ADESUA ASƐM 8
DWOM 130 Fa Bɔne Kyɛ
Wobɛyɛ Dɛn Asuasua Sɛnea Yehowa De Bɔne Kyɛ No?
“Sɛnea Yehowa ayi ne yam de akyɛ mo no, mo nso monyɛ saa ara.”—KOL. 3:13.
NEA ADESUA YI BƐKA HO ASƐM
Sɛ obi yɛ yɛn bɔne a, nneɛma pɔtee bi a yebetumi ayɛ na ama yɛatumi de onii no bɔne akyɛ no no, adesua yi bɛma yɛahu.
1-2. (a) Bere bɛn na ebetumi ayɛ den paa sɛ yɛde obi bɔne bɛkyɛ no? (b) Dɛn na Denise yɛe a ɛkyerɛ sɛ ɔde obi bɔne kyɛɛ no?
ƐYƐ den ma wo sɛ wode afoforo bɔne bɛkyɛ wɔn anaa? Yɛn mu pii wɔ hɔ a, ɛyɛ den ma yɛn sɛ yɛbɛyɛ saa, ɛnkanka bere a obi aka asɛm bi anaa wayɛ biribi ma ayɛ yɛn yaw paa no. Nanso, yebetumi ayi yaw no afi yɛn mu, na yɛde onii no bɔne akyɛ no. Momma yɛmfa onuawa bi a ne din de Denise a asɛm no nyɛ nhwɛso; oyii ne yam de obi bɔne kyɛɛ no koraa. Afe 2017 mu no, Yehowa Adansefo Adwumayɛbea Ti a na wɔabue no foforo no, Denise ne n’abusua kɔɔ hɔ nsrahwɛ. Bere a wɔnam kwan so resan akɔ fie no, obi de ne kar bɛbɔɔ wɔn de no mu. Wei maa ade tɔɔ Denise so. N’ani so tetew no no, wɔka kyerɛɛ no sɛ ne mma no apirapira paa, na ne kunu Brian de, wawu. Denise dwen nea esii no ho a, ɔka sɛ, “Asɛm no bubuu me na m’adwene nyinaa tu frae.” Akyiri yi, obehui sɛ, nea na ɔreka kar no, na ɔde ani kann na na ɛreka; ɛnyɛ sɛ na wanom nsã anaa nnubɔne. Afei nso, ɛnyɛ sɛ na ɔreyɛ kɔɔl anaa biribi foforo biara. Enti Denise srɛɛ Yehowa hɔ asomdwoe, sɛnea ɛbɛyɛ a obenya nea asi no ho adwempa.
2 Apolisifo kyeree drɔbani no, na wɔbɔɔ no sobo sɛ wakum nipa. Sɛ wɔdi n’asɛm na wɔhu sɛ odi fɔ a, na wɔbetumi de no ato afiase. Nanso, asɛnnibea no ka kyerɛɛ Denise sɛ, n’anom asɛm so na wɔbegyina abu drɔbani no atɛn. Denise ka sɛ: “Esiane sɛ na ɛsɛ sɛ meka nea esii no ho asɛm nti, ɛkaee me yaw paa. Ɛma metee nka sɛ asɛ obi atetew nhama a wɔde apam me kuru, ɛnna wabae kuru no mu ahwie nkyene galɔn ma agu mu.” Nnawɔtwe kakraa bi akyi no, wɔde ɔbarima a ɔmaa Denise abusua huu amane no kɔɔ asɛnnibea, na Denise nso kɔɔ hɔ bi sɛ ɔrekodi nea esii no ho adanse. Dɛn na ɔkae? Denise ka kyerɛɛ ɔtemmufo no sɛ onhu ɔbarima no mmɔbɔ. b Bere a Denise kasa wiei no, ɔtemmufo no sui. Ɔkaa sɛ: “Mebɛyɛɛ ɔtemmufo mfe 25 ni, nanso mentee sɛ obi aka saa asɛm yi bi da wɔ asɛnnibea ha. Mentee da sɛ abusua bi a wɔn ho aka resrɛ sɛ wɔnhu nea odi fɔ no mmɔbɔ. Ɔdɔ ne bɔnefakyɛ a ɛte sei de, minhuu bi da.”
3. Dɛn na ɛmaa Denise de ɔbarima no bɔne kyɛɛ no?
3 Dɛn na ɛboaa Denise ma ɔde ɔbarima no bɔne kyɛɛ no? Odwinnwen Yehowa bɔnefakyɛ ho. (Mika 7:18) Sɛnea Yehowa de yɛn bɔne kyɛ yɛn no, sɛ yɛn ani sɔ paa a, ɛbɛkanyan yɛn ma yɛn nso yɛde afoforo bɔne akyɛ wɔn.
