1. Asɛm bɛn na Ɔhene Dawid bisae a ɛtɔ da a yɛn mu bi bisa bi?

YƐN mu biara pɛ sɛ n’asom dwo no na ɔtena hɔ komm. Obiara nni hɔ a ɔpɛ sɛ adwinnwen hyɛ no so. Nanso ɛtɔ da a, wobɛhwɛ na adwinnwen abɛtɔ yɛn so ama yegye yɛn ho a, ennye. Ɛno nti, ɛyɛ a Yehowa asomfo bi bisa asɛm a Ɔhene Dawid bisaa Yehowa yi bi. Obisae sɛ: “Me ne me kra nni aperepere, na awerɛhow ntena me komam da mũ nyinaa nkosi da bɛn?”​—Dw. 13:2.

2. Dɛn na yebesusuw ho wɔ adesua yi mu?

² Adwinnwen de, ɛyɛ dɛn ara a, ebi bɛba abɛtɔ yɛn so. Nanso nneɛma bi wɔ hɔ a yebetumi ayɛ de atew yɛn adwinnwen so. Adesua yi mu no, yebedi kan ahwɛ nneɛma bi a ebetumi akɔfa adwinnwen abɛto yɛn so. Yewie a, yɛbɛhwɛ nneɛma nsia bi a yebetumi ayɛ na sɛ yehyia ɔhaw mpo a, yɛatumi atena hɔ komm.

3. Nneɛma bɛn na ebetumi akɔfa adwinnwen abrɛ yɛn, na yebetumi asiw saa nneɛma no ano anaa?

³ Nneɛma a ɛkɔfa adwinnwen bɛto yɛn so no, ebi wɔ hɔ a, yɛrentumi nyɛ ho hwee. Ɛho nhwɛso ni: Sɛnea aduan, ntaade, ne ɔdan bo kɔ soro afe biara no, yɛrentumi nyɛ ho hwee. Wɔn a yɛne wɔn yɛ adwuma anaa yɛne wɔn kɔ sukuu nso, yɛrentumi nkyerɛ sɛ ɛnnɛ anaa ɔkyena wɔbɛsɔ yɛn ahwɛ sɛ yenwia ade anaa yɛmmɔ aguaman. Saa ara nso na nneɛma bɔne a nkurɔfo  yɛ wɔ yɛn mpɔtam no, yɛrentumi nsiw ano. Nea enti a weinom nyinaa kɔ so ne sɛ, wiase a yɛte mu yi, sɛ nnipa dodow no ara reyɛ biribi a, Bible nnyinasosɛm de, wonnwen ho koraa. Satan a ɔyɛ wiase yi nyame no nim sɛ, nnipa bi wɔ hɔ a, wɔbɛma “wiase yi mu dadwen” ahyɛ wɔn so, enti wɔrensom Yehowa. (Mat. 13:22; 1 Yoh. 5:19) Ɛno nti, ɛnyɛ nwonwa sɛ nneɛma a ɛkɔfa adwinnwen bɛto nnipa so no abu so!

4. Sɛ ɔhaw hyɛ yɛn so boro so a, ɛdɛn na ebetumi afi mu aba?

⁴ Sɛ ɔhaw hyɛ yɛn so boro so a, yebetumi adwen ara ma yɛn adwene atu afra. Ebia ɛbɛyɛ yɛn sɛ, yɛrennya sika a yɛde bɛtotɔ nneɛma a yehia. Anaa yɛn adwene bɛyɛ yɛn sɛ, anhwɛ a na yɛayare, na yɛantumi ankɔ adwuma anaa ebia na yɛn adwuma afi yɛn nsa. Ɛtɔ da nso a, ebetumi ayɛ yɛn sɛ, sɛ biribi sɔ yɛn hwɛ a, yebebu Onyankopɔn mmara so. Yenim sɛ ɛrenkyɛ, Satan bɛma wɔn a wodi n’akyi no atow ahyɛ Onyankopɔn nkurɔfo so, enti nea yɛbɛyɛ saa bere no ho adwinnwen betumi agyaw yɛn tipae. Wei nyinaa nti, ebia yebebisa sɛ, ‘Ɛyɛ bɔne sɛ medwinnwen saa nneɛma no ho anaa?’

