ADESUA ASƐM 29
Momma Yɛntaa Yɛn Hwɛfo Yesu Akyi
“Wɔde ɔsoro ne asaase so tumi nyinaa ama me.”—MAT. 28:18.
DWOM 13 Kristo Yɛ Yɛn Nhwɛsofo
NEA YƐREBESUA a
1. Ɛnnɛ, dɛn na Yehowa pɛ?
ƐNNƐ, Onyankopɔn pɛ sɛ yɛka Ahenni ho asɛmpa no wɔ asaase so baabiara. (Mar. 13:10; 1 Tim. 2:3, 4) Wei yɛ Yehowa adwuma, na hia a ehia paa nti, ɔde ahyɛ ne Dɔba no nsa. Esiane sɛ Yesu na ɛrehwɛ asɛnka adwuma no so nti, yebetumi anya awerɛhyem sɛ ɔbɛhwɛ ama yɛayɛ no sɛnea Yehowa pɛ ansa na awiei no aba.—Mat. 24:14.
2. Dɛn na yɛbɛtweetwee mu wɔ adesua yi mu?
2 Adesua yi mu no, yebehu sɛnea Yesu nam “akoa nokwafo ne ɔbadwemma” no so rema n’akyidifo honhom fam aduan. Afei nso yebehu sɛ ɔnam akoa nokwafo no so retoto nneɛma ama n’akyidifo na wɔatumi ayɛ asɛnka adwuma a ɛso bi mmae da. (Mat. 24:45) Yɛbɛsan nso ahu nea yɛn mu biara betumi ayɛ de aboa Yesu ne akoa nokwafo no.
YESU REHWƐ ASƐNKA ADWUMA NO SO
3. Tumi bɛn na Yehowa de ahyɛ Yesu nsa?
3 Yesu na ɔrehwɛ asɛnka adwuma no so. Yɛyɛ dɛn hu saa? Aka kakra ma Yesu akɔ soro no, ɔne n’akyidifo anokwafo bi hyiae wɔ bepɔw bi so wɔ Galilea. Ɔka kyerɛɛ wɔn sɛ: “Wɔde ɔsoro ne asaase so tumi nyinaa ama me.” Hyɛ asɛm a ɔka toaa so no nsow: “Enti monkɔ nkɔyɛ aman nyinaa m’asuafo.” (Mat. 28:18, 19) Yehowa ama Yesu tumi sɛ ɔnyɛ nneɛma pii, na emu baako ne sɛ ɔbɛkyerɛ sɛnea yɛnyɛ asɛnka adwuma no.
4. Adɛn nti na yebetumi anya awerɛhyem sɛ ɛnnɛ ne nnɛ nyinaa Yesu na ɔrehwɛ asɛnka adwuma no so?
4 Yesu kaa sɛ yɛbɛyɛ asɛnka ne asuafoyɛ adwuma no wɔ “aman nyinaa” mu, na ɔne n’akyidifo bɛwɔ hɔ “nna nyinaa kosi wiase yi awiei bere.” (Mat. 28:20) Saa asɛm yi ma yehu pefee sɛ Yesu bɛkɔ so ahwɛ asɛnka adwuma no so abesi yɛn bere yi so.
5. Dɛn na yɛreyɛ de aboa ama Dwom 110:3 aba mu?
5 Ná Yesu nim sɛ ɔkwan biara so obenya nkurɔfo ama wɔayɛ asɛnka adwuma no wɔ awiei bere yi mu. Ná onim sɛ nkɔm a odwontofo no hyɛe no bɛba mu. Ɔkaa sɛ: “Ɛda a wobɛkyerɛ wo tumi no, wo man betu wɔn ho ama koraa.” (Dw. 110:3) Sɛ woreyɛ asɛnka adwuma no bi a, ɛnde na wotaa Yesu ne akoa nokwafo no akyi, na woreboa ama saa nkɔmhyɛ no aba mu. Yegu so reyɛ adwuma no denneennen, nanso ɛwɔ ne haw.
6. Ɔhaw a wɔn a wɔreka Ahenni ho asɛmpa no rehyia nnɛ no, emu baako ne sɛn?
