1-2. Sɛnea Dwom 25:14 kyerɛ no, sɛ yɛpɛ sɛ yɛne Yehowa ayɔnkofa mu yɛ den a, dɛn na ɛsɛ sɛ yɛyɛ?

 SƐ WOPƐ sɛ wo ne obi adamfofa mu yɛ den a, wohwɛ a suban bɛn na ehia sɛ wunya? Ebia wobɛka sɛ nnamfo pa de, ɛsɛ sɛ obiara dɔ ne yɔnko na ɔboa no. Ebia ɛremma wo tirim sɛ osuro yɛ suban bi a ehia na aboa ma wo ne obi adamfofa mu ayɛ den. Nanso, sɛnea kyerɛwsɛm a adesua yi gyina so no ma yehu no, wɔn a wɔpɛ sɛ wɔne Yehowa ayɔnkofa mu yɛ den no, ɛsɛ sɛ ‘wosuro no.’—Kenkan Dwom 25:14.

² Sɛ yefii ase som Yehowa akyɛ oo, sɛ ɛnkyɛe oo, ehia sɛ yɛn nyinaa suro Yehowa paa. Nanso, sɛ Bible ka sɛ yensuro Onyankopɔn a, ɛkyerɛ sɛn? Yɛbɛyɛ dɛn asuro Yehowa? Sɛnea na ofiepanyin Obadia, Ɔsɔfo Panyin Yehoiada, ne Ɔhene Yehoas suro Onyankopɔn no, dɛn na yebetumi asua afi mu?

3. Dɛn na ɛma ehu ka yɛn, na sɛn na ebetumi ama yɛayɛ yɛn ade?

³ Sɛ yɛte nka sɛ biribi betumi apira yɛn a, ebetumi ama ehu aka yɛn. Sɛ yesuro a, ɛyɛ ne kwan so, efisɛ ebetumi ama yɛayɛ yɛn ade nyansam. Sɛ yɛreforo bepɔw a obon wɔ ho a, ɛyɛ a yɛmpɛ sɛ yɛbɛn ano pɛɛ, efisɛ yesuro sɛ anhwɛ a na yɛakɔtɔ mu. Sɛ yesuro sɛ yebepira a, ebetumi ama yɛaguan afi tebea bi a ɛyɛ hu mu. Sɛ yesuro sɛ  yɛne yɛn adamfo bi a yɛdɔ no ntam bɛsɛe a, yɛrenka asɛm bi anaa yɛrenyɛ biribi a ɛbɛhaw no.

4. Yehowa ho suro bɛn na Satan pɛ sɛ yenya?

⁴ Satan pɛ sɛ Yehowa ho hu tɔ nkurɔfo so. Adwene a na Elifas wɔ no, ɛno ara bi na Satan pɛ sɛ nkurɔfo nya; Elifas kaa sɛ Onyankopɔn mfa bɔne nkyɛ, daa na ne bo afuw, na biribiara nni hɔ a yɛyɛ a ɛbɛsɔ n’ani da. (Hiob 4:18, 19) Satan pɛ sɛ Yehowa ho hu tɔ yɛn so ma yegyae no som. Sɛ yɛmpɛ sɛ saa afiri yi beyi yɛn a, ehia sɛ yesuro Onyankopɔn.

5. Bible ka sɛ yensuro Onyankopɔn a, ɛkyerɛ sɛn?

⁵ Obi a osuro Onyankopɔn no dɔ no, na ɔmpɛ sɛ ɔyɛ biribiara a ɛbɛsɛe ɔne ne ntam. Saa na na Yesu te; na ɔyɛ ‘nyamesuroni.’ (Heb. 5:7) Yehowa ho hu antɔ no so da. (Yes. 11:2, 3) Mmom, na Yesu dɔ Yehowa paa, na na ɔpɛ sɛ otie no. (Yoh. 14:21, 31) Sɛnea Yesu yɛe no, yɛn nso yebu Yehowa paa, efisɛ ɔwɔ ɔdɔ, nyansa ne tumi, na obu atɛntrenee. Yenim nso sɛ, esiane sɛ Yehowa dɔ yɛn paa nti, sɛnea yɛyɛ yɛn ade wɔ n’akwankyerɛ ho no, ɛho hia no. Enti sɛ yetie Yehowa a, ɛma ne koma tɔ ne yam; sɛ yɛantie no a, ɛma odi awerɛhow.—Dw. 78:41; Mmeb. 27:11.