5. Bere a Yesu kaa sɛ, “Munnyae sɛ mudwinnwen” no, ɛdɛn na na ɔrepɛ akyerɛ?

⁵ Yenim sɛ Yesu ka kyerɛɛ n’akyidifo sɛ: “Munnyae sɛ mudwinnwen.” (Mat. 6:25) Nea Yesu kae no, na ɔrepɛ akyerɛ sɛ ɛnsɛ sɛ yedwinnwen biribiara ho koraa? Daabi! Kae sɛ, Yehowa asomfo anokwafo a wɔtenaa ase tete no mpo, adwinnwen bɛtɔɔ ebinom so. Nanso Yehowa kɔɔ so gyee wɔn toom. * (1 Ahe. 19:4; Dw. 6:3) Nea ɛte ne sɛ, na Yesu rema yɛanya awerɛhyem. Ná ɔmpɛ sɛ yɛde nneɛma a yehia wɔ asetenam no haw yɛn ho pii, anyɛ saa a, ɔsom a yɛde ma Onyankopɔn no bɛbrɛ ase. Ɛnde, nneɛma bɛn saa na yebetumi ayɛ na adwinnwen anhyɛ yɛn so?​—Hwɛ adaka a wɔato din “ Sɛnea Wobɛyɛ No.”

6. Sɛnea Filipifo 4:6, 7 ma yehu no, sɛ yehyia ɔhaw a, ɛdɛn na ɛbɛboa yɛn ama yɛatena hɔ komm?

⁶ (1) Ɛyɛ a taa bɔ mpae. Kristofo a adwinnwen ahyɛ wɔn so no, sɛ wɔyere wɔn ho bɔ Yehowa mpae a, wɔn asom bedwo wɔn. (1 Pet. 5:7) Yehowa betie wo mpaebɔ, na ɔbɛma wo “Onyankopɔn asomdwoe a ɛboro [nnipa] adwene nyinaa so.” (Kenkan Filipifo 4:6, 7.) Yehowa nam ne honhom kronkron a tumi wom no so ma yɛn asom dwo yɛn, na yɛtena hɔ komm.​—Gal. 5:22.

7. Sɛ yɛrebɔ Onyankopɔn mpae a, ɛdɛn na ɛsɛ sɛ yɛkae?

⁷ Sɛ worebɔ Yehowa mpae a, ka nea ɛwɔ wo koma mu nyinaa kyerɛ no. Ade ko pɔtee a ɛhaw wo no, ka kyerɛ no. Ma onhu sɛnea wote nka. Sɛ biribi wɔ hɔ a wubetumi ayɛ wɔ wo haw no ho a, srɛ no sɛ ɔmma wo nyansa na hu, na ɔmma wo ahoɔden a wode bɛyɛ. Sɛ ɛyɛ biribi a worentumi nyɛ ho hwee nso a, srɛ Yehowa na ɔmmoa wo na ɛho adwinnwen anhyɛ wo so. Sɛ yɛbɔ mpae na yɛka biribi pɔtee ho asɛm, na sɛ Yehowa bua a, ɛma yehu paa sɛ wabua yɛn mpae no. Sɛ wobɔ mpae na woannya ho mmuae ntɛm a, mma w’aba mu mmmu. Sɛ yɛrebɔ mpae a, Yehowa pɛ sɛ yɛka biribi pɔtee ho asɛm. Afei nso, ɔpɛ sɛ yɛkɔ so bɔ ade ko no ho mpae.​—Luka 11:8-10.

8. Nneɛma bɛn na ɛsɛ sɛ yɛbɔ ho mpae?

⁸ Sɛ wobɔ Yehowa mpae na wotow wo dadwen gu no so a, kae nso sɛ wobɛda no ase. Sɛ nneɛma nkɔ yiye wɔ yɛn asetenam mpo a, eye sɛ yebedwinnwen nneɛma pa a yɛwɔ no ho.  Ɛtɔ da na awerɛhow ahyɛ wo so na wunhu nea wonka nkyerɛ Yehowa a, kae sɛ, sɛ wutumi bɔ mpae tiawa sɛ, ‘O Yehowa, boa me!’ a, obetie.​—2 Be. 18:31; Rom. 8:26.

9. Yɛbɛyɛ dɛn anya ahobammɔ a ɛyɛ papa?

⁹ (2) Fa wo ho to Yehowa nyansa so, na ɛnyɛ wo ara wo nyansa. Bɛboro mfe 700 ansa na Yesu reba asase so no, na Yudafo no suro sɛ Asiriafo bɛba abɛtow ahyɛ wɔn so. Ná Yudafo no mpɛ sɛ Asiriafo no bedi wɔn so, enti wɔkɔka kyerɛɛ Egypt man a na wɔsom abosom no sɛ wɔmmɛboa wɔn. (Yes. 30:1, 2) Yehowa bɔɔ wɔn kɔkɔ sɛ Egyptfo a wɔde wɔn ho ato wɔn so no, ebewie wɔn bɔne. (Yes. 30:7, 12, 13) Yehowa nam Yesaia so maa Yudafo no huu nea wɔyɛ a ebetumi ama wɔanya ahobammɔ a ɛyɛ papa. Ɔka kyerɛɛ wɔn sɛ: “Motena ase komm de mo ho to [Yehowa] so a, mubenya ahoɔden.”​—Yes. 30:15b.

