1-2. Ɔkwan bɛn so na Kristoni betumi ayɛ sɛ aborosan tenteenten bi? (1 Korintofo 15:58)

 ƐREKEKA kɔ afe 1980 no, wɔsii aborosan bi a ɛtoa so 60 wɔ Tokyo a ɛwɔ Japan. Esiane sɛ asaasewosow taa sisi wɔ saa kurow no mu nti, na ɛyɛ nkurɔfo sɛ anhwɛ a ɔdan no bedwiriw agu. Nanso, adɛn nti na annwiriw angu? Adan ho animdefo sii ɔdan no maa ahoɔden baa mu; bere koro no ara nso, wɔsii no wɔ ɔkwan bi so a, sɛ asaasewosow si a, etumi hinhim nanso emmu. Kristofo te sɛ saa aborosan tenteenten no. Ɔkwan bɛn so?

² Ɛsɛ sɛ Kristoni hu bere a ɛsɛ sɛ ɔde ne nan si fam ne bere a ɛsɛ sɛ ɔyɛ fakaa. Sɛ ɛba Onyankopɔn mmara ne ne nnyinasosɛm a, ɛsɛ sɛ ɔde ne nan si fam na ogyina pintinn de yɛ adwuma. (Kenkan 1 Korintofo 15:58.) Ɛsɛ sɛ ‘ɔyɛ asoɔmmerɛw,’ na ɛnsɛ sɛ obu Onyankopɔn mmara so. Afei nso, sɛ asɛm bi sɔre na ɛho behia sɛ ɔyɛ fakaa anaa ‘ɔte asɛm ase’ a, ɛsɛ sɛ ɔyɛ saa. (Yak. 3:17) Kristoni a onim bere a ɛsɛ sɛ ɔde ne nan si fam ne bere a ɛsɛ sɛ ɔyɛ fakaa no, ɔremma n’asɛm nyɛ denneennen na ɛnyɛ biribiara nso na ɔbɛma ho kwan. Adesua yi mu no, yɛbɛhwɛ sɛnea yebetumi agyina pintinn. Afei nso, yɛbɛhwɛ akwan nnum bi a Satan fa so didi yɛn ase, na yɛahwɛ sɛnea yebetumi ako atia no.

3. Mmarahyɛfo Pumpuni no, ne mmara bɛn na ɛwɔ Asomafo Nnwuma 15:28, 29?

³ Yehowa ne Mmarahyɛfo Pumpuni no. Ɛno nti, bere biara mmara a ɔde ma ne nkurɔfo no, emu da hɔ. (Yes. 33:22) Sɛ yɛbɛyɛ nhwɛso a, tete Kristofo no bere so no, akwankyerɛ kuw no kyerɛɛ nneɛma mmiɛnsa bi a ɛsɛ sɛ Kristofo hwɛ di so pɛpɛɛpɛ. Ɛne sɛ: (1) wɔbɛtwe wɔn ho afi abosonsom ho na wɔasom Yehowa nko ara, (2) wɔbɛtwe wɔn ho afi mogya ho, (3) wɔbɛtwe wɔn ho  afi aguamammɔ ho. (Kenkan Asomafo Nnwuma 15:28, 29.) Ɛnnɛ, sɛn na Kristofo betumi adi saa mmara mmiɛnsa yi so pɛpɛɛpɛ?

4. Dɛn na yɛyɛ a ɛkyerɛ sɛ yɛsom Yehowa nko ara? (Adiyisɛm 4:11)

⁴ Yɛtwe yɛn ho fi abosonsom ho, na yɛsom Yehowa nko ara. Ɔka kyerɛɛ Israelfo no sɛ mma wɔnnsom obiara nnka ne ho. (Deut. 5:6-10) Afei nso, bere a Ɔbonsam sɔɔ Yesu hwɛe no, Yesu kaa no pen sɛ Yehowa nko ara na ɛsɛ sɛ yɛsom no. (Mat. 4:8-10) Ɛno nti, yɛnsom abosom anaa ahoni. Bio nso, sɛ obi yɛ nyamesom kannifo oo, ɔyɛ ɔmanyɔfo oo, wagye din wɔ agokansi mu, sini anaa nnwonto mu oo, yɛnsom wɔn mu biara. Yegyina Yehowa afa pintinn, na yɛsom ɔno nkutoo, efisɛ ɔno na ‘ɔbɔɔ nneɛma nyinaa.’—Kenkan Adiyisɛm 4:11.

