1. Ahoɔyaw nti, dɛn na ɛtoo Yosef abusua no?

NÁ Yakob dɔ ne mma mmarima no nyinaa, nanso na ɔdɔ Yosef a na wadi mfe 17 no sen wɔn a wɔaka no. Wei nti, dɛn na Yosef nua mmarima no yɛe? Wɔn ani beree Yosef, na ɛma wɔtan no. Ná Yosef nyɛɛ biribiara a enti ɛsɛ sɛ ne nuanom tan no saa. Nanso, wɔtɔn Yosef kɔɔ nkoasom mu, na wodii atoro kyerɛɛ wɔn papa sɛ aboa bi akyere ne ba a ɔda ne koma so paa no. Ahoɔyaw nti, wɔsɛee asomdwoe a na ɛwɔ abusua no mu no, na wɔmaa wɔn papa dii awerɛhow paa.—Gen. 37:3, 4, 27-34.

2. Sɛnea Galatifo 5:19-21 kyerɛ no, adɛn nti na ahoɔyaw yɛ suban a edi awu saa?

² Sɛ wokan Kyerɛwnsɛm no a, ɛka sɛ ahoɔyaw * ka “ɔhonam nnwuma” a edi awu no ho. Sɛ obi wɔ saa suban no bi a, ɔrennya Onyankopɔn Ahenni. (Kenkan Galatifo 5:19-21.) Subammɔne a ahoɔyaw kɔfa ba no bi ne nitan, ntawntawdi, ne bobɔne.

3. Dɛn na yebesusuw ho wɔ adesua yi mu?

³ Nea Yosef nuanom yɛe no ma yehu sɛ, sɛ obi ani bere afoforo a, ebetumi asɛe ɔne wɔn ntam. Afei nso, ebetumi asɛe asomdwoe a ɛwɔ abusuafo ntam. Nea Yosef nuanom yɛe no, ɛnyɛ ade a yɛbɛyɛ bi da, nanso yɛn koma tɔ sin na ɛyɛ okontomponi. (Yer. 17:9) Enti, ɛnyɛ nwonwa sɛ ɛtɔ da a yebetumi ayɛ ahoɔyaw. Momma yɛnhwɛ nhwɛso ahorow bi wɔ Bible mu. Ɛbɔ yɛn kɔkɔ na ɛboa yɛn ma yehu nea ebetumi ama  ahoɔyaw agye ntini wɔ yɛn komam. Afei nso, yɛbɛhwɛ nea yebetumi ayɛ na ama yɛayi ahoɔyaw afi yɛn mu na yɛahwehwɛ asomdwoe.

4. Adɛn nti na na Filistifo no ani bere Isak?

⁴ Bere a obi wɔ ahonyade. Ná Isak wɔ ahonyade pii; ɛno nti, na Filistifo no ani bere no. (Gen. 26:12-14) Nsubura a na Isak atu a ɔde ma ne mmoa nsu no, Filistifo no de dɔte siw no. (Gen. 26:15, 16, 27) Sɛnea Filistifo no yɛe no, ɛnnɛ nso nnipa binom ani bere afoforo a wɔwɔ ahonyade pii sen wɔn no. Nnipa a wɔte saa no, ɛnyɛ sɛ wɔn ani bere afoforo ade kɛkɛ, na mmom wonyae a anka nea afoforo wɔ nso afi wɔn nsa.

5. Adɛn nti na na nyamesom akannifo no ani bere Yesu?

⁵ Bere a nnipa pii pɛ obi asɛm. Ná Yudafo nyamesom akannifo no ani bere Yesu efisɛ na ɔmanfo no pɛ n’asɛm paa. (Mat. 7:28, 29) Ná Yesu yɛ Onyankopɔn nanmusifo, na na ɔkyerɛkyerɛ nokware no. Nanso, saa nyamesom akannifo yi kekaa Yesu ho nsɛmmɔne de sɛee ne din. (Mar. 15:10; Yoh. 11:47, 48; 12:12, 13, 19) Dɛn na yebetumi asua afi saa asɛm yi mu? Yɛn nuanom a wɔwɔ suban pa a ɛma anuanom pɛ wɔn asɛm no, ɛsɛ sɛ yɛyere yɛn ho sɛ yɛremma yɛn ani mmere wɔn. Mmom, ɛsɛ sɛ yɛbɔ mmɔden suasua wɔn suban pa no.—1 Kor. 11:1; 3 Yoh. 11.

