Ná me papa ne me maame yɛ Katolekfo amapa. Nanso bere a wɔbehui wɔ Bible mu sɛ Onyankopɔn din de Yehowa no, wɔn baanu nyinaa bɛyɛɛ Yehowa Adansefo; ná wɔmfa wɔn som nni agorɔ koraa. Ná me papa yɛ kapentani, na na ɔtaa de nnua yɛ Yesu honi, nanso ogyaee. Ofie a na yɛte mu no, na ɛyɛ aborosan, enti ɔde kapenta adwuma no ho nimdeɛ a ɔwɔ no siesiee ase hɔ dan no yɛɛ no Ahenni Asa. Ná ɛno ne Ahenni Asa a edi kan wɔ San Juan del Monte; ɛyɛ borɔn bi wɔ Philippines ahenkurow Manila mu.

Me nua mmarima baanan ne me nua mmea baasa a wɔanyinyin sen me no, na m’awofo kyerɛkyerɛ wɔn Yehowa ho ade. Enti bere a wɔwoo me afe 1952 akyi no, wɔfii ase kyerɛkyerɛɛ me nso. Merenyin no, me papa hyɛɛ me nkuran sɛ menkenkan Bible no ti baako da biara. Afei nso, ɔne me suaa asafo nhoma ahorow pii. Ɛwom ara a, na m’awofo to nsa frɛ amansin so ahwɛfo ne Betel ananmusifo ma wɔbɛsoɛ yɛn fie. Osuahu ahorow a na saa anuanom yi ka kyerɛ yɛn abusua no, ɛmaa yɛn ani gyei paa na ɛhyɛɛ yɛn nkuran. Wei kanyan yɛn nyinaa ma yɛde asɛnka adwuma no dii kan wɔ yɛn asetenam.

Ná m’awofo wɔ Yehowa mu gyidi paa, enti me nso misuasuaa wɔn. Yare bɔɔ me maame a na ɔda me koma so no ma owui. Ɛno akyi no, me ne me papa fii akwampae adwuma ase afe 1971 mu. Nanso afe 1973 mu no, me papa nso wui; ná madi mfe 20. M’awofo a mehweree wɔn no ma metee nka sɛ me wiase nyinaa aba awiei, na metee nka nso sɛ mayɛ ankonam. Nanso anidaso a “etim hɔ na enhinhim” a Bible ka ho asɛm no hyɛɛ me den. Wei nti awerɛhow anhyɛ me so, na ɛno boaa me ma mekɔɔ so bataa Yehowa ho. (Heb. 6:19) Me papa wu akyi no, ankyɛ biara na Betel ka kyerɛɛ me sɛ menkɔsom sɛ ɔkwampaefo titiriw wɔ Coron supɔw a atew ne ho no so; ɛwɔ Palawan mantam mu.

Merekɔ Coron no, na madi mfe 21. Kurow kɛse mu ara na na matena. Mikoduu supɔw no so no,  mihui sɛ anyinam ahoɔden ne nsu ho yɛ den, na na kar ne moto nso nnɔɔso wɔ hɔ. Wei yɛɛ me nwanwa paa. Ɛwom sɛ na anuanom kakra wɔ hɔ de, nanso na ɔkwampaefo biara nni hɔ a me ne no bɛkɔ asɛnka, enti ɛtɔ da a, na me nko ara na mekɔ. Bosome a edi kan no, mefee m’abusuafo ne me nnamfo papaapa. Edu anadwo a, na mehwɛ nsoromma a ɛwɔ wim; merehwɛ nyinaa na meresu. Ná biribi yɛ me sɛ minnyaw adwuma no hɔ nsan nkɔ me kurom.

Sɛ mete nka saa a, na mihwie me komam nsɛm nyinaa gu Yehowa so. Ɛyɛ a mekaakae nsɛm a ɛhyɛ nkuran a mekenkan wɔ Bible ne yɛn nhoma ahorow mu no. Ná Dwom 19:14 na ɛtaa ba me tirim. Mibehui sɛ, sɛ midwinnwen nneɛma te sɛ Yehowa nnwuma ne ne su ahorow ho a, ɔbɛyɛ “me Botan ne me Gyefo.” Ɔwɛn-Aban mu asɛm bi a yɛato din “You Are Never Alone” a no boaa me paa. Mekan no mpɛn pii. Mmere a ɛtete saa mu no, na akɔyɛ sɛ me ne Yehowa nko ara na ɛwɔ hɔ, na ɛma minyaa hokwan de bɔɔ mpae, suaa ade dwinnwen ho.