5. Yehowa mmara a ɛne sɛ yɛntwe yɛn ho mfi mogya ho no, adɛn nti na ɛsɛ sɛ yedi so?

⁵ Yehowa mmara a ɛne sɛ yɛntwe yɛn ho mfi mogya ho no, yedi so. Adɛn ntia? Efisɛ Yehowa ka sɛ mogya gyina hɔ ma nkwa, na nkwa yɛ akyɛde a efi ne hɔ. (Lev. 17:14) Bere a edi kan a Yehowa ka kyerɛɛ nnipa sɛ wɔbetumi awe nam no, ɔka kyerɛɛ wɔn sɛ, ɛnsɛ sɛ wɔdi mogya no. (Gen. 9:4) Bere a Yehowa de Mose Mmara no maa Israelfo no, ɔsan tii saa mmara no mu. (Lev. 17:10) Afei nso, akwankyerɛ kuw a na ɛwɔ asomafo no bere so no, Yehowa nam wɔn so ka kyerɛɛ Kristofo nyinaa sɛ, ‘wɔntwe wɔn ho mfi mogya ho.’ (Aso. 15:28, 29) Sɛ yɛresisi yɛn ayaresa ho gyinae a, yedi saa mmara yi so pɛpɛɛpɛ. b

6. Yehowa mmara a ɛne sɛ yɛntwe yɛn ho mfi aguamammɔ ho no, yɛbɛyɛ dɛn adi so?

⁶ Yehowa mmara a ɛne sɛ yɛntwe yɛn ho mfi aguamammɔ ho no, yedi so. (Heb. 13:4) Ɔsomafo Paul tu yɛn fo sɛ ‘yenkum’ yɛn nipadua akwaa, kyerɛ sɛ, yɛnyere yɛn ho nyɛ nea yebetumi biara nyi akɔnnɔ bɔne mfi yɛn mu. Biribiara a yɛbɛyɛ anaa yɛbɛhwɛ a ɛbɛtwetwe yɛn akɔ aguamammɔ mu no, ɛsɛ sɛ yɛkwati. (Kol. 3:5; Hiob 31:1) Sɛ biribi retwetwe yɛn sɛ yɛnkɔyɛ bɔne anaa ɔbrafi bi ho adwene ba yɛn tirim a, ɛnsɛ sɛ yɛtenatena ho koraa; ntɛm pa ara, ɛsɛ sɛ yɛtwe yɛn ho fi ho anaa yeyi saa adwene no fi yɛn tirim.

7. Dɛn na ɛsɛ sɛ yesi yɛn bo sɛ yɛbɛyɛ, na adɛn ntia?

⁷ Yehowa pɛ sɛ ‘yefi koma mu yɛ osetie.’ (Rom. 6:17) Akwankyerɛ biara a ɔde ma yɛn no, ɛboa yɛn, na yɛrentumi nsesa ne mmara. (Yes. 48:17, 18; 1 Kor. 6:9, 10) Yɛyere yɛn ho sɛ yɛbɛyɛ nea ɛsɔ Yehowa ani, na yesuasua odwontofo no. Ɔkaa sɛ: “Masi me bo sɛ medi w’ahyɛde so da biara akosi awiei.” (Dw. 119:112) Nanso Satan bɛbɔ mmɔden sɛ obedidi yɛn ase ma ayɛ den sɛ yebetie Yehowa. Akwan bɛn na ɔfa so yɛ saa?