6. Dɛn na Diotrefe yɛe a ɛkyerɛ sɛ na n’ani bere afoforo?

⁶ Bere a obi anya ɔsom hokwan. Asomafo no bere so no, na Diotrefe ani bere wɔn a wodi nneɛma anim wɔ Kristofo asafo no mu no. Anuanom a na Diotrefe ne wɔn wɔ asafo mu no, na “ɔpɛ sɛ odi kan” wɔ wɔn mu. Enti ɔkekaa ɔsomafo Yohane ne anuanom mmarima afoforo ho nsɛmmɔne sɛnea ɛbɛyɛ a asafo no mufo bebu wɔn animtiaa. (3 Yoh. 9, 10) Ɛwom sɛ ebia yɛrenyɛ ade nkɔ akyiri te sɛ Diotrefe de, nanso sɛ yɛn nua Kristoni bi nya dwumadi bi a na yɛhwɛ kwan sɛ yebenya a, anhwɛ a yɛn ani bɛbere no. Na sɛ yesusuw sɛ adwuma a ɔreyɛ no, yɛn nso yebetumi ayɛ a, na asɛm no asɛe koraa.

7. Sɛ yɛn ani bere afoforo a, nsunsuanso bɛn na ebetumi de aba yɛn so?

⁷ Ahoɔyaw te sɛ nwura bɔne. Sɛ ahoɔyaw nya gye ntini wɔ yɛn komam a, ebetumi ayɛ den sɛ yebetu ase. Sɛ obi wɔ subammɔne te sɛ ahoɔyaw, ahantan, ne pɛsɛmenkominya a, ebetumi ama n’ani abere nkurɔfo kɛse. Sɛ yedua nhwiren na nwura bɔne gye fa a, ɛrentumi nyin yiye. Saa ara na sɛ yɛn ani bere afoforo a, ɛremma yennya suban pa te sɛ ɔdɔ, ayamhyehye, ne ayamye. Enti sɛ yenya hu sɛ yɛreyɛ ayɛ ahoɔyaw a, ɛsɛ sɛ yetu ase. Dɛn na yɛbɛyɛ na yɛanyɛ ahoɔyaw?

8. Suban bɛn na ebetumi aboa yɛn ama yɛayi ahoɔyaw afi yɛn mu?

⁸ Sɛ yenya ahobrɛase na yɛma yɛn ani sɔ nea yɛwɔ a, yebetumi ayi ahoɔyaw afi yɛn mu. Sɛ yɛma saa suban pa yi hyɛ yɛn koma mã a, ahoɔyaw rennya kwan wɔ yɛn koma mu. Sɛ yɛwɔ ahobrɛase a, ɛremma yenya adwene sɛ yɛkyɛn afoforo. Obi a ɔbrɛ ne ho ase nte nka sɛ biribiara mu no, ɛsɛ sɛ onya pii sen afoforo. (Gal. 6:3, 4) Sɛ obi ani sɔ nea ɔwɔ a, ɔma nea ɔwɔ no ara dɔɔso ma no, na ɔmfa ne ho ntoto afoforo. (1 Tim. 6:7, 8) Obi a ɔbrɛ ne ho ase na n’ani sɔ nea ɔwɔ no, sɛ obi nya adepa bi a, n’ani gye.

