1. Wufii ase suaa Bible no, nokwasɛm bɛn na wuhui?

 WOKAE bere a wufii ase suaa Bible no? Ebia wuhui sɛ Onyankopɔn wɔ din no, ɛyɛɛ wo nwanwa. Bere a wuhui sɛ Onyankopɔn nyɛ nnipa ayayade wɔ Ɔbonsam gya mu no, ɛbɛyɛ sɛ wo koma tɔɔ wo yam. Afei nso, bere a wuhui sɛ wubetumi ahu w’adɔfo a wɔawuwu no bio, na wo ne wɔn atena paradise asaase so no, ɛbɛyɛ sɛ w’ani gyei paa.

2. Bible mu nokwasɛm a wusuae akyi no, nkɔso bɛn bio na wunyae? (Efesofo 5:1, 2)

² Wusuaa Bible no, ɔdɔ a wowɔ ma Yehowa no yɛɛ kɛse. Ɛno kanyan wo ma wode nea wusuae no yɛɛ adwuma. Bible nnyinasosɛm boaa wo ma wusisii gyinae pa. Wosesaa wo suban ne w’abrabɔ, efisɛ na wopɛ sɛ wosɔ Onyankopɔn ani. Sɛnea abofra suasua n’awofo a wɔdɔ no no, wo nso wusuasuaa yɛn soro Agya no.—Kenkan Efesofo 5:1, 2.

3. Nsɛm bɛn na yebetumi abisa yɛn ho?

³ Yebetumi abisa yɛn ho sɛ: ‘Ɔdɔ a na mewɔ ma Yehowa bere a mebɛyɛɛ Kristoni no, seesei ayɛ kɛse anaa? M’asubɔ akyi no, me suban ne me nneyɛe kyerɛ sɛ meresuasua Yehowa paa, ɛnkanka, sɛ ɛba ɔdɔ a meyi no adi akyerɛ anuanom a?’ Sɛ “ɔdɔ a na wowɔ kan no” ano adwo a, mma w’abam mmmu. Tete Kristofo no nso, biribi a ɛte saa too wɔn, nanso Yesu ampo wɔn, na yɛn nso, ɔrempo yɛn. (Adi. 2:4, 7) Onim sɛ yesuaa nokware no,  ɔdɔ a yenyae no, yebetumi asan ahyɛ mu den.

4. Dɛn na yebesusuw ho wɔ adesua yi mu?

⁴ Ɔdɔ a yɛwɔ ma Yehowa ne afoforo no, adesua yi bɛma yɛahu nea yɛbɛyɛ na akɔ so anyin. Ɛno akyi no, ɔdɔ a yɛwɔ no, sɛ yɛma ɛkɔ so nyin a, yɛbɛhwɛ nhyira a ɛbɛma yɛne afoforo anya.

5-6. (a) Ɔsomafo Paul reyɛ ne som adwuma no, ɔhaw bɛn na ohyiae? (b) Dɛn na ɛboaa no ma ɔkɔɔ so som Yehowa?

⁵ Ɔsomafo Paul ani gyei wɔ Yehowa som mu, nanso ohyiaa ɔhaw pii. Ná Paul taa twa kwantenten; saa bere no nso, na akwantu nna fam. Paul akwantu mu no, ɛtɔ da a, na ‘asiane to no wɔ nsubɔnten so ne akorɔmfo-werɛmfo mu.’ Ɛtɔ mmere bi nso a, na asɔretiafo boro no. (2 Kor. 11:23-27) Afei nso, nea Paul fii ne komam yɛ maa ne nuanom Kristofo no, ɛnyɛ bere nyinaa na wɔkyerɛɛ ho anisɔ.—2 Kor. 10:10; Filip. 4:15.

⁶ Dɛn na ɛboaa Paul ma ɔkɔɔ so som Yehowa? Sɛnea Yehowa te no, Paul suaa ɛho ade pii fii Kyerɛwnsɛm no mu. Afei nso, osuaa bi fii nea ɔno ankasa faa mu no mu. Wei maa Paul begye dii paa sɛ Yehowa Nyankopɔn dɔ no. (Rom. 8:38, 39; Efe. 2:4, 5) Ɛmaa ɔno nso bɛdɔɔ Yehowa paa. Paul ‘som akronkronfo na ɔkɔɔ so som wɔn’ de kyerɛe sɛ ɔdɔ Yehowa.—Heb. 6:10.