Mikoduu Coron no, ankyɛ koraa na wɔpaw me sɛ asafo mu panyin. Esiane sɛ na me nko ara na meyɛ ɔpanyin wɔ hɔ nti, mifii ase dii anim ma yɛyɛɛ Teokrase Ɔsom Sukuu, Ɔsom Nhyiam, Asafo Nhoma Adesua, ne Ɔwɛn-Aban Adesua no nnawɔtwe biara. Afei nso, na mema baguam ɔkasa nnawɔtwe biara. Afei de, na nnwuma gu me so ara ma na minnya me ho atwaye mpo na kampɛsɛ mate nka sɛ mayɛ ankonam!

Asɛnka adwuma a na mereyɛ wɔ Coron no sow aba paa; me Bible asuafo no bi nyaa nkɔso bɔɔ asu. Nanso na ɛnna fam saa. Ɛtɔ da a, na menantew twa kwan fi anɔpa kosi awia dumienu ansa na madu asaasesin no mu. Yɛreka yi nso, na minnim baabi a mikodu a mɛda. Ná nsupɔw nketenkete bebree nso ka asafo no asaasesin ho. Ná metaa de ɔkorow a ingyin bɔ ho na etwa kwan kɔ nsupɔw no so. Mpɛn pii no, na mframa bɔ denneennen wɔ po no so, nanso na minnim asuguare. Ɔhaw yi nyinaa mu no, Yehowa bɔɔ me ho ban na ɔboaa me. Akyiri yi, mibehui sɛ sɛɛ na Yehowa resiesie me ama ɔhaw akɛse a na mehyia wɔ dwumadi foforo a na menya no mu.

Afe 1978 no, wɔde me kɔɔ Papua New Guinea a ɛda Australia atifi fam no. Papua New Guinea yɛ ɔman a mmepɔw wɔ hɔ paa, na ne kɛse reyɛ ayɛ sɛ Spain. Nnipa a ɛwɔ hɔ bɛyɛ ɔpepem mmiɛnsa. Bere a mihui sɛ wɔka kasa bɛboro 800 no, me ho dwiriw me paa. Anigyesɛm ne sɛ, na nnipa dodow a ɛwɔ hɔ no tumi ka Melanesia Pidgin kasa, nea wɔtaa frɛ no Tok Pisin no.

Wɔde me kɔɔ asafo bi a na wɔka Borɔfo kasa mu; ɛwɔ ɔman no ahenkurow Port Moresby mu. Ankyɛ na mifii hɔ kɔɔ Tok Pisin asafo bi mu na mehyɛɛ da suaa kasa no. Kasa a na meresua no, na meka wɔ asɛnka mu. Wei boaa me ma mihuu kasa no ntɛm paa. Anni gyina koraa, mitumi de Tok Pisin kasa no maa baguam ɔkasa. Bere a mikoduu Papua New Guinea no, anni afe baako koraa na wɔka kyerɛɛ me sɛ menkɔsom sɛ ɔmansin sohwɛfo. Mekɔsom Tok Pisin nsafo bi a na abɔ apete wɔ amantam akɛse bi mu.

Mmeae a na nsafo no wowɔ no, na emu woware, enti na ɛsɛ sɛ meyɛ amansin nhyiam pii ho nhyehyɛe na mitutu akwan pii nso. Mfiase no, metee nka sɛ mayɛ ankonam efisɛ na biribiara yɛ foforo; ɔman no yɛ foforo, kasa no yɛ foforo, ɛnna amammerɛ no nso yɛ foforo. Sɛ merekɔsrasra nsafo no a, esiane sɛ na mmepɔw wɔ hɔ na akwan no  yɛ mmonkyemmɔnka nti, na kar nkɔ hɔ. Enti ɛkame ayɛ sɛ nnawɔtwe biara na ɛsɛ sɛ mefa wimhyɛn. Ɛtɔ da a, me nko ara na na metena wimhyɛn ketewa bi a awe awu mu. Akwantu a ɛtete saa no, merekɔ nyinaa na me nsono gu gya mu; ná ɛte sɛ nea mete ɔkorow mu nam po so no ara pɛ.

