1-2. Ɔhaw bɛn na Yehowa asomfo anokwafo betumi ahyia?

 AWERƐHOSƐM bi betumi ato yɛn ama yɛn asetena asesa prɛko pɛ. Yɛbɛyɛ nhwɛso a, onua nokwafo bi a ne din de Luis a hui sɛ wanya kansa. Dɔkta ka kyerɛɛ no sɛ aka abosome kakraa bi ama ne nkwa aba awiei. Ná Monika ne ne kunu resom Yehowa a adaagye nnim koraa. Da koro, Monika behui sɛ, sɛɛ ne kunu a ɔyɛ asafo mu panyin no rebu brabɔne wɔ sum ase, na ɔde asie mfe pii. Onuawa bi a ɔnwaree a ne din de Olivia nso, ɔtee sɛ mframa gyampantrudu bi rebobɔ ba, enti na ɛsɛ sɛ otu fi baabi a ɔte no. Bere a ɔsan bae no, ohui sɛ mframa no asɛe ne fie no pasaa. Bere tiaa bi mu no, anuanom mmiɛnsa yi mu biara asetena sesae prɛko pɛ. Biribi saa ato wo pɛn? Woahyia ɔhaw bi a ɛmaa wo wiase nyinaa dan butuwii?

² Sɛ yɛde nokwaredi resom Yehowa mpo a, ɔhaw ne amane a ɛto nnipa nyinaa no, ebi betumi ato yɛn. Afei nso, wɔn a wɔmpɛ Onyankopɔn nkurɔfo asɛm betumi atan yɛn ani anaa wɔasɔre atia yɛn. Ɛwom sɛ Yehowa ma kwan ma saa ɔhaw yi nyinaa ba yɛn so, nanso ɔhyɛ bɔ sɛ ɔbɛboa yɛn. (Yes. 41:10) Mmoa a ɔde ma yɛn nti, sɛ ɔhaw a yɛrefa mu no so sɛ dɛn mpo a, yɛn ani betumi agye, yebetumi asisi gyinae pa, na yɛakɔ so abata ne ho. Sɛ esum duru yɛn wɔ ɔbra yi mu a, sɛn na Yehowa boa yɛn? Adesua yi mu no, yebesusuw akwan nnan ho. Afei nso, nea yɛbɛyɛ na yɛanya mmoa a Yehowa de ma yɛn no so mfaso no, yebesusuw ho.

 YEHOWA BƐBƆ WO HO BAN

3. Sɛ ɔhaw kɛse bi to yɛn a, dɛn na ebetumi ayɛ den ama yɛn sɛ yɛbɛyɛ?

³ Sɛ ɔhaw kɛse bi to yɛn a, ebia ɛbɛyɛ den sɛ yebedwen yiye na yɛasisi gyinae pa. Adɛn ntia? Ebia na yɛn koma abubu anaa dadwen ahyɛ yɛn so. Yebetumi ate nka te sɛ nea yɛayera wɔ kwaebirentuw bi mu a yenhu baabi a yɛmfa. Anuanom mmea mmienu a yɛadi kan aka wɔn ho asɛm no, yɛnhwɛ sɛnea wɔtee nka wɔ ɔhaw a wɔhyiae no ho. Olivia kaa sɛ: “Bere a ahum no sɛee me fie no, ebubuu me na m’adwene tu frae.” Monika nso, bere a ohui sɛ ne kunu bu brabɔne wɔ sum ase no, ɔkaa sɛ: “Sɛ meka sɛ wadi me huammɔ kɛkɛ a, na manhu ka. Metee nka sɛ asɛ nea obi de sekan awɔ me. M’adwene tu frae ara ma nneɛma nketenkete mpo na mintumi nyɛ. Ná minnye nni sɛ biribi saa betumi ato me.” Sɛ yɛkɔ ɔhaw mu na nneɛma hyɛ yɛn so a, dɛn na Yehowa ahyɛ bɔ sɛ ɔbɛyɛ de aboa yɛn?

