SƐ WOKƆ Bible Lands Museum (tete nneɛma akorae bi) a ɛwɔ Jerusalem no a, wubehu ɔbo bi a nkyerɛwee wɔ so. Wɔkyerɛw nkyerɛwee yi bɛyɛ afe 700-600 A.Y.B. Wɔkɔfaa ɔbo no fii tete ɔboda bi mu. Ɔboda no bɛn Hebron wɔ Israel. Nkyerɛwee a na egu ɔbo no so ni: “Yahweh Sabaot nnome Hagav ba Hagaf.” Sɛn na saa asɛm yi foa nea Bible no aka so? Ɛkyerɛ sɛ Onyankopɔn din Yehowa a na wɔkyerɛw no YHWH wɔ tete Hebri nkyerɛwee mu no, na nkurɔfo nim paa, na na wɔtaa de yɛ adwuma saa bere no. Ná ebinom kohyia wɔ aboda mu, na na ebinom nso guan kɔhyɛ hɔ. Sɛ wɔkɔ hɔ a, na wɔtaa kyerɛkyerɛw nsɛm bi gu ban no ho, na wɔahu sɛ nsɛm no bi yɛ Onyankopɔn din, na ebi nso yɛ nkurɔfo din a Onyankopɔn din no ho biribi wɔ mu.

Dr. Rachel Nabulsi a ɔwɔ Georgia Suapɔn mu no kaa biribi faa nsɛm a nkurɔfo kyerɛkyerɛwee no ho. Ɔkaa sɛ: “Edin YHWH a yehu bebree wɔ nsɛm no mu no kyerɛ yɛn nneɛma pii. Ɛma yehu sɛ, nea ne din ne YHWH no, ná ne ho hia Israelfo ne Yudafo no paa.” Wei foa nea Bible aka no so efisɛ wohwɛ Bible mu a, Onyankopɔn din a wɔkyerɛw no YHWH wɔ Hebri nkyerɛwee mu no pue mpempem pii wɔ mu. Afei nso, na wɔtaa hu Onyankopɔn din no ho biribi wɔ nkurɔfo din mu.

“Yahweh Sabaot” a wɔakyerɛw agu ɔbo no so no, ɛkyerɛ “Asafo Yehowa.” Wei reyɛ akyerɛ sɛ tete mmere mu no, ɛnyɛ Onyankopɔn din no nko ara na na wɔde yɛ adwuma, na mmom na wɔtaa de “Asafo Yehowa” nso yɛ adwuma paa. Wei nso foa sɛnea Bible de “Asafo Yehowa” yɛ adwuma no so. Saa asɛm no pue Hebri Kyerɛwnsɛm no mu bɛboro mpɛn 250, na ɛdɔɔso paa wɔ Yesaia, Yeremia, ne Sakaria nhoma no mu.