1. Yɛka Yehowa ho asɛm a, dɛn na ɛba w’adwenem?

 WOABƆ mmɔden sɛ wode w’adwene bebu sɛnea Yehowa te pɛn? Sɛ wobɔ no mpae a, dɛn na ɛba w’adwenem? Ɛwom sɛ yenhu Yehowa, nanso Bible ka ne ho asɛm wɔ akwan pii so. Ɛka sɛ Yehowa “yɛ owia ne ɔkyɛm” ne “ogya a ɛhyew ade.” (Dw. 84:11; Heb. 12:29) Hesekiel kaa Yehowa ho asɛm wɔ anisoadehu mu sɛ ɔte sɛ hoabo, ɔte sɛ sika ne dwetɛ a adi afra, na ɔte sɛ nyankontɔn a ɛhyerɛn paa. (Hes. 1:​26-28) Sɛnea Bible ka Yehowa ho asɛm yi, emu bi wɔ hɔ a, ebetumi ama yɛn ho adwiriw yɛn anaa ebetumi ama ehu mpo aka yɛn.

2. Dɛn na ebetumi ama ayɛ den sɛ ebinom bɛbɛn Yehowa?

² Esiane sɛ yenhu Yehowa nti, ebia ɛbɛyɛ den sɛ yebegye adi sɛ ɔdɔ yɛn. Nea ebinom afa mu nti, wɔn adwene yɛ wɔn sɛ Yehowa rentumi nnɔ wɔn da. Ebia yɛn asetena nyinaa mu no, yɛannya agya a ɔdɔ yɛn. Ne nyinaa mu no, yebetumi anya awerɛhyem sɛ Yehowa te yɛn ase, na onim sɛ ɛno nti ebetumi ayɛ den sɛ yɛbɛbɛn no. Nea ɛbɛboa yɛn ma yɛabɛn no no, ɔnam n’Asɛm no so ma yehu ne suban a ɛyɛ fɛ no.

3. Adɛn nti na ɛsɛ sɛ yesua Yehowa dɔ ho ade kɔ akyiri?

³ Sɛ yɛka Yehowa ho asɛm a, asɛmfua baako a yebetumi de abɔ ne nyinaa mua ne ɔdɔ. Bible ka sɛ “Onyankopɔn ne dɔ.” (1 Yoh. 4:8) Ɔdɔ di akoten wɔ biribiara a ɔyɛ mu. Onyankopɔn dɔ no sõ ara ma wɔn a ɛnnɔ no mpo, ebi so wɔn so. (Mat. 5:​44, 45) Adesua yi mu no, yebesua Yehowa ne ne dɔ ho ade akɔ akyiri. Sɛ yesua Onyankopɔn ho ade kɔ akyiri a, ɔdɔ a yɛwɔ ma no no bɛyɛ kɛse.

 YEHOWA DƆ YƐN PAA

4. Ayamhyehye a Yehowa wɔ no, ɛma wote nka sɛn? (Hwɛ mfoni no nso.)

⁴ “Yehowa wɔ ayamhyehye” paa. (Yak. 5:11) Yɛhwɛ Bible mu a, ɔde ne ho toto ɔbaatan pa ho. (Yes. 66:​12, 13) Fa w’adwene bu ɔbaatan bi a ɔdɔ ne ba nti wayi ne yam rehwɛ no. Ogyigye no agorɔ wɔ ne nan so, ɔne no kasa bɔkɔɔ na ɔkorɔkorɔ no. Sɛ abofra no resu anaa ne baabi yɛ no yaw a, ne maame hwɛ sɛ ɔbɛma ne nsa aka nea ohia. Yɛn nso sɛ yɛrefa yaw mu a, yebetumi anya awerɛhyem sɛ, ɔdɔ a Yehowa dɔ yɛn nti ɔbɛboa yɛn. Odwontofo no kyerɛwee sɛ: “Bere a dadwen hyɛɛ me so no, wokyekyee me werɛ na wokaa me koma too me yam.”—Dw. 94:19.