6. Dɛn ne ade baako a yɛyɛ a, ɛkyerɛ sɛ yesuro Onyankopɔn? (Dwom 34:11)

⁶ Yehowa ho suro de, wɔmfa nwo yɛn; ɛsɛ sɛ yesua. (Kenkan Dwom 34:11.) Ɔkwan baako a yebetumi afa so ayɛ saa ne sɛ yɛbɛhwɛ nneɛma a Yehowa abɔ. Sɛ yɛhwɛ ‘nneɛma a Onyankopɔn ayɛ’ a, yehu ne nyansa, ne tumi, ne ɔdɔ kɛse a ɔwɔ ma yɛn, na ɛno ma yenya ɔdɔ ne obu kɛse ma no. (Romafo 1:20) Onuawa bi a ne din de Adrienne ka sɛ, “Sɛ mehwɛ abɔde a, ɛma mihu sɛ Yehowa nim nyansa, na ɛma me ho dwiriw me. Wei boa me ma mihu sɛ onim nea eye ma me.” Saa asɛm no a ɔkɔɔ so dwinnwen ho no maa awiei koraa no ɔkaa sɛ, “Mempɛ sɛ mɛyɛ biribi a ɛbɛsɛe me ne Yehowa ntam, efisɛ ɔno na ɔmaa me nkwa.” Wubetumi apɛ bere nnawɔtwe yi de adwinnwen biribi a Yehowa abɔ ho anaa? Woyɛ saa a, ɛbɛma obu ne ɔdɔ a wowɔ ma Yehowa no ayɛ kɛse.—Dw. 111:2, 3.

7. Sɛn na mpaebɔ betumi aboa yɛn ma yɛasuro Yehowa?

⁷ Ade foforo a yebetumi ayɛ na ama yɛasuro Onyankopɔn ne sɛ yɛbɛbɔ mpae daa. Sɛ yɛkɔ so bɔ mpae a, ɛbɛma yɛahu Yehowa yiye. Bere biara a yɛbɛsrɛ Yehowa sɛ ɔmmoa yɛn ma yennyina sɔhwɛ bi ano no, ɛkae yɛn sɛ ɔwɔ tumi paa. Sɛ yɛda Yehowa ase sɛ ɔde ne Ba no maa yɛn a, ɛma yɛkae sɛ Yehowa dɔ yɛn paa. Afei nso, sɛ yɛrehyia ɔhaw bi na yɛsrɛ Yehowa sɛ ɔmmoa yɛn a, ɛkae yɛn sɛ Yehowa nim nyansa paa. Sɛ yɛbɔ mpae saa a, ɛma obu a yɛwɔ ma Yehowa no yɛ kɛse. Bio nso, ɛma yesi yɛn bo kɛse sɛ yɛrenyɛ biribiara a ɛbɛsɛe yɛne Yehowa ayɔnkofa no.

8. Dɛn na yebetumi ayɛ na yɛakɔ so asuro Onyankopɔn?

⁸ Sɛ yɛresua Bible, na yɛde si yɛn ani so sɛ yebesua biribi afi nhwɛso pa ne nhwɛso bɔne a ɛwom no mu a, ɛbɛma yɛakɔ so asuro Onyankopɔn. Momma yɛnhwɛ Yehowa asomfo anokwafo mmienu bi; wɔn ne Ɔhene Ahab fiepanyin Obadia, ne Ɔsɔfo Panyin Yehoiada. Afei, yɛbɛhwɛ nea yebetumi asua afi Yuda hene Yehoas hɔ. Mfiase no, na osuro Yehowa, nanso akyiri yi ɔpoo no.