9. Sɛnea Galatifo 5:16 ne Filipifo 2:3, 4 kyerɛ no, dɛn na honhom kronkron bɛboa yɛn ama yɛayɛ?

⁹ Sɛ yebetumi ayi subammɔne te sɛ ahoɔyaw afi yɛn mu na yɛabrɛ yɛn ho ase na yɛn  ani asɔ nea yɛwɔ a, yehia Onyankopɔn honhom kronkron no mmoa. (Kenkan Galatifo 5:16; Filipifo 2:3, 4.) Yehowa honhom kronkron betumi aboa yɛn ama yɛapɛɛpɛɛ yɛn mu ahu nea ɛwɔ yɛn adwene ne yɛn komam. Onyankopɔn betumi aboa yɛn ama yɛayi nsusuwii bɔne biara afi yɛn adwene ne yɛn komam, na yɛasusuw nneɛma pa ho. (Dw. 26:2; 51:10) Momma yɛnhwɛ nea Mose ne Paul yɛe; saa mmarima yi amma kwan amma ahoɔyaw annye ntini wɔ wɔn mu.

10. Tebea bɛn na na anka ebetumi asɔ Mose ahwɛ? (Hwɛ mfoni a ɛwɔ Ɔwɛn-Aban yi anim no.)

¹⁰ Ná Mose wɔ tumi kɛse wɔ Onyankopɔn nkurɔfo so, nanso wanyɛ ahoɔyaw sɛ ɔremma afoforo nnya saa hokwan no bi. Ɛho nhwɛso ne sɛ, bere bi Yehowa yii honhom kronkron a na ɛwɔ Mose so no bi maa mpanyimfo a na wɔwɔ Israel no binom; na wogyinagyina ahyiae ntamadan no ano. Ɛno akyi bere tiaa bi no, Mose tee sɛ mpanyimfo mmienu bi a wɔankɔ ahyiae ntamadan no ano nso anya honhom kronkron na wɔafi ase reyɛ wɔn ade sɛ adiyifo. Bere a Yosua ka kyerɛɛ Mose sɛ ɔmma saa mpanyimfo mmienu no nnyae nea wɔreyɛ no, dɛn na Mose yɛe? Mose amma n’ani ammere mmarima mmienu no sɛ Yehowa de n’adwene kɔɔ wɔn so. Mmom, esiane sɛ na Mose brɛ ne ho ase nti, n’ani gyei sɛ saa mmarima no nso nyaa hokwan a ɛte saa. (Num. 11:24-29) Dɛn na yebetumi asua afi nea Mose yɛe no mu?

11. Asafo mu mpanyimfo bɛyɛ dɛn asuasua Mose?

¹¹ Sɛ woyɛ asafo mu panyin a, wɔaka akyerɛ wo pɛn sɛ dwumadi bi a ɛhyɛ wo nsa a w’ani gye ho paa wɔ asafo no mu no, boa obi ma ɔmmɛyɛ anaa? Ebia wo na wohwɛ Ɔwɛn-Aban Adesua no so nnawɔtwe biara, na w’ani gye ho paa. Nanso, sɛ wobrɛ wo ho ase te sɛ Mose na wɔka kyerɛ wo sɛ boa onua foforo na akyiri yi watumi ayɛ adwuma a woyɛ no a, worennya adwene sɛ wo so remma mfaso bio. Mmom, w’ani begye sɛ wobɛboa wo nua no.

12. Sɛn na ɛnnɛ Kristofo pii reda no adi sɛ wɔn ani sɔ nea wɔwɔ na wɔwɔ ahobrɛase?

¹² Momma yɛnhwɛ tebea foforo a anuanom mmarima a wɔn mfe akɔ anim pii rehyia. Wɔde mfe pii asom sɛ mpanyimfo ntam nkitahodifo. Nanso sɛ saa anuanom yi di mfe 80 a, wofi wɔn pɛ mu de saa hokwan no ma obi foforo. Amansin so ahwɛfo nso di mfe 70 a, ahobrɛase a wɔwɔ nti, wɔde saa hokwan no to hɔ na ɔsom hokwan biara a wɔde ma wɔn no, woso mu. Nnansa yi, Betel mmusua a ɛwɔ wiase nyinaa nso, wɔama wɔn mu pii dwumadi foforo wɔ bere nyinaa som adwuma no mu. Saa anuanom anokwafo yi ani mmere wɔn a seesei wɔyɛ adwuma a na anka wɔyɛ no.