5. Sɛn na wunya Yehowa dɔ a enni huammɔ no so mfaso?

⁵ Yehowa dɔ nni huammɔ. (Dw. 103:8) Sɛ yɛyɛ bɔne a, ɔnka sɛ wabrɛ yɛn. Israel man no dii Yehowa huammɔ mpɛn pii, nanso ɔdɔ a enni huammɔ a na ɔwɔ ma wɔn nti, bere a wɔsakrae no, ɔkaa asɛm a edi so yi kyerɛɛ wɔn: “Wosom bo wɔ m’ani so nti, midi wo ni, na medɔ wo.” (Yes. 43:​4, 5) Ɔdɔ a Onyankopɔn wɔ no nsesae. Yebetumi anya awerɛhyem sɛ ɔbɛdɔ yɛn bere nyinaa. Sɛ yɛyɛ bɔne a ɛso mpo a, Yehowa ntow yɛn nkyene. Sɛ yenu yɛn ho na yɛsan ba ne nkyɛn a, yebehu sɛ ɔda so ara dɔ yɛn. Ɔhyɛ bɔ sɛ ‘ɔde bɛkyɛ yɛn aboro so.’ (Yes. 55:7) Bible ka sɛ, sɛ Yehowa de yɛn bɔne kyɛ yɛn a, ‘ahotɔ mmere befi ne nkyɛn aba.’—Aso. 3:19.

6. Dɛn na Sakaria 2:8 ma yehu fa Yehowa ho?

⁶ Kenkan Sakaria 2:8. Esiane sɛ Yehowa dɔ yɛn nti, ɔte yɛn ase na wayɛ krado sɛ ɔbɛbɔ yɛn ho ban. Sɛ yɛkɔ ahohia mu a, ɛhaw ɔno nso. Ɛno nti, yebetumi abɔ mpae sɛ: “Bɔ me ho ban sɛ w’aniwa kosua.” (Dw. 17:8) Ani no yɛ nipadua akwaa a ɛsom bo paa. Enti sɛ Yehowa ka sɛ yɛte sɛ n’ani kosua a, ɛte sɛ nea ɔreka sɛ, ‘Obiara a ɔyɛ mo bɔne no, na ɔresɛe ade a ɛsom bo ma me.’

7. Gyidi a yɛwɔ sɛ Yehowa dɔ yɛn no, adɛn nti na ɛsɛ sɛ yɛhyɛ mu den?

⁷ Yehowa pɛ sɛ yegye di sɛ ɔdɔ yɛn mu biara. Nanso onim sɛ nea yɛafa mu pɛn nti, ebia ɛbɛyɛ yɛn sɛ ɔnnɔ yɛn. Anaa ebia  seesei yɛrehyia tebea bi a ɛma ɛyɛ den sɛ yebegye adi sɛ Yehowa dɔ yɛn. Sɛ saa a, dɛn na ebetumi ama yɛagye adi paa sɛ Yehowa dɔ yɛn? Sɛ yesua sɛnea Yehowa da ɔdɔ adi kyerɛ Yesu, wɔn a wɔasra wɔn no, ne yɛn nyinaa a, ɛbɛboa yɛn.

SƐNEA YEHOWA DA NE DƆ ADI

8. Adɛn nti na na Yesu gye di sɛ n’Agya dɔ no?

⁸ Efi tete nyinaa, Yehowa ne ne Dɔba no anya ayɔnkofa a emu yɛ den na wɔdodɔ wɔn ho paa. Wɔn ayɔnkofa no akyɛ sen ayɔnkofa biara. Sɛnea Mateo 17:5 ka no, Yehowa kaa no pefee sɛ ɔdɔ Yesu. Ná anka Yehowa betumi aka kɛkɛ sɛ, ‘Oyi ne nea magye no atom.’ Nanso na ɔpɛ sɛ yehu sɛ ɔdɔ Yesu paa, enti ɔfrɛɛ no “me Ba, nea medɔ no.” Nea ɛmaa Yehowa ani gyee Yesu ho kɛse paa ne sɛ, ɔpenee so sɛ ɔde ne nkwa bɛto hɔ ama adasamma. (Efe. 1:7) Ná Yesu nim paa sɛ n’Agya dɔ no. Ná onim sɛ ɔdɔ a n’Agya wɔ ma no no yɛ ɔdɔ kann. Ɔde ahotoso kaa no mpɛn pii sɛ Agya no dɔ no.—Yoh. 3:35; 10:17; 17:24.