6 Ɔhaw a wɔn a wɔreka Ahenni ho asɛmpa no rehyia nnɛ no, emu baako ne ɔsɔretia. Awaefo, nyamesom akannifo, ne amanyɔfo ama nnipa pii anya yɛn adwuma no ho adwemmɔne. Sɛ yɛn abusuafo, amannifo, ne wɔn a yɛne wɔn yɛ adwuma gye saa atosɛm no di a, ebia wɔbɛhyɛ yɛn sɛ yennyae Yehowa som ne asɛnka adwuma no. Wokɔ aman bi so a, wɔn a wɔsɔre tia yɛn adwuma no tumi hunahuna anuanom, wɔyɛ wɔn basabasa, wɔkyere binom, na wotumi mpo de wɔn gu afiase. Sɛ nkurɔfo yɛ saa a, ɛnyɛ yɛn nwanwa, efisɛ Yesu ka too hɔ sɛ: “Me din nti aman nyinaa bɛtan mo.” (Mat. 24:9) Sɔre a nkurɔfo sɔre tia yɛn no kyerɛ sɛ yɛreyɛ nea ɛsɔ Yehowa ani. (Mat. 5:11, 12) Ɔbonsam na opiapia nkurɔfo ma wɔsɔre tia yɛn. Nanso ɔrentumi nnyina Yesu anim ketekete mpo! Yesu mmoa so nti, yɛreka asɛmpa no wɔ aman nyinaa mu. Momma yɛnhwɛ adanse a ɛkyerɛ saa.
7. Dɛn na ɛma wuhu sɛ Adiyisɛm 14:6, 7 reba mu?
7 Ɔhaw foforo a yɛn a yɛka Ahenni ho asɛmpa no hyia ne sɛ, wɔn a yɛka asɛmpa no kyerɛ wɔn no, bebree wɔ hɔ a, ɛsono kasa a wɔka. Adiyisɛm a Yesu de maa ɔsomafo Yohane no, ɔmaa emu daa hɔ sɛ, yɛn bere yi so no, saa ɔhaw no renyɛ osiakwan. (Kenkan Adiyisɛm 14:6, 7.) Ɔkwan bɛn so? Ɛne sɛ, seesei yɛreka Ahenni ho asɛmpa no kyerɛ nnipa bebree, na wɔn a wɔpɛ no retie gu aso pa mu. Ɛnnɛ, nnipa a ɛwɔ wiase baabiara tumi kan asafo nhoma no bi wɔ jw.org wɛbsaet hɔ, efisɛ nneɛma a ɛwɔ hɔ no, ɛwɔ kasa bɛboro 1,000 mu! Nhoma titiriw a yɛne nkurɔfo sua a ɛne Wubetumi Anya Anigye Daa! no, Akwankyerɛ Kuw no apene so ma wɔakyerɛ ase kɔ kasa bɛboro 700 mu! Afei nso Bible mu akwankyerɛ a yenya no, wɔayɛ bi video wɔ mum kasa mu, na wɔayɛ nhoma no bi nso ama anifuraefo. Ɛnnɛ, yehu sɛ Bible nkɔmhyɛ pii reba mu. Nnipa a “wɔka amanaman no kasa horow nyinaa” resua Bible mu nokware a ɛne “kasa kronkron” no. (Sak. 8:23; Sef. 3:9) Saa nneɛma yi nyinaa, Yesu Kristo na ɛhwɛ ma yetumi yɛ.
