1. Asɛm bɛn na ɔsomafo Paulo kyerɛw kɔmaa Kristofo a wɔasra wɔn no de bɔɔ wɔn kɔkɔ?

ƆSOMAFO Paulo bɔɔ kɔkɔ sɛ: “Mommfa wiase nhyehyɛe yi su.” (Rom. 12:2) Tete Kristofo na Paulo kyerɛw saa asɛm no kɔmaa wɔn. Adɛn nti na ɔde kɔkɔbɔ a ɛte saa maa mmarima ne mmea a na wɔahyira wɔn ho so ama Onyankopɔn na wɔde honhom kronkron asra wɔn no?—Rom. 1:7.

2-3. Satan pɛ sɛ yɛtwe yɛn ho fi Yehowa ho, na ɔkwan bɛn na ɔfa so yɛ saa? Nanso yɛbɛyɛ dɛn atumi atutu nsusuwii bɔne a “agye ntini” wɔ yɛn adwenem no agu?

² Ná nneɛma haw Paulo, efisɛ na Kristofo binom ama Satan wiase no nyansa ne wiase no nsusuwii bɔne regye wɔn adwene. (Efe. 4:17-19) Saa asɛm yi betumi ato yɛn mu biara. Satan na ɔyɛ wiase yi nyame, na wayere ne ho pa ara sɛ ɔbɛma yɛatwe yɛn ho afi Yehowa ho, enti obetumi afa akwan ahorow so ayɛ saa. Emu baako ne sɛ, sɛ ohu sɛ yɛpɛ anuonyam anaa yɛpɛ sɛ yegye din a, ɔbɛyɛ n’adwene sɛ ɔbɛfa so atwe yɛn afi Yehowa ho. Obetumi mpo afa ntetee a yɛanya, yɛn amammerɛ, anaa nneɛma a yɛasua wɔ sukuu so ama yɛanya n’adwene.

³ Yemmisa sɛ, yebetumi atutu nneɛma a “agye ntini” wɔ yɛn adwenem no agu anaa? (2 Kor. 10:4) Yɛnhwɛ mmuae a Paulo de mae yi: “Yɛretutu nsusuwii ne ade a ɛkorɔn biara a wɔama so atia Onyankopɔn nimdeɛ agu; na yɛfa nsusuwii nyinaa nnommum ma ɛyɛ setie ma Kristo.” (2 Kor.  10:5) Yebetumi aka pa ara sɛ, Yehowa bɛboa yɛn ama yɛatumi ayi nsusuwii bɔne afi yɛn adwenem. Sɛnea sɛ obi nom awuduru a wotumi ma no aduru bi ma edwudwo bɔre a ɛwɔ awuduru no mu ano no, saa ara na Onyankopɔn Asɛm betumi aboa yɛn ama yɛayi subammɔne biara a Satan wiase no ama yɛanya afi hɔ.

4. Bere a yɛn mu pii huu nokware no foforo no, nsakrae bɛn na na ɛsɛ sɛ yɛyɛ?

⁴ Wo de, kaakae nsakrae a na ɛsɛ sɛ woyɛ bere a wuhuu nokware a ɛwɔ Onyankopɔn Asɛm mu foforo na wusii gyinae sɛ wobɛsom Yehowa no. Yɛn mu pii wɔ hɔ a, na ɛsɛ sɛ yegyae nneɛma bɔne bi yɛ. (1 Kor. 6:9-11) Yɛn ani sɔ pa ara sɛ Yehowa aboa yɛn ama yɛatumi agyae saa nneɛma bɔne no!