9. Ɔdɔ a Yehowa wɔ ma wɔn a wɔasra wɔn no, asɛmfua bɛn na ɛma yehu sɛnea ɛte? Kyerɛkyerɛ mu. (Romafo 5:5)

⁹ Wɔn a wɔasra wɔn no nso, Yehowa ma yehu sɛ ɔdɔ wɔn. (Kenkan Romafo 5:5.) Momma yɛnhwɛ asɛmfua “ahwie” a wɔde dii dwuma wɔ kyerɛwsɛm yi mu no. Nhoma bi a ɛkyerɛkyerɛ Bible mu de saa asɛm yi toto nsu a ɛtene ho. Saa ntotoho yi ma yehu sɛ Yehowa dɔ wɔn a wɔasra wɔn no paa! Wɔn a wɔasra wɔn no nim sɛ ‘Onyankopɔn dɔ wɔn.’ (Yuda 1) Ɔsomafo Yohane kaa sɛnea wɔn a wɔasra wɔn no te nka. Ɔkyerɛwee sɛ: “Monhwɛ ɔdɔ kɛse a Agya no de adɔ yɛn. Ɛno ne sɛ, wɔafrɛ yɛn Onyankopɔn mma!” (1 Yoh. 3:1) Wɔn a wɔasra wɔn no nko ara na Yehowa dɔ wɔn anaa? Daabi, Yehowa akyerɛ sɛ ɔdɔ yɛn nyinaa.

10. Nneɛma a ɛma wuhu sɛ Yehowa dɔ wo no, emu nea ɛwɔ he na ɛyɛ kɛse paa?

¹⁰ Nneɛma a ɛma yehu sɛ Yehowa dɔ yɛn no, emu nea ɛwɔ he na ɛyɛ kɛse paa? Ɛno ne agyede no! Ɛyɛ ɔdɔ a ɛsen biara a Yehowa ayi no adi akyerɛ nnipa; obiara nyɛɛ bi saa da! (Yoh. 3:16; Rom. 5:8) Yehowa de ne ba a ɔsom bo no maa yɛn, ɔmaa kwan ma obewu maa nnipa nyinaa sɛnea ɛbɛyɛ a yebenya bɔnefakyɛ, na yɛatumi ayɛ ne nnamfo. (1 Yoh. 4:10) Nea Yehowa ne Yesu yɛe ansa na yɛn nsa reka agyede no, sɛ yɛkɔ so dwinnwen ho a, ɛbɛma yɛahu paa sɛ wɔn mu biara dɔ yɛn paa. (Gal. 2:20) Ɛnyɛ sɛ na Yehowa atɛntrenee hwehwɛ sɛ wɔtua agyede no ara nti na ɔyɛɛ saa. Mmom, ɛyɛ ɔdɔ nti na ɔde saa akyɛde no mae. Ade a ɛsom bo paa ma Yehowa na ɔde bɔɔ afɔre maa yɛn no. Ɔmaa kwan maa ne ba no bewui yayaayaw maa yɛn.

11. Dɛn na yesua fi Yeremia 31:3 mu?

¹¹ Sɛnea yɛahu no, ɔdɔ a Yehowa wɔ ma yɛn no, ɔnkata so, na mmom ɔka kyerɛ yɛn. (Kenkan Yeremia 31:3.) Yehowa atwe yɛn aba ne nkyɛn efisɛ ɔdɔ yɛn. (Fa toto Deuteronomium 7:​7, 8 ho.) Biribiara nni hɔ, na obiara nso nni hɔ a obetumi atew yɛn afi saa ɔdɔ no ho. (Rom. 8:​38, 39) Sɛn na saa ɔdɔ yi ma wote nka? Kenkan Dwom 23, na hwɛ sɛnea ɔdɔ ne ayamhyehye a na Yehowa wɔ ma Dawid no ma ɔtee nka, na hwɛ sɛnea ebetumi aboa yɛn nyinaa nso.

ƆDƆ A YEHOWA WƆ MA WO NO, ƐMA WOTE NKA SƐN?

12. Sɛn na wobɛbɔ Dwom 23 no mua?

¹² Kenkan Dwom 23:​1-6. Dawid na ɔkyerɛw Dwom 23 no. Saa dwom no mu  no, ɔma yehu sɛ na ɔwɔ ahotoso sɛ Yehowa dɔ no na ɔwɔ ayamhyehye ma no. Ayɔnkofa a na ɛda ɔne ne Hwɛfo Yehowa ntam no, ɔkaa ho asɛm. Dawid tee nka sɛ ɔwɔ ahobammɔ efisɛ ɔmaa Yehowa kyerɛɛ no kwan, na ɔde ne ho nyinaa too no so. Ná Dawid nim sɛ Yehowa dɔ bedi n’akyi ne nkwa nna nyinaa. Dɛn na ɛma onyaa ahotoso saa?

