wɔ Yohane ti 6. Adesua yi mu no, yebesusuw ho na yɛahwɛ nea yebetumi asua afi mu.

2. Bere bɛn na ɛho behiae sɛ Yesu ma nnipa mpempem bebree aduan?

² Bere bi, Yesu asomafo no kɔyɛɛ asɛnka adwuma. Wɔwiei no, Yesu ne wɔn tenaa korow mu faa Galilea Po no so kɔe sɛ wɔrekɔhyɛ baabi agye wɔn ahome. (Mar. 6:​7, 30-32; Luka 9:10) Wɔnyaa baabi a na atew ne ho wɔ Betsaida mpɔtam hɔ sɛ wɔrekɔhyɛ hɔ. Nkurɔfo tee, enti ankyɛ koraa na nnipa mpempem bebree betwa hyiaa hɔ. Yesu ampam wɔn. Mmom, onyaa bere maa wɔn na ɔkaa Ahenni no ho asɛm kyerɛɛ wɔn, na ɔsaa nkurɔfo yare. Bere a ade resa no, na asuafo no nhu nea ɛbɛyɛ a nnipadɔm no nyinaa benya aduan adi. Ɛbɛyɛ sɛ na wɔn mu bi wɔ aduan kakra, nanso na ebehia sɛ wɔn mu dodow no ara kɔ nkuraa no ase kɔtɔ aduan a wɔbedi. (Mat. 14:15; Yoh. 6:​4, 5) Dɛn na na Yesu bɛyɛ?

 ANWANWADE A ƐMAA NNIPA PII NYAA PANOO DII

3. Dɛn na Yesu kaa sɛ n’asomafo no nyɛ mma nnipadɔm no? (Hwɛ mfoni a ɛwɔ Ɔwɛn-Aban yi no nso.)

³ Yesu ka kyerɛɛ n’asomafo no sɛ: “Ɛnsɛ sɛ wɔkɔ; mo ara momma wɔn biribi nni.” (Mat. 14:16) Ná asomafo no rentumi nyɛ, efisɛ na mmarima a ɛwom bɛyɛ 5,000. Sɛ yɛde mmea ne mmofra ka ho a, na wɔn nyinaa dodow bɛyɛ 15,000. (Mat. 14:21) Andrea kaa sɛ: “Abarimaa bi wɔ ha a ɔwɔ baali paanoo anum ne mpataa nketewa abien. Nanso nnipa bebrebe yi, eyi bɛyɛ wɔn dɛn?” (Yoh. 6:9) Ná nkurɔfo di baali paanoo paa; mpataa nketewa no nso, ɛbɛyɛ sɛ na wɔahyɛ no nkyene ahata ama awo. Nanso sɛ wohwɛ nnipadɔm yi a, ɛbɛyɛ dɛn na abarimaa no paanoo ne mpataa kakraa bi no aso wɔn?

4. Dɛn na yebetumi asua afi Yohane 6:​11-13 mu? (Hwɛ mfoni no nso.)

⁴ Ná Yesu pɛ sɛ ɔma nnipadɔm no biribi di, enti ɔka kyerɛɛ wɔn sɛ wɔntenatena ase akuwakuw wɔ sare no so. (Mar. 6:​39, 40; kenkan Yohane 6:​11-13.) Afei Yesu bɔɔ paanoo ne mpataa no so mpae daa n’Agya ase. Ná ɛfata sɛ Yesu da Onyankopɔn ase, efisɛ ɔno na ɔma wɔnyaa aduan no. Ɛho hia paa sɛ yesuasua Yesu; sɛ yenya aduan a, sɛ nkurɔfo wɔ hɔ oo, sɛ obiara nni hɔ oo, ɛsɛ sɛ yɛbɔ mpae ansa na yɛadi. Yesu bɔɔ mpae no wiei no, ɔmaa n’asomafo no kyekyɛɛ aduan no maa nnipadɔm no, na wɔdidi mee. Ebi mpo kae, na na Yesu mpɛ sɛ ɛbɛsɛe kwa. Enti ɔma wɔboaboaa ano. Nea Yesu yɛe no ma yehu sɛ, yɛn nso, ɛnsɛ sɛ yɛma nneɛma sɛe kwa. Sɛ woyɛ ɔwofo a, wubetumi de saa  asɛm yi aboa wo mma ama wɔahu sɛ, ɛsɛ sɛ wɔbɔ mpae ansa na wɔadidi. Afei nso, ɛsɛ sɛ wɔyi wɔn yam boa afoforo na wɔyɛ wɔn papa.

