YUDAFO a na ɛte Bɔhyɛ Asaase no so no, afe no ahyɛase ne bere a wofuntum wɔn asaase na wodua nnɔbae. Yɛn bere yi so no, saa bere no fi ase wɔ September mfinimfini kosi October mfinimfini.

Kalenda a wogyina ɔsram so hyehyɛ a ɛyɛ abosome 12 (a nnafua 29 anaa 30 na ɛwɔ emu biara mu) no, ne tenten nnu kalenda a wogyina awia so hyehyɛ no. Enti nkurɔfo de nhyehyɛe pii agu akwan mu a ɛbɛma kalenda mmienu no ahyia. Baako ne sɛ, wɔde nnafua no bi bɛka bosome no bi ho anaa ɛwom ara a wɔde bosome no baako bɛka ho; wotumi de ka ho ansa na afe a edi hɔ no afi ase. Saa nhyehyɛe yi nti, wohwɛ kalenda no so a wutumi hu bere a wodua nnɔbae ne bere a wotwa.

Nanso Mose bere so no, Onyankopɔn ka kyerɛɛ ne nkurɔfo sɛ, kalenda a wɔde bedi dwuma wɔ wɔn som mu no, Abib anaa Nisan na ɛbɛyɛ bosome a edi kan. Yɛn bere yi so no, efi ase wɔ March mfinimfini kosi April mfinimfini. (Ex. 12:2; 13:4) Ná saa bosome yi mu na wotwa baali, enti na wodi ho afahyɛ.—Ex. 23:15, 16.

Nhoma a wɔato din The History of the Jewish People in the Age of Jesus Christ, (175 B.C.–A.D. 135) a ɔbenfo Emil Schürer kyerɛwee mu no, ɔka sɛ, “nea na wogyina so hu sɛ wɔde bosome no baako bɛka ho anaa wɔremfa nka ho no, na ɛnyɛ den koraa. Twam Afahyɛ a na wodi no Nisan (Nisan 14), bere a ɔsram no nyinaa ayɛ kurukuruwa no, bere nyinaa na ɛsɛ sɛ esi wɔ fefɛwbere, bere a adekyee ne adesae tenten yɛ pɛ no . . . Enti, sɛ ɛrekɔ afe no awiei na wohu sɛ Twam no rensi wɔ fefɛwbere, bere a adekyee ne adesae tenten yɛ pɛ no a, na Yudafo no de bosome a ɛtɔ so 13 ka ho ansa na Nisan bosome no afi ase.”

Sɛ Yehowa Adansefo pɛ sɛ wohu da a ɛfata a wɔde bedi Awurade Anwummere Aduan no a, wɔde saa akwankyerɛ yi yɛ adwuma, efisɛ saa afahyɛ no si wɔ Nisan 14 wɔ fefɛwbere mu wɔ Hebrifo kalenda no so. Sɛ wohu da no a, wodi kan bɔ nsafo a ɛwɔ wiase nyinaa amanneɛ ansa na da no adu so. *

Ná Hebrifo no yɛ dɛn hu sɛ bosome baako rebewu na foforo rebefi ase? Ɛnnɛ de, ayɛ fofoofo. Sɛ wohwɛ kalenda a ɛbɔ wo fie anaa kalenda a ɛwɔ wo ɛlɛtrɔnik afiri so a wubehu. Nanso Bible bere so de, na ɛnyɛ mmerɛw saa.

Noa bere so no, na bosome biara yɛ nnafua 30. (Gen. 7:11, 24; 8:3, 4) Nanso akyiri yi, wɔ Hebrifo kalenda so no, ɛnyɛ bere nyinaa na na bosome no yɛ nnafua 30. Hebrifo kalenda so no, sɛ ɔsram foforo yi ne ti a, ɛnna wofi ase kan nna a ɛwɔ bosome no mu. Ɛtɔ da a, esi nnafua 29 anaa 30.

Bere bi, Dawid ne Yonatan nyinaa kaa bosome bi a na ɛrebefi ase ho asɛm sɛ: “Ɔkyena yɛ ɔsram foforo.” (1 Sam. 20:5, 18) Enti ɛbɛyɛ sɛ wɔn bere so no, na wodi kan bu abosome no biara tenten ho akontaa to hɔ. Ná ɛbɛyɛ dɛn na Israelni bi ahu sɛ bosome foforo afi ase? Yudafo mmara ne wɔn amammerɛ a na enni nhoma mu a akyiri yi wɔboaboaa ano a wɔfrɛ no Mishnah no ma yenya wei ho nsɛm bi. Ɛka sɛ, bere a Yudafo no fi Babilon nkoasom mu bae no, Sanhedrin (Yudafo asɛnnibea kɛse) no ka ho bi na na wɔkyerɛ bere a bosome bi befi ase. Abosome nson mu no, bosome no mu biara da a ɛtɔ so 30 no, na asɛnnibea no hyia. Saa mmarima no na na wɔkyerɛ bere a bosome foforo befi ase. Dɛn na na wogyina so yɛ saa?

Ná wɔde awɛmfo gyinagyina mmeae a ɛkorɔn a atwa Yerusalem ho ahyia no. Wɔn adwuma ne sɛ wɔbɛhwɛ wim anadwo ahwɛ sɛ ɔsram foforo ayi ne ti anaa. Sɛ wohu sɛ ɔsram foforo ayi ne ti pɛ, wɔyɛ ntɛm kɔbɔ Sanhedrin no amanneɛ. Sɛ Sanhedrin no mufo hu sɛ wɔanya adanse a edi mu a ɛkyerɛ sɛ ɔsram foforo ayi ne ti a, wɔde to gua sɛ bosome foforo afi ase. Na sɛ omununkum anaa ɛbɔ nti, awɛmfo no anhu sɛ ɔsram foforo apue nso ɛ? Ɛba saa a, bosome a wɔwom no bɛyɛ nnafua 30. Afei bosome foforo no betumi afi ase da a edi hɔ no.

 Mishnah no kyerɛkyerɛ mu sɛ, sɛ Sanhedrin no de reto gua sɛ bosome foforo afi ase a, na wɔbɔ ogyatanaa wɔ Ngodua Bepɔw a ɛbɛn Yerusalem no so. Wɔ mmeae afoforo a ɛkorɔn wɔ Israel nyinaa nso, na wɔbɔ ogyatanaa de bɔ asɛm no dawuru. Akyiri yi, na wotu abɔfo ma wɔkɔbɔ amanneɛ. Enti na wɔnam saa kwan yi so ma Yudafo a ɛwɔ Yerusalem ne wɔn a ɛtete mmeae ahorow nyinaa nya no ntee sɛ bosome foforo afi ase. Wei nti, afahyɛ biara a wobedi no, na wɔn nyinaa tumi di no bere koro mu.

Sɛnea na Hebrifo kalenda te, afahyɛ ahorow a na wodi, bere a na wodua wɔn nnɔbae, bere a na wotwa ne nea ɛkeka ho no, adaka a ɛwɔ ase ha yi bɛboa wo ma woasua ho ade pii.