13. Adɛn nti na na Dawid gye di sɛ Yehowa bɛhwɛ no?

¹³ “Hwee renhia me.” Dawid tee nka sɛ Yehowa hwɛ no efisɛ bere nyinaa na ɔde nea ohia ma no. Ná Dawid nim sɛ Yehowa yɛ n’adamfo na ɔpɛ n’asɛm. Ɛno nti, na ogye di paa sɛ, baabi a ɔbra no bekyim no akosi biara, Yehowa de nea ohia nyinaa bɛma no. Ná Dawid wɔ ahotoso paa sɛ Yehowa dɔ no na ɔbɛhwɛ no, ɛno nti wannwinnwen anhaw ne ho. Ɛno ma onyaa anigye ne akomatɔyam.—Dw. 16:11.

14. Sɛn na ebia Yehowa beyi ne yam ahwɛ yɛn?

¹⁴ Yehowa yi ne yam hwɛ yɛn, ɛnkanka bere a ɔhaw anaa amane bi ato yɛn no. Claire a asom wɔ Betel bɛboro mfe 20. Bere a n’abusua hyiaa ɔhaw ntoatoaso no, n’ani nyinaa tutu kaa ne nsam. Ne papa nyaa stroke, wɔtuu ne nuabea baako fii asafo no mu, adwuma a abusua no didi ho nkakrankakra ne wɔn fie nso fii wɔn nsa. Sɛn na Yehowa kyerɛe sɛ odwen wɔn ho? Claire ka sɛ: “Yehowa hwɛe sɛ, nea m’abusua hia da biara no, ɔde bɛma wɔn. Mpɛn pii no, na Yehowa de nea ɛboro so koraa ma yɛn abusua no! Metaa dwinnwen sɛnea Yehowa aboa yɛn no ho, na m’ani sɔ paa. Wei nti sɛ mihyia sɔhwɛ a, memma emmu m’abam.”

15. Adɛn nti na Dawid tee nka sɛ ne ho adwo no? (Hwɛ mfoni no nso.)

 ¹⁵ “Ɔma me ho dwo me.” Ɛtɔ mmere bi a, ɔhaw ne amane a na Dawid hyia no, na ɛma ne ho hiahia no. (Dw. 18:​4-6) Nanso esiane sɛ na Yehowa dɔ no na odwen ne ho nti, ɛmaa ne ho dwoo no. Yehowa de n’adamfo a na n’asɛm ayɛ mmɔbɔ no kɔɔ “adidibea a ɛhɔ wura yɛ frɔmfrɔm” ne “homebea a nsu pii wɔ.” Ɛno nti, Dawid san nyaa ahoɔden na ɔkɔɔ so de anigye som Yehowa.—Dw. 18:​28-32.

16. Sɛn na ɔdɔ a Yehowa dɔ wo no ama wo ho adwo wo?

¹⁶ Ɛnnɛ nso, yɛfa sɔhwɛ ne abɛbrɛsɛ bebree mu. Ne nyinaa mu no, “Yehowa dɔ a enni huammɔ nti na yɛn ase nhyewee.” (Kwa. 3:22; Kol. 1:11) Momma yɛnhwɛ nea ɛtoo Rachel. COVID-19 nsanyare bere no mu no, ne kunu gyaw no hɔ, na ogyaee Yehowa som nso. Wei bubuu no paa. Dɛn na Yehowa yɛ maa no? Ɔka sɛ: “Yehowa ma metee nka sɛ ɔdɔ me. Ɔma minyaa nnamfo a na wɔbɛsra me ne me bɔ nkɔmmɔ, wɔbrɛ me aduan na wɔsɛnde me mɛsegye ne kyerɛwnsɛm a ɛhyɛ nkuran. Afei nso na wɔserew kyerɛ me, na na wɔtaa kae me sɛ Yehowa rehwɛ me. Da biara, meda Yehowa ase sɛ wama manya abusua kɛse a wɔdɔ me.”

17. Adɛn nti na na Dawid “nsuro bɔne biara”?

¹⁷ “Minsuro bɔne biara, efisɛ woka me ho.” Ná Dawid taa ne owu bɔ mpunimpu, na na ɔwɔ atamfo a wɔn ho yɛ hu bebree. Nanso ɔdɔ a na Yehowa wɔ ma Dawid nti, na ɔte nka sɛ ɔwɔ ahobammɔ. Dawid tee nka sɛ, tebea biara mu no, Yehowa ka ne ho, na ɛno kyekyee ne werɛ. Ɛno nti, otumi kaa sɛ: ‘Nneɛma a ɛbɔɔ me hu no, Yehowa gyee me fii ne nyinaa mu.’ (Dw. 34:4) Nokwasɛm ne sɛ, ɛtɔ mmere bi a na Dawid suro paa, nanso esiane sɛ na Yehowa dɔ no nti, otumi dii ehu a ɛtete saa so.

