1. Yɛbɛyɛ dɛn atumi asuasua yɛn Agya Yehowa a ɔwɔ ɔdɔ no?

YEHOWA dɔ yɛn pa ara. (Yoh. 3:16) Yɛpɛ sɛ yesuasua yɛn Agya a ɔwɔ ɔdɔ no. Enti yɛbɔ mmɔden sɛ yebenya ‘tema, onuadɔ, ne ayamhyehye’ ama nnipa nyinaa, ne titiriw, wɔn a “yɛne wɔn bɔ abusua wɔ gyidi mu no.” (1 Pet. 3:8; Gal. 6:10) Yɛpɛ sɛ yɛboa yɛn nuanom Kristofo a wɔrefa ateetee mu.

2. Dɛn na yebesusuw ho wɔ adesua yi mu?

² Obiara a ɔpɛ sɛ ɔde ne ho bɔ Yehowa abusua no bɛfa ateetee mu. (Mar. 10:29, 30) Bere a wiase yi awiei rebɛn no, yebetumi afa sɔhwɛ pii mu. Yɛbɛyɛ dɛn aboa yɛn ho yɛn ho? Momma yɛnhwɛ nea yebetumi asua afi Lot, Hiob, ne Naomi ho nsɛm a ɛwɔ Bible mu no mu. Afei nso, yebesusuw nsɛnnennen bi a yɛn nuanom Kristofo refa mu nnɛ ho, na yɛahwɛ nea yebetumi ayɛ de aboa wɔn ama wɔagyina nsɛnnennen no ano.

3. Sɛnea 2 Petro 2:7, 8 ma yehu no, gyinae bɔne bɛn na Lot sii, na dɛn na efii mu bae?

³ Lot sii gyinae sɛ ɔne Sodomfo a na wɔn bra asɛe pɔtɔɔ no bɛkɔ akɔtena. Saa gyinae a osii no, na ɛyɛ gyinae bɔne. (Kenkan 2 Petro 2:7, 8.) Ná nkurɔfo a wɔte mpɔtam hɔ di yiye, nanso Sodom a Lot kɔtenae no ma ohyiaa ɔhaw bebree. (Gen. 13:8-13; 14:12) Ɛbɛyɛ sɛ ne yere ani kaa kurom hɔ pa ara anaa n’ani gyee ɛhɔfo no bi ho araa ma ɔyɛɛ  Yehowa so asoɔden. Lot yere no hweree ne nkwa bere a Onyankopɔn tɔɔ ogya ne sufre guu nkurow a ɛwɔ mpɔtam hɔ so no. Afei, momma yɛnhwɛ Lot mmabea mmienu no. Mmarima a na wɔrebɛware wɔn no wui wɔ Sodom. Lot hweree ne fie, n’ahode, na nea ɛyɛ yaw pa ara no, ɔhweree ne yere nso. (Gen. 19:12-14, 17, 26) Bere a emu yɛ den yi mu no, Yehowa bo fuw Lot anaa? Dabi.

4. Dɛn na Yehowa yɛe a ɛkyerɛ sɛ onyaa Lot ho abotare? (Hwɛ mfoni a ɛwɔ Ɔwɛn-Aban yi anim no.)

⁴ Ɛwom sɛ Lot ankasa na osii gyinae kɔtenaa Sodom de, nanso Yehowa yam hyehyee no ma ɔsomaa abɔfo ma wokogyee ɔne n’abusua. Abɔfo no kaa no denneennen kyerɛɛ Lot sɛ omfi Sodom. Nanso, sɛ́ anka Lot betie abɔfo no na wafi kurom hɔ ntɛm ara no, ‘ɔtwentwɛn ne nan ase.’ Enti nea ɛbae ne sɛ, abɔfo no soo Lot nsa, na wɔboaa ɔne n’abusua ma woguan fii kurow no mu. (Gen. 19:15, 16) Afei abɔfo no ka kyerɛɛ no sɛ onguan nkɔ bepɔw so. Nanso, Lot antie Yehowa, na mmom, ɔsrɛɛ Yehowa sɛ ɔmma ɔnkɔ kurow bi a ɛbɛn hɔ mu. (Gen. 19:17-20) Yehowa nyaa Lot ho abotare tiee no, na ɔmaa no kwan sɛ ɔnkɔ saa kurow no mu. Akyiri yi, na Lot suro sɛ ɔbɛtena baabi a ɔte no, enti otu kɔtenaa bepɔw no so. Bepɔw no so hɔ ara a na Yehowa dii kan ka kyerɛɛ no sɛ ɔnkɔtena. (Gen. 19:30) Hwɛ sɛnea Yehowa nyaa Lot ho abotare kɛse! Yɛbɛyɛ dɛn asuasua Yehowa?

