1. Sɛnea 1 Petro 5:2 kyerɛ no, adwuma titiriw bɛn na ɛsɛ sɛ mpanyimfo yɛ?

 YEHOWA nguan a wɔsom bo no, ɔde wɔn ahyɛ asafo mu mpanyimfo nsa sɛ wɔnhwɛ wɔn so. Hokwan a saa mmarima a wɔwɔ ahofama yi anya sɛ wɔbɛsom wɔn nuanom no, ɛda wɔn koma so paa, enti wɔyere wɔn ho sɛ wɔbɛyɛ ‘ahwɛfo a wɔbɛhwɛ nguan no yiye.’ (Yer. 23:4; kenkan 1 Pet. 5:2.) Yɛda Yehowa ase paa sɛ yɛwɔ mmarima a ɛte saa wɔ asafo no mu!

2. Ɔhaw bɛn na mpanyimfo binom betumi ahyia?

² Sɛ mpanyimfo redi wɔn asɛde ho dwuma a, wɔtumi hyia ɔhaw bebree. Yɛbɛyɛ nhwɛso a, ɛsɛ sɛ mpanyimfo yɛ adwumaden de hwɛ asafo no so. Tony yɛ asafo mu panyin a ɔwɔ United States; obehui sɛ ɛnsɛ sɛ ɔsoa nnwuma pii gu ne ho so. Ɔkyerɛ mu sɛ: “Bere a COVID-19 nsanyare no fii ase no, mebɔɔ mmɔden sɛ mɛyɛ asafo no mu nnwuma pii sɛnea ɛbɛyɛ a adesua ne asɛnka bɛkɔ so. Sɛ meyere me ho yɛ no sɛ dɛn mpo a, bere nyinaa na adwuma no pii da so wɔ hɔ. Eduu baabi no, na minnya kwan nkenkan Bible, nyɛ kokoam adesua, na na minnya kwan mmɔ mpae mpo.” Ilir nso yɛ asafo mu panyin a ɔwɔ Kosovo; ɛsono ɔhaw a ɔno nso hyiae. Bere a na ɔwɔ baabi a akodi rekɔ so no, na ɛyɛ den ma no sɛ ɔde asafo akwankyerɛ bɛyɛ adwuma. Ɔka sɛ: “Bere a Betel ka kyerɛɛ me sɛ menkɔboa anuanom a na wɔwɔ baabi a ɛhɔ yɛ hu no, ɛsɔɔ me hwɛe. Ná misuro, na na ɛyɛ me sɛ ntease nni akwankyerɛ no mu.” Tim yɛ ɔsɛmpatrɛwni wɔ Asia. Nneɛma a na ɛsɛ sɛ ɔyɛ no da biara no, na ɛyɛ den ma no. Ɔka sɛ: “Ɛtɔ da a mete nka sɛ adwene no abrɛ, na mayɛ bohoo.” Dɛn na ebetumi aboa asafo mu mpanyimfo a wɔrehyia ɔhaw a ɛte saa?

3. Sɛ yesusuw Ɔtemmufo Gideon nhwɛso no ho a, sɛn na ɛbɛboa yɛn nyinaa?

³ Asafo mu mpanyimfo betumi asua biribi afi Ɔtemmufo  Gideon nhwɛso no mu. (Heb. 6:12; 11:32) Ɔbɔɔ Onyankopɔn nkurɔfo ho ban, na ɔhwɛɛ wɔn. (Atem. 2:16; 1 Be. 17:6) Sɛnea Gideon yɛe no, ɛnnɛ nso, Yehowa apaw mpanyimfo no sɛ wɔnhwɛ ne nkurɔfo wɔ mmere a emu yɛ den yi mu. (Aso. 20:28; 2 Tim. 3:1) Yebetumi asuasua Gideon ahobrɛase ne osetie a ɔyɛe no. Ná ɛsɛ sɛ omia n’ani na watumi ayɛ nnwuma a Yehowa de hyɛɛ ne nsa no. Sɛ yɛyɛ asafo mu mpanyimfo oo, sɛ yɛnyɛ bi oo, adwuma a mpanyimfo no yɛ no, yebetumi akyerɛ ho anisɔ kɛse. Yebetumi ataa mmarima a wɔyɛ adwumaden yi akyi.—Heb. 13:17.