10. Nneɛma bɛn mu na yebetumi de yɛn ho ato Yehowa so?

¹⁰ Bere bɛn na yebetumi akyerɛ sɛ yɛde yɛn ho to Yehowa so? Wo de, yɛnhwɛ bi. Fa no sɛ woanya adwuma bi a sika wom paa, nanso ebegye wo bere pii, na ɛremma wunnya bere nsom Yehowa yiye. Anaa yɛmfa no sɛ obi a wo ne no yɛ adwuma yeyɛ nneɛma bi a ɛkyerɛ sɛ ɔpɛ wo, nanso ɔnyɛ Onyankopɔn somfo a wabɔ asu. Anaa ebia wo busuani bi a wobɛn no paa bɛka akyerɛ wo sɛ: “Me, ɛne Yehowa som no, yi mu baako.” Asɛm yi mu biara to wo a, anhwɛ a worenhu nea wonyɛ, nanso Yehowa bɛboa wo ama woahu nea wobɛyɛ. (Mat. 6:33; 10:37; 1 Kor. 7:39) Ɛba saa a, wode wo ho bɛto Yehowa so na woayɛ nea ɔbɛka no anaa?

11. Bible mu nsɛm bɛn na yebetumi asua na sɛ nkurɔfo tan yɛn ani a, ehu anhyɛ yɛn so?

¹¹ (3) Wɔn a wɔyɛɛ nhwɛso pa ne wɔn a wɔyɛɛ nhwɛso bɔne a Bible aka wɔn ho asɛm no, sua biribi fi wɔn hɔ. Nsɛm pii wɔ Bible mu a, ɛma yehu sɛ ɛho hia sɛ yɛtena ase komm na yɛde yɛn ho to Yehowa so. Sɛ worekenkan saa nsɛm no a, hwɛ nea ɛboaa Onyankopɔn asomfo maa wɔtenaa ase komm bere a nkurɔfo tan wɔn ani yayaayaw no. Sɛ yɛbɛyɛ nhwɛso a, bere a Yudafo asɛnnibea kɛse no ka kyerɛɛ asomafo no denneennen sɛ wonnyae asɛmpa no ka no, wɔammɔ hu koraa. Mmom wɔde akokoduru kaa sɛ: “Ɛsɛ sɛ yetie Onyankopɔn sɛ sodifo mmom sen nnipa.” (Aso. 5:29) Bere a wɔbɔɔ asomafo no mmaa mpo, anhunahuna wɔn. Adɛn ntia? Efisɛ na wonim sɛ Yehowa taa wɔn akyi, na ogye wɔn tom. Wei nti wɔkɔɔ so kaa asɛmpa no. (Aso. 5:40-42) Yɛnhwɛ osuani Stefano nso. Bere a wɔrebekum no mpo, ɔyɛɛ komm te sɛ nea hwee nhaw no, na na “n’anim te sɛ ɔbɔfo anim.” (Aso. 6:12-15) Adɛn ntia? Efisɛ na ogye di paa sɛ Yehowa gye no tom.