8. Dɛn na afi asɛnka adwuma a yɛreyɛ no mu aba?
8 Ɛnnɛ, nnipa bɛboro 8,000,000 na ɛwɔ Yehowa ahyehyɛde no mu wɔ aman 240 so. Afe biara, nnipa mpempem pii bɔ asu! Nnipa dodow no hyɛ nkuran paa, nanso nea ehia kyɛn saa koraa ne suban pa anaa “suban foforo” a wɔn a wɔabɔ asu foforo no anya no. (Kol. 3:8-10) Kan no, na wɔn mu bebree bu brabɔne, wɔyɛ aturutrafo, na ɔtan ahyɛ wɔn ma, na na wɔn man da wɔn koma so, nanso seesei wɔagyae ne nyinaa. Nkɔmhyɛ a ɛwɔ Yesaia 2:4 no aba mu; ‘wonsua akodi bio.’ Sɛ yɛyere yɛn ho nya suban foforo no a, ɛtwetwe nkurɔfo ba Onyankopɔn ahyehyɛde no mu, na yɛde kyerɛ sɛ yɛredi Kristo Yesu a ɔyɛ yɛn hwɛfo no akyi. (Yoh. 13:35; 1 Pet. 2:12) Nea yɛaka yi mma kwa. Mmoa biara a yehia no, Yesu de ma yɛn.
YESU APAW AKOA BI
9. Sɛnea Mateo 24:45-47 ka no, dɛn na Yesu kaa sɛ ebesi wɔ awiei bere no mu?
9 Kenkan Mateo 24:45-47. Yesu ka too hɔ sɛ, awiei bere no mu no, ɔbɛpaw “akoa nokwafo ne ɔbadwemma” bi a ɔbɛma yɛn honhom fam aduan. Enti yɛhwɛ kwan sɛ yɛn bere yi so no, yebehu sɛ akoa no reyɛ adwuma denneennen, na saa ara nso na ɛte. Onyankopɔn nkurɔfo ne wɔn a wɔn ani gye asɛmpa no ho no, yɛn hwɛfo no nam mmarima kakraa bi a wɔasra wɔn so rema wɔn honhom fam “aduan bere a ɛsɛ mu.” Saa mmarima yi mmu wɔn ho atumfoɔ wɔ afoforo gyidi so. (2 Kor. 1:24) Mmom, wogye tom sɛ Yesu Kristo na ɔyɛ ne nkurɔfo so “panyin ne ɔsahene.”—Yes. 55:4.
10. Nhoma a ɛwɔ mfoni no mu no, emu nea ɛwɔ he na ɛma wusii gyinae sɛ wobɛfa nkwa kwan no so?
10 Efi afe 1919 reba no, wɔn a wɔn ani gye asɛmpa no ho no, akoa nokwafo no ayɛ nhoma ahorow pii, na aboa wɔn ama wɔanya hokwan asua nokware no afi Onyankopɔn Asɛm mu. Afe 1921 no, akoa no yɛɛ nhoma bi a wɔtoo din, The Harp of God sɛ ɛmmoa wɔn a wɔn ani gye asɛmpa no ho mma wonsua Bible nkyerɛkyerɛ atitiriw no. Bere rekɔ so no, wɔyɛɛ nhoma afoforo kaa ho. Nhoma bɛn na ɛboaa wo ma wuhuu yɛn Agya a ɔwɔ soro no, na wodɔɔ no? Ɛyɛ “Ma Onyankopɔn Nyɛ Ɔnokwafo,” Nokware a Ɛde Kɔ Daa Nkwa Mu, Wubetumi Atra Ase Daa wɔ Paradise wɔ Asase So, Nimdeɛ a Ɛde Kɔ Daa Nkwa Mu, Dɛn na Bible Kyerɛkyerɛ Ankasa?, Dɛn na Yebetumi Asua Afi Bible Mu?, anaa nhoma foforo a aba nnansa yi a yɛato din, Wubetumi Anya Anigye Daa! no? Wɔyɛɛ nhoma yi mu biara sɛ yɛmfa mmoa nkurɔfo mma wɔmmɛyɛ asuafo, na bere a woyii emu biara adi no nso, na ɛfata.