5-6. Bere a yɛresuasua Onyankopɔn no, yɛbɛyɛ dɛn de afotu a ɛwɔ 1 Tesalonikafo 5:14 no ayɛ adwuma?

⁵ Ebia yɛn nua Kristoni bi besisi gyinae bɔne na akɔfa ɔhaw akɛse abegu no so te sɛ nea ɛtoo Lot no. Ɛba saa a, dɛn na yɛbɛyɛ? Anhwɛ a yɛbɛka akyerɛ no sɛ nea ogui no na ɔretwa so aba no. Yɛka saa a, ɛyɛ nokware. (Gal. 6:7) Nanso, yebetumi ayɛ nea eye sen saa. Yebetumi asuasua sɛnea Yehowa boaa Lot no. Dɛn na yebetumi ayɛ?

⁶ Bere a Yehowa de ɔsɛe reba Sodom so no, ɔsomaa abɔfo sɛ wɔnkɔbɔ Lot kɔkɔ, na wɔmmoa no mma onnya ne ti nnidi mu. Saa ara na yɛn nso, sɛ yehu sɛ onua bi reyɛ biribi a ɛde no bɛkɔ ɔhaw mu a, ebia ebehia sɛ yɛbɔ no kɔkɔ. Na yebetumi aboa no nso. Sɛ mpo wamfa Bible mu afotu a yɛde bɛma no no anyɛ adwuma ntɛm a, ɛsɛ sɛ yenya ne ho abotare. Ɛsɛ sɛ yesuasua abɔfo mmienu no. Sɛ́ anka yɛbɛpa abaw na yɛatwe yɛn ho afi yɛn nua no ho no, ɛsɛ sɛ yɛhwehwɛ akwan pa bi fa so boa no. (1 Yoh. 3:18) Sɛ yɛbɛka a, ebia ebehia sɛ yeso ne nsa, kyerɛ sɛ, yɛbɛboa no ama ɔde afotu a yɛde ama no no ayɛ adwuma.—Kenkan 1 Tesalonikafo 5:14.

7. Yɛbɛyɛ dɛn anya adwene a Yehowa nyae wɔ Lot ho no bi?

⁷ Ná anka Yehowa betumi de n’adwene asi Lot sintɔ so. Nanso akyiri yi, ɔmaa ɔsomafo Petro kaa Lot ho asɛm sɛ ɔyɛ ɔtreneeni. Hwɛ sɛnea ɛyɛ anigye sɛ Yehowa de yɛn mfomso kyɛ yɛn! (Dw. 130:3) Yebetumi anya adwene a Yehowa nyae wɔ Lot ho no bi anaa? Sɛ yɛde yɛn adwene si suban pa a yɛn nuanom Kristofo wɔ so a, yebenya wɔn ho abotare pii. Wei bɛma ayɛ mmerɛw koraa ama wɔn sɛ wobegye mmoa a yɛde ma wɔn no atom.

8. Dɛn na ayamhyehye bɛma yɛayɛ?

⁸ Gyinae bɔne bi a Lot sii na ɛma ohuu amane; Hiob de, ɛnyɛ gyinae bɔne bi a osii na ɛma ohuu amane. Nanso, ɔfaa amanehunu pii mu; ɔhweree n’ahode, anuonyam a na ɔwɔ wɔ mpɔtam a ɔte bɔɔ no, na ɔyaree. Nea ɛyɛ yaw sen biara no, mma a ɔne ne yere woe  nyinaa wui. Nkurɔfo mmiɛnsa a na wɔkyerɛ sɛ wɔyɛ Hiob nnamfo nso bɔɔ no sobo. Dɛn ne ade baako nti a gyamserefo mmiɛnsa no annya ayamhyehye amma Hiob? Wɔansusuw nea na ato Hiob no ho ankɔ akyiri. Ɛno nti, wonyaa Hiob ho adwene a ɛnteɛ, na wɔkekaa nsɛm a ɛyɛ yaw kyerɛɛ no. Dɛn na yɛbɛyɛ na yɛanni mfomso a ɛte saa? Ɛsɛ sɛ yehu sɛ Yehowa nko ara na onim obi asetena mu nsɛm nyinaa. Enti, sɛ obi a ɔrehu amane rekasa a, yɛ aso tie no. Ntie no kɛkɛ, mmom bɔ mmɔden sɛ wobɛte no ase. Sɛ woyɛ saa a, ɛnna wubetumi anya tema ankasa ama wo nua no.