9. Sɛn na Yehowa ho suro boaa Obadia? (1 Ahene 18:3, 12)

⁹ Bere a edi kan a Bible kaa Obadia b ho asɛm no, ɛkaa sɛ: “Obadia yɛ obi a osuro Yehowa paa.” (Kenkan 1 Ahene 18:3, 12.) Sɛn na Yehowa ho suro yi boaa Obadia? Ade baako ne sɛ, ɛma odii nokware, na ɛmaa afoforo gyee no dii, enti ɔhene no de n’ahemfie no hyɛɛ ne nsa sɛ ɔnhwɛ so. (Fa toto Nehemia 7:2 ho.) Afei nso, Onyankopɔn ho suro a na Obadia wɔ no, ɛma onyaa akokoduru kɛse. Ná ɛho hia paa sɛ onya saa su yi, efisɛ ɔtenaa ase wɔ ɔhene tirimɔdenfo Ahab bere so. Ɔhene Ahab “yɛɛ Yehowa ani so bɔne sen wɔn a wodii no kan nyinaa.” (1 Ahe. 16:30) Bio nso, Ahab yere Yesebel a na ɔsom Baal no, na ɔtan Yehowa paa, enti ɔyɛe sɛ ɔbɛtɔre nokwaresom ase wɔ atifi fam ahemman no mu. Yesebel kunkum Onyankopɔn adiyifo pii mpo. (1 Ahe. 18:4) Anokwa, yehu sɛ Obadia som Yehowa wɔ bere bɔne mu paa.

10. Dɛn na Obadia yɛe a ɛkyerɛ sɛ na ɔwɔ akokoduru kɛse?

¹⁰ Dɛn na Obadia yɛe a ɛkyerɛ sɛ na ɔwɔ akokoduru kɛse? Bere a Yesebel rehwehwɛ Onyankopɔn adiyifo akunkum wɔn no, Obadia faa wɔn mu 100 de wɔn kohintaw ‘ɔbodan mu, aduonum aduonum, na ɔmaa wɔn aduan ne nsu daa.’ (1 Ahe. 18:13, 14) Sɛ wɔhuu nea Obadia yɛe no a, anka ɔkwan biara so, wɔbekum no. Ɛwom, na Obadia suro, na na ɔmpɛ sɛ obewu. Nanso, na Obadia dɔ Yehowa ne wɔn a wɔsom no no sen sɛnea na odwen ɔno ara ne nkwa ho no.

11. Dɛn na Yehowa asomfo a wɔwɔ hɔ nnɛ yɛ de suasua Obadia? (Hwɛ mfoni no nso.)

¹¹ Ɛnnɛ, aman a wɔabara yɛn adwuma no wɔ hɔ no, Yehowa asomfo pii tete hɔ. Ɛwom sɛ saa anuanom yi bu atumfoɔ no, nanso wɔde ɔsom a ɛfata Yehowa nko ara no ma no. Wɔyɛ saa de suasua Obadia. (Mat. 22:21) Nea wɔyɛ de kyerɛ sɛ wɔsuro  Onyankopɔn ne sɛ, wɔtie no, na ɛnyɛ nnipa. (Aso. 5:29) Ɛno nti, wɔkɔ so ka asɛmpa no, na wɔyɛ anifere pɛ kwan bi fa so hyiam. (Mat. 10:16, 28) Wɔhwɛ sɛ anuanom nsa bɛka nneɛma a ɛbɛboa wɔn ma wɔne Yehowa ntam akɔ so ayɛ kama. Yɛnhwɛ onua bi a ne din de Henri. Afrika man bi a bere bi na wɔabara yɛn adwuma no wɔ hɔ no, ɛhɔ na ɔte. Bere a wɔbaraa yɛn no, Henri tuu ne ho mae sɛ ɔde asafo nhoma bɛkɔ akɔma anuanom. Ɔkyerɛwee sɛ: “Mefɛre ade. Enti migye di paa sɛ ɛyɛ obu kɛse a mewɔ ma Yehowa no na ɛma minyaa saa akokoduru no.” Wohwɛ a, wo nso wubetumi anya akokoduru te sɛ Henri? Sɛ wusuro Onyankopɔn a, wubetumi anya bi.