11. Adɛn nti na ehia sɛ yɛn nyinaa sua Bible na yehu Yehowa yiye?
11 Ɛnyɛ wɔn a wɔn ani gye asɛmpa no ho nko ara na ehia sɛ wosua Bible na wohu Yehowa yiye. Ehia sɛ yɛn nyinaa yɛ saa. Ɔsomafo Paul kyerɛwee sɛ: “Aduan a ɛyɛ den yɛ wɔn a wɔanyin no dea.” Paul toaa so sɛ, sɛ yɛde nea yesua fi Bible mu no yɛ adwuma a, ɛbɛboa yɛn ama yɛahu “papa ne bɔne mu nsonsonoe.” (Heb. 5:14) Mmere a emu yɛ den yi mu a nnipa abrabɔ asɛe koraa no, ebetumi ayɛ den sɛ yɛde Yehowa akwankyerɛ bɛbɔ yɛn bra. Nanso, Yesu hwɛ sɛ yebenya nneɛma a yehia, na yɛasua ama yɛn gyidi ayɛ den. Nneɛma a yesua no nyinaa, efi Onyankopɔn Asɛm Bible a wɔnam ne honhom so kyerɛwee no mu. Yesu na ɛhwɛ ma akoa nokwafo no ma yɛn nsa ka ne nyinaa.
12. Sɛnea na Yesu bu Onyankopɔn din no, sɛn na yɛn nso yebu no?
12 Sɛnea Yesu yɛe no, yɛn nso nidi a ɛsɛ fata Onyankopɔn din no, yɛde ma no. (Yoh. 17:6, 26) Ɛho nhwɛso ne sɛ, afe 1931 no, yɛfaa edin Yehowa Adansefo a egyina Bible so no too yɛn so. Saa a yɛyɛe no kyerɛ sɛ, yɛpɛ sɛ nkurɔfo hu sɛ yɛn Agya a ɔwɔ soro no din ho hia yɛn paa. (Yes. 43:10-12) Efi October 1931 reba no, Ɔwɛn-Aban biara a ɛbɛba no, yehu edin no wɔ anim. Nea ɛka ho bio ne sɛ, Kyerɛw Kronkron—Wiase Foforo Nkyerɛase no de Onyankopɔn din no ahyɛ baabi a ɛfata sɛ ɛhyɛ biara wɔ n’Asɛm no mu. Nanso Bible nkyerɛase a Kristoman nsɔre ayɛ no de, ɛnte saa koraa, efisɛ wɔayi Yehowa din no afi bebree mu!
YESU RETOTO NNEƐMA AMA N’AKYIDIFO
13. Dɛn na ɛma wugye di sɛ Yesu de “akoa nokwafo ne ɔbadwemma” no reyɛ adwuma nnɛ? (Yohane 6:68)
13 Yesu nam “akoa nokwafo ne ɔbadwemma” no so anya ahyehyɛde soronko bi wɔ asaase so a ɛrepagyaw nokware som. Wote nka sɛn wɔ saa ahyehyɛde no ho? Ebia asɛm a ɔsomafo Petro ka kyerɛɛ Yesu no aba w’adwenem. Ɔkaa sɛ: “Hena nkyɛn na yɛnkɔ? Wo na wowɔ daa nkwa nsɛm.” (Yoh. 6:68) Wo de hwɛ, sɛ yɛanhu Yehowa ahyehyɛde no a, anka yɛwɔ he nnɛ? Kristo nam ahyehyɛde yi so hwɛ sɛ yebedidi yiye wɔ honhom fam. Afei nso, ɔtete yɛn ma yɛyɛ asɛnka adwuma no yiye. Ɔsan nso boa yɛn ma yɛhyɛ “suban foforo” no sɛnea ɛbɛyɛ a yɛbɛsɔ Yehowa ani.—Efe. 4:24.
14. COVID-19 nsanyare kodiawu no bae no, sɛn na Yehowa ahyehyɛde a woka ho no aboa wo?
14 Sɛ ɔhaw bi ba a, Yesu ma yɛn akwankyerɛ pa. COVID-19 nsanyare kodiawu no bae no, wɔmaa yɛn akwankyerɛ, na sɛnea aboa yɛn no ma yehu sɛ nea yɛreka yi yɛ nokware. Ná nnipa pii ani so atan wɔn a wonhu nea wɔnyɛ. Nanso, Yesu hwɛ maa yɛn nsa kaa akwankyerɛ a emu da hɔ a ɛbɛbɔ yɛn ho ban. Wɔhyɛɛ yɛn nkuran sɛ, sɛ yɛnam abɔnten a, yɛmfa ade nkata yɛn hwene na yɛnhwɛ sɛ yɛremmemmɛn nkurɔfo. Wɔkaee mpanyimfo no sɛ ɛyɛ a wɔntaa ne asafo no mufo nyinaa nni nkitaho, na ama wɔahu nea wohia ne nea ɛbɛboa wɔn ma wɔasom Yehowa yiye. (Yes. 32:1, 2) Afei nso, amanneɛbɔ a efi Akwankyerɛ Kuw no hɔ no ma yenyaa nkuranhyɛ ne akwankyerɛ foforo a ɛbɛboa yɛn.