8. Sɛn na Satan fa ɔsɔretia so didi yɛn ase sɛnea ɛbɛyɛ a yebegyae Yehowa som?

⁸ Ɔsɔretia. Ɔbonsam tumi ma nkurɔfo yɛ yɛn basabasa anaa wɔhyɛ yɛn so sɛnea ɛbɛyɛ a obedidi yɛn ase ma yɛagyae Yehowa som. Ɔpɛ sɛ ‘ɔkyere yɛn we,’ anaa ɔma yɛne Yehowa ntam sɛe. (1 Pet. 5:8) Kristofo a na ɛwɔ asomafo no bere so no, esiane sɛ na wɔasi wɔn bo sɛ wɔbegyina pintinn nti, wɔhunahunaa wɔn mu binom, wɔhwee ebinom na  wɔkunkum ebinom nso. (Aso. 5:27, 28, 40; 7:54-60) Ɛnnɛ, Satan da so ara sɔre tia Yehowa asomfo. Wei ho nhwɛso na ɛrekɔ so wɔ Russia ne aman foforo so no. Atamfo redi yɛn nuanom ani wɔ hɔ paa. Ɛno da nkyɛn a, atamfo reteetee anuanom.

9. Nyansakwan a Satan fa so de nhyɛso ba yɛn so no, ma ho nhwɛso fa kyerɛ nea enti a ɛsɛ sɛ yɛhwɛ yiye wɔ ho.

⁹ Nhyɛso a ɛnam nyansakwan so. Ɔsɔretia a Satan de ba yɛn so akyi no, ɔsan fa “nnɛɛdɛe” so. (Efe. 6:11) Yɛmfa onua bi a ne din de Bob asɛm no nyɛ nhwɛso. Wɔgyee no too ayaresabea a na wɔrebɛyɛ no oprehyen kɛse bi. Ɔka kyerɛɛ adɔktafo no sɛ, mogya a ɛde mogya paa de, ɔrennye bi da. Dɔktani a na ɔbɛyɛ oprehyen no penee so. Nanso anadwo a ade rebɛkyɛ ama wɔayɛ Bob oprehyen no, bere a n’abusuafo kɔɔ fie no, adɔktafo a na wɔbɛyɛ Bob oprehyen no mu baako baa ne nkyɛn. Ɔka kyerɛɛ Bob sɛ onnye nni sɛ wɔbɛma no mogya, nanso ɔde mogya no bi resi hɔ na sɛ ɛho behia a wɔde ama no. Ebia dɔkta no nyaa adwene sɛ, Bob abusuafo nni hɔ nti ebia ɔbɛsesa n’adwene. Nanso Bob gyinaa pintinn na ɔkaa sɛ, sɛ tebea no te sɛn oo, sɛ ɛte sɛn oo, mma wɔmmma no mogya.

10. Adɛn nti na wiase nyansa yɛ hu? (1 Korintofo 3:19, 20)

¹⁰ Wiase nyansa. Adwene a nkurɔfo wɔ wɔ Yehowa mmara ho no, sɛ yenya bi a, anhwɛ a yebebu yɛn ani agu Yehowa mmara so. (Kenkan 1 Korintofo 3:19, 20.) Mpɛn pii no, “wiase nyansa” piapia nkurɔfo ma wɔdi wɔn akɔnnɔ akyi. Kristofo a na ɛwɔ Pergamo ne Tiatira no, wɔn mu bi maa abosonsom ne aguamammɔ a na ɛkɔ so wɔ kurow no mu no nyaa wɔn so nkɛntɛnso. Yesu de afotu a emu yɛ den kɔmaa saa nsafo no, efisɛ na wɔsosɔ aguamammɔ so. (Adi. 2:14, 20) Ɛnnɛ, nkurɔfo de wiase nyansa puapua yɛn. Yɛn abusuafo ne amannifo betumi akeka nsɛm bi ama yɛate nka sɛ yɛn mmara no yɛ kyenkyenenn dodo, na wɔahyɛ yɛn sɛ yɛngow mu. Ebia wɔbɛka sɛ, sɛ yedi yɛn akɔnnɔ akyi a ɛnyɛ bɔne, efisɛ Bible mu nsɛm koraa atwam.