4. Dɛn na Yehowa pɛ sɛ yɛyɛ? (Efesofo 4:32)
4 Sɛnea Yehowa yi ne yam de yɛn bɔne kyɛ yɛn no, ɔpɛ sɛ yɛn nso yeyi yɛn yam de afoforo bɔne kyɛ wɔn. (Kenkan Efesofo 4:32.) Sɛ obi yɛ biribi ma ɛyɛ yɛn yaw a, Yehowa hwɛ kwan sɛ yebeyi yɛn yam de akyɛ no. (Dw. 86:5; Luka 17:4) Adesua yi mu no, yɛbɛhwɛ nneɛma mmiɛnsa bi a ɛbɛboa yɛn ma yɛde afoforo bɔne akyɛ wɔn.
MFA ABUFUW NHYƐ WO MU
5. Sɛnea Mmebusɛm 12:18 ma yehu no, sɛ obi yɛ yɛn bɔne a, sɛn na ebia yɛbɛte nka?
5 Obi betumi aka asɛm bi anaa wayɛ biribi ma ahye yɛn paa, ɛnkanka sɛ onii no yɛ yɛn yɔnko berɛbo anaa yɛn busuani a. (Dw. 55:12-14) Ɛtɔ da a, ɛyaw a yɛte no, ɛte sɛ nea obi de sekan awɔ yɛn. (Kenkan Mmebusɛm 12:18.) Ɛba saa a, ebia yɛde onii no ho abufuw bɛhyɛ yɛn mu. Sɛ yɛyɛ saa a, ɛbɛyɛ te sɛ nea obi de sekan awɔ yɛn na sekan no da so hyɛ hɔ. Enti, sɛ yɛde obi ho abufuw hyɛ yɛn mu nso a, saa ara na ɛte; ɛyaw no remfi hɔ da.
6. Sɛ obi yɛ yɛn bɔne a, anhwɛ a dɛn na yɛbɛyɛ?
6 Sɛ obi yɛ yɛn bɔne a, anhwɛ a yɛn bo befuw. Bible ma yehu sɛ yɛn bo betumi afuw. Nanso ɛbɔ yɛn kɔkɔ sɛ ɛnsɛ sɛ yɛma abufuw no tena hɔ kyɛ. (Dw. 4:4; Efe. 4:26) Adɛn ntia? Efisɛ sɛ atenka bi ba yɛn mu a, ɛtaa ma yɛyɛ biribi. Na abufuw nso de, ɛntaa mma yɛnyɛ adepa. (Yak. 1:20) Kae sɛ, obi betumi ahyɛ wo abufuw, nanso sɛ wubeyi afi wo mu oo, sɛ wode bɛhyɛ wo mu oo, ɛwɔ wo nsam.
Kae sɛ, obi betumi ahyɛ wo abufuw, nanso sɛ wubeyi afi wo mu oo, sɛ wode bɛhyɛ wo mu oo, ɛwɔ wo nsam
7. Sɛ obi yɛ biribi ma ɛhaw yɛn a, atenka bɛn bio na anhwɛ a yebetumi anya?
7 Sɛ obi ne yɛn anni no yiye a, ebetumi atwa yɛn nsono mu paa. Yɛbɛyɛ nhwɛso a, onuawa bi a ne din de Ann ka sɛ: “Meyɛ abofra no, me papa gyaa me maame kɔwaree abaawa a na ɔhwɛ me. Metee nka sɛ wɔayi me baako ahyɛ me nsa. Bere a wɔwoe no, metee nka sɛ wɔn mma no abegye m’anuonyam. Merenyin nyinaa na ɛyɛ me sɛ obiara nnwen me ho.” Momma yɛnhwɛ onuawa bi a ne din de Georgette nso. Bere a ne kunu ne ɔbea foforo sɛee aware no, ɔkaa sɛnea ɔtee nka no ho asɛm sɛ: “Ná me ne me kunu yɛ nnamfo fi yɛn mmofraase, na yeboom yɛɛ akwampae adwuma nso. Enti bere a ɔyɛɛ saa no, me koma bubui.” Ewiee ase no, aware no gui. Onuawa bi a ne din de Naomi ka sɛ: “Manna annwen ho da sɛ me kunu bɛyɛ ade ma ahye me saa. Enti bere a ɔka kyerɛɛ me sɛ ɔhwɛ ponografi no, metee nka sɛ wadaadaa me, na wadi me huammɔ.”
