ASƐMFUA a wɔakyerɛ ase “teaseɛnam” wɔ Wiase Foforo Nkyerɛase no mu no, ebetumi akyerɛ teaseɛnam ahorow ahorow nso. (Aso. 8:​28, 29, 38) Nanso teaseɛnam a na Etiopiani no te mu no, ɛbɛyɛ sɛ na ɛsõ sen teaseɛnam a na wɔde kɔ ɔko anaa wɔde si akan. Yɛnhwɛ nea enti a yɛreka saa no bi.

Ná Etiopiani no yɛ ahemfie panyin a watwa kwantenten. “Ná ɔyɛ otumfo a ɔhyɛ Etiopiafo hemmaa Kandake ase, na ɔno na na ɔhwɛ ne sika nyinaa so.” (Aso. 8:27) Sudan nyinaa ne Egypt anaafo a ɛwɔ hɔ nnɛ no, tete no, na ne nyinaa ka Etiopia ho. Ɛwom sɛ ebia Etiopiani no antena teaseɛnam baako pɛ mu na etwaa kwan no nyinaa, nanso ɛbɛyɛ sɛ na nneɛma a ɔde retu kwan ka ne ho. Asomafo no bere so no, teaseɛnam a na wɔde fa nnipa no, na ebi wɔ ntwahonan nnan. Nhoma bi a ɛkyerɛkyerɛ Asomafo Nnwuma no mu no ka sɛ: “Ná teaseɛnam a ɛte saa no tumi fa nneɛma pii, emu tena yɛ dɛ, na ɛbɛyɛ sɛ na etumi boa nkurɔfo ma wɔtwa kwantenten.”

Bere a Filipo kɔɔ Etiopiani no nkyɛn no, na ɔrekenkan ade. Kyerɛwtohɔ no ka sɛ, ‘Filipo tuu mmirika kɔɔ ho, na ɔtee sɛ ahemfie panyin no rekenkan odiyifo Yesaia nhoma no den.’ (Aso. 8:30) Teaseɛnam a na wɔde tu kwan no, wɔanyɛ no sɛ ɛnkɔ mmirika. Esiane sɛ na teaseɛnam no kɔ bɔkɔɔ nti, na ahemfie panyin no betumi akenkan ade. Afei nso, na ɛrenyɛ den sɛ Filipo betu mmirika akɔto teaseɛnam no.

Etiopiani no ‘srɛɛ Filipo sɛ ɔmforo mmɛtena ne nkyɛn.’ (Aso. 8:31) Teaseɛnam ankasa a na wɔde si akan no de, na wɔn a wɔka no gyina mu. Nanso, teaseɛnam a na wɔde tu kwan no, na emu sõ, enti na ahemfie panyin no ne Filipo nyinaa benya baabi atena.

Esiane asɛm a ɛwɔ Asomafo Nnwuma ti 8 ne nea abakɔsɛm ama yɛahu nti, yɛayɛ nsakrae bi. Etiopiani a ɔyɛ ahemfie panyin ho mfoni a yɛyɛ wɔ yɛn nhoma ahorow mu no, nnansa yi yɛyɛ no sɛ ɔte teaseɛnam a ɛsõ mu. Ɛnte sɛ nea na wɔde kɔ ɔko anaa wɔde si akan no.