4. Dɛn na Gideon yɛe a ɛkyerɛ sɛ na ɔbrɛ ne ho ase?

⁴ Ná Gideon brɛ ne ho ase. b Bere a Yehowa bɔfo ka kyerɛɛ Gideon sɛ ɔno na Yehowa apaw no sɛ onnye Israelfo no mfi Midianfo no nsam no, Gideon ahobrɛase nti, ɔkaa sɛ: “M’abusua na esua koraa, na me papa fi nso, me na mensɛ hwee koraa.” (Atem. 6:15) Ɔtee nka sɛ ɔmfata sɛ Yehowa de saa adwuma no hyɛ ne nsa, nanso na Yehowa nim sɛ obetumi ayɛ dodo. Yehowa mmoa so nti, Gideon tumi wiee adwuma no.

5. Dɛn na ebetumi asɔ ɔpanyin bi ahobrɛase ahwɛ?

⁵ Ɛsɛ sɛ biribiara mu no, mpanyimfo yɛ nea wɔbetumi biara sɛ wɔbɛda ahobrɛase adi. (Mika 6:8; Aso. 20:18, 19) Ɛnsɛ sɛ wɔde nea wɔnim anaa nea wɔatumi ayɛ bɔ wɔn ho safohene; wɔdi mfomso nso a, ɛnsɛ sɛ wɔnya adwene sɛ mfaso biara nni wɔn so bio. Nanso ɛtɔ mmere bi a, ebetumi ayɛ den sɛ asafo mu panyin bi bɛbrɛ ne ho ase. Sɛ yɛbɛyɛ nhwɛso a, obetumi agyigye nnwuma pii abɔ so, nanso ebewie ase no, na ayɛ den ama no sɛ ɔbɛyɛ ne nyinaa. Anaa ebia sɛ ɔyɛ ne dwumadi bi yiye na wɔkamfo no a, ɛbɛyɛ den sɛ ɔbɛbrɛ ne ho ase, na saa ara nso na sɛ ne dwumadi bi ankɔ yiye na afoforo ka ho asɛm a, ebetumi ayɛ den sɛ obegye atom. Sɛ mpanyimfo hyia tebea bi a ɛte sei a, sɛn na Gideon nhwɛso no betumi aboa wɔn?

6. Dɛn na mpanyimfo betumi ayɛ de asuasua Gideon ahobrɛase no? (Hwɛ mfoni no nso.)

⁶ Hwehwɛ mmoa. Obi a ɔbrɛ ne ho ase no, onim sɛ ɛnyɛ biribiara na obetumi ayɛ.  Gideon kyerɛe sɛ ɔbrɛ ne ho ase, efisɛ ɔmaa afoforo boaa no. (Atem. 6:27, 35; 7:24) Asafo mu mpanyimfo a wɔwɔ nhumu nso yɛ saa ara. Tony a yɛadi kan aka ne ho asɛm no kyerɛ mu sɛ: “Esiane sɛnea wɔtetee me nti, ɛma migyigye nnwuma pii bɔ so, nanso mintumi nyɛ ne nyinaa. Enti misii gyinae sɛ yebesusuw ahobrɛase ho wɔ yɛn abusua som ase na mama me yere aka sɛnea ohu m’ahobrɛase. Afei mesan hwɛɛ video a yɛato din Montete Afoforo, Monnya Ahotoso wɔ Wɔn Mu, na Momma Wɔn Asɛyɛde Sɛnea Yesu Yɛe No a ɛwɔ jw.org no.” Tony fii ase hwehwɛɛ afoforo a wɔbɛso adwuma no mu aboa no. Dɛn na efii mu bae? Tony ka sɛ: “Asafo no mu adwuma no rekɔ so, na manya bere pii nso a mede bɛhyɛ me ne Yehowa ayɔnkofa mu den.”