11. Dɛn na ɛsɛ sɛ yɛkwati de kyerɛ sɛ yegyina pintinn?

¹¹ Ɛtɔ mmere bi a, akwankyerɛ a Yehowa de ma yɛn no, ebia yɛbɛte nka sɛ emu nhyɛ da nna hɔ papa. Sɛ yɛanhwɛ yiye a, yebetumi mpo ‘ayɛ ade atra nea wɔakyerɛw no.’ (1 Kor. 4:6) Nyamesom akannifo a na ɛwɔ Yesu bere so no yɛɛ bɔne a ɛte saa. Wɔn ankasa hyehyɛɛ mmara no bi kaa Mose Mmara no ho, na ɛbɛyɛɛ adesoa maa ɔmanfo no. (Mat. 23:4) Yehowa nam n’Asɛm ne n’ahyehyɛde no so ma yɛn akwankyerɛ a emu da hɔ. Akwankyerɛ a ɔde ma yɛn no, yenni hokwan sɛ yɛde bi ka ho. (Mmeb. 3:5-7) Enti, yɛnyɛ ade ntra nea wɔakyerɛw wɔ Bible mu. Afei nso, nneɛma a obiara wɔ hokwan sɛ osi nea ɔpɛ ho gyinae no, yɛnhyehyɛ ho mmara mma anuanom.

12. Sɛn na Satan de “nnaadaa hunu” di dwuma?

¹² Nnaadaa. Satan de “nnaadaa hunu” ne “wiase no nneɛma hunu” daadaa nkurɔfo, na ɔde paapae wɔn mu. (Kol. 2:8) Tete Kristofo no bere so no, na saa nneɛma hunu no bi ne nyansapɛ a egyina nnipa amammerɛ so, Yudafo nkyerɛkyerɛ a na emfi Kyerɛwnsɛm no mu, ne nkyerɛkyerɛ a ɛne sɛ, ɛsɛ sɛ Kristofo di Mose Mmara no so no. Ná wei yɛ nnaadaa, efisɛ eyii nkurɔfo adwene fii Yehowa a ɔno ne nyansa nyinaa Wura no so. Ɛnnɛ, nsɛm  a enni nnyinaso ne atosɛm a amanyɔfo keka no, Satan nam nsɛm ho amanneɛbɔfo ne sohyia midia so trɛw mu. Yehuu wei ho nhwɛso bebree bere a COVID-19 nsanyare no bae no. c Yehowa Adansefo a etiee akwankyerɛ a yɛn ahyehyɛde no de mae no, wɔanhaahae te sɛ wɔn a etiee nnaadaasɛm no.—Mat. 24:45.

13. Adɛn nti na ɛsɛ sɛ yɛhwɛ yiye na nneɛma antwetwe yɛn?

¹³ Nneɛma a ebetumi atwetwe yɛn. Ɛnsɛ sɛ yɛn werɛ fi “nneɛma a ehia paa no.” (Filip. 1:9, 10) Sɛ yɛma nneɛma twetwe yɛn a, ɛbɛma yɛasɛe bere pii, na ebeyi yɛn adwene afi nneɛma a ɛho hia paa no so. Nneɛma a yɛyɛ no daa te sɛ adidi, ɔnom, agodi, ne adwuma mpo, sɛ yɛanhwɛ yiye a, ebetumi atwetwe yɛn na abɛyɛ ade titiriw wɔ yɛn asetena mu. (Luka 21:34, 35) Ɛno da nkyɛn a, daa wobɛte na nkurɔfo atew wɔn ho agu mmɔnten so reyɛ ɔyɛkyerɛ. Afei nso, wobɛte no, yɛse amanyɔkuw wei na ɛyɛ, wei nyɛ, wei na ɛyɛ, wei nyɛ. Ɛsɛ sɛ yɛhwɛ yiye na saa nsɛmnsɛm no antwetwe yɛn. Anyɛ saa a, wobɛhwɛ na yɛn koma reyɛ akodi ɔfa bi akyi. Satan fa akwan a yɛaka ho asɛm yi nyinaa so bɔ mmɔden sɛ obedidi yɛn ase ma yɛayɛ nea ɛnsɔ Yehowa ani. Momma yɛnhwɛ sɛnea yebetumi ako atia no, na yɛagyina pintinn.