Ná fon mmuu so saa, enti na metaa fa nkrataakyerɛw so na ɛne nsafo no di nkitaho. Mpɛn pii no, na mikodu ansa na nkrataa a mekyerɛwee no akodu. Enti ɛyɛ a mibisa kurom hɔfo ma wɔkyerɛ me baabi a adawurubɔfo no tete. Wei nyinaa akyi no, bere biara a mehu anuanom no, na wɔgye me fɛw so paa, enti na ɛma mihu sɛ me brɛ anyɛ kwa. Mihui sɛ Yehowa boaa me wɔ akwan pii so, na me ne n’ayɔnkofa mu nso yɛɛ den paa.

Bere a edi kan a mekɔɔ adesua wɔ supɔw bi a wɔfrɛ no Bougainville so no, awarefo bi baa me nkyɛn a na wɔresereserew, na wɔbisaa me sɛ: “Wokae yɛn?” Mekaee sɛ midii saa awarefo yi adanse bere a mikoduu Port Moresby no. Me ne wɔn fii Bible adesua ase ansa na mede wɔn rema onua bi a ɔwɔ hɔ sɛ ɔntoa adesua no so. Saa bere yi de, na wɔn baanu nyinaa abɔ asu! Mfe mmiɛnsa a midii wɔ Papua New Guinea no, nhyira bebrebe a minyae wɔ hɔ no, na wei ka ho.

Ansa na merefi Coron afe 1978 no, mihyiaa onuawa hoɔfɛfo bi a ɔwɔ ahofama; ná ne din de Adel. Ná ɔwɔ mma mmienu a wɔn din de Samuel ne Shirley, na na ɔyɛ daa kwampaefo nso. Bere koro no ara, na ɔrehwɛ ne maame a wayɛ aberewa. May afe 1981 mu no, mesan kɔɔ Philippines kɔwaree Adel. Yɛwaree akyi no, yeboom yɛɛ daa akwampae adwuma no, na yeboom hwɛɛ abusua no.

Ɛwom sɛ na mewɔ abusua de, nanso afe 1983 mu no, wɔsan paw me sɛ ɔkwampaefo titiriw, na wɔde me kɔɔ Linapacan supɔw so. Ɛwɔ Palawan mantam mu. Abusua no nyinaa tu kɔɔ supɔw a na atew ne ho yi so; ná Adansefo biara nni hɔ. Bɛyɛ afe baako akyi no, Adel maame wui. Nanso yɛkɔɔ so yɛɛ asɛnka adwuma no denneennen, na ɛno boaa yɛn ma yegyinaa awerɛhow no ano. Yɛne nkurɔfo bebree fii ase suaa Bible wɔ Linapacan, na na wɔrenya nkɔso. Enti ankyɛ koraa na yehui sɛ ehia sɛ yenya Ahenni Asa ketewa bi wɔ hɔ. Ne saa nti, yɛn ara yesii bi. Mfe mmiɛnsa pɛ a yedii wɔ hɔ no, nnipa 110 na wɔbaa Nkaedi no bi, na wei maa yɛn ani gyei paa. Yefii hɔ akyi no, wɔn mu bebree nyaa nkɔso bɔɔ asu.