7. Dɛn ne ɔkwan baako a yɛbɛfa so ama ɔdɔ a yɛwɔ ma Yehowa no anyin?

⁷ Sɛ yɛyere yɛn ho sua Bible no a, ɔdɔ a yɛwɔ ma Onyankopɔn no betumi anyin. Asɛm biara a wobɛkan wɔ Bible mu no, bɔ mmɔden sɛ wubehu nea ɛma wusua fa Yehowa ho. Bisa wo ho sɛ: ‘Dɛn na ɛwɔ saa asɛm yi mu a ɛma mihu sɛ Yehowa dɔ me? Dɛn na ɛwɔ saa asɛm yi mu a ɛma mihu sɛ ɛsɛ sɛ medɔ Yehowa?’

8. Ɔdɔ a yɛwɔ ma Onyankopɔn no, sɛn na mpaebɔ betumi aboa ama anyin?

⁸ Ɔdɔ a yɛwɔ ma Yehowa no, ade foforo a yebetumi ayɛ ama anyin ne sɛ yebefi yɛn komam abɔ mpae daa. (Dw. 25:4, 5) Yɛyɛ saa a, Yehowa nso betie yɛn mpaebɔ. (1 Yoh. 3:21, 22) Onuawa bi a ɔwɔ Asia a ne din de Khanh ka sɛ: “Yehowa ho ade a misuae na ɛma medɔɔ no, nanso bere a mihuu sɛnea obuaa me mpaebɔ no, ɛmaa saa ɔdɔ no mu yɛɛ den. Wei nti, daa na mepɛ sɛ meyɛ nea ɛsɔ n’ani.” b

9. Dɛn na Timoteo yɛe a na ɛkyerɛ sɛ ɔdɔ a ɔwɔ ma afoforo no renyin?

⁹ Paul bɛyɛɛ Kristoni mfe kakra akyi no, ohyiaa aberante bi a ne din de Timoteo. Ná Timoteo dɔ Yehowa, na na ɔdɔ nnipa nso. Paul ka kyerɛɛ Filipifo no sɛ: “Minni obiara a ne suban te sɛ [Timoteo] a obeyi ne yam adi mo nsɛm ho dwuma saa.” (Filip. 2:20) Ɛha no, Paul anka sɛ Timoteo nim sɛnea wɔtoto nneɛma yiye, anaa onim ɔkasa ma paa, na mmom ɛda adi sɛ na n’ani gye sɛnea na Timoteo dɔ anuanom no ho. Wei nti, sɛ Timoteo rekɔsom nsafo no a, ɛbɛyɛ sɛ na wɔhwɛ no kwan paa.—1 Kor. 4:17.

10. Dɛn na Anna ne ne kunu yɛe a ɛkyerɛ sɛ na wɔdɔ anuanom?

¹⁰ Yɛn nso, yɛhwehwɛ akwan a yɛbɛfa so aboa anuanom. (Heb. 13:16) Momma yɛnhwɛ Anna a yɛkaa ne ho asɛm wɔ adesua a edi wei anim mu no. Bere a  ahum bi tui akyi no, ɔne ne kunu kɔsraa abusua bi a wɔyɛ Adansefo, na wɔhui sɛ ahum no ama wɔn dan no nkuruso abu agu mu. Ɛno nti na wɔn ntaade nyinaa mu asɛe. Anna ka sɛ: “Yɛsesaw wɔn ntaade no kɔhoroe, na yɛtow so bobɔw no kama san de kɔmaa wɔn. Yɛn de, yɛanhu no sɛ ɛyɛ ade kɛse biara na yɛyɛe, nanso ama yɛne wɔn afa nnamfo denneennen abesi nnɛ.” Ɔdɔ a Anna ne ne kunu wɔ ma anuanom no, ɛno na ɛkanyan wɔn ma wɔboaa wɔn.—1 Yoh. 3:17, 18.

11. (a) Sɛ yɛyɛ biribi de kyerɛ sɛ yɛdɔ afoforo a, ɛbɛma wɔate nka sɛn? (b) Sɛnea Mmebusɛm 19:17 kyerɛ no, sɛ yɛyɛ biribi de kyerɛ sɛ yɛdɔ afoforo a, Yehowa hu no sɛn?