5. Nneɛma mmienu bɛn na Romafo 12:2 ka sɛ yɛnyɛ?

⁵ Nanso, ɛnsɛ sɛ yenya adwene da sɛ ɛho nhia sɛ yɛyɛ nsakrae biara bio. Ɛwom sɛ yegyaee bɔne a emu yɛ duru biara a na yɛyɛ ansa na yɛrebɔ asu de, nanso ɛsɛ sɛ yɛyere yɛn ho sɛ yɛremma biribiara ntwetwe yɛn nkɔ saa bɔne no ho bio. Yɛbɛyɛ dɛn atumi ayɛ saa? Paulo kaa sɛ: “Mommfa wiase nhyehyɛe yi su na mmom munnya adwensakra mfa nyɛ mo ho foforo.” (Rom. 12:2) Enti, ɛsɛ sɛ yɛyɛ nneɛma mmienu bi. Nea edi kan, ɛnsɛ sɛ ‘yɛfa wiase nhyehyɛe yi su,’ anaa yɛma wiase no kyerɛ yɛn kwan. Nea ɛto so mmienu, ɛsɛ sɛ yenya adwensakra de ‘yɛ yɛn ho foforo.’

6. Asɛm a Yesu kaa wɔ Mateo 12:43-45 no, dɛn na yesua fi mu?

⁶ Nsakrae a na Paulo reka ho asɛm no, na ɛnyɛ nnipa ani so de. Ɛsɛ sɛ ɛka biribiara a yɛyɛ. (Hwɛ adaka a wɔato din “ Yɛsakrae Ankasa Anaa Ɛyɛ Nnipa Ani So De?”) Ɛsɛ sɛ yɛsakra yɛn adwene koraa, kyerɛ sɛ, sɛnea yɛte ankasa, nea ɛwɔ yɛn komam,  ne nea yɛpɛ. Enti, ehia sɛ yɛn mu biara bisa ne ho sɛ, ‘Nsakrae a mereyɛ de asuasua Kristo no, ɛyɛ nnipa ani so de, anaa meresakra wɔ adwene ne koma mu ankasa?’ Yesu kyerɛɛ nea ɛsɛ sɛ yɛyɛ wɔ Mateo 12:43-45. (Kenkan.) Saa asɛm no ma yehu biribi titiriw bi. Ɛne sɛ: Sɛ yeyi nsusuwii bɔne fi yɛn adwenem a, na yenwiei; mmom ɛsɛ sɛ yɛde Onyankopɔn adwene hyɛ ananmu.

7. Yɛbɛyɛ dɛn asesa sɛnea yɛte wɔ yɛn adwene ne yɛn koma mu?

⁷ Yebetumi asesa nea yɛpɛ pa ara anaa sɛnea yɛte wɔ yɛn adwene ne yɛn koma mu ankasa anaa? Onyankopɔn Asɛm ka sɛ: “Momma wɔnkɔ so nyɛ mo foforo wɔ tumi a ɛkanyan mo adwene no mu, na monhyɛ nipasu foforo a wɔbɔɔ no sɛnea Onyankopɔn pɛ wɔ nokware trenee ne nokwaredi pintinn mu no.” (Efe. 4:23, 24) Enti, yebetumi asesa sɛnea yɛte wɔ yɛn komam, nanso ɛnna fam. Sɛ yɛhyɛ yɛn ho so wɔ akɔnnɔ bɔne ho na yegyae nneɛma bɔne yɛ a, na yenwiei. Mmom, ɛsɛ sɛ yɛsesa ‘tumi a ɛkanyan yɛn adwene no.’ Ɛno hwehwɛ sɛ yɛyɛ nsakrae wɔ nea yɛpɛ, yɛn suban, ne nea ɛma yɛyɛ nneɛma bi mu. Wei nyɛ biribi a yɛyɛ no da koro; ɛsɛ sɛ yɛkɔ so yɛ.

8-9. Sɛn na onua bi suahu ma yehu sɛ ehia sɛ yɛsesa sɛnea yɛte wɔ yɛn koma mu?