4. Sɛnea Filipifo 4:​6, 7 kyerɛ no, dɛn na Yehowa de ahyɛ yɛn bɔ?

⁴ Nea Yehowa yɛ de boa yɛn. Wahyɛ bɔ sɛ ɔbɛma yɛn ‘n’asomdwoe.’ (Kenkan Filipifo 4:​6, 7.) Dɛn ne “Onyankopɔn asomdwoe” no? Ɛyɛ akomatɔyam a yenya esiane sɛ yɛne no wɔ ayɔnkofa a emu yɛ den nti. Saa asomdwoe no, “ɛboro ntease nyinaa so”; kyerɛ sɛ ɛyɛ den sɛ yɛbɛte ase. So woabɔ Yehowa mpae denneennen na wuwiei no, wotee nka sɛ wo ho adwo wo fɔmm pɛn? Sɛ saa a, ɛnde saa atenka no na yɛfrɛ no “Onyankopɔn asomdwoe” no.

5. Sɛn na Onyankopɔn asomdwoe bɔ yɛn adwene ne yɛn koma ho ban?

⁵ Saa kyerɛwsɛm no san ka sɛ, Onyankopɔn asomdwoe “bɛbɔ mo koma ne mo adwene ho ban.” Asɛmfua a wɔkyerɛɛ ase ‘bɔ ho ban’ no, asraafo a tete no na wɔwɛn kurow bi sɛnea ɛbɛyɛ a atamfo remmɛto nhyɛ so no, wɔn na na wɔde ka wɔn ho asɛm. Nnipa a wɔte kurow a ɛte saa mu no, wɔda a na wɔada efisɛ wɔnim sɛ asraafo rewɛn kurow no. Yɛn nso, sɛ Onyankopɔn asomdwoe bɔ yɛn koma ne yɛn adwene ho ban a, ɛma yenya akomatɔyam efisɛ yenim sɛ biribiara rentumi nyɛ yɛn. (Dw. 4:8) Sɛnea ɛtoo Hanah no, sɛ yɛn tebea no ansesa amonom hɔ ara mpo a, yebetumi anya asomdwoe. (1 Sam. 1:​16-18) Sɛ yɛwɔ akomatɔyam a, mpɛn pii no, ɛnyɛ den sɛ yebedwen yiye na yɛasisi gyinae pa.

6. Dɛn na yebetumi ayɛ na yɛanya Onyankopɔn asomdwoe? (Hwɛ mfoni no nso.)

⁶ Nea ehia sɛ yɛyɛ. Sɛ ɔhaw bi to wo a,  hwehwɛ mmoa fi Yehowa hɔ. Wobɛyɛ no sɛn? Bɔ mpae ara kosi sɛ wobɛte nka sɛ woanya Onyankopɔn asomdwoe. (Luka 11:9; 1 Tes. 5:17) Luis a yɛadi kan aka ne ho asɛm no, bere a dɔkta ka kyerɛɛ no sɛ ɛrenkyɛ na wawu no, dɛn na ɛboaa ɔne ne yere Ana ma wɔtumi gyinaa ano? Ɔkaa sɛ: “Biribi saa si a, ɛyɛ den paa sɛ wubesisi ayaresa ne nneɛma foforo ho gyinae. Nanso mpaebɔ paa na aboa yɛn ma yɛanya asomdwoe.” Luis ne ne yere kaa sɛ, na wɔtaa bɔ mpae denneennen srɛ Yehowa sɛ ɔmma wɔn asomdwoe, akomatɔyam, ne nyansa a wɔde besisi gyinae pa. Wɔtee nka sɛ Yehowa aboa wɔn ampa. Sɛ wowɔ ɔhaw bi mu a, nnyae mpaebɔ da, na wubehu sɛ Yehowa asomdwoe rebɔ wo koma ne w’adwene ho ban.—Rom. 12:12.

YEHOWA BƐMA WOAGYINA PINTINN

7. Sɛ amanehunu kɛse bi to yɛn a, anhwɛ a sɛn na yɛbɛte nka?

⁷ Sɛ amanehunu kɛse bi to yɛn a, yɛn adwene betumi atu afra na yɛayɛ basaa. Ebia yɛbɛte nka te sɛ po so hyɛn bi a mframa rewosow no biribiribiri. Ana a yɛadi kan aka ne ho asɛm no kaa sɛ, ne kunu Luis wu akyi no, na ogye ne ho a ennye. Ɔkaa sɛ: “Sɛ m’adwene tu fra saa a, na me werɛ ahow me ho. Ná etumi hye me paa nso sɛ wawu.” Afei nso, Ana tee nka sɛ wayɛ ankonam; gyinae a Luis wɔ hɔ a anka obesisi no, afei ɔno na na ato no. Ɛba saa a, na ato adwinnwen. Ɛtɔ da a, na ɔte nka sɛ ɛte sɛ nea ɔwɔ po so a mframa rebɔ denneennen. Sɛ ɔhaw bunkam yɛn so saa a, dɛn na Yehowa yɛ de boa yɛn?