8. (a) Nea enti a ɛsɛ sɛ yɛde afoforo bɔne kyɛ wɔn no, ebi ne sɛn? (b) Sɛ yɛde bɔne kyɛ a, mfaso bɛn na yenya? (Hwɛ adaka a yɛato din “ Nea Obi De Ayɛ Wo Nti, Akɔfa Ɔhaw Abrɛ Wo a, Dɛn Na Wobɛyɛ?” no.)
8 Nea afoforo bɛyɛ atia yɛn anaa wɔbɛka akyerɛ yɛn no, yenni so tumi, nanso nea yɛbɛyɛ wɔ ho de, ɛwɔ yɛn nsam. Mpɛn pii no, nea eye paa ne sɛ yɛde bɛkyɛ. Adɛn ntia? Efisɛ yɛdɔ Yehowa, na ɔpɛ sɛ yɛde bɔne kyɛ. Sɛ yɛde abufuw hyɛ yɛn mu na yɛamfa bɔne ankyɛ a, anhwɛ a yebedi nkwaseasɛm, na ebetumi abɔ yɛn yare. (Mmeb. 14:17, 29, 30) Yɛnhwɛ onuawa bi a ne din de Christine. Ɔka sɛ: “Sɛ obi hyɛ me abufuw a, mentaa nserew, na minnidi yiye. Afei nso, ɛyɛ a mintumi nna, na ɛyɛ den paa sɛ mɛhyɛ me ho so. Ɛba saa a, me ne me kunu ne afoforo ntam tumi yɛ basaa.”
9. Adɛn nti na ɛsɛ sɛ yeyi abufuw fi yɛn mu?
9 Sɛ obi yɛ biribi tia yɛn na wannye ne mfomso antom da mpo a, yebetumi ayɛ biribi ma ɛyaw no ano abrɛ ase. Yɛbɛyɛ no sɛn? Georgette a yɛadi kan aka ne ho asɛm no ka sɛ: “Ɛwom sɛ egyee bere kakra, nanso me kunu a na me ne no agyaa aware no, mitumi yii ne ho menasepɔw ne abufuw fii me mu. Wei maa m’asom dwoo me paa.” Sɛ yeyi abufuw fi yɛn mu a, ɛremma yennya afoforo ho menasepɔw. Afei nso ɛboa yɛn ankasa, efisɛ ɛma yeyi yɛn adwene fi nea onii no de ayɛ yɛn no so, na yɛhwɛ so bɔ yɛn bra ma yɛn ani gye. (Mmeb. 11:17) Wei nyinaa akyi no, sɛ hwee nka wo sɛ fa bɔne kyɛ a, dɛn na ɛsɛ sɛ woyɛ?
SƐNEA WUBEYI ABUFUW AFI WO MU
10. Sɛ yɛpɛ sɛ yeyi abufuw fi yɛn mu a, adɛn nti na ebegye bere? (Hwɛ mfoni no nso.)
10 Wobɛyɛ dɛn ayi abufuw afi wo mu? Ade baako ne sɛ, ɛsɛ sɛ wuhu sɛ ebegye bere. Sɛ obi pira paa na yɛrehwɛ no a, ebegye bere ansa na ne ho atɔ no koraa. Yɛn nso, ebia ebegye bere ansa na yɛayi obi ho abufuw afi yɛn mu na yɛde ne bɔne akyɛ no.—Ɔsɛnk. 3:3; 1 Pet. 1:22.
Sɛ obi pira paa a, ehia sɛ yɛn ani ku ne ho na yɛhwɛ no, nanso ebegye bere ansa na ne ho atɔ no koraa. Yɛn nso, ebia ebegye bere ansa na yɛayi obi ho abufuw afi yɛn mu na yɛde ne bɔne akyɛ no (Hwɛ nkyekyɛm 10)
11. Sɛn na mpaebɔ betumi aboa wo ma wode bɔne akyɛ?
11 Bɔ mpae srɛ Yehowa sɛ ɔmmoa wo na fa bɔne kyɛ. c Ann a yɛadi kan aka ne ho asɛm no kyerɛ sɛnea mpaebɔ boaa no. Ɔka sɛ: “Nea abusua no muni biara yɛe a ankɔ yiye no, mesrɛɛ Yehowa sɛ ɔmfa nkyɛ yɛn. Afei mekyerɛw krataa kɔmaa me papa ne ne yere foforo no sɛ nea wɔde ayɛ me no, mede akyɛ wɔn.” Ann gye tom sɛ na ɛnna fam sɛ ɔbɛyɛ saa. Nanso ɔka sɛ: “Migye di sɛ, esiane sɛ mabɔ mmɔden asuasua sɛnea Yehowa de bɔne kyɛ no nti, ebia ɛbɛkanyan me papa ne ne yere ma wɔasua Yehowa ho ade.”
