Asɔre bi a na ɛwɔ hɔ a wɔfrɛ no United Church of Canada no, na me papa yɛ ɔpanyin wom. Enti nnawɔtwe biara na ɔma me ne me nuabea kɔ Sunday sukuu. Yɛpɔn a na yɛne no kɔ asɔre a wɔyɛ no anɔpa 11 no. Edu awia nso a, na yɛne yɛn maame kɔ Ahenni Asa so. Ná ɛnyɛ den koraa sɛ yebehu nsonsonoe a ɛda nsɔre mmienu no ntam.

Me maame kaa nea na ɔresua no bi kyerɛɛ Bob ne Marion Hutcheson a na ɔne wɔn abɔ akyɛ no, na wɔn nso begyee nokware no. Afe 1958 no, wɔde nnafua nwɔtwe yɛɛ Onyankopɔn Apɛde Amanaman Ntam Nhyiam wɔ New York City. Saa nhyiam no, Onua ne Onuawa Hutcheson faa me kaa wɔn mma mmarima mmiɛnsa ho ma yɛkɔɔ bi. Seesei mibu kɔmpɔ hwɛ m’akyi a, mihu sɛ na ɛnyɛ mmerɛw mma wɔn sɛ wɔde me bɛka wɔn ho akɔ, nanso nhyiam a mekae paa no, wei ka ho.

Meyɛ aberantewa no, baabi a na yɛte no, na yɛyɛn mmoa, na na m’ani gye saa adwuma no ho. Ná mepɛ paa sɛ mebɛyɛ mmoa dɔkta. Me maame kaa wei ho asɛm kyerɛɛ asafo mu panyin bi. Ɔpanyin no ka kyerɛɛ me sɛ, menkae sɛ yɛte “awiei mmere no” mu, enti sɛ mikodi mfe pii wɔ suapɔn hɔ a, sɛnea ɛbɛka me ne Yehowa ayɔnkofa no, minsusuw ho. (2 Tim. 3:1) Nea ɔkae no nti, misii gyinae sɛ merenkɔ suapɔn no.

 Ne nyinaa mu no, na meda so ara redwen ho sɛ, miwie ntoaso sukuu koraa a, dɛn na mɛyɛ? Ɛwom sɛ nnawɔtwe awiei biara na mekɔ asɛnka, nanso na ɛnyɛ me dɛ, na na ɛnyɛ me sɛ metumi ayɛ ɔkwampaefo. Merekasa yi, na me papa ne me papa kumaa rehyɛ me nkuran sɛ memfa me bere nyinaa nkɔyɛ adwuma wɔ nsiakyibaa kɔmpene kɛse bi a ɛwɔ Toronto mu. Ná me papa kumaa no ka mpanyimfo a ɛwɔ adwumam hɔ no ho, enti migye toom kɔyɛe.

Mewɔ Toronto no, esiane sɛ na metaa ka mu yɛ adwuma na me ne wɔn a ɛnsom Yehowa bɔe nti, na ɛmma menkeka me ho wɔ Yehowa som mu. Mfiase no, na me ne me nanabarima a na ɔnyɛ Yehowa Danseni na ɛte, nanso owui no, na ɛsɛ sɛ mekɔpɛ baabi foforo tena.

Onua ne Onuawa Hutcheson a wɔde me kɔɔ 1958 nhyiam no bi no, wɔfaa me sɛ wɔn ba. Wɔma mebɛtenaa wɔn fie, na wɔboaa me ma minyaa nkɔso wɔ Yehowa som mu. Afe 1960 no, me ne wɔn ba John bɔɔ asu. John fii akwampae adwuma ase, na epusuw me ma meyeree me ho wɔ asɛnka adwuma no mu. Anuanom mmarima a ɛwɔ asafo no mu no huu me nkɔso, na eduu baabi no, wɔpaw me sɛ Teokrase Ɔsom Sukuu somfo. a

Afe 1966 no, mewaree ɔkwampaefo mmɔdenbɔfo bi a ne din de Randi Berge. Ná ne koma so ade paa ne sɛ ɔbɛkɔ akɔsom wɔ baabi a mmoa ho hia. Yɛn mansin sohwɛfo faa yɛn adamfo, na ɔhyɛɛ yɛn nkuran sɛ yɛnkɔboa asafo bi a ɛwɔ Orillia, Ontario. Enti yɛboaboaa yɛn ho tu kɔe.

