WOAHYIA ɔhaw bi ama woate nka pɛn sɛ woto w’ani a na ɛntɔ obiara anim anaa? Yɛte “mmere a emu yɛ den” mu, enti ɛtɔ da a, yɛn abam betumi abu anaa yebetumi ate nka sɛ yɛayɛ ankonam. (2 Tim. 3:1) Nanso, ɛnsɛ sɛ yɛn nko ara kyekyere yɛn haw soa. Bible ma yehu sɛ nnamfo pa betumi aboa yɛn wɔ “amanehunu bere” mu.—Mmeb. 17:17.

Nnamfo pa a Paul ne wɔn tutuu akwan no, wɔboaa no wɔ nneɛma pii mu. (Kol. 4:​7-11) Bere a Roma aban no kaa Paul hyɛɛ fie no, ne nnamfo boaa no ma ɔyɛɛ nnwuma bi a na anka ɔno ara rentumi nyɛ. Yɛbɛyɛ nhwɛso a, nneɛma bi a na Paul hia a na anuanom a ɛwɔ Filipi pɛ sɛ wɔde kɔma no no, Epafrodito de kɔe. (Filip. 4:18) Nkrataa a Paul kyerɛwee sɛ ɔde rekɔma nsafo no, ɔde somaa Tikiko. (Kol. 4:7) Ɛwom sɛ Roma aban no kaa Paul hyɛɛ fie, na bere bi nso wɔde no too afiase, nanso mmoa a ne nnamfo de maa no nti, otumi yɛɛ ne som adwuma no. Wo nso, dɛn na wobɛyɛ na ama woayɛ ɔyɔnko berɛbo?

Ɔyɔnko berɛbo so wɔ mfaso paa. Osuahu a edi so yi si nea yɛreka yi so dua. Elisabet yɛ onuawa kwampaefo bi a ɔwɔ Spain. Ɔka sɛnea onuawa bi boaa no wɔ ahohia bere mu ho asɛm. Bere a adɔktafo kaa sɛ Elisabet maame anya kansa no, onuawa no de Bible mu nsɛm a ɛhyɛ nkuran sɛndee Elisabet. Elisabet kyerɛ mu sɛ: “Saa nsɛm no maa m’ani gyei, na metee nka sɛ afoforo dwen me ho. Ɛhyɛɛ me den ma mitumi gyinaa me tebea no ano.”—Mmeb. 18:24.

Sɛ yɛboa yɛn nuanom Kristofo ma wɔkɔ asɛnka anaa adesua a, ayɔnkofa a yɛne wɔn wɔ no, ɛma mu yɛ den. Yɛbɛyɛ nhwɛso a, wubetumi de kar akɔfa onua anaa onuawa bi a ne mfe akɔ anim aba adesua anaa asɛnka. Sɛ woyɛ saa a, mo mu biara benya hokwan ahyɛ ne yɔnko nkuran. (Rom. 1:12) Nanso anuanom binom wɔ hɔ a, yare ama wɔaka fie. Yɛbɛyɛ dɛn ama saafo no ahu sɛ yɛyɛ yɔnko berɛbo?

Yɛn nuanom bi wɔ hɔ a, yare anaa tebea afoforo bi nti, wɔntumi ntutu wɔn nan nkɔ adesua. Momma yɛnhwɛ David; adɔktafo kaa sɛ wanya kansa. Bɛboro abosome nsia nyinaa na ɔda so regye ayaresa. Saa bere no nyinaa, David ne ne yere Lidia antumi antutu wɔn nan ankɔ adesua; wɔtiee adesua no wɔ Intanɛt so.

Wɔn nnamfonom a ɛwɔ asafo no mu no, mmoa bɛn na wɔde maa wɔn? Adesua biara awiei no, na anuanom a ɛwɔ Ahenni Asa so no bi bɔ mmɔden sɛ wɔne David ne Lidia bɛkasa  wɔ Intanɛt no so. Afei nso, sɛ David ne Lidia ma mmuae a, akyiri yi, anuanom sɛnde wɔn tɛs mɛsegye de kamfo wɔn. Wei ma wɔtee nka sɛn? Ɛma wɔtee nka sɛ ɛnkaa wɔn nko ara.