⁸ Momma yɛnhwɛ onua bi a bere bi na ɔyɛ basabasa. Ná ɔwe nsa ankasa, na na ɔpɛ ntɔkwaw nso. Nanso ogyaee, na akyiri yi otumi bɔɔ asu. Wei yɛɛ adansedi kɛse wɔ ne kurow ketewa a na ɔte mu no mu. Nanso anwummere bi, ohyiaa sɔhwɛ bi a na ɔnhwɛ kwan. Saa bere no, na ɔbɔɔ asu nkyɛe. Ɔbarima bi a na wabow nsa baa ne fie bɛkaa no ntɔkwaw. Mfiase no, na onua no mpɛ sɛ ɔne no ko. Nanso, bere a ɔbarima no kaa asɛm bi de guu Yehowa din ho fĩ no, afei de, onua no antumi anhyɛ ne ho so. Opue kɔboroo ɔbarima no. Adɛn nti na ɔboroo no? Ɛwom sɛ na Bible a wasua no aboa no ama wahyɛ ne ho so nti na ɔnyɛ basabasa de, nanso na ontumi nsesaa tumi a ɛkanyan n’adwene no. Sɛ yɛbɛka a, na ɔnsesaa sɛnea ɔte wɔ ne komam ankasa.

⁹ Nanso, onua yi ampa abaw. (Mmeb. 24:16) Asafo mu mpanyimfo boaa no ma ɔkɔɔ so yɛɛ nsakrae. Akyiri yi, wɔpaw no sɛ asafo mu panyin. Afei anwummere bi, sɔhwɛ a ohyiae mfe bi a atwam no, ɔsan hyiaa bi bere a na ogyina Ahenni Asa ho pɛɛ. Ná ɔbarima bi a wabow nsa pɛ sɛ ɔboro asafo mu panyin bi. Dɛn na yɛn nuabarima no yɛe? Onyaa abotare tɔɔ ne bo ase dwudwoo ɔbarima a wabow nsa no bo, na ɔboaa no ma ɔkɔɔ fie. Adɛn nti na saa bere yi de, onua no ne ɔbarima no anko? Ná onua no asesa tumi a ɛkanyan n’adwene. Ná wasesa wɔ ne komam ankasa; afei de, na ɔpɛ asomdwoe, na na ɔbrɛ ne ho ase. Wei hyɛɛ Yehowa anuonyam!

10. Dɛn na ɛsɛ sɛ yɛyɛ na yɛatumi ayɛ saa nsakrae yi?

¹⁰ Saa nsakrae yi mma prɛko pɛ; egye mmɔdenbɔ. Ebehia sɛ yɛyere yɛn ho mfe pii ‘yɛ nea yebetumi biara.’ (2 Pet. 1:5) Mfe pii a yɛde “atena nokware no mu” nko ara nkyerɛ sɛ yebetumi ayɛ saa nsakrae yi. Ɛsɛ sɛ yɛbɔ yɛn ho mmɔden pa ara sesa sɛnea yɛte wɔ yɛn komam. Nneɛma titiriw bi a yɛbɛyɛ betumi aboa yɛn ama yɛayɛ saa nsakrae no. Momma yensusuw emu bi ho.

11. Sɛn na mpaebɔ boa yɛn ma yɛsesa tumi a ɛkanyan yɛn adwene?

¹¹ Ade a ɛho hia sɛ yedi kan yɛ ne sɛ yɛbɛbɔ mpae. Ehia sɛ yɛbɔ mpae sɛnea odwontofo no yɛe no. Ɔkaa sɛ: “O Onyankopɔn, bɔ koma a emu tew ma me, na fa honhom foforo a ase atim hyɛ me mu.” (Dw. 51:10) Ɛsɛ sɛ yegye tom sɛ ehia sɛ yɛsesa tumi a ɛkanyan yɛn adwene na yɛsrɛ Yehowa sɛ ɔmmoa yɛn. Yɛbɛyɛ dɛn ahu sɛ Yehowa bɛboa yɛn ama yɛayɛ saa nsakrae no? Asɛm a Yehowa ka kyerɛɛ Israelfo a na wɔn koma yɛ den wɔ Hesekiel bere so no betumi ahyɛ yɛn nkuran. Ɔhyɛɛ wɔn bɔ sɛ: “Mɛma wɔn koma koro na mede honhom foforo ahyɛ wɔn mu . . . na mama wɔn koma a ɛyɛ mmerɛw [kyerɛ sɛ, koma a ebetie Onyankopɔn akwankyerɛ].” (Hes. 11:19) Ná Yehowa pɛ sɛ ɔboa saa Israelfo no ma wɔsesa, na saa ara na ɔpɛ sɛ ɔboa yɛn nso.