14. Dɛn ne ade baako a ebetumi aboa yɛn ma yɛakɔ so abata Yehowa ho denneennen?

¹⁴ Nea enti a wuhyiraa wo ho so na wɔbɔɔ asu no, dwinnwen ho. Wutuu saa anammɔn no, efisɛ na wopɛ sɛ wobata Yehowa ho. Bu kɔmpɔ hwɛ w’akyi, na hwɛ nea ɛboaa wo ma wugye dii sɛ woahu nokware no. Wusuaa Yehowa, wo soro Agya no ho nokwasɛm, na ɛmaa ɔdɔ ne obu a wowɔ ma no no yɛɛ kɛse. Wunyaa gyidi, na ɛkanyan wo ma wosakrae. Wugyaee nneyɛe a Onyankopɔn kyi, na wufii ase yɛɛ n’apɛde. Bere a wubehui sɛ Onyankopɔn de wo bɔne akyɛ wo no, ɛmaa wo  koma tɔɔ wo yam. (Dw. 32:1, 2) Wokɔɔ Kristofo nhyiam, na nneɛma pa a wusuae no, wufii ase kaa bi kyerɛɛ afoforo. Seesei a woahyira wo ho so abɔ asu abɛyɛ Kristoni yi, wonam nkwa kwan no so, na woasi wo bo sɛ woremfi so da.—Mat. 7:13, 14.

15. Adɛn nti na ehia sɛ yɛkenkan Bible na yedwinnwen ho?

¹⁵ Sua Onyankopɔn Asɛm na dwinnwen ho. Sɛ dua bi ntini awurawura asaase mu kɔ akyiri a, ɛyɛ den sɛ ebetutu. Yɛn nso, sɛ yɛwɔ gyidi a emu yɛ den wɔ Onyankopɔn Asɛm no mu a, ebetumi ama yɛakɔ so agyina pintinn. Sɛ dua bi si hɔ a, ɛrenyin nyinaa na ne ntini no retrɛtrɛw, na na ɛrewurawura asaase no mu kɔ akyiri. Sɛ yesua ade na yedwinnwen ho a, ɛhyɛ yɛn gyidi den, na ɛma yehu paa sɛ Onyankopɔn akwan na eye paa. (Kol. 2:6, 7) Tete no, sɛnea Yehowa kyerɛkyerɛɛ n’asomfo, ɔmaa wɔn akwankyerɛ na ɔbɔɔ wɔn ho ban no, dwinnwen ho. Yɛbɛyɛ nhwɛso a, asɔrefie a Hesekiel hui wɔ anisoadehu mu no, bere a ɔbɔfo bi too ne bo ase sɛ ɔresusuw no, Hesekiel hwɛɛ no yiye. Anisoadehu yi hyɛɛ Hesekiel den, na ɛma yesua nneɛma pɔtee bi a ebetumi aboa yɛn ma yɛahu sɛnea yɛbɛsom Yehowa ma asɔ n’ani. d (Hes. 40:1-4; 43:10-12) Yɛn nso, nneɛma a emu dɔ a ɛwɔ Onyankopɔn Asɛm no mu no, sɛ yɛto yɛn bo ase sua na yedwinnwen ho a, ɛbɛboa yɛn.