12. Dɛn na Ɔsɔfo Panyin Yehoiada ne ne yere yɛe a ɛkyerɛ sɛ wɔdi Yehowa nokware paa?

¹² Ná Ɔsɔfo Panyin Yehoiada suro Yehowa, enti wei kaa no ma odii nokware, na ɔpagyaw nokwaresom. Nea Yehoiada yɛe bere a Yesebel babea Atalia sii ne ho hemmaa wɔ Yuda no ma yehu sɛ na osuro Yehowa ampa. Ná Atalia tirim yɛ sum, na na n’ani bere tumidi ara ma ɔyɛe sɛ obekunkum adehye mma a wɔyɛ ɔno ara ne nananom no nyinaa! Wei nti, na ɔmanfo no suro no. (2 Be. 22:10, 11) Adehye mma no baako a ne din de Yehoas no, Atalia annya no ankum no, efisɛ Yehoiada yere Yehosabat faa no fii wɔn mu, na ɔne ne kunu de no kosiei na wɔhwɛɛ no. Nea Yehoiada ne Yehosabat yɛe yi nti, Dawid asefo a na wɔbɛba abedi hene no ase anhyew. Yehoiada dii Yehowa nokware, na wansuro Atalia.—Mmeb. 29:25.

13. Bere a Yehoas dii mfe nson no, dɛn bio na Yehoiada yɛe a ɛkyerɛ sɛ na ɔyɛ ɔnokwafo?

¹³ Bere a Yehoas dii mfe nson no, Yehoiada san kyerɛe sɛ odi Yehowa nokware. Ɔbɔɔ pɔw bi a na ɛbɛma Yehoas abɛyɛ ɔhene, efisɛ na ɔfata sɛ ɔtena Dawid ahengua so. Nanso sɛ anyɛ yiye a, anka Yehoiada nkwa betumi afi ne nsa. Yehowa mmoa so nti, pɔw a ɔbɔe no yɛɛ yiye. Abirɛmpɔn no ne Lewifo no boaa Yehoiada ma wɔsii Yehoas hene, na wɔkum Atalia. (2 Be. 23:1-5, 11, 12, 15; 24:1) Afei, “Yehoiada ne Yehowa ne ɔhene ne ɔman no nyinaa yɛɛ apam sɛ wɔbɛyɛ Yehowa man daa.” (2 Ahe. 11:17) Afei nso, Yehoiada ‘de apon ano ahwɛfo no gyinagyinaa Yehowa fi apon ano sɛnea ɛbɛyɛ a obiara a ne ho ntew wɔ ade biara mu remma mu.’—2 Be. 23:19.

14. Esiane sɛ Yehoiada dii Yehowa ni nti, dɛn na Yehowa yɛe de dii ɔno nso ni?

¹⁴ Ná Yehowa adi kan aka sɛ: “Wɔn a wodi me ni no, me nso medi wɔn ni.” Nokwasɛm ne sɛ, ohyiraa Yehoiada. (1 Sam. 2:30) Ebi ne sɛ, ɔma wɔkyerɛw nneɛma pa a ɔsɔfo panyin no yɛe too hɔ maa yɛn sɛ yensua biribi mfi mu. (Rom. 15:4) Afei nso, bere a Yehoiada wui no, wɔdii no ni paa; wɔsiee no “wɔ Dawid Kurow mu kaa ahemfo no ho, efisɛ ɔyɛɛ adepa wɔ Israel; ɔmaa nokware Nyankopɔn no som ne ne fi ho hiaa no.”—2 Be. 24:15, 16.

15. Dɛn na yebetumi asua afi nea Yehoiada yɛe no mu? (Hwɛ mfoni no nso.)

¹⁵ Nea Yehoiada yɛe no betumi aboa yɛn nyinaa ma yɛasuro Onyankopɔn. Asafo mu mpanyimfo betumi asuasua Yehoiada, na wɔama wɔn ani ada hɔ abɔ Onyankopɔn nguan ho ban. (Aso. 20:28) Afei nso, wɔn a wɔn mfe akɔ anim no betumi asuasua Yehoiada na wɔahu  sɛ, sɛ wɔsuro Yehowa na wɔkɔ so di no nokware a, obetumi de wɔn ayɛ adwuma ma n’atirimpɔw abam. Yehowa ntow wɔn nkyenee. Mmerante ne mmabaa nso, sɛnea Yehowa dii Yehoiada ni, na ɔdaa obu adi kyerɛɛ no no, wɔbetumi asuasua no, na wɔadi wɔn a wɔn mfe akɔ anim no ni, na wɔabu wɔn, ɛnkanka wɔn a wɔde nokwaredi asom Yehowa mfe pii no. (Mmeb. 16:31) Nea etwa to no, abirɛmpɔn ne Lewifo a wɔtaa Yehoiada akyi no, yɛn nyinaa betumi asua biribi afi wɔn hɔ. Enti, momma yɛnyɛ osetie mma ‘wɔn a wodi yɛn anim no’ mfa nkyerɛ sɛ yɛtaa wɔn akyi denneennen.—Heb. 13:17.