13. Dɛn na anka ebetumi ama ɔsomafo Paul ani abere asomafo 12 no?

¹³ Ɔsomafo Paul nso yɛ obi a na ɔbrɛ ne ho ase, na ɔmaa n’ani sɔɔ nea ɔwɔ. Paul amma n’ani ammere afoforo. Ɔyeree ne ho yɛɛ asɛnka adwuma no, nanso esiane sɛ ɔbrɛ ne ho ase nti ɔkaa sɛ: “Mene nea osua koraa wɔ asomafo no mu a mensɛ sɛ wɔfrɛ me ɔsomafo.” (1 Kor. 15:9, 10) Bere a Yesu reyɛ ne som adwuma wɔ asase so no, na asomafo 12 no di n’akyi, nanso Paul de, Yesu wusɔre akyi ansa na ɔrebɛyɛ Kristoni. Ewiee ase no, wɔpaw no sɛ “ɔsomafo ankasa ma amanaman no.” Sɛ na ɔyɛ asomafo 12 no mu baako a, anka ɛbɛyɛ hokwan kɛse paa nanso wannya saa hokwan no. (Rom. 11:13; Aso. 1:21-26) Paul amma n’ani ammere asomafo 12 no, na saa ara nso na wamma n’ani ammere ayɔnkofa a na ɛwɔ wɔne Yesu ntam no. Mmom ɔmaa n’ani sɔɔ nea ɔwɔ.

14. Sɛ yɛbrɛ yɛn ho ase na yɛma yɛn ani sɔ nea yɛwɔ a, dɛn na yɛbɛyɛ?

¹⁴ Sɛ yɛbrɛ yɛn ho ase na yɛma yɛn ani  sɔ nea yɛwɔ a, yɛbɛyɛ sɛ Paul na yɛada obu adi akyerɛ wɔn a Yehowa de asɛyɛde ahyehyɛ wɔn nsa no. (Aso. 21:20-26) Yehowa ayɛ nhyehyɛe sɛ asafo mu mpanyimfo nni nneɛma anim wɔ Kristofo asafo no mu. Ɛmfa ho sɛ mpanyimfo no tɔ sin no, Yehowa bu wɔn sɛ ‘nnipa a wɔyɛ akyɛde.’ (Efe. 4:8, 11) Sɛ yɛda obu adi kyerɛ mmarima a wɔapaw wɔn yi na yɛbrɛ yɛn ho ase tie wɔn akwankyerɛ a, ɛbɛma yɛabɛn Yehowa na asomdwoe bɛtena yɛne yɛn nuanom Kristofo ntam.

15. Dɛn na ehia sɛ yɛyɛ?

¹⁵ Sɛ yɛma yɛn ani bere afoforo a yɛrentumi ne wɔn ntena asomdwoe mu. Ehia sɛ yetu ahoɔyaw ase fi yɛn mu, na yɛhwɛ yiye na yɛanyɛ nneɛma a ɛbɛma afoforo ani abere yɛn. Sɛ yɛyɛ saa a, ɛbɛma yɛatumi adi Yehowa ahyɛde a ɛka sɛ “yenni nneɛma a ɛde asomdwoe ba, ne nneɛma a ɛhyɛ yɛn den akyi” no so. (Rom. 14:19) Dɛn pɔtee na yebetumi ayɛ de aboa afoforo ama wɔayi ahoɔyaw afi wɔn mu, na dɛn na yebetumi ayɛ ama asomdwoe atena yɛn ntam?