5. Nea Yesu yɛe saa da no nti, dɛn na anka nkurɔfo no reyɛ, na dɛn na Yesu nso yɛe?

⁵ Sɛnea Yesu kyerɛkyerɛe na ɔyɛɛ anwanwade no, ɛmaa nkurɔfo no ho dwiriw wɔn. Ná wɔnim sɛ Mose aka sɛ Onyankopɔn beyi odiyifo soronko bi ama wɔn, enti ebia na ɛyɛ wɔn sɛ ɛyɛ Yesu a. (Deut. 18:​15-18) Ebia ɛyɛɛ wɔn sɛ, sɛ Yesu bedi wɔn so a, nneɛma bɛkɔ yiye paa ama wɔn; ebia obetumi ama ɔman mu no nyinaa anya aduan adi. Wei nti, nnipadɔm no yɛe sɛ ‘wɔbɛkyere Yesu ayɛ no ɔhene.’ (Yoh. 6:​14, 15) Saa bere no, na Romafo na edi Yudafo no so. Enti sɛ Yesu penee so a, anka ɛbɛkyerɛ sɛ ɔde ne ho rehyehyɛ wɔn amanyɔsɛm mu. Nanso wanyɛ. Bible ka sɛ ‘ɔtwee ne ho kɔhyɛɛ bepɔw no so.’ Enti ɛmfa ho sɛ afoforo piapiaa no sɛ ɔmfa ne ho nhyɛ amanyɔsɛm mu no, wanyɛ. Nea Yesu yɛe no, yebetumi asua biribi afi mu paa!

6. Yɛbɛyɛ dɛn akyerɛ sɛ yɛpɛ sɛ yedi Yesu nhwɛso akyi? (Hwɛ mfoni no nso.)

⁶ Yɛn de, yenim sɛ obiara renka nkyerɛ yɛn sɛ yɛnyɛ anwanwade mma nkurɔfo nnya aduan nni anaa yɛnsa nkurɔfo yare. Afei nso, ɛnyɛ ade a nkurɔfo bɛba abɛkyere yɛn de yɛn akɔyɛ ɔmampanyin. Nanso, ebia wɔbɛhyɛ yɛn sɛ yɛmfa yɛn ho nhyɛ amanyɔsɛm  mu; ebia wɔbɛka sɛ yɛntow aba, anaa obi a wɔte nka sɛ obetumi ayɛ nneɛma yiye no, wɔbɛhyɛ yɛn sɛ yɛntaa n’akyi. Nanso Yesu ayɛ nhwɛso fɛfɛɛfɛ ama yɛn. Wamfa ne ho anhyehyɛ amanyɔsɛm mu; akyiri yi, ɔkaa mpo sɛ: “M’Ahenni mfi wiase.” (Yoh. 17:14; 18:36) Ɛnnɛ, ɛsɛ sɛ Kristofo suasua nea Yesu yɛe no. Ɛsɛ sɛ yɛtaa Ahenni no akyi, yɛka ho asɛm kyerɛ nkurɔfo na yɛbɔ mpae sɛ ɛmmra. (Mat. 6:10) Anwanwade a Yesu yɛe a ɛmaa nnipa pii nyaa aduan dii no, momma yɛnsan nkɔ so na yɛnhwɛ ade foforo a yebetumi asua afi mu.