9. Sɛ yɛwɔ ayamhyehye a, dɛn na yɛrenyɛ, na adɛn ntia?

⁹ Yɛwɔ ayamhyehye a, ɔhaw a afoforo refa mu no, yɛrenni ho nseku bɔne. Obi a odi nseku nhyɛ asafo no den, mmom ɔde mpaapaemu ba asafo no mu. (Mmeb. 20:19; Rom. 14:19) Ne tirim yɛ den, na onnwen afoforo ho. Ne nsɛnkeka no betumi ama onipa a ɔrehu amane dedaw no adi yaw kɛse. (Mmeb. 12:18; Efe. 4:31, 32) Sɛ yɛde yɛn adwene si suban pa a onipa no wɔ so, na yɛhwehwɛ ɔkwan a yɛbɛfa so aboa no ama wagyina sɔhwɛ a ato no no ano a, ɛbɛboa pa ara!

10. Dɛn na asɛm a ɛwɔ Hiob 6:2, 3 no ma yehu?

¹⁰ Kenkan Hiob 6:2, 3. Ɛtɔ da a na Hiob kasa “hatuhatu.” Nanso, nsɛm a ɔkekae no, akyiri yi ɔtwee bi sanee. (Hiob 42:6) Sɛnea Hiob yɛe no, ɛnnɛ obi a ɔhaw bi reteetee no betumi akasa hatuhatu akeka nsɛm bi a akyiri yi obenu ne ho. Ɛba saa a, dɛn na ɛsɛ sɛ yɛyɛ? Ɛnsɛ sɛ yɛkasa tia no, na mmom ɛsɛ sɛ yɛn yam hyehye yɛn ma no. Kae sɛ, na ɛnyɛ Yehowa adwene ne sɛ yɛn mu biara bɛfa ɔhaw ne ateetee a yehyia nnɛ no mu.  Enti, sɛ Yehowa somfo nokwafo bi a ɔreteetee kasa bumbum a, ɛnyɛ nwonwa. Sɛ mpo ɔkeka nsɛm bi a ɛnyɛ nokware fa Yehowa ho anaa yɛn ho a, ɛnsɛ sɛ yɛma yɛn bo fuw no ntɛm, anaa yɛkasa tia no sɛ wakeka nsɛm a ɛte saa.—Mmeb. 19:11.

11. Sɛ asafo mu mpanyimfo de afotu rema a, dɛn na wobetumi ayɛ de asuasua Elihu?

¹¹ Ɛtɔ da a, onipa a ɔrefa ateetee mu nso hia afotu anaa nteɛso bi a ɛbɛboa no. (Gal. 6:1) Asafo mu mpanyimfo bɛyɛ dɛn atumi ayɛ saa? Ɛsɛ sɛ wosuasua Elihu a onyaa ayamhyehye kɛse maa Hiob na otiee no no. (Hiob 33:6, 7) Elihu huu Hiob adwene ansa na ɔretu no fo. Mpanyimfo a wosuasua nea Elihu yɛe no bɛyɛ aso atie onii a ɔrefa ateetee mu no na wɔabɔ mmɔden sɛ wobehu nea ɛhaw no. Afei, sɛ wɔde afotu ma nea ɔrefa ateetee mu no a, ebia ɛbɛka ne koma.