16. Dɛn na yebetumi ayɛ de aboa afoforo ama wɔayi ahoɔyaw afi wɔn mu?

¹⁶ Yɛn suban ne yɛn nneyɛe betumi anya afoforo so tumi kɛse. Wiase no pɛ sɛ yɛde nneɛma a yɛwɔ “hoahoa” yɛn ho. (1 Yoh. 2:16) Nanso sɛ obi yɛ saa a, ebetumi ama afoforo ani abere no. Nneɛma a yɛwɔ anaa nneɛma a yɛabɔ yɛn tirim sɛ yɛbɛtɔ no, sɛ yɛamfa ho asɛm anguan nkurɔfo asom a, ɛremma wɔn ani mmere yɛn. Ade foforo a yebetumi ayɛ na afoforo ani ammere yɛn ne sɛ, hokwan a  yɛwɔ wɔ asafo no mu no, yɛremfa ntu yɛn ho. Sɛ yɛtwe adwene ba hokwan a yɛwɔ wɔ asafo no mu so a, ebetumi ayɛ mmerɛw sɛ afoforo ani bɛbere yɛn. Nanso, sɛ yɛma afoforo hu sɛ yedwen wɔn ho, na yɛkamfo wɔn wɔ nneɛma pa a wɔyɛ ho a, yɛma wɔn ani sɔ nea wɔwɔ na yɛma asomdwoe ne baakoyɛ tena asafo no mu.

17. Dɛn na Yosef nuanom yɛe, na adɛn nti na wotumi yɛɛ saa?

¹⁷ Yebetumi atu ahoɔyaw ase ama ayɛ yiye! Momma yɛnhwɛ Yosef nuanom asɛm no bio. Nea wɔde yɛɛ Yosef nyinaa akyi no, mfe bi akyi wokohyiaa no wɔ Egypt. Ansa na Yosef reyi ne ho adi akyerɛ ne nuanom no, odii kan sɔɔ wɔn hwɛe sɛ wɔasesa anaa. Ɔtoo pon maa wɔn na ɔmaa Benyamin a ɔyɛ wɔn nua kumaa no aduan pii sen wɔn a wɔaka no. (Gen. 43:33, 34) Nanso, biribiara nni hɔ a ɛkyerɛ sɛ ne nuanom ani beree Benyamin. Mmom, wɔdaa no adi sɛ wodwen Benyamin ne wɔn papa Yakob ho. (Gen. 44:30-34) Esiane sɛ na Yosef nuanom ayi ahoɔyaw afi wɔn mu nti, wotumi boa ma wɔn abusua no san nyaa asomdwoe. (Gen. 45:4, 15) Saa ara na yɛn nso, sɛ yetu ahoɔyaw ase a, ɛbɛboa ama asomdwoe atena yɛn abusua ne asafo no mu.

18. Sɛnea Yakobo 3:17, 18 kyerɛ no, sɛ yɛboa ma asomdwoe tena yɛne afoforo ntam a, dɛn na ebefi mu aba?

¹⁸ Yehowa pɛ sɛ yeyi ahoɔyaw fi yɛn mu na yɛhwehwɛ asomdwoe. Ɛsɛ sɛ yɛyere yɛn ho paa na yɛatumi ayɛ saa. Sɛnea yɛasusuw ho wɔ adesua yi mu no, ɛnyɛ den sɛ yɛn ani bɛbere afoforo. (Yak. 4:5) Afei nso, wiase a yɛte mu no, nnipa pii ani bere afoforo. Nanso sɛ yɛbrɛ yɛn ho ase, yɛma yɛn ani sɔ nea yɛwɔ, na yɛkyerɛ nneɛma ho anisɔ a, yɛrenyɛ ahoɔyaw da. Mmom, yɛbɛboa ama asomdwoe atena yɛne afoforo ntam, na yɛatumi asow trenee aba anaa yɛanya suban pa.—Kenkan Yakobo 3:17, 18.