7. Sɛ obi kasa tia asafo mu mpanyimfo a, sɛn na wɔbetumi asuasua Gideon? (Yakobo 3:13)

⁷ Sɛ obi kasa tia wo a, wo ne no nkasa bɔkɔɔ. Sɛ obi kasa tia asafo mu mpanyimfo a, ebetumi ayɛ sɔhwɛ ama wɔn. Sɛ biribi saa si a, nea Gideon yɛe no betumi aboa wɔn. Ɛda adi sɛ na onim sɛ mfomso wɔ ne ho, enti bere a Efraimfo no kasa tiaa no no, ɔne wɔn kasae bɔkɔɔ. (Atem. 8:1-3) Gideon ne wɔn ankasa abufuw so. Ɔyɛɛ aso tiee nea enti a na Efraimfo no bo afuw no, na ɔkaa asɛmdɛ bi de siesiee asɛm a na ayere tann no. Ɔyɛɛ wei de kyerɛe sɛ ɔbrɛ ne ho ase. Sɛ obi kasa tia asafo mu mpanyimfo, na wɔyɛ aso tie onii no na wɔne no kasa bɔkɔɔ a, ɛbɛkyerɛ sɛ wɔresuasua Gideon. (Kenkan Yakobo 3:13.) Wɔyɛ saa a, ɛbɛma asomdwoe atena asafo no mu.

8. Sɛ obi kamfo asafo mu mpanyimfo a, sɛn na ɛsɛ sɛ wɔyɛ wɔn ade? Ma ho nhwɛso.

⁸ Fa nkamfo no ma Yehowa. Bere a Gideon dii Midianfo no so nkonim na nkurɔfo pɛ sɛ wɔhyɛ no anuonyam no, ɔde ayeyi no maa Yehowa. (Atem. 8:22, 23) Sɛn na mpanyimfo betumi asuasua nea Gideon yɛe no? Sɛ wɔtumi yɛ biribi a, ɛsɛ sɛ wɔde ɛho ayeyi no ma Yehowa. (1 Kor. 4:6, 7) Sɛ yɛbɛyɛ nhwɛso a, sɛ obi kamfo ɔpanyin bi wɔ ne nkyerɛkyerɛ ho a, obetumi aka sɛ ne nsɛm no fi Bible mu, anaa obetumi akyerɛ mu sɛ ntetee a yenya fi Yehowa ahyehyɛde no hɔ no, ɛno na ɛboa yɛn nyinaa. Ɛwom ara a mpanyimfo betumi abisa wɔn ho sɛ, ‘Ɛyɛ a wɔde wɔn nkyerɛkyerɛ pɛ anuonyam anaa wɔde wɔn nkyerɛkyerɛ hyɛ Yehowa anuonyam?’ Momma yɛnhwɛ asafo mu panyin bi a ne din de Timothy. Bere a wɔpaw no foforo no, na ɔpɛ baguam kasa ma paa. Ɔka sɛ: “Sɛ meresiesie me kasa a, mehwehwɛ nnianim nsɛm a ɛware ne mfatoho a emu piw. Ná wei ma afoforo taa kamfo me. Awerɛhosɛm ne sɛ, sɛ anka atiefo adwene bɛkɔ Bible no anaa Yehowa so no, me mmom na na migye anuonyam no.” Eduu baabi no, Timothy behui sɛ, ɛsɛ sɛ ɔsesa ɔkwan a ɔfa so kyerɛkyerɛ no sɛnea ɛbɛyɛ a ɔremfa ne nkyerɛkyerɛ mpɛ anuonyam. (Mmeb. 27:21) Ekowiee sɛn? Ɔkyerɛ mu sɛ: “Seesei, sɛ mema ɔkasa bi a, sɛnea ɛboa anuanom ma wɔdi ɔhaw bi ho dwuma, sɛnea ɛboa wɔn ma wɔgyina sɔhwɛ bi ano, anaa sɛnea ɛboa wɔn ma wɔbɛn Yehowa no, ɛno na wɔka ho asɛm kyerɛ me. Saa nsɛm no ma m’ani gye sen nkamfo a bere bi a abɛsen kɔ no na wɔde ma me no.”

9. Adɛn nti na na ebetumi ayɛ den ama Gideon sɛ ɔbɛyɛ osetie na wada akokoduru adi? (Hwɛ mfoni a ɛwɔ Ɔwɛn-Aban yi anim no.)