NEA “PAANOO HO ASƐM” NO KYERƐ

7. Dɛn na Yesu yɛe, na dɛn na asomafo no nso yɛe wɔ ho? (Yohane 6:​16-20)

⁷ Bere a Yesu maa nnipadɔm no aduan wiei no, ɔne asomafo no faa ɔkorow fii hɔ san kɔɔ Kapernaum, na ɔtwee ne ho kɔhyɛɛ bepɔw no so. Ɔyɛɛ saa sɛnea ɛbɛyɛ a nnipadɔm no rentumi nkyere no nyɛ no ɔhene. (Kenkan Yohane 6:​16-20.) Bere a asomafo no nam po no so no, mframa bɔe denneennen. Wei maa asorɔkye no nso ano yɛɛ den. Afei wɔhui sɛ Yesu nam nsu no so reba wɔn nkyɛn. Ɔka kyerɛɛ ɔsomafo Petro sɛ ɔno nso nnantew nsu no so. (Mat. 14:​22-31) Bere a Yesu duu ɔkorow no mu pɛ, mframa no gyaee. Asuafo no ho dwiriw wɔn, na wɔkaa sɛ: “Woyɛ Onyankopɔn Ba ampa.” a (Mat. 14:33) Anikasɛm ne sɛ, bere a Yesu faa nsu no so no, saa bere no na asuafo no kaa saa asɛm yi. Nanso bere a ɔyɛɛ anwanwade maa nnipadɔm no nyaa paanoo dii no de, n’asuafo no anka biribi saa. Adɛn ntia? Hwɛ nea Marko ka faa saa asɛm no ho: “[Asomafo no] ho dwiriw wɔn pii, efisɛ na wɔntee paanoo ho asɛm no ase, na na wɔn koma nnyaa ntease.” (Mar. 6:​50-52) Nokwasɛm ne sɛ, tumi a na Yehowa de ama Yesu sɛ ɔmfa nyɛ anwanwade no, na wɔnnya ntee ase. Wei akyi bere tiaa bi no, anwanwade a Yesu yɛe a ɛmaa nkurɔfo pii nyaa paanoo dii no, ɔsan kaa ho asɛm na ɔma yehuu asuade a ɛwom.

8-9. Adɛn nti na na nnipadɔm no rehwehwɛ Yesu? (Yohane 6:​26, 27)

⁸ Nnipadɔm a Yesu maa wɔn aduan no, nea na wɔbenya adi nko ara na na ehia wɔn. Ade kyee no, wɔhui sɛ Yesu ne asomafo no nni hɔ. Akorow bi fi Tiberia baa hɔ, enti nnipadɔm no kɔtenatenaa mu, na wɔde wɔn ani kyerɛɛ Kapernaum sɛ wɔrekɔhwehwɛ Yesu. (Yoh. 6:​22-24) Wohwɛ a, Ahenni ho asɛm no na na wɔpɛ sɛ wɔte bi ka ho nti na wɔkɔe anaa? Daabi. Aduan a na wɔbenya adi no, ɛno ho asɛm paa na na ehia wɔn. Yɛyɛ dɛn hu?

⁹ Bere a nnipadɔm no kɔtoo Yesu wɔ baabi a ɛbɛn Kapernaum no, yɛnhwɛ nea esii. Yesu ka sii wɔn anim sɛ ‘paanoo a wɔdi mee no nti’ na na wɔrehwehwɛ no. Paanoo nso de, ɛyɛ “aduan a ɛsɛe.” Enti, Yesu hyɛɛ wɔn nkuran sɛ wɔnyɛ “aduan a ɛnsɛe a ɛma daa nkwa” mmom ho adwuma. (Kenkan Yohane 6:​26, 27.) Yesu kaa sɛ, n’Agya bɛma wɔn saa aduan no. Bere a wɔtee sɛ aduan betumi ama wɔanya daa nkwa no, ɛbɛyɛ sɛ wɔn ho dwiriw wɔn! Ebia wɔbisaa wɔn ho sɛ, ‘Aduan bɛn na ebetumi ama yɛanya daa nkwa, na yɛbɛyɛ dɛn anya bi?’

10. “Onyankopɔn adwuma” bɛn na na ɛsɛ sɛ nkurɔfo no yɛ na wɔanya daa nkwa?

¹⁰ Ɛda adi sɛ, na saa Yudafo no te nka sɛ ɛsɛ sɛ wɔyɛ nnwuma bi ansa na wɔn nsa aka saa aduan no. “Nnwuma” a na Mose Mmara no hwehwɛ sɛ wɔyɛ no, ɛbɛyɛ sɛ ɛno  na na wɔn adwene wɔ so. Nanso Yesu ka kyerɛɛ wɔn sɛ: “Onyankopɔn adwuma ne sɛ mubegye nea ɔsomaa no no adi.” (Yoh. 6:​28, 29) Onii a Onyankopɔn somaa no a wɔbegye no adi no, ɛno na na ɛbɛma ‘wɔanya daa nkwa.’ Nea ɛwom ne sɛ, na Yesu adi kan aka wei ho asɛm. (Yoh. 3:​16-18, 36) Akyiri yi, nea yɛyɛ a yebenya daa nkwa no, ɔkaa ho asɛm pii.—Yoh. 17:3.