15. COVID-19 nsanyare kodiawu no bae no, sɛnea yɛbɛyɛ adesua ne asɛnka adwuma no, ɛho akwankyerɛ bɛn na wɔde maa yɛn, na dɛn na afi mu aba?
15 COVID-19 nsanyare kodiawu no bae no, sɛnea yɛbɛyɛ adesua ne asɛnka adwuma no, wɔmaa yɛn ɛno nso ho akwankyerɛ a emu da hɔ. Amonom hɔ ara, yɛfaa Intanɛt so fii ase yɛɛ Kristofo nhyiam, amansin ne amantam nhyiam. Afei nso, ɛkame ayɛ sɛ asɛnka adwuma no nyinaa begyinaa nkrataakyerɛw ne tɛlefon so. Yɛde akwankyerɛ no yɛɛ adwuma no, Yehowa nso hyiraa yɛn. Betel ahorow pii abɔ amanneɛ sɛ adawurubɔfo a wɔwɔ no dodow akɔ anim. Nokwasɛm ne sɛ, COVID-19 bere yi mu no, anuanom pii anya osuahu a ɛhyɛ nkuran.—Hwɛ adaka a yɛato din, “ Yehowa Ahyira Asɛnka Adwuma No So” no.
16. Awerɛhyem bɛn na yebetumi anya?
16 Ebia ebinom tee nka sɛ, nsanyare kodiawu no bae no, ahwɛyiye a ahyehyɛde no yɛe no boro so. Nanso mpɛn pii no, ɛbɛdaa adi sɛ akwankyerɛ a wɔde maa yɛn no, na ɛyɛ akwankyerɛ papa paa. (Mat. 11:19) Sɛ yedwinnwen sɛnea Yesu ayi ne yam redi ne nkurɔfo anim no ho a, ɛma yenya awerɛhyem sɛ ɛmfa ho nea ɔkyena de bɛba biara no, Yehowa ne ne Dɔba no rennyaw yɛn da.—Kenkan Hebrifo 13:5, 6.
17. Sɛnea Yesu hwɛ yɛn so no, wote nka sɛn wɔ ho?
17 Ɛyɛ yɛn dɛ paa sɛ Yesu ne yɛn hwɛfo! Ahyehyɛde a yɛwom no, obi amammerɛ, ɔman a obi fi mu, ne kasa a obi ka mpaapae yɛn mu. Yedidi yiye wɔ honhom fam, na yenya ntetee a ɛbɛboa yɛn ama yɛayɛ asɛnka adwuma no. Yɛn mu biara nya nea ɛbɛboa no ma wahyɛ suban foforo no, na yɛresua sɛ yɛbɛdodɔ yɛn ho. Yɛwɔ biribiara a yebetumi agyina so ahoahoa yɛn ho efisɛ Yesu ne yɛn hwɛfo!
DWOM 16 Kamfo Yehowa, Ne Ba a Wasra no no Nti
a Mmarima, mmea, ne mmofra ɔpepem pii de nsi ne ahokeka reka asɛmpa no nnɛ. Woka wɔn ho anaa? Sɛ saa a, ɛnde na woreyɛ adwuma wɔ yɛn Awurade Yesu Kristo akwankyerɛ ase. Adesua yi mu no, yɛbɛhwɛ adanse a ɛkyerɛ sɛ, asɛnka adwuma a yɛreyɛ no nnɛ no, Yesu na ɔrehwɛ so. Sɛ yedwinnwen saa asɛm yi ho a, ɛbɛboa yɛn ama yɛasi yɛn bo sɛ yɛbɛkɔ so asom Yehowa wɔ Kristo akwankyerɛ ase.