⁹ Bere a Gideon bɛyɛɛ ɔtemmufo no, biribi sii a na ebetumi ama ayɛ den sɛ ɔbɛyɛ osetie na wada akokoduru adi. Yehowa maa no adwuma bi a ɛyɛ hu paa. Ɔka kyerɛɛ no sɛ ɔnkɔsɛe afɔremuka a na ne papa bɔ so afɔre ma Baal no. (Atem. 6:25, 26) Bere foforo nso, bere a Gideon boaboaa asraafo  ano no, Yehowa ka kyerɛɛ no sɛ wɔdɔɔso, enti ɔntew so. Ɔyɛɛ saa akyi no, Yehowa san ka kyerɛɛ no sɛ ɔntew so bio. (Atem. 7:2-7) Awiei koraa no, Yehowa ka kyerɛɛ no sɛ ɔnkɔtow nhyɛ wɔn atamfo no so anadwo dasum.

10. Dɛn na ebetumi ama ayɛ den sɛ ɔpanyin bi bɛyɛ osetie?

¹⁰ Ɛsɛ sɛ mpanyimfo “yɛ asoɔmmerɛw.” (Yak. 3:17) Asafo mu panyin a ɔyɛ osetie no, ɔntwentwɛn ne nan ase sɛ ɔde nea Kyerɛwnsɛm no ka bɛyɛ adwuma anaa obetie akwankyerɛ a efi Onyankopɔn ahyehyɛde no hɔ no. Ɔyɛ saa a, afoforo betumi asuasua ne nhwɛso pa no. Ne nyinaa akyi no, ebetumi ayɛ den sɛ ɔbɛyɛ osetie. Sɛ yɛbɛyɛ nhwɛso a, ebetumi ayɛ den sɛ akwankyerɛ a ne nsa ka no, ɔde ne nyinaa bɛyɛ adwuma. Ɛtɔ mmere bi a, ɛbɛyɛ no sɛ akwankyerɛ no bi wɔ hɔ a ntease nnim, na ɔde yɛ adwuma a ɛrenyɛ yiye. Anaa wɔbetumi aka akyerɛ no sɛ onkodi dwuma bi a sɛ wɔkyere no a, ebetumi de no akɔ ɔhaw mu. Sɛ mpanyimfo hyia tebea a ɛtete saa a, dɛn na wɔbetumi ayɛ de asuasua Gideon?

11. Dɛn na ebetumi aboa mpanyimfo ma wɔayɛ osetie?

¹¹ Sɛ wɔde akwankyerɛ bi ma wo a, tie no yiye na fa yɛ adwuma. Ɔkwan a na Gideon bɛfa so asɛe ne papa afɔremuka no, baabi a na obesi afɔremuka foforo ama Yehowa, ne aboa pɔtee a na ɔde bɛbɔ afɔre no, Yehowa de ne nyinaa ho akwankyerɛ maa no. Gideon adwenem anyɛ no naa wɔ akwankyerɛ no ho; odii so pɛpɛɛpɛ. Ɛnnɛ, Yehowa ahyehyɛde no nam nkrataakyerɛw, nkaebɔ ne akwan foforo so de akwankyerɛ ma asafo mu mpanyimfo. Wei bɔ asafo no ho ban na ɛma wɔne Yehowa ayɔnkofa mu yɛ den. Ɛyɛ yɛn dɛ sɛ mpanyimfo no tie akwankyerɛ a efi asafo no hɔ no, na wɔdi so pɛpɛɛpɛ. Wei boa obiara a ɔwɔ asafo no mu no.—Dw. 119:112.

12. Sɛ Yehowa ahyehyɛde no de akwankyerɛ foforo bi ba a, sɛn na mpanyimfo no betumi de asɛm a ɛwɔ Hebrifo 13:17 no ayɛ adwuma?