11. Dɛn na Yudafo no yɛe a ɛkyerɛ sɛ nea Yesu kae nyinaa akyi no, aduan ho adwene no ara na na ɛwɔ wɔn tirim? (Dwom 78:​24, 25)

¹¹ “Onyankopɔn adwuma” a Yesu kaa sɛ Yudafo no nyɛ no, wɔne no anyɛ adwene. Wɔbisaa Yesu sɛ: “Sɛnkyerɛnne bɛn na wobɛyɛ na ama yɛahu na yɛagye wo adi?” (Yoh. 6:30) Afei wɔka kyerɛɛ no sɛ, Mose bere so no, wɔn agyanom dii mana da biara. (Neh. 9:15; kenkan Dwom 78:​24, 25.) Wuhu pefee sɛ, aduan a na wɔbenya adi no ara na na wɔn adwene da so wɔ so. Yesu kaa “nokware paanoo a efi soro” a ɛma nkwa ho asɛm; ná ɛnte sɛ mana a wɔdii wɔ sare no so no. Bere a Yesu kaa saa asɛm no, Yudafo no anhaw wɔn ho mpo ammisa no nea ɛkyerɛ. (Yoh. 6:32) Aduan a na wɔbenya adi no ara na na agye wɔn adwene, enti daa nkwa ho asɛm a na Yesu reka no nyinaa, na egu wɔn aso akyi. Dɛn na yebetumi asua afi saa asɛm yi mu?

ADE A ƐSƐ SƐ ƐHO HIA YƐN PAA

12. Dɛn na Yesu yɛe a ɛma yehu ade a ɛho hia paa?

¹² Asuade titiriw a ɛwɔ Yohane ti 6 ni. Ɛne sɛ yebetie Onyankopɔn na yɛayɛ n’apɛde. Kae sɛ bere a Satan sɔɔ Yesu hwɛe no, Yesu ma ohui sɛ osetie a yɛbɛyɛ ama Yehowa no, ɛno ne ade a ɛho hia paa. (Mat. 4:​3, 4) Afei nso, Bepɔw So Asɛnka no mu no, osii so dua sɛ yehia Onyankopɔn akwankyerɛ. (Mat. 5:3) Enti yebetumi abisa yɛn ho sɛ, ‘Me ne Yehowa ayɔnkofa no, ɛho hia me paa sen nea menya adi anaa nneɛma a meyɛ a ɛbɛma me ho adwo me?’

13. (a) Adɛn nti na ɛnyɛ bɔne sɛ yebedidi ama yɛn ani agye? (b) Ahwɛyiye bɛn na ɛsɛ sɛ yɛyɛ? (1 Korintofo 10:​6, 7, 11)

¹³ Sɛ yɛbɔ mpae sɛ Yehowa mma yɛn aduan ne nea yehia na ama yɛn ani agye a, ɛnyɛ bɔne. (Luka 11:3) Eye sɛ ‘yebedidi na yɛanom’ na yɛanya anigye afi yɛn adwumaden mu, efisɛ “efi nokware Nyankopɔn no nsam.” (Ɔsɛnk. 2:24; 8:15; Yak. 1:17) Nanso, ɛsɛ sɛ yɛhwɛ yiye na honam fam nneɛma ammɛyɛ ade titiriw wɔ yɛn asetenam. Ɔsomafo Paul sii wei so dua bere a na ɔrekyerɛw krataa akɔma Yudafo Kristofo no. Nhwɛso bɔne a Israelfo no yɛe wɔ sare no so, ne bere a na wɔabɛn Sinai Bepɔw no, ɔkaa ho asɛm. Ɔbɔɔ Kristofo no kɔkɔ sɛ, ‘ɛnsɛ sɛ wɔn kɔn dɔ bɔne sɛnea Israelfo no kɔn dɔe no.’ (Kenkan 1 Korintofo 10:​6, 7, 11.) Aduan a na Israelfo no repɛ adi nti, anwanwade a Yehowa yɛe a ɛmaa wɔn nsa kaa aduan no, ewiee ase no, ɛdan “bɔne” maa wɔn. (Num. 11:​4-6, 31-34) Afei nso, bere a wɔresom sika nantwi ba no, wɔdidi nomee, na wɔgyee wɔn ani. (Ex. 32:​4-6) Ná ɛrenkyɛ na atamfo abɛsɛe Yerusalem ne asɔrefie no wɔ afe 70. Enti Paul de saa asɛm no yɛɛ kɔkɔbɔ maa Kristofo a na wɔwɔ hɔ saa bere no. Yɛn nso, yɛte wiase yi awiei bere mu, na ɛrenkyɛ na saa wiase yi akɔ n’awiei. Enti ɛnsɛ sɛ yɛde asɛm a Paul kae no di agorɔ koraa.