Afe 1986 no, wɔde me kɔɔ Culion supɔw so; ɛyɛ baabi a na akwatafo wɔ paa. Ɛno akyi no, wɔpaw Adel nso sɛ ɔkwampaefo titiriw. Mfiase no, na yesuro sɛ yɛbɛka asɛmpa no akyerɛ wɔn a kwata asɛe wɔn nipadua no. Nanso anuanom a ɛwɔ hɔ no maa yɛn awerɛhyem sɛ, wɔn a wɔanya saa yare no bi no, adɔktafo ahwɛ wɔn ma wɔn ho atɔ wɔn, enti ɛnsɛ sɛ yesuro sɛ wɔde bɛsan yɛn. Adesua a na wɔyɛ wɔ onuawa bi fie no, na wɔn mu bi mpo kɔ bi. Afei de na yensuro bio, enti saa nkurɔfo yi a na wɔte nka sɛ Onyankopɔn ne nnipa ayi wɔn baako ahyɛ wɔn nsa no, yetumi kaa Bible mu anidaso a yɛwɔ no kyerɛɛ wɔn. Wei maa yɛn ani gyei paa. Nnipa a na yare ateetee wɔn saa no, yɛma wɔhui sɛ wɔbetumi anya apɔwmuden a edi mu daakye;  wei maa wɔn ani gyei paa na yɛn nso yɛn ani gyei.—Luka 5:​12, 13.

Dɛn na yɛyɛe a ɛboaa yɛn mma no maa wɔn ani kaa Culion? Me ne Adel too nsa frɛɛ anuanom mmabaa mmienu fii Coron bɛkaa yɛn ho, sɛnea ɛbɛyɛ a yɛn mma no ne wɔn betumi abɔ. Ná Samuel, Shirley ne anuanom mmabaa mmienu no ani gye wɔ asɛnka mu paa, efisɛ wɔne mmofra pii suaa ade. Me ne Adel ne mmofra no awofo nso suaa ade. Nokwasɛm ne sɛ, eduu bere bi no, na yɛne mmusua 11 na esua ade. Ankyɛ, wɔn a yɛne wɔn sua ade no bebree nyaa nkɔso, enti yetumi tew asafo wɔ hɔ!

Mfiase no, me nko ara na na meyɛ asafo mu panyin wɔ mpɔtam hɔ. Enti Betel ka kyerɛɛ me sɛ nnawɔtwe biara menyɛ asafo nhyiam mma adawurubɔfo nwɔtwe a na wɔwɔ Culion no. Afei nso, wɔkaa sɛ menyɛ saa ara mma adawurubɔfo nkron a wɔwɔ akuraa bi a ne din de Marily no; sɛ wode ɔkorow fi baabi a na yɛwɔ no rekɔ Marily hɔ a, na ebegye wo nnɔnhwerew mmiɛnsa. Yɛkɔ adesua wɔ hɔ na yɛpɔn a, na yɛn abusua no nantew fa mmepɔw mu nnɔnhwerew pii ne nkurɔfo kɔyɛ Bible adesua wɔ akuraa bi a wɔfrɛ no Halsey ase.

Akyiri yi asɛnka adwuma no sow aba paa wɔ Marily ne Halsey, enti yesii Ahenni Asa wɔ mmeae mmienu no nyinaa. Sɛnea anuanom yɛe wɔ Linapacan no, ɛha nso anuanom ne Bible asuafo de wɔn ahoɔden bɛboae ma yesii Ahenni Asa no, na nneɛma a yɛde sii no nso, emu dodow no ara wɔn na wɔde bae. Ahenni Asa a yesii wɔ Marily no, na etumi fa nnipa 200, na na yetumi trɛw mu de yɛ amansin nhyiam nso.

Afe 1993, bere a na mmofra no anyinyin no, me ne Adel fii ɔmansin adwuma ase wɔ Philippines. Afe 2000 mu no, mekɔɔ Asomfo Ntetee Sukuu, sɛnea ɛbɛyɛ a wɔbɛtete me ma mabɛyɛ ɔkyerɛkyerɛfo wɔ saa sukuu no mu. Ná mete nka sɛ memfata sɛ mekyerɛ ade wɔ saa sukuu no mu, nanso na Adel hyɛ me nkuran bere biara. Ɔkaee me sɛ Yehowa bɛhyɛ me den ma mayɛ saa dwumadi foforo no. (Filip. 4:13) Ná Adel nim nea ɔreka, efisɛ ɔno ara nso, na n’apɔwmuden nyɛ papa, nanso na ɔde reyɛ ne som adwuma no.