¹² Nsakrae bi ba a, bɔ mmɔden fa yɛ adwuma. Kae sɛ, bere a Yehowa ka kyerɛɛ Gideon sɛ ɔntew n’asraafo no so koraa no, wampopo ne ti. (Atem. 7:8) Ebia obisaa ne ho sɛ: ‘Na wei koraa, ɛho hia? Nea ɔreka yi koraa ɛbɛyɛ yiye ni?’ Ne nyinaa akyi no, Gideon tiei. Ɛnnɛ nso, asafo mu mpanyimfo suasua Gideon, enti sɛ Yehowa ahyehyɛde no de akwankyerɛ foforo bi ba a, wɔde yɛ adwuma. (Kenkan Hebrifo 13:17.) Sɛ yɛbɛyɛ nhwɛso a, afe 2014 no, ɔkwan a yɛfa so tua Ahenni Asa ne Nhyiam Asa a yesisi ho ka no, Akwankyerɛ Kuw no sesaa no. (2 Kor. 8:12-14) Seesei de, ɛho nhia sɛ asafo bi tua sika a wɔde si Ahenni Asa ma wɔn no ho ka. Mmom ntoboa a nsafo a ɛwɔ wiase nyinaa yi no, ɛno bi na ahyehyɛde no de sisi Ahenni Asa ne Nhyiam Asa wɔ baabiara a wɔhia bi. Sɛ asafo bi sika nnɔɔso mpo a, wɔsi bi ma  wɔn. Bere a José tee saa nsakrae a aba yi, na onnye nni sɛ ebetumi ayɛ yiye, enti ɔkaa wɔ ne tirim sɛ: ‘Ɛnyɛ ade a wɔbetumi asi Ahenni Asa baako mpo. Ɛha de, yɛnyɛ yɛn nneɛma saa oo.’ Dɛn na ɛboaa José ma ogyee nhyehyɛe no toom? Ɔka sɛ: “Asɛm a ɛwɔ Mmebusɛm 3:5, 6 no kaee me sɛ, ɛsɛ sɛ mede me ho to Yehowa so. Mahu sɛ nhyehyɛe no akɔ yiye paa! Seesei yetumi sisi Ahenni Asa bebree. Afei nso, yɛahu akwan a yɛfa so yi ntoboa ma biribiara kyɛ pɛpɛɛpɛ.”

13. (a) Ahotoso bɛn na Gideon nyae? (b) Sɛn na mpanyimfo betumi asuasua Gideon? (Hwɛ mfoni no nso.)

¹³ Fa akokoduru yɛ Yehowa apɛde. Ɛwom sɛ na Gideon suro, na na adwuma a ɔrekɔyɛ no yɛ hu, nanso otiee Yehowa. (Atem. 9:17) Yehowa maa Gideon awerɛhyem, na ɛno akyi no, onyaa ahotoso kɛse sɛ Yehowa bɛboa no ma wabɔ Onyankopɔn nkurɔfo ho ban. Mpanyimfo a wɔte mmeae a wɔabara yɛn adwuma no suasua Gideon. Ɛmfa ho sɛ wɔbetumi akyere wɔn, abisabisa wɔn nsɛm, ayɛ wɔn basabasa anaa wɔn adwuma betumi afi wɔn nsa no, wɔde akokoduru di anim yɛ adesua ne asɛnka ho nhyehyɛe. c Ahohiahia kɛse no mu no, ebehia sɛ mpanyimfo nya akokoduru na wɔatumi de akwankyerɛ biara a wɔn nsa bɛka no ayɛ adwuma. Ebia akwankyerɛ no bi mpo betumi de wɔn nkwa ato asiane mu. Ebia wɔbɛkyerɛ yɛn sɛnea yɛbɛka atemmusɛm a ɛte sɛ asukɔtweaa no, anaa nea yɛyɛ a sɛ Gog a ofi Magog no tow hyɛ yɛn so a, yebenya yɛn ti adidi mu.—Hes. 38:18; Adi. 16:21.

14. Adɛn nti na na ehia sɛ Gideon mia n’ani?

¹⁴ Ná ɛsɛ sɛ Gideon yere ne ho paa na watumi ayɛ ɔtemmufo adwuma no. Bere a Gideon ne Midianfo no koe anadwo no, wɔguanee. Nanso Gideon taa wɔn so fii Yesreel Bon mu ara koduu Asubɔnten Yordan ho tɔnn. Ɛbɛyɛ sɛ na adɔtɔ wɔ hɔ paa. (Atem. 7:22) Gideon koduu Yordan ho no, na ɛkyerɛ  sɛ wawie anaa? Daabi! Ɛwom sɛ na wabrɛ, nanso ɔne ne mmarima 300 no twaa asubɔnten no, na wɔkɔɔ so tiw Midianfo no. Awiei koraa no, wɔkɔtoo wɔn dii wɔn so nkonim.—Atem. 8:4-12.