Yekoduu Orillia ara pɛ na me nso mebɛyɛɛ ɔkwampaefo. Esiane sɛ na Randi yɛ ɔkwampaefo dedaw nti, na n’ahokeka no bi awura me mu. Bere a mede me koma hyɛɛ akwampae adwuma no mu no, m’ani gyei paa, efisɛ na mitumi de Bible no kyerɛkyerɛ nkurɔfo ma wɔte ase. Bere a yɛboaa awarefo bi a wɔwɔ Orillia ma wɔyɛɛ nsakrae bɛsom Yehowa no, yɛn ani gyei paa.

Bere bi a yɛkɔɔ Toronto no, mihyiaa Arnold MacNamara. Ná ɔka anuanom a edi nneɛma anim wɔ Betel no ho. Obisaa yɛn sɛ yɛn ani begye ho sɛ yɛbɛkɔ akɔyɛ akwampaefo titiriw anaa. Mamma mframa amfa so koraa na mekaa sɛ: “Yɛbɛkɔ dodo! Baabiara yɛbɛkɔ, nanso Quebec de, ɛbɛyɛ den.” Ná wɔn a wɔka Borɔfo kasa wɔ Canada no nni wɔn a wɔka French kasa a wɔte Quebec no ho adwempa, na na me nso manya saa adwene no bi. Saa bere no, na ekuw bi a ɛwɔ Quebec reyɛ ɔyɛkyerɛ tia aban no sɛ, wɔpɛ sɛ wɔtew wɔn ho fi Canada ho.

Arnold kaa sɛ, “Seesei nso de, Quebec nko ara na Betel de akwampaefo atitiriw kɔ.” Ɛhɔ ara na mekaa sɛ mɛkɔ. Ná minim sɛ Randi ani gye ho sɛ ɔbɛkɔ akɔsom wɔ hɔ. Akyiri yi, mibehui sɛ gyinae papa paa na yesii no!

Yɛkɔe no, yesuaa French kasa no nnawɔtwe nnum. Ɛno akyi no, me ne Randi ne awarefo bi kɔɔ Rimouski; efi Montreal kɔ hɔ yɛ kilomita 540 anaa akwansin 336. Bere a mekenkan nkaebɔ wɔ adesua bi a yɛkɔe ase no, ɛbɛdaa adi paa sɛ na yɛn ano ntɔɔ kasa no so. Bere a merema nhyiam bi a na yɛrebɛyɛ ho nkaebɔ no, sɛ́ anka mɛka sɛ “Austriafo” bebree bɛba no, mekaa sɛ “nsohori” bebree mmom na ɛbɛba.

Yɛne awarefo no kɔɔ Rimouski no, anuanom mmea asigyafo mmɔdenbɔfo nnan bɛkaa yɛn ho, na Onua ne Onuawa Huberdeau ne wɔn mma mmea mmienu nso bɛkaa yɛn ho. Onua ne Onuawa Huberdeau kɔhae dan bi a dankora nson na ɛwom, na yɛn nyinaa kyɛ tuae. Yɛtoo dan no din “White House” efisɛ na dan no anim ne n’adum nyinaa yɛ fitaa. Yɛn a na yɛte hɔ no, na yɛn dodow taa yɛ 12 anaa 14. Esiane sɛ na me ne Randi yɛ akwampaefo atitiriw nti, anɔpa oo, awia oo, anwummere oo, na yɛnam asɛnka mu. Enti na ɛyɛ yɛn dɛ paa sɛ bere biara yenya obi ne no kɔ; anwummere a awɔw wom paa mpo, na yenya obi ne no kɔ.