12. Bere a Naomi kunu ne ne mmabarima mmienu wui no, ɛkaa no sɛn?

¹² Naomi yɛ ɔbea a na odi nokware, na na ɔdɔ Yehowa. Nanso bere a ne kunu ne ne mmabarima mmienu wui no, na ɔpɛ sɛ ɔsesa ne din Naomi na wɔfrɛ no “Mara,” a nea ɛkyerɛ ne, nwenenwene. (Rut 1:3, 5, 20, 21) Naomi asebea Rut kɔɔ so bataa Naomi ho wɔ ne sɔhwɛ nyinaa mu. Rut boaa Naomi ma onyaa nneɛma a ohia, na ɔsan nso kyekyee ne werɛ. Rut yii ne yam kaa asɛm tiawa bi de kyerɛe sɛ ɔdɔ Naomi, na ɔtaa n’akyi.—Rut 1:16, 17.

13. Adɛn nti na ɛsɛ sɛ yɛboa wɔn a wɔn kunu anaa wɔn yere awu?

¹³ Sɛ yɛn nua Kristoni bi kunu anaa ne yere wu a, obehia yɛn mmoa. Yebetumi de ɔbea ne okunu atoto nnua mmienu a ɛbata ho a ɛbom nyin ho. Mfe bi akyi no, nnua mmienu no ntini bobare ho. Sɛ nnua no baako ase tutu na ewu a, etumi ka dua baako a aka no pa ara. Saa ara na sɛ yɛn tamfo a ɔne owu fa obi kunu anaa obi yere a, obetumi adi yaw mfe pii. Paula * kunu wui mpofirim. Paula kaa sɛ: “M’asetena sesae koraa, ná migye me ho a ennye. Ná m’adamfo pa kɔ gyaw me. Ná meka m’asɛm biara kyerɛ me kunu. M’ani gye a na ɔno nso ani agye, na sɛ nneɛma mu yɛ den ma me a, ɔno ara na na okurakura me. Ná ɔne me werɛkyekyefo. Ɛyɛe sɛ nea wɔatwa me nipadua fã bi akyene.”

14-15. Dɛn na yebetumi ayɛ de akyekye obi a ne kunu anaa ne yere awu werɛ?

¹⁴ Dɛn na yebetumi ayɛ de akyekye obi a ne kunu anaa ne yere awu werɛ? Ade a edi kan a ɛho hia pa ara sɛ woyɛ ne sɛ wo ne onii no bɛkasa. Ɛwom, ebia ɛbɛyɛ den ama wo sɛ wo ne no bɛkasa anaa wunhu asɛm a wobɛka akyerɛ no. Paula a yɛadi kan aka ne ho asɛm no kaa sɛ: “Minim sɛ obi wu a, ɛma nkurɔfo ho yeraw wɔn. Ɛyɛ wɔn sɛ anhwɛ a na wɔaka asɛm bi ama ahaw obi. Nanso, nea enye koraa ne sɛ obiara bɛka n’ano atom.” Ebia nea ɔredi awerɛhow no nhwɛ kwan sɛ yɛbɛka asɛm titiriw bi akyerɛ no. Paula kaa sɛ: “Sɛ me nnamfo ka asɛm tiawa bi te sɛ, ‘Nea ato wo no yɛ me yaw’ a, na m’ani sɔ pa ara.”

¹⁵ Mfe bi a atwam no, William yere wui. William kaa sɛ: “Sɛ afoforo ka nneɛma pa a wɔkae wɔ me yere ho kyerɛ me a, m’ani sɔ; ɛma minya awerɛhyem sɛ na nkurɔfo dɔ no, na na wobu no. Ɔkwan a wɔfa so kyekye me werɛ yi boa me pa ara. Nsɛm a wɔka no kyekye me werɛ, efisɛ na me yere da me koma so ankasa, na ɔno ara na na okurakura me.” Bianca yɛ okunafo. Ɔkaa sɛ: “Sɛ afoforo ne  me bɔ mpae, na wɔne me kenkan kyerɛwnsɛm baako anaa mmienu a, ɛkyekye me werɛ. Sɛ wɔka me kunu ho asɛm a, ɛboa me, na me nso mereka ne ho asɛm na wɔyɛ aso tie a, ɛhyɛ me nkuran.”

16. (a) Dɛn na ɛsɛ sɛ yɛyɛ ma obi a ne dɔfo bi awu? (b) Sɛnea Yakobo 1:27 ka no, asɛyɛde bɛn na yɛwɔ?