12. Sɛnea 1 Petro 3:14 ne 4:14 ma yehu no, adɛn nti na sɛ nkurɔfo tan yɛn ani mpo a, yɛn ani betumi agye?

¹² Ná asomafo no wɔ adanse paa a ɛkyerɛ sɛ Yehowa ka wɔn ho. Ná Yehowa ama wɔn tumi ama wɔde ayɛ anwonwade bebree. (Aso. 5:12-16; 6:8) Ɛnnɛ de, Yehowa mma yɛn tumi a yɛde yɛ anwonwade. Nanso ɔnam n’Asɛm no so ma yenya awerɛhyem sɛ, sɛ trenee nti yehu amane a, ogye yɛn tom, na ɔde ne honhom bɛboa yɛn. (Kenkan 1 Petro 3:14; 4:14.) Enti sɛ nkurɔfo tan yɛn ani daakye a, nea yɛbɛyɛ no, ɛnsɛ sɛ yɛde haw yɛn ho koraa nnɛ. Mmom, nea yebetumi ayɛ nnɛ ama yɛanya ahotoso kɛse sɛ Yehowa bɛboa yɛn na obegye yɛn no, ɛno na ɛsɛ sɛ yɛyere yɛn ho sɛ yɛbɛyɛ no kɛse. Sɛnea tete asomafo no yɛe no, yɛn nso, ɛsɛ sɛ yɛde yɛn ho to Yesu bɔhyɛ yi so. Ɔkaa sɛ: “Mɛma mo ano ne nyansa a wɔn a wɔsɔre tia mo nyinaa ntumi nnyina ano anaa wɔmmɔ ngu.” Yesu ahyɛ yɛn bɔ sɛ: “Sɛ munya  boasetɔ a, mubenya mo kra.” (Luka 21:12-19) Mommma yɛn werɛ mmfi da sɛ, Yehowa somfo biara a obedi nokware akosi sɛ obewu no, Yehowa kae ne ho biribiara, enti obetumi anyan no.

13. Wɔn a wɔanyɛ komm amfa wɔn ho anto Yehowa so no, sɛ yesua wɔn ho ade a, ɛbɛboa yɛn sɛn?

¹³ Wɔn a wɔanyɛ komm amfa wɔn ho anto Yehowa so no, wɔn nso, yebetumi asua biribi afi nea wɔyɛe no mu. Nea saa nnipa no yɛe no nyɛ papa, nanso sɛ yesua ho ade a, ɛbɛboa yɛn na yɛanni mfomso a wodii no bi. Yɛmfa Ɔhene Asa nyɛ nhwɛso. Bere a obedii hene no, ankyɛ koraa na asraafodɔm kɛse bi baa no so. Ɔde ne ho too Yehowa so, na Yehowa nso hyiraa no ma odii wɔn so nkonim. (2 Be. 14:9-12) Akyiri yi, Israel hene Baasa de asraafo kakraa bi baa Asa so. Nanso saa bere yi de, Asa amfa ne ho anto Yehowa so sɛ onnye no sɛnea ɔyɛe kan no. Mmom, otuaa sika maa Siriafo sɛ wɔmfa wɔn asraafo mmɛboa no. (2 Be. 16:1-3) Aka kakra ama Asa awu no, yare kɛse bi bɔɔ no, nanso ɛno mpo wamfa ne ho anto Yehowa so.—2 Be. 16:12.

14. Mfomso a Asa dii no, ɛdɛn na yebetumi asua afi mu?

¹⁴ Ahyɛase no, bere a Asa hyiaa ɔhaw no, ɔde ne ho too Yehowa so sɛ ɔmmoa no. Nanso akyiri yi, bere a ɔsan hyiaa ɔhaw no, wamfa ne ho anto ne Nyankopɔn no so bio sɛ ɔmmoa no. Mmom, ɔno ara bɔɔ mmɔden sɛ obedi ne haw ho dwuma. Adwene a Asa fae sɛ ɔbɛma Siriafo abɛboa no ama wako atia Israel no, sɛ woannwen ho ankɔ akyiri a, wobɛka sɛ ɛyɛ adwempa. Nanso nkonim a odii no ankyɛ. Yehowa nam odiyifo bi so ka kyerɛɛ no sɛ: “Sɛ́ wode wo ho ato Siria hene so na woamfa wo ho anto Yehowa, wo Nyankopɔn so nti, Siria hene asraafodɔm no afi wo nsa.” (2 Be. 16:7) Ɛsɛ sɛ yɛhwɛ yiye na yɛannye yɛn ho anni dodo. Anyɛ saa a, yebenya adwene sɛ yɛn ankasa yebetumi adi yɛn haw ho dwuma, na enhia sɛ yɛhwehwɛ Yehowa akwankyerɛ a ɔnam N’asɛm so de ma yɛn no. Sɛ ehia sɛ yesi gyinae bi putupuru, na sɛ yɛto yɛn bo ase de yɛn ho to Yehowa so a, ɔbɛboa yɛn ama yɛasi gyinae pa.