Yɛne saa akwampaefo no bɔe ara ma eduu baabi no, na yɛayɛ sɛ abusua. Ɛtɔ da a, na yɛde anyina sɔ gya bom tena ho anaa yɛbom noa aduan. Ná onua baako yɛ ade wɔ nnwom ho paa, enti edu Memeneda anwummere a, na yɛtaa to nnwom di asaw.

Ná Rimouskifo bebree ani gye Bible mu asɛm a na yɛka no ho. Mfe nnum ntam no, Bible asuafo pii nyaa nkɔso bɔɔ asu, na yenyaa adawurubɔfo bɛyɛ 35. Wei maa yɛn ani gyei paa.

Yɛwɔ Quebec no, nea yɛfaa mu no tetee yɛn paa. Yehuu sɛnea Yehowa boaa yɛn wɔ asɛnka adwuma no mu, ne sɛnea ɔboaa yɛn maa yɛn nsa kaa nea yehia. Afei nso, yɛn ani begyee Frenchfo no ho. Wɔn kasa ne wɔn amammerɛ nso, yɛn ani begyee ho. Ɛno maa yɛn ani begyee afoforo nso amammerɛ ho.—2 Kor. 6:13.

Mpofirim ara na Betel ka kyerɛɛ yɛn sɛ yɛnkɔ Tracadie a ɛbɛn New Brunswick mpoano. Ná ɛyɛ den ma me, efisɛ na yɛakɔka dan bi a yɛpɛ sɛ yɛhae ho asɛm de me nsa ahyɛ ɛho nkrataa ase. Ɛno da nkyɛn a, na mede me bere kakra kyerɛ ade wɔ sukuu bi mu. Bio nso, afei ara na na yɛn Bible asuafo no bi abɛyɛ adawurubɔfo, na na yegu so resi Ahenni Asa nso.

Saa nnawɔtwe no awiei no, Tracadie a yɛbɛkɔ no, ɛno ara ho mpae na yɛbɔe, na yɛkɔhwɛɛ hɔ. Ná ɛhɔ nte sɛ Rimouski koraa. Nanso yɛkaa sɛ, esiane sɛ Yehowa pɛ sɛ yɛkɔ nti, yɛbɛkɔ. Yɛsɔɔ Yehowa hwɛe, na yehui sɛ oyii akwanside biara fii hɔ maa yɛn. (Mal. 3:10) Esiane sɛ na Randi dɔ Yehowa paa, ɔwɔ ahofama, na otumi  de nsɛm bi yɛ serew nti, ɛmaa tu a na yɛretu akɔ no anyɛ den pii.

Asafo foforo a yɛkɔɔ mu no, Robert Ross nko ara na na ɔyɛ ɔpanyin wɔ hɔ. Ɔne ne yere Linda yɛɛ akwampae adwuma no wɔ hɔ ara kosii sɛ wɔwoo wɔn abakan, na wɔyɛɛ wɔn adwene sɛ wɔbɛtena hɔ. Ɛwom sɛ na wɔrehwɛ wɔn ba abarimaa, nanso sɛnea wɔne yɛn tenaa fɛfɛɛfɛ, na wɔde nsi ne ahokeka yɛɛ asɛnka adwuma no, ɛhyɛɛ me ne Randi nkuran paa.

Bere a yɛyɛɛ akwampae adwuma no wɔ Tracadie mfe mmienu no, biribi a yɛnhwɛ kwan san sii; wɔtoo nsa frɛɛ yɛn sɛ yɛnkɔyɛ ɔmansin adwuma. Yɛde mfe nson som amansin a wɔka Borɔfo kasa, na ɛno akyi no, wɔde yɛn kɔɔ ɔmansin a wɔka French kasa mu wɔ Quebec. Yɛn mantam sohwɛfo a na ɔwɔ Quebec a ne din de Léonce Crépeault no, mema ɔkasa wie a na ɔkamfo me. Nanso ɛno akyi no, na ɔtaa bisa me sɛ, “Wohwɛ a, woyɛɛ no sɛn a na anka anuanom benya wo kasa no so mfaso paa?” b Sɛnea onyaa bere maa me no, ɛboaa me ma mehwɛɛ sɛnea mɛma me nkyerɛkyerɛ mu ada hɔ na obiara ate ase.