12-13. (a) Sɛnea Dwom 119:59 ka no, dɛn na ɛsɛ sɛ yedwinnwen ho? (b) Nsɛm bɛn na ɛsɛ sɛ wubisa wo ho?

¹² Ade a ɛto so mmienu a ɛho hia sɛ yɛyɛ ne sɛ yebedwinnwen Onyankopɔn Asɛm ho. Sɛ yɛto yɛn bo ase kenkan Onyankopɔn Asɛm da biara a, ehia sɛ yegye bere dwinnwen nea yɛkenkan no ho yiye sɛnea ɛbɛyɛ a yebehu nsakrae a ɛsɛ sɛ yɛyɛ wɔ yɛn adwene ne yɛn koma mu. (Kenkan Dwom 119:59; Heb. 4:12; Yak. 1:25) Ɛsɛ sɛ ɛboa yɛn ma yehu biribiara a ebetumi atwetwe yɛn ama yɛn ani agye wiase nyansa ho. Ɛsɛ sɛ yegye tom sɛ yɛwɔ mmerɛwyɛ na yɛyere yɛn ho tu saa mmerɛwyɛ no ase.

¹³ Wubetumi abisa wo ho sɛ: ‘Anibere anaa ahoɔyaw bi wɔ me koma mu anaa?’ (1 Pet. 2:1) ‘Baabi a mifi, nneɛma a masua wɔ sukuu, anaa me sika nti, misusuw sɛ mekyɛn afoforo?’ (Mmeb. 16:5) ‘Nkurɔfo a wonni nneɛma a mewɔ anaa ɛsono wɔn kɔla no, mibu wɔn animtiaa anaa?’ (Yak. 2:2-4) ‘Nneɛma a ɛwɔ Satan wiase no mu twetwe me anaa?’ (1 Yoh. 2:15-17) ‘M’ani gye anigyede a aguamammɔ ho nsɛm ne basabasayɛ wom ho?’ (Dw. 97:10; 101:3; Amos 5:15) Sɛ woreyi nsɛmmisa yi ano a, ebia wubehu sɛ ehia sɛ woyɛ nsakrae bi. Sɛ yetumi tutu nsusuwii a “agye ntini” wɔ yɛn komam gu a, yɛbɛsɔ yɛn soro Agya no ani.—Dw. 19:14.

14. Adɛn nti na ehia pa ara sɛ yɛfa nnamfo pa?

¹⁴ Ade a ɛto so mmiɛnsa a ehia sɛ yɛyɛ ne sɛ yɛbɛfa nnamfo pa. Sɛ yenim oo, yennim oo, nkurɔfo a yɛne wɔn bɔ no, yetumi suasua wɔn pa ara. (Mmeb. 13:20) Wɔn a yɛne wɔn yɛ adwuma anaa wɔn a yɛne wɔn kɔ sukuu no, ebia wɔrentumi mmoa yɛn mma yensusuw nneɛma ho wɔ ɔkwan a ɛsɔ Onyankopɔn ani so. Nanso, yebetumi anya nnamfo pa wɔ Kristofo nhyiam ase. Ɛhɔ na wobetumi akanyan yɛn akɔ “ɔdɔ ne nnwuma pa” mu.—Heb. 10:24, 25.

15-16. Dɛn na Satan pɛ sɛ ɔyɛ de sesa yɛn adwene?