12. Adɛn nti na ɛnsɛ sɛ yedi yɛn koma akyi, na mmom yɛde yɛn ho to Yehowa so? (Mmebusɛm 3:5, 6)
12 Fa wo ho to Yehowa so, na nni wo koma akyi. (Kenkan Mmebusɛm 3:5, 6.) Bere nyinaa, Yehowa nim nea eye paa ma yɛn. (Yes. 55:8, 9) Ɔrenka da sɛ yɛnyɛ biribi a ebepira yɛn. Enti sɛ ɔka kyerɛ yɛn sɛ yɛmfa bɔne nkyɛ a, yebetumi anya awerɛhyem sɛ yɛyɛ saa a, ɛbɛboa yɛn. (Dw. 40:4; Yes. 48:17, 18) Nanso sɛ yedi yɛn koma akyi a, ebia yɛrentumi mfa bɔne nkyɛ da. (Mmeb. 14:12; Yer. 17:9) Naomi a yɛadi kan aka n’asɛm no ka sɛ: “Esiane sɛ na me kunu hwɛ ponografi nti, mfiase no na ɛyɛ me sɛ, sɛ mamfa ne bɔne ankyɛ no a, ɛyɛ ne kwan so. Ná misuro sɛ ɔbɛsan ayɛ biribi ma ahaw me, anaa ne werɛ befi sɛ nea ɔyɛe no ma midii yaw paa. Minyaa adwene sɛ, sɛnea mete nka no, Yehowa te ase. Nanso mibehui sɛ, te a Yehowa te me ase no ara kɛkɛ nkyerɛ sɛ nea mereyɛ no, ɔpene so. Onim sɛnea mete nka, na onim sɛ ebegye bere na matumi ayi abufuw no afi me mu, nanso ɔpɛ nso sɛ mede bɔne kyɛ.” d
YERE WO HO FA BƆNE KYƐ
13. Sɛnea Romafo 12:18-21 kyerɛ no, dɛn na ehia sɛ yɛyɛ?
13 Sɛ obi yɛ biribi ma ɛhaw yɛn paa na yɛde onii no bɔne kyɛ no a, ɛnyɛ nea ɛsɛ sɛ yɛyɛ ara ne sɛ yɛbɛka akyerɛ onii no sɛ yentwa so. Sɛ nea wayɛ biribi atia yɛn no yɛ yɛn nua Kristoni mpo de a, ɛno koraa na ɛsɛ sɛ yɛde si yɛn ani so sɛ yebesiesie yɛne no ntam. (Mat. 5:23, 24) Sɛ́ anka yɛde ne ho abufuw bɛhyɛ yɛn mu anaa yebenya ne ho menasepɔw no, yɛbɛda mmɔborɔhunu adi na yɛde ne bɔne akyɛ no. (Kenkan Romafo 12:18-21; 1 Pet. 3:9) Dɛn na ebetumi aboa yɛn ama yɛayɛ saa?
14. Dɛn na ɛsɛ sɛ yɛyere yɛn ho sɛ yɛbɛyɛ, na adɛn ntia?
14 Yehowa hwɛ nneɛma pa a ɛwɔ nnipa ho. Enti yɛn nso, sɛ obi yɛ yɛn bɔne a, ɛsɛ sɛ yɛyere yɛn ho suasua Yehowa na yɛhwɛ nneɛma pa a ɛwɔ onii no ho. (2 Be. 16:9; Dw. 130:3) Mpɛn pii no, sɛ yɛyɛ yɛn adwene sɛ yɛbɛhwɛ nneɛma pa a ɛwɔ nkurɔfo ho a, yebenya bi; sɛ nea enye wɔ wɔn ho nso na yɛpɛ sɛ yɛhwɛ a, yebenya bi. Sɛ yɛhwɛ nneɛma pa a ɛwɔ afoforo ho a, ɛbɛyɛ mmerɛw sɛ yɛde wɔn bɔne bɛkyɛ wɔn. Yɛbɛyɛ nhwɛso a, onua bi a ne din de Jarrod ka sɛ, “Nea ɛma ɛyɛ mmerɛw sɛ mede onua bi bɔne bɛkyɛ no ne sɛ, ɛyɛ a mehwɛ nneɛma pa pii a ɛwɔ onii no ho, na memfa m’adwene nsi mfomso a wadi no so.”