Afe 1978 no, wɔyɛɛ “Gyidi Nkonimdi” Amanaman Ntam Nhyiam wɔ Montreal. Dwumadi a minyae wɔ saa nhyiam no ase no, me werɛ remfi da. Mekɔyɛɛ adwuma wɔ dwumadibea a na ɛhwɛ aduannoa so. Ná yɛrehwɛ nnipa 80,000 kwan. Afei nso, ɔkwan a yɛbɛfa so ama wɔn aduan no, na wɔasesa mu. Nkyɛnsee ne mfiri a yɛde bɛyɛ aduan, aduan ko a yɛbɛyɛ ne ɔkwan a yɛbɛfa so anoa aduan no; ná biribiara yɛ foforo. Ná yɛwɔ frigye akɛse bɛyɛ 20, nanso ɛtɔ da a na ɛnyɛ adwuma. Ade rebɛkye ama yɛafi nhyiam no ase no, yɛantumi ankɔ agoprama no so ankɔhyehyɛ yɛn nneɛma kosii anadwo dasum, efisɛ na agokansi bi rekɔ so wɔ hɔ. Afei nso, na ɛsɛ sɛ yɛsosɔ gya a yɛde bɛyɛ anɔpa aduan ansa na ade akye. Ná yɛabrɛ, nanso misuaa nneɛma pii fii anuanom a me ne wɔn yɛɛ adwuma no hɔ. Ná wɔmfa wɔn adwuma nni agorɔ, na wɔn ho akokwaw, na na wɔn ho yɛ anika. Me ne wɔn faa nnamfo denneennen, na ebesi nnɛ nyinaa, yɛda so ara yɛ nnamfo. Nhyiam titiriw a yɛyɛe wɔ Quebec yi maa m’ani gyei paa. Quebec ha pɛɛ na wɔtan anuanom ani denneennen fi afe 1940 mu hɔ kosi bɛyɛ afe 1960.

 Nhyiam akɛse a na yɛyɛ wɔ Montreal no, misuaa nneɛma pii fii me mfɛfo ahwɛfo no hɔ. Afe bi, David Splane a seesei ɔyɛ Akwankyerɛ Kuw no muni no, ɔno na ɔhwɛɛ nhyiam no so. Akyiri yi, nhyiam foforo bi a yɛyɛe no, me na wɔma mehwɛɛ so, na David taa m’akyi.

Afe 2011, bere a na yɛayɛ ɔmansin adwuma no mfe 36 no, wɔtoo nsa frɛɛ me sɛ Sukuu a Wɔyɛ Ma Asafo Mu Mpanyimfo no, menkɔka akyerɛkyerɛfo no ho. Mfe mmienu ntam no, me ne Randi daa mpa ahorow 75 so, nanso yɛannu yɛn ho da. Nnawɔtwe biara a sukuu no bi bɛba awiei no, na asafo mu mpanyimfo no ani agye paa, efisɛ na wɔhu sɛ Akwankyerɛ Kuw no pɛ sɛ wɔne Yehowa ayɔnkofa mu yɛ den.