¹⁵ Kae sɛ, Satan asi ne bo pa ara sɛ ɔbɛsesa yɛn adwene. Nokware a ɛwɔ Onyankopɔn Asɛm mu boa yɛn ma yetumi susuw nneɛma ho yiye, enti Satan refa ɔkwan biara so sɛ ɔbɛma yɛanya nsusuwii foforo de asɛe yɛn adwene.

¹⁶ Satan kɔ so ara bisa asɛm koro no ara a obisaa Hawa wɔ Eden turom no. Satan bisaa Hawa sɛ: “Ɛyɛ ampa sɛ Onyankopɔn kae sɛ . . . ?” (Gen. 3:1) Esiane sɛ Satan na odi wiase yi so nti, nkurɔfo taa bisa nsɛm a ɛma yɛn adwenem yɛ yɛn nãã. Ebi ni: ‘Ɛyɛ  ampa sɛ Onyankopɔn ani nnye ɔbarima ne ɔbarima aware anaa ɔbea ne ɔbea aware ho? Ɛyɛ ampa sɛ Onyankopɔn mpɛ sɛ wudi Buronya ne awoda? Ɛyɛ ampa sɛ wo Nyankopɔn mpɛ sɛ wugye mogya? Ɛyɛ ampa sɛ Onyankopɔn a ɔdɔ yɛn no mpɛ sɛ wo ne w’adɔfo a wɔatu wɔn afi asafo no mu bɔ?’

17. Sɛ obi bisa yɛn nea yegye di ho asɛm sɛnea ɛbɛma yɛn adwenem ayɛ yɛn nãã a, dɛn na ɛsɛ sɛ yɛyɛ? Sɛnea Kolosefo 2:6, 7 kyerɛ no, yɛyɛ saa a, dɛn na ebetumi afi mu aba?

¹⁷ Ehia sɛ yeso yɛn gyidi mu den. Sɛ nkurɔfo bisa nsɛm fa yɛn gyidi ho na yɛanhwehwɛ ho mmuae a, ebetumi ama yɛn adwenem ayɛ yɛn nãã. Ɛba saa a, nkakrankakra ebetumi asɛe yɛn adwene ne yɛn gyidi. Ɛnde, dɛn na ɛsɛ sɛ yɛyɛ? Onyankopɔn Asɛm ka kyerɛ yɛn sɛ yɛnsakra yɛn adwene sɛnea ɛbɛyɛ a yebehu “Onyankopɔn pɛ a eye na ɛsɔ ani na edi mũ.” (Rom. 12:2) Sɛ yesua ade daa a, yebetumi ahu sɛ nea yɛasua afi Bible mu no yɛ nokware. Afei nso, yebetumi agye adi pa ara sɛ Yehowa akwankyerɛ na ɛyɛ papa. Ɛba saa a, yebegye ntini, na ‘yɛatintim wɔ gyidi no mu’ te sɛ dua a ase atim.—Kenkan Kolosefo 2:6, 7.

18. Dɛn na ɛbɛboa yɛn ama yɛabɔ yɛn ho ban afi Satan wiase no nsusuwii bɔne ho?

¹⁸ Obiara rentumi mma wo gyidi nyɛ den, gye sɛ w’ankasa. Enti kɔ so ma tumi a ɛkanyan w’adwene no nyɛ foforo. Bɔ mpae daa; srɛ Yehowa ma ɔmfa ne honhom kronkron mmoa wo. Dwinnwen Onyankopɔn Asɛm ho yiye; kɔ so hwehwɛ wo nsusuwii ne nea ɛma woyɛ nneɛma bi mu. Hwehwɛ nnamfo pa; fa nnamfo a wɔbɛboa wo ama woasesa wo nsusuwii ayɛ no foforo. Woyɛ saa a, wubeyi nsusuwii bɔne biara a Satan wiase no ama woanya afi wo tirim na woatutu “nsusuwii ne ade a ɛkorɔn biara a wɔama so atia Onyankopɔn nimdeɛ” no agu.—2 Kor. 10:5.