8. Sɛnea 1 Petro 5:10 ka no, awerɛhyem bɛn na Yehowa de ma yɛn?

⁸ Nea Yehowa yɛ de boa yɛn. Ɔma yɛn awerɛhyem sɛ ɔbɛma yɛagyina pintinn. (Kenkan 1 Petro 5:10.) Sɛ ahum tu wɔ po so a, ebetumi awosow po so hyɛn biribiribiri. Nea ɛbɛyɛ na po so hyɛn nnan mmutuw no, po so ahyɛn no pii wɔ biribi wɔ ase wɔ benkum ne nifa. Wei boa ma hyɛn no nhinhim pii, ɛma akwantufo no nya ahobammɔ, na ɛma akwantu no yɛ dɛ. Nanso nea ɛboa ma po so hyɛn nhinhim no, pii wɔ hɔ a, sɛ ɛbɛyɛ adwuma yiye a, gye sɛ po so hyɛn no rekɔ. Yɛn nso, sɛ yehyia ɔhaw bi na yɛantew antena a, Yehowa bɛboa yɛn ama yɛagyina pintinn.

9. Sɛn na nneɛma a yɛde yɛ nhwehwɛmu no betumi aboa yɛn ma yɛagyina pintinn? (Hwɛ mfoni no nso.)

⁹ Nea ehia sɛ yɛyɛ. Sɛ worehyia ɔhaw kɛse bi a, nea woyɛ wɔ Yehowa som mu  no, kɔ so yɛ. Ɛwom, nea na woyɛ no kan no, ebia seesei worentumi nyɛ no saa, nanso kae sɛ Yehowa te wo ase. (Fa toto Luka 21:​1-4 ho.) Nea woyɛ wɔ Yehowa som mu daa no da nkyɛn a, ɛsɛ sɛ wuyi bere nso si hɔ de sua ade na wudwinnwen ho. Adɛn ntia? Yehowa nam n’ahyehyɛde no so ama yɛanya nneɛma pii a yebetumi asua, na aboa yɛn ma yɛagyina pintinn. Sɛ wopɛ sɛ wunya nsɛm a ɛbɛboa wo a, wubetumi de nneɛma a yɛde yɛ nhwehwɛmu no ayɛ saa. Ebi ne JW Library^® app, Watch Tower Publications Index, ne Nhoma a Yehowa Adansefo De Yɛ Nhwehwɛmu no. Monika a yɛadi kan aka ne ho asɛm no kaa sɛ, sɛ ohu sɛ yaw a ɔrefa mu no reyɛ ayi ne ti a, na ɔyɛ nhwehwɛmu wɔ yɛn nhoma ahorow no mu. Yɛbɛyɛ nhwɛso a, na ɔyɛ asɛmfua “abufuw” ho nhwehwɛmu. Ɛtɔ da nso a, na ɔhwehwɛ nsɛm a ɛfa “huammɔdi” anaa “nokwaredi” ho. Owie a, ɔkan ara kosi sɛ ɔbɛte nka sɛ ne ho atɔ no. Ɔkaa sɛ, “Sɛ mifi ase sɛ mereyɛ nhwehwɛmu no a, midwen a ensi so. Nanso merekan kɔ nyinaa, nkakrankakra na ayɛ te sɛ nea Yehowa reyɛ me atuu. Bere a migu so rekan no, mibehui sɛ sɛnea mete nka biara Yehowa te me ase, na ɔreboa me.” Mmoa a ɛte saa a wubenya afi Yehowa hɔ no nso betumi aboa wo ma woagyina pintinn kosi sɛ nneɛma mu bedwo ama wo.—Dw. 119:​143, 144.

YEHOWA BƐBOA WO

10. Sɛ asɛnkɛse bi to yɛn a, sɛn na yebetumi ate nka?

¹⁰ Sɛ asɛnkɛse bi to yɛn a, ɛtɔ da bi a, yebetumi ate nka sɛ yɛayɛ bɛtɛɛ, na yɛn anigye asa. Yebetumi ate nka sɛ ommirikatufo bi a kan no na onim mmirika tu paa, na afei de, ɔtɔ gu ne nan so. Nnwuma bi a kan no na ɛyɛ koko koraa ma yɛn no, ebia seesei ɛbɛyɛ den ama yɛn sɛ yɛbɛyɛ. Anaa nneɛma bi a bere bi yɛyɛ a na ɛma yɛn ani gye no, ebia biribiara rempusuw yɛn sɛ yɛnyɛ. Sɛnea ɛtoo Elia no, ebia yɛn nso yɛbɛte nka sɛ yenni ahoɔden a yɛde bɛsɔre; da ara na yɛpɛ sɛ yɛda. (1 Ahe. 19:​5-7) Sɛ yɛte nka sɛ yɛayɛ mmerɛw a, dɛn na Yehowa ahyɛ bɔ sɛ ɔbɛyɛ ama yɛn?