16. Dɛn na ɛkyerɛ sɛ na Ɔhene Yehoas yɛ mmerɛw?

¹⁶ Yehoiada nhwɛso pa boaa Ɔhene Yehoas paa. (2 Ahe. 12:2) Ɛno nti, bere a ɔhene no yɛ abofra nyinaa, na ɔpɛ sɛ ɔyɛ nea ɛsɔ Yehowa ani. Nanso Yehoiada wu akyi no, Yehoas kotiee Yuda mpanyimfo awaefo no. Dɛn na efii mu bae? Yehoas ne ne manfo ‘fii ase som abosonnua ne ahoni.’ (2 Be. 24:4, 17, 18) Ɛyɛɛ Yehowa yaw paa, nanso ‘ɔsomaa adiyifo baa wɔn hɔ mpɛn pii sɛ wɔnsan mmra ne nkyɛn, nso wɔantie.’ Yehoiada ba Sakaria a na ɔyɛ Yehowa diyifo ne ɔsɔfo, na ɔsan yɛ Yehoas busuani mpo, wɔantie no. Nea ɛwom ne sɛ, nea na abusua yi ayɛ ama Ɔhene Yehoas nyinaa no, n’ani ansɔ, mmom okum Sakaria.—2 Be. 22:11; 24:19-22.

17. Ewiee Yehoas sɛn?

¹⁷ Yehoas ankɔ so ansuro Yehowa, ɛno  nti anwie no yiye koraa. Ná Yehowa aka sɛ: “Wɔn a wobu me animtiaa no, meremfa wɔn nyɛ hwee.” (1 Sam. 2:30) Akyiri yi, Siria asraafo kakraa bi dii Yehoas “asraafodɔm kɛse” so nkonim, na ‘wopiraa no paa.’ Siriafo no kɔe akyi no, Yehoas ankasa nkoa kum no esiane sɛ na wakum Sakaria nti. Ná nkurɔfo mpo susuw sɛ saa ɔhene tirimɔdenfo yi mfata sɛ wɔsie no wɔ “ahemfo amusiei.”—2 Be. 24:23-25.

18. Sɛnea Yeremia 17:7, 8 kyerɛ no, dɛn na yɛbɛyɛ na yɛansuasua Yehoas?

¹⁸ Dɛn na yebetumi asua afi Yehoas asɛm no mu? Sɛnea yɛde dua foforo sum dua a ne ntini nkɔɔ fam na antutu no, saa ara na na Yehoas te. Bere a Yehoiada a wayɛ sɛ dua a wɔde sum dua foforo wui no, Yehoas kodii awaefo akyi. Wei ma yehu paa sɛ yɛn abusuafo ne yɛn nuanom Kristofo afoforo betumi aboa yɛn ma yɛasom Onyankopɔn, nanso ɛnyɛ wɔn nti na ɛsɛ sɛ yesuro Onyankopɔn. Sɛ yesua ade daa, dwinnwen ho, na yɛbɔ mpae a, ɛbɛma ɔdɔ ne obu a yɛwɔ ma Yehowa no ayɛ kɛse. Wei bɛma yɛne Yehowa ayɔnkofa mu akɔ so ayɛ den.—Kenkan Yeremia 17:7, 8; Kol. 2:6, 7.

19. Dɛn na Yehowa hwehwɛ fi yɛn hɔ?

¹⁹ Yehowa nhwehwɛ pii mfi yɛn hɔ. Nea ɔhwehwɛ fi yɛn hɔ no, wɔabɔ no mua wɔ Ɔsɛnkafo 12:13. Ɛhɔ ka sɛ: “Suro nokware Nyankopɔn no na di ne mmara nsɛm so, na eyi ne ade a ɛho hia paa wɔ nnipa asetena mu.” Sɛ yesuro Onyankopɔn, na yehyia sɔhwɛ a, yebetumi agyina pintinn te sɛ Obadia ne Yehoiada. Ɛba saa a, biribiara rentumi nsɛe yɛne Yehowa ayɔnkofa no da.