Akyiri yi, Ahenni Asɛmpakafo Sukuu no, mekɔkaa akyerɛkyerɛfo no ho. Mpɛn pii no, sɛ sukuufo no hu sɛnea sukuu no nhyehyɛe te a, na wɔabɔ hu: da biara wɔbɛtena sukuudan mu asua ade bɛyɛ nnɔnhwerew nson, wɔpɔn a, anwummere biara wɔde nnɔnhwerew mmiɛnsa nso bɛyɛ sukuu dwumadi, nnawɔtwe biara nso, sukuuni biara bɛyɛ dwumadi nnan anaa nnum wɔ klas. Ɛyɛ a me ne ɔkyerɛkyerɛfo a ɔka me ho no kyerɛkyerɛ mu kyerɛ sukuufo no sɛ, sɛ Yehowa ammoa wɔn a, wɔrentumi. Sɛ sukuufo no de wɔn ho to Yehowa so a, nea na wɔsusuw sɛ anka wɔrentumi nyɛ no, ɛyɛ a na ɛyɛ wɔn nwanwa sɛ wɔtumi yɛ boro so. Wei yɛ biribi a me werɛ remfi da.

Kyerɛ a me maame kyerɛe sɛ odwen afoforo ho no boaa ne Bible asuafo ma wɔnyaa nkɔso, na ɛboaa me papa mpo ma obenyaa nokware no ho adwempa. Me maame wui no, ne nnansa akyi no, me papa yɛɛ biribi a ɛyɛɛ yɛn nwanwa; ɔbaa Ahenni Asa so betiee baguam ɔkasa, na efi saa bere no, ɔtoaa so kɔɔ adesua mfe 26. Ɛwom sɛ me papa ammɔ asu da, nanso mpanyimfo no ka kyerɛɛ me sɛ, nnawɔtwe biara na ɔno na odu adesua ase kan.

Me maame nhwɛso no nso nyaa ne mma so tumi paa. Me nua mmea mmiɛnsa no nyinaa, wɔne wɔn kununom de nokwaredi resom Yehowa. Wɔn mu mmienu som wɔ Betel; baako wɔ Portugal, ɛnna ɔbaako nso wɔ Haiti.

Seesei, me ne Randi som sɛ akwampaefo atitiriw wɔ Hamilton, Ontario. Bere a na yɛwɔ ɔmansin adwuma no mu no, na yɛn ani gye ho paa sɛ yɛne afoforo bɛkɔ akɔyɛ wɔn sankɔhwɛ ne Bible adesua. Nanso seesei yehu sɛ yɛn ara nso yɛn Bible asuafo renya nkɔso, na wei ma yɛn ani gye paa. Afei nso, sɛnea yɛne yɛn asafo foforo yi mufo bɔ, na yehu sɛnea Yehowa boa wɔn wɔ mmere pa ne mmere bɔne nyinaa mu no, ɛhyɛ yɛn nkuran paa.

Sɛ yebu kɔmpɔ hwɛ yɛn akyi, na yehu sɛnea nkurɔfo bebree kyerɛe sɛ wɔdwen yɛn ho no a, yɛn ani sɔ paa. Wei nti, yɛn nso yɛbɔ mmɔden sɛ ‘yebedwen afoforo ho paa,’ na yɛahyɛ wɔn nkuran sɛ wɔbɛyɛ nea wɔbetumi biara asom Yehowa. (2 Kor. 7:6, 7) Abusua bi mu no, na ɔbea no, wɔn babarima ne wɔn babea nyinaa yɛ akwampaefo. Enti mibisaa ɔbarima no sɛ, wadwen akwampae adwuma no ho pɛn anaa. Ɔka kyerɛɛ me sɛ ɔreboa akwampaefo mmiɛnsa. Enti mibisaa no sɛ, “Wubetumi aboa wɔn asen Yehowa?” Mehyɛɛ no nkuran sɛ, nhyira a wɔrenya no, ɔno nso nkɔka bi nhwɛ. Abosome mmiɛnsa akyi na ɔno nso bɛyɛɛ ɔkwampaefo.

Me ne Randi bɛkɔ so aka Yehowa ‘anwonwadwuma’ ho asɛm akyerɛ “awo ntoatoaso” a ɛbɛba no, na yɛwɔ anidaso sɛ, sɛnea yɛasom Yehowa ama yɛn ani agye no, wɔn nso bɛsom Yehowa ama wɔn ani agye.—Dw. 71:17, 18.