18. Sɛ yɛrefa amanehunu mu na yehu sɛ Yehowa dɔ yɛn a, sɛn na ɛboa yɛn?

¹⁸ Sɛ yɛrefa amanehunu mu na yehu sɛ Yehowa dɔ yɛn a, sɛn na ɛboa yɛn? Onuawa kwampaefo bi a ne din de Susi ka sɛnea ɔne ne kunu tee nka bere a wɔn babarima kum ne ho no. Ɔkaa sɛ: “Sɛ ɔhaw bi to yɛn mpofirim a, etumi ma yɛn adwene tu fra, na etumi bubu yɛn a yɛyɛ yɛn ho hwee a ɛnyɛ yiye. Nanso ayamhyehye a Yehowa wɔ ma yɛn no ma yɛte nka sɛ yɛwɔ ahobammɔ.” Rachel a yɛadi kan aka ne ho asɛm no ka sɛ: “Anadwo bi a na awerɛhow amene me, m’adwene atu afra na ehu aka me no, misu frɛɛ Yehowa. Ɛhɔ ara na metee nka sɛ Yehowa aka me koma  ato me yam na wama me ho adwo me sɛnea ɔbaatan yɛ ma ne ba no, na mefaa mu dae. Me werɛ remfi saa da no da.” Wɔde asafo mu panyin bi a ne din de Tasos kɔtoo afiase, efisɛ wampene sɛ ɔbɛkɔ sraadi. Sɛn na Yehowa ma ohui sɛ ɔdɔ no na odwen ne ho? Ɔka sɛ: “Nea mihia no, Yehowa ma minya boroo so. Wei ma minyaa gyidi paa sɛ metumi de me ho ato no so. Bio nso, ɛmfa ho sɛ na baabi a meda no nye no, Yehowa nam ne honhom no so ma minyaa anigye. Wei ma minyaa ahotoso sɛ, sɛ mekɔ so de me ho to no so a, ɔbɛma mahu sɛ ɔno nso dɔ me paa. Enti mehyɛɛ akwampae adwuma no ase wɔ afiase.”

TWE BƐN ONYANKOPƆN A ƆWƆ AYAMHYEHYE NO

19. (a) Sɛ yenim sɛ Yehowa dɔ yɛn a, sɛn na yɛbɛbɔ mpae? (b) Nea Bible ka fa Yehowa dɔ ho no, emu nea ɛwɔ he na w’ani gye ho paa? (Hwɛ adaka a yɛato din “ Bible Mu Nsɛm Bi a Ɛma Yehu Sɛ Yehowa Dɔ Yɛn Paa.”)

¹⁹ Osuahu ahorow a yɛasusuw ho yi nyinaa si so dua sɛ Yehowa, ‘ɔdɔ Nyankopɔn no’ ka yɛn ho. (2 Kor. 13:11) Odwen yɛn mu biara ho. Yegye di sɛ ne ‘dɔ a enni huammɔ atwa yɛn ho ahyia.’ (Dw. 32:10) Ɔdɔ a wayi no adi akyerɛ yɛn no, sɛ yɛkɔ so dwinnwen ho a, ɛbɛma yɛahu sɛ ɔyɛ obi a ɔwɔ hɔ ankasa, na ɛbɛtwe yɛn abɛn no. Yebetumi abɔ no mpae bere biara, na yɛaka akyerɛ no sɛ onyi ne dɔ adi nkyerɛ yɛn. Nea ɛhaw yɛn biara yebetumi aka ho asɛm akyerɛ no, na yɛanya ahotoso sɛ ɔte yɛn ase na wayɛ krado sɛ ɔbɛboa yɛn.—Dw. 145:​18, 19.

20. Ɔdɔ a Yehowa wɔ ma yɛn no, sɛn na ɛtwe yɛn bɛn no?

²⁰ Sɛ awɔw wom a, ɛyɛ a yɛpɛ sɛ yɛkɔ baabi a ɔhyew wɔ. Saa ara nso na sɛ yɛrefa ɔhaw mu a, ɛsɛ sɛ yɛtwe bɛn Yehowa. Ɔdɔ a Yehowa wɔ ma yɛn no, ɛsõ paa, na ɔwɔ ayamhyehye nso ma yɛn. Enti ma w’ani nnye sɛ Yehowa dɔ wo. Momma yɛn mu biara nso mpae mu nka sɛ: “Medɔ Yehowa”!—Dw. 116:1.