14. Dɛn na Bible ka fa aduan ho wɔ wiase foforo no mu?

¹⁴ Bere a Yesu ka kyerɛɛ yɛn sɛ yɛmmɔ mpae sɛ Yehowa mma yɛn “aduan a yehia no nnɛ da yi” no, ɔkaa sɛ yɛmmɔ mpae nso sɛ Onyankopɔn apɛde nyɛ hɔ “wɔ asaase so te sɛ ɔsoro.” (Mat. 6:​9-11) Wiase foforo no mu no, wohwɛ a sɛn na saa asɛm yi bɛbam?  Bible ma yehu sɛ Onyankopɔn apɛde a ɛbɛyɛ hɔ no, aduan pa a yebenya adi nso ka ho. Sɛnea Yesaia 25:​6-8 ka no, wiase foforo no mu no, aduan pa bebu so. Dwom 72:16 ka sɛ: “Aduan bebu so wɔ asaase no so; ebebu so akodu mmepɔw atifi.” Yemmisa oo, saa bere no, w’akɔnnɔduan bɛn na wobɛyɛ? Wubesua aduan foforo yɛ anaa? Afei nso bobefuw a ebia wobɛyɛ no, wubetumi adi aba no bi anaa wubetumi de bi ayɛ nsa anom ama w’ani agye. (Yes. 65:​21, 22) Na wunim, ɛnyɛ wo nko ara oo, obiara a ɔte asaase so no ani begye.

15. Sɛ wɔnyan awufo a, nkyerɛkyerɛ adwuma bɛn na ɛbɛkɔ so? (Yohane 6:35)

¹⁵ Kenkan Yohane 6:35. Nnipa a Yesu yɛɛ anwanwade ma wɔnyaa paanoo dii na wɔnyaa nam wee no, wo de, susuw wɔn ho hwɛ. Owusɔre no mu no, ebia wubehyia wɔn mu bi. Sɛ na wɔnni Yesu mu gyidi mpo a, ebia wɔbenyan wɔn. (Yoh. 5:​28, 29) Wɔn a ɛte saa no, asɛm a edi so a Yesu kae yi, ebehia sɛ wɔhu nea ɛkyerɛ. Ɔkaa sɛ: “Mene nkwa paanoo no. Obiara a ɔba me nkyɛn no, ɔkɔm renne no da.” Ebehia sɛ wɔnya Yesu agyede afɔrebɔ no mu gyidi, na wɔhu sɛ ɔno na ɔde ne nkwa too hɔ maa wɔn. Saa bere no, awufo a wɔbɛsɔre ne mma biara a wɔbɛwo wɔn no, wɔbesua Yehowa ho ade. Yɛn ani begye paa sɛ yɛbɛyɛ nkyerɛkyerɛ adwuma a ɛte saa no bi! Sɛ yɛreyɛ saa adwuma no a, yɛn ani begye koraa asen sɛ yɛredi aduan ankasa. Nokwasɛm ne sɛ, nneɛma a ɛfa Onyankopɔn som ho na ɛbɛyɛ ade titiriw.

16. Dɛn na yebesusuw ho wɔ adesua a edi hɔ no mu?

¹⁶ Asɛm a ɛwɔ Yohane ti 6 no, yɛasusuw ne fã bi ho. Nanso na Yesu wɔ pii ka fa “daa nkwa” ho. Ná ɛsɛ sɛ Yudafo no tie daa nkwa ho asɛm no gu aso pa mu, na saa ara na ɛsɛ sɛ yɛn nso yɛyɛ. Adesua a edi hɔ no mu no, yɛbɛtoa so asusuw Yohane ti 6 no ho.