¹¹ Sɛ yɛda ɔdɔ adi na yeyi yɛn yam boa afoforo a, mpɛn pii no, wɔhu sɛ yɛrebɔ mmɔden sɛ yebesuasua Yehowa. Afei nso, sɛnea wɔn ani bɛsɔ yɛn ayamye no, ebia ɛbɛyɛ den sɛ yebehu. Khanh a yɛadi kan aka ne ho asɛm no kae wɔn a wɔboaa no no paa. Ɔka sɛ: “Anuanom mmea a wɔne me kɔɔ asɛnka no nyinaa, m’ani sɔ nea wɔyɛe no paa. Ná wɔbɛfa me wɔ fie, wɔto nsa frɛ me ma yekodidi, yewie a na wɔakosi me wɔ fie. Seesei mahu sɛ, sɛɛ na adwuma wom paa, nanso wɔde anigye na ɛyɛe.” Ɛwom, ɛnyɛ obiara na yɛyɛ biribi ma no a ɔbɛkyerɛ ho anisɔ. Khanh ka wɔn a wɔboaa no no ho asɛm sɛ: “Ayamye bebrebe a wɔyii no adi kyerɛɛ me no, minyae a anka mɛhyɛ wɔn ananmu, nso minnim baabi a wɔn nyinaa te. Nanso, Yehowa nim, na mebɔ mpae sɛ, nea wɔayɛ ama me no, ɔnhyɛ wɔn ananmu.” Nokwasɛm na Khanh aka no. Ayamye biara a yɛbɛda no adi akyerɛ afoforo no, sɛ esua mpo a, Yehowa hu. Ohu no sɛ ɛyɛ afɔrebɔ a ɛsom bo, anaa biribi a yɛde abɔ no  bosea a obetua.—Kenkan Mmebusɛm 19:17.

12. Dɛn na anuanom mmarima betumi ayɛ de akyerɛ sɛ wɔdɔ asafo no mufo? (Hwɛ mfoni no nso.)

¹² Sɛ woyɛ onuabarima a, dɛn na wobɛyɛ de akyerɛ sɛ wodɔ afoforo na wopɛ sɛ woboa wɔn? Onua aberantewa bi a ne din de Jordan bisaa asafo mu panyin bi nea obetumi ayɛ de aboa asafo a ɔwom no. Ɔpanyin no kamfoo no wɔ nkɔso a wanya dedaw no ho, na ɔmaa no afotu a ɛbɛboa no ma watumi ayɛ pii. Ɔka kyerɛɛ Jordan sɛ, obetumi aba Ahenni Asa so ntɛm abekyiakyia afoforo, na wama mmuae wɔ adesua ase. Afei nso, obetumi ne n’asɛnka kuw mufo akɔ asɛnka daa, na wahwehwɛ akwan a ɔbɛfa so aboa afoforo. Bere a Jordan de saa afotu no yɛɛ adwuma no, osuaa sɛnea ɔbɛyɛ nneɛma pii. Ɛno da nkyɛn a, ɔdɔ a ɔwɔ ma ne nuanom nso yɛɛ kɛse. Jordan behui sɛ, sɛ onua bi bɛyɛ asafo mu somfo a, ɛnyɛ saa bere no na ofi ase boa afoforo, na mmom sɛ ɔbɛyɛ ɔsomfo a, na ɔretoa nea ɔyɛ de boa afoforo no so.—1 Tim. 3:8-10, 13.

13. Sɛn na ɔdɔ kanyan onua bi a ne din de Christian ma ɔsan fatae sɛ wɔpaw no asafo mu panyin?

¹³ Sɛ woasom sɛ asafo mu somfo anaa ɔpanyin pɛn nso ɛ? Yehowa kae nea woayɛ pɛn no, na ɔdɔ a ɛkanyan wo ma woyɛɛ saa no nso, ɔkae. (1 Kor. 15:58) Ɔdɔ a woda so ara da no adi no nso, ohu. Ná onua bi a ne din de Christian yɛ asafo mu panyin, nanso ne hokwan no fii ne nsa. Ɛbaa saa no, ɛhaw no paa. Nanso ɔka sɛ: “Sɛ mewɔ ɔsom hokwan oo, sɛ minni bi oo, mɛyɛ nea metumi biara de asom Yehowa.” Bere bi akyi no, wɔsan paw no sɛ asafo mu  panyin. Christian ka sɛ: “Ná anka mempɛ sɛ mɛsan ayɛ ɔpanyin bio. Nanso mekaa sɛ, sɛ Yehowa mmɔborɔhunu nti ɔpɛ sɛ mesan som sɛ ɔpanyin bio a, ɛnde mɛyɛ, efisɛ medɔ no, na medɔ anuanom nso.”

14. Asɛm bi a onuawa bi a ofi Georgia kae no, dɛn na wusua fi mu?

¹⁴ Bio nso, Yehowa asomfo da ɔdɔ adi kyerɛ wɔn a ɛte bɛn wɔn no. (Mat. 22:37-39) Yɛnhwɛ onuawa bi a ofi Georgia a ne din de Elena. Ɔka sɛ: “Mfiase no, Yehowa ho dɔ nko ara na na ɛkanyan me ma mekɔ asɛnka. Nanso bere a ɔdɔ a mewɔ ma yɛn soro Agya no yɛɛ kɛse no, ɔdɔ a mewɔ ma nnipa nso yɛɛ kɛse. Ná mebɔ mmɔden de m’adwene bu ɔhaw a wɔrehyia ne asɛm a meka a, ɛbɛka wɔn koma. Meredwen wɔn ho saa nyinaa, na ɔpɛ a mewɔ sɛ mɛboa wɔn no mu reyɛ den.”—Rom. 10:13-15.