16. Sɛn na koma a enhinhim boaa Bob? (Dwom 112:7)

¹⁶ Mma wo koma nnhinhim. Ɔhene Dawid kaa sɛ ɔbɛdɔ Yehowa akosi daa. Ɔka kyerɛɛ Onyankopɔn sɛ ɔremma ‘ne koma nhinhim.’ (Dw. 57:7) Yɛn nso, sɛ yɛamma yɛn koma anhinhim a, yebetumi de yɛn ho ato Yehowa so bere nyinaa. (Kenkan Dwom 112:7.) Momma yɛnhwɛ sɛnea wei boaa Bob a yɛadi kan aka ne ho asɛm no. Bere a wɔka kyerɛɛ no sɛ, wɔde mogya no bi besi hɔ, na sɛ ɛho behia a wɔde ama no no, ɛhɔ ara na ɔkaa sɛ, sɛ ohu sɛ wɔpɛ sɛ wɔma no mogya a, ntɛm  pa ara, obefi ayaresabea hɔ. Akyiri yi Bob kaa sɛ, “Ná masi m’adwene pi, na na minsuro nea na ebetumi asi biara.”

17. Dɛn na yebetumi asua afi Bob suahu no mu? (Hwɛ mfoni no nso.)

¹⁷ Bob tumi gyinaa pintinn, efisɛ na wasi n’adwene pi dedaadaw ansa na ɔrekɔ ayaresabea hɔ. Nea edi kan, na ɔpɛ sɛ ɔma Yehowa ani gye. Nea ɛtɔ so mmienu, nea Bible ne asafo nhoma ka fa mogya ho no, ɔtoo ne bo ase suae. Nea ɛtɔ so mmiɛnsa, na ogye di paa sɛ, sɛ odi Yehowa akwankyerɛ so a, obehyira no. Ɛmfa ho sɔhwɛ biara a yebehyia no, yɛn nso yebetumi agyina pintinn.

18. Sɛn na Barak nhwɛso no kyerɛ yɛn sɛnea yɛde yɛn ho bɛto Yehowa so? (Hwɛ mfoni a ɛwɔ Ɔwɛn-Aban yi anim no.)

¹⁸ Fa wo ho to Yehowa so. Momma yɛnhwɛ sɛnea Yehowa akwankyerɛ a Barak tiei nti, odii nkonim. Ɛwom, na Israelfo no mu biara nni ɔkyɛm anaa peaw, nanso Yehowa ka kyerɛɛ Barak sɛ ɔne Kaananfo sahene Sisera ne n’asraafo a wɔwɔ akode pii no nkɔko. Odiyifobea Debora ka kyerɛɛ Barak sɛ onkohyia Sisera ne ne ko nteaseɛnam 900 no wɔ asaasetraa so. Ɛwom sɛ na nteaseɛnam no bɛboa atamfo no paa wɔ asaasetraa so, nanso Barak tiee Yehowa. Bere a Barak ne n’asraafo resian Tabor Bepɔw no, Yehowa maa nsu tɔe denneennen. Sisera nteaseɛnam no kotintim atɛkyɛ mu, na Yehowa maa Barak dii nkonim. (Atem. 4:1-7, 10, 13-16) Yɛn nso, sɛ yɛde yɛn ho to Yehowa so na yetie akwankyerɛ a ɔnam n’ahyehyɛde no so de ma yɛn no a, ɔbɛma asi yɛn yiye.—Deut. 31:6.

19. Adɛn nti na wopɛ sɛ wokɔ so gyina pintinn?

¹⁹ Yɛda so te Satan wiase yi mu de, ebehia sɛ yɛkɔ so yere yɛn ho gyina pintinn. (1 Tim. 6:11, 12; 2 Pet. 3:17) Momma yensi yɛn bo sɛ yɛremma ɔsɔretia, nhyɛso a ɛnam nyansakwan so, wiase nyansa, nnaadaa ne nneɛma a ebetumi atwetwe yɛn mma yennhinhim. (Efe. 4:14) Mmom, momma yennyina pintinn, yɛmmata Yehowa ho denneennen, na yɛmfa yɛn nan nsi fam nni n’ahyɛde so. Bere koro no ara nso, ɛsɛ sɛ yɛyɛ fakaa. Yehowa ne Yesu yɛ fakaa paa. Adesua a edi hɔ no, yebesua wei ho ade akɔ akyiri.