15. Sɛ wode obi bɔne kyɛ no na woka kyerɛ no a, adɛn nti na mfaso wɔ so?
15 Sɛ obi yɛ wo bɔne a, ade foforo a ehia sɛ woyɛ ne sɛ wobɛka akyerɛ no sɛ wode akyɛ no. Adɛn ntia? Naomi a yɛadi kan aka ne ho asɛm no, yɛnhwɛ nea ɔkae. Ɔkaa sɛ: “Me kunu bisaa me sɛ, ‘Wode me bɔne akyɛ me anaa?’ Bere a mibuee m’ano sɛ mereka akyerɛ no sɛ mede akyɛ no no, mekasa a na ɛmma. Wei ma mihui sɛ me komam paa de, na memfa nkyɛɛ no. Bere bi akyi no, mitumi buee m’ano ka kyerɛɛ no sɛ, mede akyɛ no. Mede kyɛɛ no no, mihui sɛ nisu ataataa no; sɛnea ne koma tɔɔ ne yam no, me koraa ɛyɛɛ me nwanwa. Me ara nso metee nka sɛ adesoa bi afi me so. Efi saa bere no, masan anya ne mu ahotoso, na yɛaka abom denneennen a mframa mpo mfa yɛn ntam.”
16. Dɛn na woasua afa bɔnefakyɛ ho?
16 Yehowa pɛ sɛ yɛde bɔne kyɛ. (Kol. 3:13) Nanso ebia ɛrenyɛ mmerɛw sɛ yɛde afoforo bɔne bɛkyɛ wɔn. Sɛ yɛamfa afoforo ho abufuw anhyɛ yɛn mu, na yɛyɛ nea yebetumi biara siesie yɛne wɔn ntam a, yebetumi de wɔn bɔne akyɛ wɔn, na yɛanya wɔn ho adwempa.—Hwɛ adaka a yɛato din “ Nneɛma Mmiɛnsa a Wubetumi Ayɛ Na Ama Wode Afoforo Bɔne Akyɛ Wɔn.”
MFASO A ƐWƆ BƆNEFAKYƐ SO NO, FA W’ADWENE SI SO
17. Adɛn nti na ɛsɛ sɛ yɛde afoforo bɔne kyɛ wɔn?
17 Nea enti a ɛsɛ sɛ yɛde bɔne kyɛ no dɔɔso. Yɛnhwɛ emu kakra. Nea edi kan, sɛ yɛde bɔne kyɛ a na yɛresuasua Yehowa, yɛn Agya a ne mmɔborɔhunu dɔɔso no. (Luka 6:36) Afei nso, sɛ yɛde bɔne kyɛ a, ɛkyerɛ sɛ yɛn ani sɔ sɛnea Yehowa ayi ne yam de yɛn bɔne akyɛ yɛn no. (Mat. 6:12) Nea ɛtɔ so mmiɛnsa, sɛ yɛde bɔne kyɛ a, ɛma yenya akwahosan pa, na ɛma yɛne afoforo ayɔnkofa mu yɛ den.
18-19. Sɛ yɛde obi bɔne kyɛ no a, dɛn na ebetumi afi mu aba?
18 Sɛ yɛde bɔne kyɛ a, ebia yebenya nhyira a yɛnhwɛ kwan. Momma yɛnhwɛ Denise a yɛadi kan aka ne ho asɛm no. Ná onnim sɛ sɛɛ na drɔbani no ayɛ n’adwene sɛ, sɛ wɔdi n’asɛm wie a, obekum ne ho. Nanso bere a ɔde drɔbani no bɔne kyɛɛ no no, ɛkaa ne koma ara ma ofii ase ne Yehowa Adansefo suaa Bible no.
19 Ebia ɛbɛyɛ den paa sɛ yɛde obi a wafom yɛn bɔne bɛkyɛ no. Nanso sɛ yetumi yɛ a, ebia ɛde nhyira pii bɛbrɛ yɛn. (Mat. 5:7) Enti, momma yɛn nyinaa nyɛ nea yebetumi biara nsuasua Yehowa bɔnefakyɛ.
DWOM 125 “Anigye Ne Mmɔborɔhunufo”!
a Wɔasesa edin no bi.
b Tebea a ɛte saa mu no, Kristoni biara na obesi nea ɔbɛyɛ ho gyinae.
c Hwɛ nnwom ho video ahorow a ɛwɔ jw.org a yɛato din “Fa Bɔne Kyɛ,” “Fa Kyɛ,” ne “Ma Yɛnka Mmom” no.
d Sɛ obi hokafo hwɛ ponografi a ɛyɛ bɔne na ɛyɛ yaw, nanso Bible mma ɔwarefo a ne ho nni asɛm no kwan sɛ obetumi agyina ɛno so agyaa aware.