15. Adɛn nti na ɛtɔ da a, ehia sɛ ɔpanyin bi mia n’ani?

¹⁵ Asafo no mu nnwuma ne abusua mu asɛde nti, ebia ɔpanyin bi betumi ate nka sɛ n’adwene abrɛ, na wayɛ bohoo. Tebea a ɛte saa mu no, sɛn na mpanyimfo betumi asuasua Gideon?

16-17. Dɛn na ɛboaa Gideon ma omiaa n’ani, na awerɛhyem bɛn na mpanyimfo betumi anya? (Yesaia 40:28-31) (Hwɛ mfoni no nso.)

¹⁶ Nya awerɛhyem sɛ Yehowa bɛhyɛ wo den. Ná Gideon wɔ awerɛhyem sɛ Yehowa bɛhyɛ no den, na ne nsa ansi fam. (Atem. 6:14, 34) Bere bi a na Gideon ne ne mmarima no taa Midian ahemfo mmienu bi so no, ɛbɛyɛ sɛ ahemfo no de, na wɔtete yoma so. (Atem. 8:12, 21) Nanso Onyankopɔn boaa Israelfo no ma wɔkɔtoo wɔn dii wɔn so nkonim. Asafo mu mpanyimfo nso betumi de wɔn ho ato Yehowa so, efisɛ “ɔmmrɛ da na n’ahoɔden nsa da.” Wɔbrɛ a, ɔbɛhyɛ wɔn den.—Kenkan Yesaia 40:28-31.

¹⁷ Momma yɛnhwɛ onua bi a ne din de Matthew. Ɔka Ayaresabea Ntam Nkitahodi Boayikuw no ho. Dɛn na ɛboa no ma omia n’ani yɛ n’adwuma no? Matthew ka sɛ: “Mahu sɛ asɛm a ɛwɔ Filipifo 4:13 no yɛ nokware turodoo. Mpɛn pii no, sɛ mebrɛ na migye me ho a ennye a, mebɔ mpae denneennen srɛ Onyankopɔn sɛ ɔmma me ahoɔden a mede bɛboa anuanom. Sɛ meyɛ saa a, mete nka sɛ Yehowa de ne honhom no ahyɛ me den, na ɛno boa me ma mimia m’ani yɛ adwuma no.” Asafo mu mpanyimfo a wɔyɛ adwumaden te sɛ Gideon no betumi ahyia ɔhaw bere a wɔayi wɔn yam rehwɛ Yehowa nguan no. Nanso ɛsɛ sɛ wɔhu nea wɔbetumi ayɛ ne nea wɔrentumi nyɛ. Ne nyinaa mu no, wɔbetumi anya awerɛhyem sɛ Yehowa betie wɔn adesrɛ na wahyɛ wɔn den ma wɔamia wɔn ani ayɛ wɔn adwuma no.—Dw. 116:1; Filip. 2:13.

18. Sɛ yɛbɔ no mua a, sɛn na mpanyimfo betumi asuasua Gideon?

¹⁸ Asafo mu mpanyimfo betumi asua nneɛma pii afi Gideon hɔ. Ɛsɛ sɛ mpanyimfo brɛ wɔn ho ase na wɔannyigye nnwuma pii ammɔ so. Afei nso, sɛ wɔyɛ wɔn dwumadi bi yiye na wɔkamfo wɔn a, ɛsɛ sɛ wɔbrɛ wɔn ho ase. Saa ara nso na sɛ wɔn dwumadi bi ankɔ yiye na afoforo ka ho asɛm a, ɛsɛ sɛ wɔbrɛ wɔn ho ase gye tom. Ɛsɛ sɛ wɔyɛ osetie na wɔnya akokoduru, ɛnkanka bere a wiase yi awiei rebɛn no. Bio nso, ɛsɛ sɛ wɔnya awerɛhyem sɛ nsu mu oo, awia mu oo, Onyankopɔn bɛhyɛ wɔn den. Nokwasɛm ne sɛ, yɛn ani sɔ adwumaden a mpanyimfo no yɛ no, na ‘yɛkɔ so bu nnipa a wɔte saa no sɛ wɔsom bo.’—Filip. 2:29.