11. Ɔkwan foforo bɛn na Yehowa fa so boa yɛn? (Dwom 94:18)

¹¹ Nea Yehowa yɛ de boa yɛn. Wahyɛ bɔ sɛ obeso yɛn mu. (Kenkan Dwom 94:18.) Sɛnea mmirikatufo a wapira hia  mmoa na watumi anantew no, saa ara na yɛn nso ebia yebehia mmoa na ama yɛakɔ so akeka yɛn ho wɔ Yehowa som mu. Yehowa ma yɛn awerɛhyem sɛ: “Me, Yehowa wo Nyankopɔn, mikura wo nsa nifa mu. Me na meka kyerɛ wo sɛ, ‘Nsuro. Mɛboa wo.’” (Yes. 41:13) Ɔhene Dawid nyaa mmoa a ɛte saa. Bere a ɔkɔɔ amanehunu mu na atamfo sɔre tiaa no no, ɔka kyerɛɛ Yehowa sɛ: “Wo nsa nifa na ekura me mu.” (Dw. 18:35) Nanso, ɔkwan bɛn na Yehowa fa so boa yɛn?

12. Sɛ yɛte nka sɛ yɛayɛ mmerɛw a, henanom na Yehowa betumi afa wɔn so aboa yɛn?

¹² Mmoa a Yehowa de ma yɛn no, mpɛn pii no, ɔde fa afoforo so. Yɛbɛyɛ nhwɛso a, bere bi a Dawid tee nka sɛ wayɛ mmerɛw no, n’adamfo Yonatan kɔsraa no kyekyee ne werɛ na ɔhyɛɛ no nkuran. (1 Sam. 23:​16, 17) Saa ara nso na Yehowa faa Elisa so boaa Elia. (1 Ahe. 19:​16, 21; 2 Ahe. 2:2) Ɛnnɛ nso, Yehowa betumi afa yɛn abusuafo, yɛn nnamfo, anaa asafo mu mpanyimfo so aboa yɛn. Nanso, sɛ yɛrefa yaw mu a, ebia yɛbɛpɛ sɛ yɛtew yɛn ho kɔhyɛ yɛn baabi dinn. Yɛte nka saa a, ɛnyɛ bɔne. Nanso, dɛn na yebetumi ayɛ na Yehowa aboa yɛn?

13. Mmoa a Yehowa de ma yɛn no, dɛn na ɛsɛ sɛ yɛyɛ na yɛn nsa atumi aka? (Hwɛ mfoni no nso.)

¹³ Nea ehia sɛ yɛyɛ. Yere wo ho bɛn anuanom; ntew wo ho. Sɛ yɛtew yɛn ho fi afoforo ho a, ɔhaw a yɛrefa mu ne yɛn nko ara yɛn ho na ebia yebedwen. Ɛba saa a, ebia yɛrentumi nsisi gyinae pa. (Mmeb. 18:1) Ɛwom ara a, ehia sɛ yɛn mu biara kɔhyɛ baabi komm fa ne ho adwene, ɛnkanka bere a ɔhaw kɛse bi ato yɛn no. Nanso sɛ yɛtew yɛn ho kyɛ a, mmoa a Yehowa pɛ sɛ ɔfa afoforo so de ma yɛn no, ebia yɛn nsa renka. Enti ɔhaw a worefa mu no, sɛ ani soso sɛ dɛn mpo a, mmoa a Yehowa nam w’abusuafo, wo nnamfo ne asafo mu mpanyimfo so de rema wo no, gye tom. Hu sɛ Yehowa nam wɔn so reboa wo.—Mmeb. 17:17; Yes. 32:​1, 2.

YEHOWA BƐKYEKYE WO WERƐ

14. Ɔhaw a ɛyɛ hu bɛn na ebetumi asisi wɔ yɛn akwan mu?