15. Sɛ yɛrekan Bible a, ɛdɛn na yebetumi ayɛ?

¹⁵ (4) Kyere Bible mu nsɛm gu wo tirim. Sɛ worekan Bible na wokɔto nsɛm bi a ɛma wuhu sɛ, sɛ yɛtena ase komm na yɛde yɛn ho to Yehowa so a ɛbɛma yɛanya ahoɔden a, kyere saa nsɛm no bi gu wo tirim. Wubetumi akenkan no den anaa wubetumi akyerɛw ato hɔ na woasan akenkan no mpɛn pii. Wei bɛboa wo ama woatumi akyere agu wo tirim. Yehowa ka kyerɛɛ Yosua sɛ ɔnkenkan Mmara nhoma no na onnwinnwen ho daa sɛnea ɛbɛyɛ a ɔbɛyɛ n’ade nyansam. Nea ɔbɛkenkan wɔ Mmara nhoma no mu no, na ebeyi ehu afi ne mu nso, na ama wanya akokoduru de adi Onyankopɔn nkurɔfo anim. (Yos. 1:8, 9) Nsɛm pii wɔ Onyankopɔn Asɛm mu a ebetumi ama w’asom adwo wo na wo koma atɔ wo yam bere a woahyia tebea a ebetumi de adwinnwen abɛto wo so anaa ebetumi ama ehu aka wo no.​—Dw. 27: 1-3; Mmeb. 3:25, 26.

16. Ɔkwan bɛn so na Yehowa nam asafo no so boa yɛn ma yɛyɛ komm na yɛde yɛn ho to no so?

¹⁶ (5) Wo ne Onyankopɔn nkurɔfo mmɔ. Yehowa nam yɛn nuanom mmarima ne mmea so ma yɛyɛ komm na yɛde yɛn ho to no so. Sɛ yɛkɔ asafo nhyiam a, ɔkasa ahorow a yetie, mmuae a atiefo ma, ne nkɔmmɔ a ɛhyɛ nkuran a yɛne yɛn nuanom Kristofo bɔ no nyinaa hyɛ yɛn den. (Heb. 10:24, 25) Sɛ yɛka nea ɛhaw yɛn kyerɛ asafo no mufo a wɔyɛ yɛn nnamfo paa no a, ɛno nso hyɛ yɛn den. Sɛ yɛn adamfo ka “asɛmpa” bi kyerɛ yɛn a, ebetumi atew yɛn adwinnwen so koraa.​—Mmeb. 12:25.

17. Sɛnea Hebrifo 6:19 kyerɛ no, ɔkwan bɛn so na anidaso a Ahenni no ama yɛanya no betumi ama yɛatena ase komm bere a yɛrehyia nsɛnnennen?

 ¹⁷ (6) Hyɛ w’anidaso no mu den. Anidaso a Ahenni no ama yɛanya no te sɛ “ɔkra sɛkyɛ,” na sɛ yehyia nsɛnnennen anaasɛ adwinnwen bi bɛtɔ yɛn so a, ɛma yɛtena ase komm. (Kenkan Hebrifo 6:19.) Yehowa ahyɛ bɔ sɛ daakye, nneɛma a ɛma adwinnwen hyɛ yɛn so nyinaa befi hɔ. Ɛyɛ a dwinnwen saa bɔhyɛ no ho. (Yes. 65:17) Wo de, fa no sɛ wowɔ wiase foforo no mu, na ɔhaw a yɛfrɛ no ɔhaw de, wo ne no too nkwanta a, moapae; asomdwoe nko ara. (Mika 4:4) Sɛ woka wiase foforo no ho asɛm kyerɛ nkurɔfo a, ɛno nso bɛhyɛ w’anidaso no mu den paa. Yɛ nea wubetumi biara ka asɛmpa no kyerɛ nkurɔfo, na yɛ asuafoyɛ adwuma no bi. Sɛ woyɛ saa a, wubetumi anya “anidaso no mu awerɛhyem a edi mũ akosi ase.”​—Heb. 6:11.

18. Ɔhaw bɛn na yebetumi ahyia daakye, na ɛdɛn na yebetumi ayɛ wɔ ho?

¹⁸ Bere a wiase yi rekeka kɔ n’awiei no, yebehyia ɔhaw bebree a ebetumi akɔfa adwinnwen abɛto yɛn so. Afe 2021 afe asɛm no betumi aboa yɛn, na sɛ saa ɔhaw no ba a, yɛamfa yɛn ho anto yɛn ankasa ahoɔden so, na mmom yɛde yɛn ho ato Yehowa so, na yɛayɛ komm. Biribiara a yɛbɛyɛ wɔ afe 2021 yi mu no, momma yɛnkyerɛ sɛ yɛwɔ Yehowa bɔhyɛ yi mu gyidi: “Motena ase komm de mo ho to me so a, mubenya ahoɔden.”​—Yes. 30:15.