 Afe 2006 no, bere a meda so ara yɛ ɔkyerɛkyerɛfo no, adɔktafo kaa sɛ Adel anya adwenem yare bi a ɛma awosoawosow tumi ka no. Yɛn ho dwiriw yɛn! Bere a meka kyerɛɛ Adel sɛ mepɛ sɛ yɛde yɛn dwumadi no so hɔ ara na mehwɛ no no, ɔkaa sɛ: “Mepa wo kyɛw, hwehwɛ dɔkta a obetumi ahwɛ me, na minim sɛ Yehowa bɛboa yɛn ama yɛatoa so.” Mfe nsia a edi hɔ no, Adel kɔɔ so yɛɛ ne som adwuma no a wanwiinwii. Eduu baabi no, na ontumi nnantew, enti na ɔte mmubuafo akongua mu. Ɛno mpo no, na ɔda so ara ka asɛmpa no. Bere a na ontumi nkasa papa mpo no, na otumi ma mmuae baako mmienu bi wɔ adesua ase. Adel de animia som Yehowa kosii sɛ owui wɔ afe 2013; ná ne nhwɛso no yɛ anuanom fɛ paa, enti na wɔtaa kyerɛw nsɛm a ɛhyɛ nkuran brɛ no de bɛkamfo no. Me ne me yere nokwafo Adel a na ɔda me koma so no tenae bɛboro mfe 30. Enti bere a owui no, midii awerɛhow, na metee nka sɛ mayɛ ankonam bio.

Ná Adel pɛ sɛ metoa so yɛ me dwumadi no, enti saa ara na meyɛe. Meyeree me ho yɛɛ adwuma a na ɛhyɛ me nsa no, na ɛboaa me ma migyinaa ankonamyɛ ano. Efi afe 2014 kosi afe 2017 no, aman a na wɔmma anuanom kwan mma wɔnsom Yehowa sɛnea wɔpɛ wɔ hɔ no, wɔma me kɔsrasraa nsafo a ɛka Tagalog kasa b a ɛwɔ hɔ no. Ɛno akyi no, mekɔsrasraa nsafo a ɛka Tagalog kasa wɔ Taiwan, United States, ne Canada. Afe 2019 no, mede Borɔfo kasa kyerɛɛ ade wɔ Ahenni Asɛmpakafo Sukuu wɔ India ne Thailand. Saa dwumadi yi nyinaa ama manya anigye kɛse. Sɛ mede m’adwene nyinaa si Yehowa som so a, ɛno na ɛma m’ani gye paa.

Baabi foforo biara a mɛkɔ no, me ne anuanom fa adamfo denneennen, enti sɛ meregyaw wɔn hɔ a, ɛyɛ a na ɛnna fam. Mahu sɛ mmere a ɛtete saa mu no, ɛsɛ sɛ mede me ho to Yehowa so koraa. Mahu Yehowa nsa wɔ m’abrabɔ mu mpɛn pii. Wei aboa me ma nsakrae biara a ɛbɛba m’asetenam no, mitumi gye tom. Ɛnnɛ, meyɛ ɔkwampaefo titiriw wɔ Philippines. M’ani aka asafo foforo a makɔ mu no mu, na anuanom no ayɛ sɛ m’abusua; wɔboa me na wɔdwen me ho. Afei nso, mihu sɛ Samuel ne Shirley resuasua wɔn maame gyidi, na ɛma m’ani gye sɛ.—3 Yoh. 4.

Mahyia ɔhaw pii wɔ m’asetenam; ebi ne yare a ɛbɔɔ me yere a ɔda me koma so na ɛteetee no ara ma owui no. Ná m’ani tua ne nyinaa. Mmere adan wɔ m’asetenam mpɛn pii, na emu biara no, me nso medan me ho. Ne nyinaa mu no, mahu sɛ Yehowa ‘ne yɛn mu biara ntam nware.’ (Aso. 17:27) “Yehowa nsa nyɛ tiaa,” enti ɔboa n’asomfo na ɔhyɛ wɔn den; sɛ wɔwɔ mmeae a atew ne ho mpo a, ɔyɛ saa. (Yes. 59:1) M’asetenam nyinaa, Yehowa a ɔyɛ me Botan no nnyaa me mu da, na me da no ase paa. Manyɛ ankonam da.