¹⁴ Ɛtɔ mmere bi a, ɔhaw bi a yɛrefa mu betumi ama ehu aka yɛn. Yɛhwɛ Bible mu a, yebehu sɛ Onyankopɔn asomfo anokwafo bi kaa sɛ, atamfo ahunahuna ne nhyɛso afoforo nti, na wɔteetee. (Dw. 18:4; 55:​1, 5) Yɛn nso, yɛn mfɛfo sukuufo  anaa akyerɛkyerɛfo, yɛn adwumamfo, yɛn abusuafo anaa aban no betumi asɔre atia yɛn. Yare bi a abɛtena yɛn so nti, ebia dɔkta bɛka akyerɛ yɛn sɛ yebetumi awu. Mmere a ɛtete saa mu no, yɛn asɛm betumi ayɛ mmɔbɔ te sɛ abofra. Dɛn na Yehowa yɛ de boa yɛn wɔ mmere a ɛtete saa mu?

15. Awerɛhyem bɛn na Dwom 94:19 ma yenya?

¹⁵ Nea Yehowa yɛ de boa yɛn. Ɔkyekye yɛn werɛ, na ɔka yɛn koma to yɛn yam. (Kenkan Dwom 94:19.) Yɛkan dwom yi mu asɛm no a, nea ebetumi aba yɛn adwenem ne abaayewa bi a aprannaa rebobom ama ehu aka no nti ontumi nna. Yebetumi de yɛn adwene abu sɛ ne papa abɛfa no na ɔrekorɔkorɔ no kosi sɛ ɔbɛda. Ɛwom sɛ aprannaa no da so ara rebobom, nanso esiane sɛ ne papa aka no abata ne ho denneennen nti, onsuro. Sɛ yehyia ɔhaw bi a ani soso a, ebia yebehia sɛ yɛn soro Agya no ka yɛn bata ne ho denneennen kosi sɛ nneɛma mu bedwo. Yɛbɛyɛ dɛn anya awerɛkyekye a ɛte saa afi Yehowa hɔ?

16. Awerɛkyekye a Yehowa de ma yɛn no, dɛn na yebetumi ayɛ na yɛn nsa aka? (Hwɛ mfoni no nso.)

¹⁶ Nea ehia sɛ yɛyɛ. Nya bere ma Yehowa; bɔ no mpae daa na kenkan n’Asɛm no. (Dw. 77:​1, 12-14) Sɛ wotaa yɛ saa na wuhyia ɔhaw bi a, ɛda adi sɛ ade a edi kan a wobɛyɛ ne sɛ, wobɛhwehwɛ mmoa afi wo soro Agya no hɔ. Nea ɛrehunahuna wo anaa ɛreteetee wo biara, ka ho asɛm kyerɛ Yehowa. Ma ɔmfa Bible no so ne wo nkasa na ɔnkyekye wo werɛ. (Dw. 119:28) Sɛ ehu ka wo a, ebia wubehu sɛ Bible mu nsɛm pɔtee bi betumi akyekye wo werɛ. Ebia Hiob, Nnwom ne Mmebusɛm nhoma no mu nsɛm betumi aka wo koma ato wo yam. Afei nso, Yesu nsɛm a ɛwɔ Mateo ti 6 no betumi aboa wo paa. Sɛ wobɔ Yehowa mpae na wokenkan n’Asɛm no a, wubenya awerɛkyekye.

17. Ahotoso bɛn na yebetumi anya?

¹⁷ Sɛ esum duru yɛn wɔ ɔbra yi mu a, yebetumi anya ahotoso sɛ Yehowa bɛboa yɛn. Ɔbɛka yɛn ho daa. (Dw. 23:4; 94:14) Yehowa ahyɛ bɔ sɛ ɔbɛbɔ yɛn ho ban, ɔbɛma yɛagyina pintinn, ɔbɛboa yɛn, na wakyekye yɛn werɛ. Yesaia 26:3 ka Yehowa ho asɛm sɛ: “Wɔn a wɔde wɔn ho to wo so koraa no, wobɛbɔ wɔn ho ban; wobɛma wɔn asomdwoe daa, efisɛ wo na wɔde wɔn ho to wo so.” Enti fa wo ho to Yehowa so, na akwan a ɔpɛ sɛ ɔfa so boa yɛn no nso, gye tom. Sɛ woyɛ saa na sɛ ɔhaw no so sɛ dɛn mpo a, wubenya ahoɔden de agyina ano.