¹⁶ Sɛnea Rut kɔɔ so bataa okunafo Naomi ho no, ɛsɛ sɛ yɛn nso yɛkɔ so boa wɔn a wɔn dɔfo bi awu. Paula a yɛadi kan aka ne ho asɛm no kaa sɛ: “Me kunu wui akyi pɛɛ no, nkurɔfo pii bɛboaa me kyekyee me werɛ. Nanso, bere bi akyi no, nneɛma a nkurɔfo yɛ wɔ wɔn asetenam daa no gyee wɔn bere. Nanso, na m’asetena asesa koraa. Sɛ obi wu na afoforo hu sɛ abosome bi akyi anaa mfe bi akyi mpo, nea ɔredi awerɛhow no hia mmoa ne awerɛkyekye a, ɛboa pa ara.” Nokwasɛm ne sɛ, ɛsono sɛnea obiara te. Ebinom wɔ hɔ a, ɛte sɛ nea asetena foforo a wɔaba mu no kokwaw wɔn ntɛm. Nanso, afoforo de, bere biara a wɔbɛyɛ biribi a na wɔne wɔn dɔfo a wawu no bom yɛ no, wɔkae sɛ wɔahwere ade kɛse. Ɛsono ɔkwan a obiara fa so di awerɛhow. Momma yɛnkae sɛ Yehowa de ahyɛ yɛn nsa sɛ yɛnhwɛ wɔn a wɔn kunu anaa wɔn yere awu, na ɛyɛ asɛyɛde a ɔde ama yɛn.—Kenkan Yakobo 1:27.

17. Adɛn nti na ɛsɛ sɛ yɛboa wɔn a wɔn kununom anaa wɔn yerenom aguan agyaw wɔn na yɛkyekye wɔn werɛ?

¹⁷ Awarefo binom a wɔn kununom anaa wɔn yerenom guan gyaw wɔn fa ateetee mu, na wodi yaw pii. Joyce kunu guan gyaw no kɔfaa ɔbea foforo. Joyce kaa sɛ: “Ɛyaw  a awaregyae no ma midii no, sɛ me kunu wui a, ebia anka ɛrenyɛ me yaw saa. Sɛ onyaa akwanhyia na owui anaa yare bi na ɛbɔɔ no ma owui a, ɛno de, anka ɛnyɛ ɔno na wayɛ biribi. Nanso, wei de, me kunu hyɛɛ da na oguan gyaw me. Metee nka sɛ wagu m’anim ase.”

18. Wɔn a wonni kunu anaa wonni yere bio no, dɛn na yebetumi ayɛ de aboa wɔn?

¹⁸ Sɛ yeyi yɛn yam yɛ nneɛma nketenkete de boa wɔn a wonni kunu anaa wonni yere bio a, yɛma wohu sɛ yɛdɔ wɔn pa ara. Seesei a aka wɔn nko ara no, wohia nnamfo pa. (Mmeb. 17:17) Dɛn na wubetumi ayɛ de akyerɛ sɛ woyɛ wɔn adamfo? Wubetumi afrɛ wɔn aba wo fie na wo ne wɔn ato nsa adidi. Wubetumi ne wɔn abom ayɛ biribi agyigye mo ani anaa wubetumi ne wɔn akɔ asɛnka. Biribi foforo a wubetumi ayɛ ne sɛ, ɛtɔ da a, wubetumi ama wɔabɛka w’abusua ho ama moayɛ abusua som. Sɛ woyɛ saa a, wobɛma Yehowa ani agye, efisɛ ‘ɔbɛn wɔn a wɔn koma abubu,’ na ɔyɛ “akunafo temmufo.”—Dw. 34:18; 68:5.

19. Dɛn na 1 Petro 3:8 ka sɛ yɛnyɛ?

¹⁹ Ɛrenkyɛ, Onyankopɔn Ahenni bedi tumi wɔ asase yi so, na ‘yɛrenkae amanehunu’ biara bio. Yɛrehwɛ bere a ‘yɛrenkae kan nneɛma no bio, na ɛremma komam bio’ no kwan pa ara. (Yes. 65:16, 17) Enkosi sɛ saa da no bɛba no, momma yɛmmoa yɛn ho yɛn ho, na yɛmfa yɛn kasa ne yɛn nneyɛe nkyerɛ sɛ yɛdɔ yɛn nuanom Kristofo nyinaa.—Kenkan 1 Petro 3:8.