Ebia yebetumi ne anuanom a wɔaka fie no bi abom ayɛ asɛnka adwuma no. Nsakrae kakraa bi a yɛbɛyɛ wɔ yɛn nhyehyɛe mu no, ebetumi ama saafo no ahu sɛ yɛn werɛ mfii wɔn. (Mmeb. 3:27) Wubetumi ayɛ nhyehyɛe ne wɔn abom akyerɛw nkrataa anaa ayɛ tɛlefon so adansedi. Wɔn a wɔaka fie betumi atie asɛnka nhyiam no bi wɔ videoconference so. David ne Lidia ani gyee saa nhyehyɛe yi ho. David kyerɛ mu sɛ, “Bere a yɛne anuanom hyiaam yɛɛ asɛnka nhyiam na yɛbɔɔ mpae no, ɛhyɛɛ yɛn nkuran paa.” Afei nso, sɛ ɛbɛyɛ yiye a, ɛwom ara a wubetumi de wo Bible suani bi akɔ onua anaa onuawa a ontumi nkɔ baabiara no fie na moakɔyɛ adesua no wɔ hɔ.

Sɛ yɛne yɛn nuanom a wɔaka fie no bɔ, na yehu suban pa a wɔwɔ no a, ɛma yɛne wɔn ayɔnkofa mu yɛ den. Yɛbɛyɛ nhwɛso a, sɛ yɛne wɔn bom yɛ asɛnka adwuma no, na yehu sɛnea wɔde Onyankopɔn Asɛm no kyerɛkyerɛ nkurɔfo ma ɛka wɔn koma a, ɛbɛma ɔdɔ a yɛwɔ ma wɔn no ayɛ kɛse. Sɛ yɛboa yɛn nuanom Kristofo ma wɔkɔ asɛnka ne adesua a, ebetumi ama yɛanya nnamfo foforo.—2 Kor. 6:13.

Bere a Paul wɔ ahohia mu a ne yɔnko Tito kɔsraa no no, ɛkyekyee ne werɛ paa. (2 Kor. 7:​5-7) Saa asɛm yi ma yehu sɛ, sɛ yɛka nkurahyɛsɛm kyerɛ yɛn nuanom a wɔwɔ ahohia mu a, eye paa. Nanso, sɛnea Tito yɛe no, sɛ yɛkɔsra wɔn na yɛyɛ nneɛma pɔtee bi de boa wɔn a, ɛno nso kyekye wɔn werɛ.—1 Yoh. 3:18.

Atumfo a ɛwɔ Russia retan yɛn nuanom a ɛwɔ hɔ no ani paa, nanso anuanom a ɛwɔ hɔ boa wɔn ho wɔn ho. Wei yɛ nhwɛso fɛfɛɛfɛ a yebetumi asuasua. Momma yɛnhwɛ Sergey ne ne yere Tatyana. Apolisifo bɔ wuraa wɔn fie kotuu hɔ nneɛma nyinaa hwehwɛɛ hɔ. Wɔwiei no, wɔde wɔn kɔe kobisabisaa wɔn nsɛm. Tatyana na wɔdii kan gyaa no sɛ ɔnkɔ fie. Sergey ka sɛ: “Bere a [Tatyana] koduu fie ara pɛ na onuawa kokodurufo bi kɔsraa no. Ankyɛ, anuanom bebree kɔɔ fie hɔ kɔboae ma wɔsan hyehyɛɛ biribiara pɛpɛɛpɛ.”

Sergey toa so sɛ: “Kyerɛwsɛm a m’ani gye ho paa ne Mmebusɛm 17:17. Ɛhɔ ka sɛ: ‘Ɔyɔnko berɛbo de, ɔkyerɛ ne dɔ bere nyinaa, na ɔyɛ onua a wɔwoo no maa amanehunu bere.’ Saa bere yi a atamfo reteetee yɛn yi paa na mate saa kyerɛwsɛm no ase, efisɛ sɛ anuanom mmoa nnim a anka ɛbɛyɛ den. Yehowa ama manya nnamfo akokodurufo a wɔtaa m’akyi.”

Atetee ne ɔhaw bere yi mu na yehia nnamfo a wɔbɛboa yɛn. Ahohiahia kɛse no mu mpo de, yebehia wɔn mmoa kɛse. Enti saa bere yi paa na ɛsɛ sɛ yɛyɛ nea yebetumi biara de kyerɛ sɛ yɛyɛ yɔnko berɛbo!—1 Pet. 4:​7, 8.