15-16. Sɛnea mfoni no kyerɛ no, sɛ yɛkyerɛ sɛ yɛdɔ afoforo a, nhyira bɛn na yebetumi anya?

¹⁵ Sɛ yɛkyerɛ sɛ yɛdɔ anuanom a, ɛnyɛ wɔn nko ara na enya so mfaso. COVID-19 nsanyare no fii ase no, onua bi a ne din de Paolo ne ne yere yɛɛ biribi de boaa anuanom mmea bebree a wɔn ani afi. Wɔkyerɛɛ wɔn sɛnea wɔde ɛlɛtrɔnik mfiri bedi adanse. Onuawa bi a mfiase no na ɛyɛ den ma no no, ewiee ase no, ohuu mu, na otumi de too nsa  frɛɛ n’abusuafo ma wɔbaa Nkaedi no. Wɔn mu pɔrepɔre aduosia na ɛbaa bi wɔ video so! Nea Paolo ne ne yere yɛe no, onuawa no ne n’abusuafo no nyinaa nyaa so mfaso. Akyiri yi, ɔkyerɛw kɔmaa Paolo sɛ: “Yɛda wo ase sɛ yɛn a yɛn mfe akɔ anim yi, woakyerɛ yɛn sɛnea yɛde ɛlɛtrɔnik mfiri bedi dwuma. Sɛnea Yehowa dwen yɛn ho, ne mmɔden a wobɔe no, me werɛ remfi da.”

¹⁶ Osuahu ahorow a ɛte sei maa Paolo nyaa asuade titiriw bi. Wabehu sɛ, ɔdɔ a yɛbɛda no adi no, ɛho hia sen nimdeɛ anaa ɔdom akyɛde a yɛwɔ. Ɔka sɛ: “Bere bi, na meyɛ ɔmansin sohwɛfo. Nanso merekasa yi, ebetumi aba sɛ, ɔkasa ahorow a memae no, anuanom werɛ afi, nanso nneɛma pɔtee bi a meyɛe de boaa wɔn no de, wɔda so ara kae.”

17. Sɛ yɛkyerɛ sɛ yɛdɔ afoforo a, henanom bio na enya so mfaso?

¹⁷ Sɛ yɛkyerɛ sɛ yɛdɔ afoforo a, yɛn ara nso yebetumi anya nhyira a yɛnhwɛ kwan. Jonathan a ɔte New Zealand no di wei ho adanse. Memeneda bi a awia rebɔ denneennen no, ohuu ɔkwampaefo bi a ɔno nko ara redi adanse wɔ kwan ho. Jonathan yɛɛ n’adwene sɛ, efi saa da no rekɔ no, Memeneda awia biara ɔbɛkɔ akɔka ɔkwampaefo no ho. Saa bere no, amma n’adwene mu da sɛ boa a na ɔbɛkɔ akɔboa ɔkwampaefo no ma wɔayɛ asɛnka adwuma no, ɔno ara nso benya so mfaso. Jonathan ka sɛ: “Saa bere no, na m’ani nnye asɛnka ho koraa. Nanso bere a mihuu sɛnea ɔkwampaefo no kyerɛkyerɛ, ne sɛnea na n’asɛnka adwuma no rekɔ yiye no, epusuw me, na ɛmaa m’ani begyee asɛnka adwuma no ho. Onua no bɛyɛɛ m’adamfo, na ɔboaa me ma minyaa nkɔso, asɛnka adwuma no bɛyɛɛ me dɛ, na me ne Yehowa ayɔnkofa mu bɛyɛɛ den.”

18. Dɛn na Yehowa pɛ sɛ yɛyɛ?

¹⁸ Ɔdɔ a yɛwɔ ma Yehowa ne afoforo no, ɔpɛ sɛ ɛkɔ so nyin. Sɛnea yɛahu no, sɛ yɛkenkan Bible no na yedwinnwen ho, na yɛtaa bɔ Yehowa mpae a, ebetumi ama ɔdɔ a yɛwɔ ma no no akɔ so anyin. Sɛ yɛyɛ nneɛma pɔtee bi de boa yɛn nuanom a, ɛbɛma ɔdɔ a yɛwɔ ma wɔn no akɔ so anyin. Sɛ yɛma ɔdɔ a yɛwɔ no nyin a, ɛbɛma yɛabɛn Yehowa ne anuanom paa, na saa ayɔnkofa no bɛtena hɔ daa!